The Comprehensive Aramaic Lexicon

04:01	ܒܪܝ ܠܐ ܬܡܝܩ ܒܚܝܘܗ̈ܝ ܕܡܣܟܢܐ܂ ܘܠܐ ܬܛܪܦ ܠܡܣܟܢܐ ܚܫܝܟܐ܂
04:02	ܢܦܫܐ ܕܚܣܝܪ ܠܗ ܠܐ ܬܟܐܒ ܪܘܚܗ܂ ܘܠܐ ܬܛܥܐ ܪܘܚܗ ܕܐܢܫܐ ܕܬܒܝܪܐ܂
04:03	ܡܥܘ̈ܗܝ ܕܐܢܫܐ ܡܣܟܢܐ ܠܐ ܬܟܐܒ܂ ܘܠܐ ܬܟܠܐ ܡܘܗܒܬܐ ܡܢ ܨܪܝܟܐ܀
04:04	ܒܥܘܬܗ ܕܡܣܟܢܐ ܠܐ ܬܫܒܘܩ܂
04:05	ܘܠܐ ܬܬܠ ܠܗ ܐܬܪܐ ܕܢܠܘܛܟ܂
04:06	ܠܐܛ ܗܘ܃ ܓܝܪ ܡܪܝܪ ܚܢܟ̈ܐ ܡܢ ܟܠܗ ܢܦܫܗ܃ ܘܒܩܠܐ ܕܓܥܬܗ ܫܡܥ ܒܪܝܗ܂

04:07	ܐܪܚܡ ܢܦܫܟ ܠܟܢܘܫܬܐ܂ ܘܠܫ̈ܠܝܛܢܐ ܕܡܕܝܢܬܐ ܐܡܟ ܢܦܫܟ܂

04:08	ܐܪܟܢ ܠܡܣܟܢܐ ܐܕܢܟ܃ ܘܥܢܝܘܗܝ ܫܠܡܐ ܒܡܟܝܟܘܬܐ܂
04:09	ܦܪܘܩ ܠܐܠܝܨܐ ܡܢ ܐܠܘܨ̈ܘܗܝ܂ ܘܠܐ ܬܬܟܪܐ ܪܘܚܟ ܒܕܝܢܐ ܬܪܝܨܐ܂
04:10	ܗܘܝ ܐܝܟ ܐܒܐ ܠܝ̈ܬܡܐ܂ ܘܚܠܦ ܒܥܠܐ ܠܐܪ̈ܡܠܬܐ܂ ܘܬܗܘܐ ܠܐܠܗܐ ܐܝܟ ܒܪܐ܂ ܘܢܪܚܡ ܥܠܝܟ܀
04:11	ܚܟܡܬܐ ܒ̈ܢܝܗ ܐܠܦܬ܂ ܘܬܢܗܪ ܠܟܠ ܐܝܠܝܢ ܕܡܣܬܟܠܝܢ ܒܗ܃
04:12	ܪ̈ܚܡܝܗ ܐܝܠܝܢ ܕܪܚܡܝܢ ܚܝ̈ܐ܂ ܘܕܒܥܝܢ ܠܗ ܢܩܒܠܘܢ ܨܒܝܢܐ ܡܢ ܡܪܝܐ܂
04:13	ܘܕܡܬܕܒܩܝܢ ܒܗ ܐܝܩܪܐ ܡܢ ܩܕܡ ܐܠܗܐ ܢܫܟܚܘܢ܂ ܘܐܬܪܐ ܕܒܪܟ ܡܪܝܐ ܒܝܬ ܡܫܪܝܗܘܢ܂
04:14	ܡܫܡ̈ܫܢܝܗ ܡܫܡ̈ܫܢܝ ܩܘܕܫܐ܂ ܘܒܝܬ ܡܫܪܝܗ ܪܚܡ ܐܠܗܐ܂
04:15	ܕܫܡܥ ܠܝ ܢܕܘܢ ܫܪܪܐ܂ ܘܕܨܐܬ ܠܝ ܢܫܪܐ ܠܓܘ ܡܢܝ܂
04:16	ܐܢ ܢܗܝܡܢ ܒܝ ܢܐܪܬܢܝ܂ ܘܢܩܒܠܢܝ ܠܟܠܗܘܢ ܕܪ̈ܐ ܕܥܠܡܐ܂
04:17	ܡܛܠ ܕܗܦܟܐܝܬ ܐܗܠܟ ܥܡܗ܃ ܘܩܕܡܝ ܐܒܩܝܘܗܝ܂ ܕܚܠܬܐ ܘܙܘܥܬܐ ܐܪܡܐ ܥܠܘܗܝ܂ ܘܐܒܕܩܝܘܗܝ ܒܢܣ̈ܝܘܢܝ܂ ܥܕ ܥܕܢ ܕܢܬܡܠܐ ܠܒܗ ܒܝ܂
04:18	ܐܗܦܘܟ ܐܬܩܢ ܥܡܗ܃ ܘܐܓܠܐ ܠܗ ܟܠܗܝܢ ܟܣ̈ܝܬܝ܂
04:19	ܐܢ ܕܝܢ ܢܗܦܘܟ ܡܢ ܒܬܪܝ ܐܪܡܝܘܗܝ܂ ܘܐܫܠܡܝܘܗܝ ܒܝܕ ܚܛܘ̈ܦܐ܂
04:20	ܥܕܢܐ ܛܪ܂ ܘܕܚܠ ܡܢ ܒܝܫܐ܂ ܘܡܢ ܢܦܫܟ ܠܐ ܬܒܗܬ܂
04:21	ܡܛܘܠ ܕܐܝܬ ܒܗܬܬܐ܂ ܕܒܪܝܐ ܚ̈ܛܗܐ܂ ܘܐܝܬ ܒܗܬܬܐ ܕܐܝܩܪܗ ܛܝܒܘܬܐ܂
04:22	ܠܐ ܬܣܒ ܒܐ̈ܦܝ ܢܦܫܟ܃ ܘܠܐ ܬܒܗܬ ܠܡܘܕܝܘ ܒܬܘܩܠܬܟ܂
04:23	ܠܐ ܬܟܠܐ ܦܬܓܡܐ ܒܥܕܢܗ܂ ܘܠܐ ܬܛܫܐ ܚܟܡܬܟ܂
04:24	ܡܛܠ ܕܒܡܐܡܪܐ ܗܘ ܡܬܝܕܥܐ ܚܟܡܬܐ܂ ܘܣܘܟܠܐ ܒܥܢܝܢܐ ܕܠܫܢܐ܂
04:25	ܠܐ ܬܣܪܘܒ ܥܠ ܩܘܫܬܐ܂ ܘܡܢ ܣܟ̈ܠܘܬܟ ܐܬܟܠܝ܂
04:26	ܠܐ ܬܒܗܬ ܠܡܘܕܝܘ ܒܚܛܗ̈ܝܟ܂ ܘܠܐ ܬܩܘܡ ܠܘܩܒܠ ܣܟܠܐ܂
04:27	ܠܐ ܬܪܟܢ ܠܫܛܝܐ ܢܦܫܟ܂ ܘܠܐ ܬܬܚܪܐ ܠܘܩܒܠ ܫܠܝܛܐ܂
04:28	ܥܕܡܐ ܠܡܘܬܐ ܐܬܟܬܫ ܥܠ ܩܘܫܬܐ܂ ܘܡܪܝܐ ܢܬܟܬܫ ܚܠܦܝܟ܂
04:29	ܠܐ ܬܗܘܐ ܫܒܗܪܢ ܒ̈ܡܠܝܟ ܘܪܦܐ ܘܢܫܝܫ ܒܥܒ̈ܝܕܬܟ܂
04:30	ܠܐ ܬܗܘܐ ܟܠܒ ܒܒܝܬܟ܂ ܘܙܥܝܦ ܘܕܚܝܠ ܒܥܒ̈ܝܕܬܟ܂
04:31	ܠܐ ܬܗܘܐ ܦܫܝܛܐ ܐܝܕܟ ܠܡܣܒ܃ ܂ ܘܬܗܘܐ ܩܦܝܣܐ ܠܡܬܠ܂