← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62066: Sirach

Click on a word for lexical analysis
Click on a red-colored coordinate for comments and/or translations of the line

previous chapter


11:01 ܚܟܡܬܗ ܕܡܣܟܢܐ ܬܪܝܡ ܪܝܫܗ܃ ܘܒܝܢܬ ܫܠܝ̈ܛܢܐ ܬܘܬܒܝܘܗܝ܃
11:02 ܠܐ ܬܫܒܚ ܠܒܪܢܫܐ ܕܫܦܝܪ ܒܚܙܘܗ܂ ܘܠܐ ܬܓܢܐ ܠܒܪܢܫܐ ܕܣܢܐ ܒܚܙܘܗ܃
11:03 ܡܛܠ ܕܫܝܛܐ ܗܝ ܒܥܘܦܐ ܕܒܘܪܝܬܐ ܘܪܝܫ ܛܘܒܐ ܕܟܠ ܥ̈ܠܠܬܐ ܐܒܗ܂
11:04 ܒܡܢ ܕܠܒܝܫ ܪ̈ܘܩܥܐ ܠܐ ܬܓܚ݁ܟ܃ ܘܠܐ ܬܫܘܛ ܠܒܪܢܫܐ ܕܡܪ̈ܝܪܢ ܚܢܟ̈ܘܗܝ܂ ܡܛܠ ܕܦܪܝܫܝܢ ܐܢܘܢ ܪ̈ܐܙܘܗܝ ܕܐܠܗܐ܃ ܘܡ݁ܛܫܝܢ ܡܢ ܒܢܝܢ̈ܫܐ ܥܒ݁ܕܘ̈ܗܝ܂
11:05 ܣܓܝ̈ܐܐ ܫ̈ܝܛܐ ܕܝܬܒܘ ܥܠ ܟܘܪܣܝܐ ܕܡܠܟܘܬܐ܂ ܕܠܐ ܣܠܩܝܢ ܗܘܘ ܥܠ ܠܒܐ܂ ܠܒܫܘ ܠܒܘܫ̈ܐ ܕܐܝܩܪܐ܂
11:06 ܣܓܝܐ̈ܐ ܡ̈ܠܟܐ ܕܐܨܛܥܪܘ ܐܝܟ ܚܕܐ ܘܕܡܝܩܪܝܢ ܕܐܬܒܨܪܘ ܡܢ ܐܝܩܪܗܘܢ܂
11:07 ܥܕ ܠܐ ܬܒܩܐ ܠܐ ܬܫܬܘܬܦ܂ ܥܩܒ ܠܘܩܕܡ ܘܗܝܕܝܢ ܥܒܕ ܫܕ̈ܟܐ܂
11:08 ܥܕ ܠܐ ܬܫܡܥ ܠܐ ܬܬܠ ܦܬܓܡܐ܂ ܘܒܓܘ ܫܘ̈ܥܝܬܐ܂ ܠܐ ܬܡܠܠ܂
11:09 ܐܢ ܐܝܬ ܒܟ ܚܝܠܐ ܠܐ ܬܬܚܪܐ܂ ܘܒܓܘ ܥܘܠܐ ܠܐ ܬܣܓܐ ܛܠܘܡܝܟ܂
11:10 ܒܪܝ ܕܠܡܐ ܬܣܓܐ ܒܝܫܬܟ܂ ܘܕܪܗܛ ܠܡܣܓܝܘܬܗ ܠܐ ܙܟܐ܀ ܒܪܝ ܐܢ ܠܐ ܬܪܗܛ܂ ܠܐ ܬܕܪܟ܂ ܘܐܢ ܠܐ ܬܒܥܐ ܠܐ ܬܫܟܚ܃
11:11 ܐܝܬ ܕܪܗܛ ܘܠܐܐ ܘܥܡܠ܂ ܘܒܟܠܗܝܢ ܗܘ ܡܫܬܘܚܪ܂
11:12 ܐܝܬ ܕܠܐܐ ܘܥܡܠ܂ ܘܚܣܝܪ ܦܓܪܗ܂ ܘܚܣܝܪ ܟܠ ܘܝܬܝܪ ܡܣܟܢܘܬܐ܂ ܡܐܡܪܗ ܕܡܪܝܐ ܥܠܘܗܝ ܢܛܐܒ܂ ܘܢܦܨܝܘܗܝ ܡܢ ܥܦܪܐ ܘܡܢ ܩܛܡܐ܂
11:13 ܐܪܝܡ ܪܝܫܗ ܘܪܡܪܡܗ܃ ܘܢܬܡܗܘܢ ܥܠܘܗܝ ܣܓ̈ܝܐܐ܂
11:14 ܛܒܬܐ ܘܒܝܫܬܐ ܚܝ̈ܐ ܘܡܘܬܐ܂ ܥܬܝܪܐ ܘܡܣܟܢܐ ܩܕܡ ܐܠܗܐ ܫܘܝܢ ܐܢܘܢ܂ ܚܟܡܬܐ ܘܢܟܦܘܬܐ ܘܝܕܥܬܐ ܕܢܡܘܣܐ ܡܢ ܠܘܬ ܡܪܝܐ ܗܝ܂ ܚܘܒܐ ܘܐܘܪ̈ܚܬܐ ܕܥܒ̈ܕܐ ܛܒ̈ܐ ܡܢ ܠܘܬܗ ܐܢܝ̈ܢ܂ ܛܥܝܘܬܐ ܘܚܫܘܟܐ ܠܚ̈ܛܝܐ ܐܬܒܪܝܘ܃ ܘܥܡ ܐܝܠܝܢ ܕܡܬܪܒܝܢ ܒܒܝܫܬܐ ܒܝܫܬܐ ܥܡܗܘܢ ܣܐܒܐ܂
11:17 ܡܘܗܒܬܗ ܕܡܪܝܐ ܡܩܘܝܐ ܠܕܚ̈ܠܘܗܝ܂ ܘܨܒܝܢܗ ܠܥܠܡ ܢܬܩܢ܂
11:18 ܐܝܬ ܕܥܬܪ ܡܢ ܡܣܟܢܘܬܗ܃ ܘܐܝܬ ܕܠܐ ܠܘܐ ܠܗ ܥܘܬܪܗ܃
11:19 ܘܒܥܕܢܐ ܕܐܡܪ ܐܫܟܚܬ ܠܝ ܢܝܚܐ܂ ܗܐ ܡܟܝܠ ܐܟܘܠ ܡܢ ܛܒ̈ܬܝ܂ ܘܠܐ ܝܕܥ ܡܢܐ ܗܘܝܐ ܚܪܬܗ܃܂ ܕܫܒܩ ܠܗܝܢ ܠܐܚܪ̈ܢܝܢ ܘܡܐܬ܀
11:20 ܒܪܝ ܩܘܡ ܥܠ ܐܘܪܚܟ ܘܥܠܝܗ ܐܣܬܡܟ܂ ܘܒܥܒ̈ܕܝܗ ܙܠ ܘܐܥܬܩ܃
11:21 ܠܐ ܬܬܕܡܪ ܒܥܒ̈ܕܐ ܕܥܘܠܐ܂ ܐܠܐ ܣܟܐ ܠܡܪܝܐ ܘܩܘܐ ܒܢܘܗܪܗ܃ ܡܛܠ ܕܩܪܝܒ ܗܘ ܩܕܡ ܡܪܝܐ ܠܡܥܬܪܘ ܠܡܣܟܢܐ ܡܢ ܫܠܝ܂
11:27 ܒܝܫܬܗ ܕܝܘܡܐ܂ ܬܫܟܚ ܛܒܬܐ܂ ܘܚܪܬܗ ܕܒܪܢܫܐ ܬܗܘܐ ܥܠܘܗܝ܃
11:28 ܥܕ ܠܐ ܬܒܩܐ ܠܐܢܫ ܠܐ ܬܫܒܚܝܘܗܝ܃ ܡܛܠ ܕܒܚܪܬܗ ܗܘ ܡܫܬܒܚ ܒܪܢܫܐ܂
11:29 ܠܐ ܠܟܠ ܒܪܢܫ ܠܡܥܠܘ ܠܒܝܬܟ܃ ܟܡܐ̈ܢܘܗܝ ܓܝܪ ܕܢܟܘܠܬܢܐ ܣܓܝܐ̈ܝܢ ܐܢܘܢ܃
11:30 ܐܝܟ ܚܓܠܐ ܨܝܕܐ ܒܐܩܠܘܒܝܐ ܠܒܗ ܕܓܐܝܐ܂ ܘܐܝܟ ܕܘܩܐ ܕܚܐܪ ܠܡܦܘܠܬܐ܂ ܡܐ ܣ̈ܓܝܐܝܢ ܚܘܒ̈ܝܗܘܢ ܕܥܘ̈ܠܐ܂ ܐܝܟ ܟܠܒܐ ܕܠܟܠ ܒܝ ܥܐܠ ܘܚܛܦ܂ ܗܟܢܐ ܥܘܠܐ ܠܟܠ ܒܝ ܥܐܠ ܘܫܓܫ܂
11:31 ܘܛܒ̈ܬܐ ܠܒ̈ܝܫܬܐ ܗ݀ܦܟ܂ ܘܒܡܐ̈ܢܝ ܪܓܬܐ ܝܗ݀ܒ ܬܘܩܠܬܐ܂
11:32 ܡܢ ܩܠܝܠ ܣܪܩܬܐ ܝܩܕܐ ܢܘܪܐ܂ ܗܟܢܐ ܒܪܢܫܐ ܥܘܠܐ ܐܫܕ ܕܡܐ ܐܝܟ ܡܝ̈ܐ܂
11:33 ܕܚܠ ܡܢ ܒܝܫܐ ܡܛܠ ܕܠܒܝܫ ܒܪܐ܂ ܕܠܡܐ ܡܘܡܐ ܕܥܠܡܐ ܬܣܒ܂
11:34 ܠܐ ܬܬܕܒܩ ܠܥܘܠܐ ܕܠܐ ܢܩܠܩܠ ܐܘܪܚܟ ܘܢܗܦܟܟ ܡܢ ܩܝܡܟ܂

next chapter