The Comprehensive Aramaic Lexicon

10:01	ܕܝ݁ܢܐ ܚܟܝܡܐ ܢܠܦ ܥܡܗ܂ ܘܫܠܝܛܐ ܚܟܝܡܐ ܢܘܬܒ ܩܪܝܬܗ܃
10:02	ܐܝܟ ܕܝ݁ܢܐ ܕܥܡܐ ܗܟܢܐ ܡܫ̈ܡܫܢܘܗܝ܃ ܘܐܝܟ ܪܝܫܐ ܕܡܕܝܢܬܐ ܗܟܢܐ ܥܡܘܪ̈ܝܗ݀܃
10:03	ܡ݁ܠܟܐ ܥܘ݁ܠܐ ܢܘܒܕ ܥܡܗ܂ ܘܡܬܝܬܒܐ ܩܪܝܬܐ ܒܚܟܡܬܐ ܕܫ̈ܠܝܛܢܐ܂
10:04	ܒܐܝܕ̈ܘܗܝ ܕܡܪܝܐ ܫܘܠܛܢܐ ܕܬܒܝܠ܂ ܘܕܟܫܪ ܠܥܕܢܗ ܢܩܝܡ ܥܠܝܗ܃
10:05	ܒܐܝܕ̈ܘܗܝ ܕܡܪܝܐ ܫܘܠܛܢܐ ܕܟܠ܂ ܘܠܕܚ̈ܠܘܗܝ ܢܬܠ ܐܝܩܪܗ܂
10:06	ܒܟܠ ܣܘܪ̈ܚܢܝܟ ܠܐ ܬܛܠܘܡ ܪܚܡܟ܂ ܘܠܐ ܬܗܠܟ ܒܐܘܪܚܐ ܕܓܐܘ̈ܬܢܐ܂ ܡܢ ܟܘܠ ܚܛܗ̈ܐ ܘܟܕܒܘܬܐ ܐܪܚܩ܂ ܘܠܐ ܬܗܠܟ ܒܪܘܚܐ ܪܡܬܐ܂
10:07	ܡܛܠ ܕܣܢܝܐ ܗܝ ܩܕܡ ܐܠܗܐ ܘܩܕܡ ܒ̈ܢܝܢܫܐ ܓܐܝܘܬܐ܂ ܘܡܢ ܬܪ̈ܝܗܘܢ ܚܛܘܦܝܐ ܘܛܠܘܡܝܐ܂
10:08	ܡܠܟܘܬܐ ܡܢ ܥܡܐ ܠܥܡܐ ܡܫܬܚܠܦܐ ܡܛܠ ܚܛܗ̈ܐ ܘܓܐܝܘܬܐ ܘܡܡܘܢܐ܂
10:09	ܡܢܐ ܢܬܓܐܐ ܥܦܪܐ ܘܩܛܡܐ܂
10:10	ܕܒܚܝܘ̈ܗܝ ܬܘ̈ܠܥܐ ܪ̈ܚܫܢ܂ ܓܒ̈ܘܗܝ ܘܡܥ̈ܘܗܝ ܐܣܝܐ ܢܨܪܐ܂ ܝܘܡܢܐ ܡܗܠܟ ܘܡܚܪ ܡܐܬ܂
10:11	ܒܡܘܬܗ ܕܒܪ ܐܢܫܐ ܪܡܬܐ ܡܢܬܗ ܘܬܘܠܥܗ ܩܕܡܘܗܝ ܪܚܫܐ܀
10:12	ܪܝܫ ܚܘܒ̈ܝܗܘܢ ܕܒܢ̈ܝܢܫܐ ܓܐܝܘܬܗܘܢ܂ ܘܥܒ̈ܕܝܗܘܢ ܡܫܛܝܢ ܠܗܘܢ܂
10:13	ܡܛܠ ܕܡܒܘܥܐ ܚܛܝܬܐ ܕܓܐܝܘܬܐ܂ ܘܙܢܝܘܬܐ ܡܒܘܥܐ ܕܬܪܬܝܗܝܢ܂ ܡܛܠ ܗܢܐ ܦܪܫ ܐܠܗܐ ܡܟܬܫܝܗ̈ܘܢ܂ ܘܡܚܐ ܐܢܘܢ ܡܚܘܬܐ ܓܡܝܪܬܐ܂
10:14	ܟܘܪܣܝܐ ܕܓܐܘ̈ܬܢܐ ܣܚܦ ܡܪܝܐ܂ ܘܐܘܬܒ ܡܟܝ̈ܟܐ ܚܠܦܝܗܘܢ
10:15	ܥܩܪܐ ܕܓܐܘ̈ܬܢܐ ܥܩܪ ܡܪܝܐ܂ ܘܢܨܒ ܡܟܝ̈ܟܐ ܚܠܦܝܗܘܢ܃
10:16	ܥܩܒ̈ܬܐ ܕܓܐܘ̈ܬܢܐ ܥܩܪ ܡܪܝܐ܂ ܘܐܘܒܕ ܡܢ ܐܪܥܐ ܕܘܟܪܢܗܘܢ܂
10:17	ܐܘܒܕ ܐܢܘܢ ܘܣܚܦ ܐܢܘܢ ܘܥܩܪ ܐܢܘܢ܂ ܘܓܡܪ ܡܢ ܒܢ̈ܝܢܫܐ ܕܘܟܪܢܗܘܢ܂
10:18	ܡܛܠ ܕܠܐ ܐܬܦܠܓܬ ܓܐܝܘܬܐ ܠܒ̈ܢܝ ܐ̈ܢܫܐ܂ ܘܪܡܘܬܐ ܕܠܒܐ ܠܝܠܝ̈ܕܝ ܐܢܬܬܐ܂܀
10:19	ܙܪܥܐ ܝܩܝܪܐ ܡܐ ܕܙܪܝܥ ܠܐܢܫܐ܂ ܙܪܥܐ ܝܩܝܪܐ ܡܢ ܕܕܚܠ ܠܐܠܗܐ܂ ܙܪܥܐ ܝܩܝܪܐ ܡܢ ܕܢܛܪ ܦܘܩܕ̈ܢܐ܂ ܙܪܥܐ ܙܠܝܠܐ ܡܐ ܕܙܪܝܥ ܠܐܢܫܐ܂ ܙܪܥܐ ܙܠܝܠܐ ܡܢ ܕܠܐ ܢܛܪ ܦܘܩ̈ܕܢܐ܀
10:20	ܒܝܬ ܐ̈ܚܐ ܩܫܝܫܐ ܡܝܩܪ܂ ܘܕܕܚܠ ܠܐܠܗܐ ܡܝܩܪ ܗܘ ܡܢܗ܂
10:22	ܬܘܬܒܐ ܐܟܣܢܝܐ ܕܡܣܟܝܢ ܘܥܝܝܩܐ ܠܗ܃ ܬܫܒܘܚܬܗ ܒܕܚܠܬܗ ܕܐܠܗܐ܂
10:23	ܠܝܬ ܠܡܨܥܪܘ ܠܡܣܟܢܐ ܙܕܝܩܐ܂ ܐܦ ܠܐ ܠܡܝܩܪܘ ܠܥܬܝܪܐ ܥܘ݁ܠܐ܂
10:24	ܪܒܐ ܘܫܠܝܛܐ ܘܕܝ݁ܢܐ ܝܩܪ܂ ܘܠܝܬ ܕܪܒ ܡܢ ܡܢ ܕܡܝܩܪ ܠܡܢ ܕܕܚܠ ܠܐܠܗܐ܂
10:25	ܠܥܒܕܐ ܚܟܝܡܐ ܚܐܪ̈ܐ ܢܦܠܚܘܢ܂ ܘܓܒܪܐ ܣܟܘܠܬܢܐ ܟܕ ܡܬܪܕܐ ܠܐ ܡܬܪܥܡ܀
10:26	ܠܐ ܬܬܚܒܢ ܠܡܥܒܕ ܥܒܕܟ܃ ܘܠܐ ܬܬܝܩܪ ܒܥܕܢܐ ܕܨܪܝܟܘܬܟ܃
10:27	ܛܒ ܗܘ ܕܦܠܚ ܘܝܬܝܪ ܡܡܘܢܐ܂ ܡܢ ܡܢ ܕܡܬܝܩܪ ܘܚܣܝܪ܀܀
10:28	ܒܪܝ ܒܥܢܘܝܘܬܐ ܝܩܪ ܢܦܫܟ܂ ܘܗܒ ܠܗ ܛܥܡܐ ܐܝܟ ܡܐ ܕܡܬܒܥܐ ܠܗ܂

10:29	ܒܪܝ ܡܢ ܕܡܚܝܒ ܢܦܫܗ ܡܢܘ ܢܙܟܝܘܗܝ܃ ܐܘ ܡܢܘ ܢܝܩܪ ܠܡܢ ܕܡܙܠ ܢܦܫܗ܂

10:30	ܐܝܬ ܡܣܟܢܐ ܕܡܬܝܩܪ ܡܛܠ ܚܟܡܬܗ܂ ܘܐܝܬ ܥܬܝܪܐ ܕܡܬܝܩܪ ܡܛܠ ܥܘܬܪܗ܃
10:31	ܕܡܬܝܩܪ ܒܡܣܟܢܘܬܗ ܒܥܘܬܪܗ ܚܕ ܟܡܐ܂ ܘܕܙܠܝܠ ܒܥܘܬܪܗ܃ ܒܡܣܟܢܘܬܗ ܚܕ ܟܡܐ܀