The Comprehensive Aramaic Lexicon

16:01	ܠܐ ܬܬܪܓܪܓ ܠܣܘܓܐܐ ܕܒܢܝܐ ܚܛܝ̈ܐ܂ ܘܠܐ ܬܚܕܐ ܒܟܠ ܒܢܝܐ ܕܫܘܩܪܐ܂
16:02	ܘܐܦܢ ܣܓܝܘ ܠܐ ܬܚܕܐ ܒܗܘܢ ܡܛܠ ܕܠܐ ܐܝܬܝܗܘܢ ܒܕܚܠܬܗ ܕܐܠܗܐ܂
16:03	ܠܐ ܬܬܟܠ ܥܠ ܚܝܝ̈ܗܘܢ܂ ܘܠܐ ܬܗܝܡܢ ܕܗܘܝܐ ܠܗܘܢ ܚܪܬܐ ܛܒܬܐ܂ ܡܛܠ ܕܛܒ ܗܘ ܚܕ ܕܥܒܕ ܨܒܝܢܐ ܡܢ ܐܠܦ܂ ܘܗܘ ܕܡܐܬ ܕܠܐ ܒܢܝܐ܂ ܡܢ ܗܘ ܕܗܘܝܢ ܠܗ ܒܢܝܐ ܣܓܝ̈ܐܐ ܕܥܘܠܐ܂
16:04	ܡܢ ܚܕ ܓܝܪ ܕܕܚܠ ܠܐܠܗܐ ܬܬܡܠܐ ܟܠܗ ܩܪܝܬܐ܂ ܘܡܢ ܣܘܓܐܐ ܕܒܢ̈ܝܢܫܐ ܥܘ̈ܠܐ ܬܚܪܒ܂
16:05	ܕܣܓܝ̈ܐܢ ܡܢ ܗܠܝܢ ܚܙܬ ܥܝܢܝ܂ ܘܕܥܫ̈ܝܢܢ ܡܢ ܗܠܝܢ ܫܡܥܬ ܐܕܢܝ܂
16:06	ܒܟܢܘܫܬܐ ܕܥܘ̈ܠܐ ܝܩܕܐ ܢܘܪܐ܃ ܘܒܥܡܐ ܕܡܪܓܙ ܫܠܛܐ ܚܡܬܐ܂
16:07	ܠܐ ܫܒܩ ܠܡ̈ܠܟܐ ܩܕܡܝ̈ܐ܂ ܕܡܠܘ ܥܠܡܐ ܒܓܢܒܪܘܬܗܘܢ܂
16:08	ܘܠܐ ܚܣ ܥܠ ܥܡܘܪ̈ܐ ܕܩܪܝܬܗ ܕܠܘܛ܂ ܕܐܪܫܥܘ ܡܛܠ ܓܐܝܘܬܗܘܢ܂
16:09	ܘܠܐ ܪܚܡ ܥܠ ܥܡܐ ܚܪܡܐ܂ ܘܓܙܪ ܥܠܝܗܘܢ ܠܡܐܒܕ ܡܛܠ ܚܛܗ̈ܝܗܘܢ܂
16:10	ܒܗܘ ܙܒܢܐ܂ ܫܬܡܐܐ ܐ̈ܠܦܝܢ ܪ̈ܓܠܐܝܢ ܐܬܩܦܣܘ ܡܛܠ ܪܛܘܢܝܗܘܢ܂

16:11	ܘܐܦ ܚܕ ܐܢ ܢܩܫܐ ܩܕܠܗ܃ ܗܢܐ ܗܘ ܬܡܗܐ ܐܢ ܢܙܟܐ܂ ܡܛܠ ܕܪ̈ܚܡܐ ܘܪܘܓܙܐ ܥܡܗ܂ ܘܡܣܓܐ ܠܡܫܒܩ ܘܐܦ ܬܒܥ ܚܛܗ̈ܐ܂

16:12	ܐܝܟܢܐ ܕܪ̈ܚܡܘܗܝ ܣܓܝܐܝܢ܂ ܗܟܢܐ ܐܦ ܬܒܥ ܚܛܗ̈ܐ܂ ܘܐܢܫ ܐܝܟ ܥܒ̈ܕܘܗܝ ܕܐܢ ܠܗ܂
16:13	ܠܐ ܢܦܠܛ ܠܥܒ̈ܕܝ ܫܘܩܪܐ ܘܠܓܠܘ̈ܙܐ܂ ܘܠܐ ܢܒܛܠ ܣܒܪܗܘܢ ܕܙܕܝܩ̈ܐ ܠܥܠܡ܃
16:14	ܠܟܠ ܡܢ ܕܥܒܕ ܙܕܝܩܘܬܐ ܐܝܬ ܠܗ ܐܓܪܐ܂ ܘܟܠ ܐܢܫ ܐܝܟ ܥܒܕܘ̈ܗܝ ܡܫܟܚ ܩܕܡܘܗܝ܀
16:17	ܠܐ ܬܐܡܪ ܕܡܢ ܩܕܡ ܡܪܝܐ ܐܬܛܫܐ܂ ܘܒܡܪܘܡܐ ܕܫܡܝܐ ܡܢܘ ܢܬܕܟܪܢܝ܂ ܘܒܥܡܐ ܣܓܝܐܐ ܠܐ ܐܬܝܕܥ܂ ܐܘ ܡܢܐ ܗܝ ܢܦܫܝ ܒܝܢܬ ܪ̈ܘܚܬܐ ܕܟܠܗܘܢ ܒܢܝܢܫܐ܂
16:18	ܗܐ ܫܡܝܐ ܘܫܡ̈ܝ ܫܡܝܐ ܘܬܗܘܡܐ ܘܐܪܥܐ܂ ܒܓܠܝܢܗ ܕܥܠܝܗܘܢ ܩܝܡܝܢ܂
16:19	ܥܩܪ̈ܐ ܕܛܘܪ̈ܐ ܘܫܬܐܣ̈ܐ ܕܬܒܝܠ܂ ܟܕ ܡܬܚܙܐ ܥܠܝܗܘܢ ܙܝܥܝܢ܂
16:20	ܘܐܦ ܐܢܐ ܠܐ ܐܣܝܡ ܥܠ ܠܒܝ܂ ܘܒܐܘܪ̈ܚܬܝ ܡܢܘ ܢܬܒܝܢ܂
16:21	ܐܢ ܐܚܛܐ ܠܐ ܬܚܙܝܢܝ ܥܝܢܐ܂ ܐܘ ܐܢ ܐܕܓܠ ܒܟܠ ܕܡܛܫܝ ܡܢܘ ܝܕܥ܂
16:23	ܚܣܝܪ̈ܝ ܠܒܐ ܢܐܡܪܘܢ ܗܠܝܢ܂ ܘܓܒܪܐ ܥܘܠܐ ܢܬܪܥܐ ܗܟܢܐ܂
16:24	ܫܘܡܥܘܢܝ ܘܩܒܠܘ ܝܘܠܦܢܝ܂ ܘܠܟܠ ܡ̈ܠܝ ܗܒܘ ܠܒܟܘܢ܂
16:25	ܐܡܪ ܒܡܬܩܠܐ ܡ̈ܠܝ܂ ܘܒܚܟܡܬܐ ܐܚܘܐ ܝܘܠܦܢܝ܃
16:26	ܟܕ ܒܪܐ ܐܠܗܐ ܥܒ̈ܕܘܗܝ ܡܢ ܠܩܘܕܡܝܢ܂ ܥܡ ܒܪܝܬܗܘܢ ܦܠܓ ܢܡܘܣ̈ܝܗܘܢ܂
16:27	ܘܝܗܒ ܥܕܡܐ ܠܚܪܬܐ ܥܒ̈ܕܝܗܘܢ܃ ܘܫܘܠܛܢܗܘܢ ܠܟܠ ܕܪ̈ܐ ܕܥܠܡܐ܂ ܠܐ ܟܦܢܝܢ ܘܠܐ ܨܗܝܢ܂ ܘܠܐ ܠܐܝܢ ܘܠܐ ܥܡܠܝܢ܂ ܘܠܐ ܚܣܪܝܢ܂ ܡܢ ܓܢܒܪܘܬܗܘܢ܂
16:28	ܚܕ ܠܚܕ܂ ܠܐ ܣܢܝܢ܂ ܘܥܕܡܐ ܠܥܠܡ ܠܐ ܡܥܒܪܝܢ ܡܠܬܗ܀
16:29	ܘܒܬܪ ܗܠܝܢ ܥܠ ܐܪܥܐ ܐܕܝܩ܂ ܘܒܪܟܗ ܒܟܠ ܥ̈ܠܠܬܗ܂
16:30	ܢܦܫ̈ܬܐ ܕܟܠ ܚܝ̈ܐ ܡܠܐ ܐܦܝ̈ܗ܂ ܘܩܦܣ ܠܓܘܗ ܟܘܠ ܥܒܕܝ̈ܗܘܢ܂