The Comprehensive Aramaic Lexicon

18:01	ܡܢܘ ܡܫܟܚ ܠܡܚܘܝܘ ܥܒܕܘ̈ܗܝ܂ ܐܘ ܡܢܘ ܢܡܢܐ ܓܒܪ̈ܘܬܗ܂ ܥܠܡܐ ܟܠܗ ܡܬܒܩܐ ܐܟܚܕܐ܂ ܘܡܪܝܐ ܒܠܚܘܕܘܗܝ ܙܟܝ܂
18:07	ܒܫܘܠܡܗܘܢ ܕܒ̈ܢܝ ܐܢܫܐ ܗܢܘܢ ܡܫܪܝܢ܂ ܘܐܢ ܢܬܘܒܘܢ ܢܬܡܗܘܢ܂
18:08	ܡܢܐ ܐܢܘܢ ܒܢܝܢ̈ܫܐ܂ ܘܡܢܐ ܚܘܣܪܢܗܘܢ ܘܡܢܐ ܝܘܬܪܢܗܘܢ܂ ܘܡܢܐ ܛܒܘܬܗܘܢ ܘܡܢܐ ܒܝܫܘܬܗܘܢ܂
18:09	ܡܢܝܢܐ ܕܝܘ̈ܡܘܗܝ ܕܒܪܢܫܐ ܟܕ ܢܣܓܐ ܠܡܚܐ ܡܐܐ ܫ̈ܢܝܢ܂
18:10	ܐܝܟ ܕܠܡܡܠܐ ܓܘܕܐ ܡܢ ܝܡܐ܂ ܘܐܝܟ ܦܪܕܬܐ ܡܢ ܚܠܐ܂ ܐܠܦ ܫ̈ܢܝܢ ܡܢ ܥܠܡܐ ܗܢܐ܂ ܠܐ ܐܝܬܝܗܝܢ ܐܝܟ ܚܕ ܝܘܡܐ ܒܥܠܡܐ ܕܙܕܝ̈ܩܐ܂
18:11	ܡܛܠ ܗܢܐ ܡܓܪ ܪܘܚܗ ܥܡܗܘܢ܃ ܘܐܫܕ ܥܠܝܗܘܢ ܪ̈ܚܡܘܗܝ܃
18:12	ܡܛܠ ܕܝܕܥ ܕܚܪܬܗܘܢ ܒܝܫܐ ܗܝ܂ ܡܛܠ ܗܢܐ ܐܣܓܝ ܫܘܒܩܢܗܘܢ܃
18:13	ܪ̈ܚܡܐ ܕܒܪܢܫܐ ܥܠ ܩܪܝܒ ܒܣܪܗ܂ ܘܪ̈ܚܡܘܗܝ ܕܐܠܗܐ ܥܠ ܟܠܗܘܢ ܥܒ̈ܕܘܗܝ܃ ܡܚܟܡ ܘܪܕܐ܂ ܘܡܠܦ ܠܗܘܢ܂ ܘܡܗܦܟ ܠܗܘܢ ܐܝܟ ܪܥܝܐ ܛܒܐ ܕܪܥܐ ܠܓܙܪܗ܂
18:14	ܛܘܒܝܗܘܢ ܠܐܝܠܝܢ ܕܡܣܒܪܝܢ ܠܪ̈ܚܡܘܗܝ܃ ܘܠܐܝܠܝܢ ܕܡܩܒܠܝܢ ܠܕܝ̈ܢܘܗܝ܀
18:15	ܒܪܝ ܠܡܢ ܕܡܛܐܒ ܠܚܒܪܗ ܠܐ ܬܟܠܐ܂ ܘܒܡܢ ܕܝܗܒ ܠܐ ܬܒܐܫ ܥܝܢܟ܂
18:16	ܐܝܟ ܡܛܪܐ ܓܝܪ ܕܡܒܛܠ ܫܘܒܐ܂ ܗܟܢܐ ܡܠܬܐ ܡܗܦܟܐ ܡܘܗܒܬܐ܂
18:17	ܐܝܬ ܓܝܪ ܡܠܬܐ ܛܒܬܐ ܕܡܢ ܡܘܗܒܬܐ ܛܒܐ ܗܝ܂ ܘܬܪ̈ܬܝܗܝܢ ܥܠ ܐܢܫܐ ܟܫܪ̈ܐ܂
18:18	ܣܟܠܐ ܓܝܪ ܡܚܣܕ ܥܕ ܠܐ ܥܒܕ ܛܝܒܘܬܐ܂ ܘܡܘܗܒܬܗ ܕܪܫܝܥܐ ܡܬܝܟܐ ܥܝ̈ܢܐ܂
18:19	ܥܕ ܠܐ ܬܬܟܬܫ ܒܥܝ ܠܟ ܥܕܘܪܐ܂ ܘܥܕ ܠܐ ܬܬܟܪܗ ܒܥܝ ܠܟ ܐܣܝܐ܂
18:20	ܥܕ ܠܐ ܬܡܛܝܟ ܥܩܬܐ ܨܠܐ܂ ܘܠܙܒܢܐ ܕܥܩܬܐ ܬܫܟܚܝܗ܂ ܘܬܥܢܝܟ܂
18:21	ܥܕ ܠܐ ܬܬܩܠ܃ ܨܠܐ ܘܒܥܝ܂ ܘܥܕ ܠܐ ܬܚܛܐ ܗܒ ܙܕܩܬܐ܃
18:22	ܠܐ ܬܬܟܠܐ ܠܡܥܒܪܘ ܚܘ̈ܒܝܟ܂ ܘܠܐ ܬܗܘܐ ܡܕܫ ܥܕܡܐ ܕܬܥܘܩ ܠܟ܃ ܠܐ ܬܬܠ ܙܒܢܐ ܠܡܬܒ ܡܢ ܚܛܗ̈ܝܟ܃ ܐܬܕܟܪ ܕܡܘܬܐ ܠܐ ܡܫܬܘܚܪ܂

18:23	ܥܕ ܠܐ ܬܕܘܪ ܛܝܒ ܢܕܪ̈ܝܟ܃ ܘܠܐ ܬܗܘܐ ܐܝܟ ܓܒܪܐ ܕܡܢܣܐ ܡܪܗ܂ ܠܐ ܬܘܣܦ ܠܡܚܛܐ ܚܛܗ̈ܐ܂ ܡܛܠ ܕܒܩܕܡ̈ܝܐ ܠܐ ܙܟܝܬ܂

18:24	ܐܬܕܟܪ ܕܪܘܓܙܐ ܒܚܪܬܐ ܗܘ ܕܟܠܗܘܢ ܚܛܗ̈ܐ܂ ܘܒܙܒܢܐ ܕܥܩܬܐ ܠܐ ܢܗܦܟ ܡܢܟ ܐܦ̈ܐ܂
18:25	ܗܘܝܬ ܕܟܝܪ ܠܟܦܢܐ ܒܝܘ̈ܡܝ ܣܒܥܐ܃ ܘܡܣܟܢܘܬܐ ܘܥܢܘܝܘܬܐ ܒܝܘ̈ܡܝ ܥܘܬܪܐ܂
18:26	ܡܢ ܨܦܪܐ ܠܪܡܫܐ ܡܫܢܐ ܥܕܢܐ܂ ܘܟܠܗܝܢ ܗ̈ܠܝܢ ܫܦܝܪ̈ܢ ܐܢܝ̈ܢ ܩܕܡ ܐܠܗܐ܂
18:27	ܓܒܪܐ ܚܟܝܡܐ ܠܗܠܝܢ ܟܠܗܝܢ ܢܐܨܦ܂ ܘܒܝܘܡ̈ܬܐ ܕܪܘܫܥܐ ܠܐ ܢܕܚܠ ܡܢ ܒܝܫܐ܂
18:28	ܠܟܠ ܕܚܟܝܡ ܠܡܠܦܘ ܚܟܡܬܐ܂ ܘܠܝܕܘ̈ܥܝܗ̤ ܠܡܬܠ ܬܚܘܝܬܐ܂
18:29	ܚܟ̈ܝܡܝ ܝܘܠܦܢܐ ܐܦ ܗܢܘܢ ܢܬܚܟܡܘܢ܂ ܘܢܕܥܘܢ ܥܕܡܐ ܠܐܚܪܝܬܐ ܡ̈ܠܐ ܕܡ̈ܬܠܐ܂ ܘܡ̈ܠܐ ܕܚܟܡܬܐ ܘܝܘܠܦܢܐ܂ ܀
18:30	ܒܪܝ ܒܬܪ ܫܐܠܬ ܢܦܫܟ ܠܐ ܬܐܙܠ܂ ܘܡܢ ܪܓܬܗ ܟܠܝܗ݀܃
18:31	ܐܢ ܓܝܪ ܬܥܒܕ ܨܒܝܢܐ ܕܢܦܫܟ܃ ܐܝܟ ܗ݀ܘ ܗܘ ܕܥ݁ܒܕ ܨܒܝܢܐ ܕܣܢܐܗ܂
18:32	ܠܐ ܬܚܕܐ ܒܣܘܓܐܐ ܕܬܦܢܝ̈ܩܐ܂ ܕܠܐ ܚܕ ܬܪ̈ܝܢ ܬܗܘܐ ܡܣܟܝܢ܀܀
18:33	ܠܐ ܬܗܘܐ ܡܣܟܝܢ ܘܪܘܝ ܘܙܠܝܠ ܘܦܩܩ݁܂ ܟܕ ܡܕܡ ܒܟܝܣܟ ܠܝܬ܂