The Comprehensive Aramaic Lexicon

09:01	ܠܐ ܬܛܢ ܒܐܢܬܬܟ܂ ܕܠܐ ܬܐܠܦ ܥܠܝܟ ܚܟܡܐ ܒܝܫܐ܂
09:02	ܠܐ ܬܬܠ ܠܐܢܬܬܐ ܢܦܫܟ܂ ܠܡܫܠܛܘܬܗ ܥܠ ܟܠ ܡܐ ܕܐܝܬ ܠܟ܂

09:03	ܠܐ ܬܥܢܐ ܥܡ ܙܢܝܬܐ܂ ܕܠܐ ܬܦܠ ܒܡܨܝ̈ܕܬܗ܂

09:04	ܥܡ ܙܡܪܬܐ ܠܐ ܬܣܬܘܕ܂ ܕܠܐ ܬܘܒܕܟ ܒܫܘܥ̈ܝܬܗ܂
09:05	ܒܒܬܘܠܬܐ ܠܐ ܬܬܒܩܐ܃ ܕܠܡܐ ܬܬܚܝܒ ܒܦܪܢܝܬܗ ܐܥܦܐ܂
09:06	ܠܐ ܬܬܠ ܠܙܢܝܬܐ ܢܦܫܟ܂ ܕܠܐ ܬܘܒܕ ܝܘܪܬܢܐ ܕܢܟ̈ܣܝܟ܃
09:07	ܘܬܨܛܥܪ ܒܫܘ̈ܩܝ ܡܕܝܢܬܐ܂ ܘܬܬܟܬܒ ܒܓܘܪܐ ܕܚܘ̈ܒܐ܂
09:08	ܐܦ̈ܝܟ ܒܐܢܬܬܐ ܕܫܦܝܪܐ ܠܐ ܢܚܘܪ̈ܢ܂ ܘܠܐ ܬܬܒܩܐ ܒܫܘܦܪܐ ܕܠܐ ܕܝܠܟ܂ ܒܫܘܦܪܗ ܓܝܪ ܕܐܢܬܬܐ ܣܓܝ̈ܐܐ ܐܒܕܘ܃ ܘܪܚܡܬܗ ܐܝܟ ܢܘܪܐ ܝܩܕܐ܂
09:09	ܥܡ ܡܪܬ ܒܝܬܐ ܠܐ ܬܣܡܘܟ ܝܨܝܠܟ܃ ܘܠܐ ܬܡܙܘܓ ܥܡܗ ܚܡܪܐ ܥܬܝܩܐ܂ ܕܠܡܐ ܢܣܛܐ ܒܬܪܗ ܠܒܟ܂ ܘܚܝܒ ܡܘܬܐ ܬܚܘܬ ܠܫܝܘܠ܂
09:10	ܥܡ ܐܢܬܬ ܓܒܪܐ ܠܐ ܬܣܓܐ ܡܡܠܠܐ܂ ܘܠܐ ܬܓܪ ܥܡܗ ܫܘܥ̈ܝܬܐ܂ ܕܠܡܐ ܢܣܛܐ ܒܬܪܗ ܠܒܟ܂ ܘܒܕܡܐ ܚܝܒܐ ܬܚܘܬ ܠܫܝܘܠ܂
09:11	ܠܐ ܬܫܒܘܩ ܪܚܡܟ ܥܬܝܩܐ܂ ܡܛܠ ܕܚܕܬܐ ܠܐ ܡܛܐ ܠܗ܂ ܪܚܡܐ ܚܕܬܐ ܐܝܟ ܚܡܪܐ ܚܕܬܐ܂ ܕܟܕ ܢܥܬܩ ܬܫܬܝܘܗܝ܂
09:12	ܠܐ ܬܛܢ ܒܐܢܫܐ ܪܫܝܥܐ܂ ܡܛܠ ܕܠܐ ܬܕܥ ܡܢܐ ܗܘܝܐ ܚܪܬܗ܂ ܠܐ ܬܛܢ ܒܥܘܠܐ ܕܡܨܠܚ܂ ܐܬܕܟܪ ܕܥܕܡܐ ܠܡܘܬܐ ܐܢܫ ܠܐ ܙܟܐ܂
09:13	ܐܪܚܩ ܡܢ ܐܢܫܐ ܕܫܠܝܛ ܠܡܩܛܠ܃ ܘܠܐ ܬܕܚܠ ܡܢ ܕܚܠܬܐ ܕܡܘܬܐ܂ ܘܐܢ ܩܪܒ ܐܢܬ ܠܐ ܬܚܝܒ ܢܦܫܟ܂ ܘܕܥ ܕܒܝܬ ܦ̈ܚܐ ܐܢܬ ܦܣܥ܂ ܘܥܠ ܢܫܒ̈ܐ ܐܢܬ ܡܗܠܟ܃
09:14	ܐܝܟ ܚܝܠܟ ܥܢܝ ܚܒܪܟ܃ ܘܥܡ ܚܟ̈ܝܡܐ ܗܘܝܬ ܩܛܪ ܪܐܙܐ܂
09:15	ܥܡ ܡܢ ܕܕܚܠ ܠܐܠܗܐ ܢܗܘܘܢ ܚܘܫܒ̈ܢܝܟ܃ ܘܟܠܗܝܢ ܫܘ̈ܥܝܬܟ ܒܐܘܪ̈ܚܬܗ ܕܡܪܝܐ܂
09:16	ܐܢܫܐ ܟܐ̈ܢܐ ܢܗܘܘܢ ܐܟ̈ܠܝ ܦܬܘܪܟ܂ ܘܒܕܚܠܬܗ ܕܐܠܗܐ ܬܗܘܐ ܬܫܒܘܚܬܟ܀
09:17	ܒܚܟܡܬܗ ܕܕܝܢܐ ܬܬܩܢ ܡܕܝܢܬܐ܂ ܘܕܫܠܝܛ ܒܥܡ̈ܡܐ ܚܟܝܡ ܘܣܟܘܠܬܢ܂
09:18	ܕܚܝܠ ܒܩܪܬܐ ܓܒܪܐ ܦܟܢܐ܂ ܘܕܢܣܒ ܥܠ ܦܘܡܗ ܡܣܬܢܐ܂