The Comprehensive Aramaic Lexicon

20:01	ܐܝܬ ܡܣܟܢܘܬܐ ܕܠܐ ܝܐܝܐ܂ ܘܐܝܬ ܕܫܬܝܩ ܘܗܘ ܚܟܝܡ܂
20:02	ܠܝܬ ܠܗ ܛܝܒܘܬܐ ܠܡܢ ܕܡܟܣ ܠܥܘܠܐ܂ ܘܡܫܬܒܚ ܡܢ ܟܪ ܕܠܐ ܘܠܐ ܠܗ ܠܡܫܬܒܚܘ܂
20:04	ܡܬܪܓܪܓ ܡܗܝܡܢܐ ܠܡܕܡܟ ܥܡ ܒܬܘܠܬܐ܂ ܗܟܢܐ ܡܢ ܕܥܒܕ ܕܝܢܐ ܒܐܘܠܨܢܐ܂
20:05	ܐܝܬ ܕܟܕ ܫܬܝܩ ܡܬܚܫܒ ܚܟܝܡܐ܂ ܘܐܝܬ ܕܡܣܬܢܐ ܒܣܘܓܐܐ ܕܫܘ̈ܥܝܬܗ܂
20:06	ܐܝܬ ܕܡܡܠܠ ܐܝܟܐ ܕܠܐ ܘܠܐ ܠܗ ܠܡܡܠܠܘ܂
20:07	ܘܓܒܪܐ ܚܟܝܡܐ ܢܛܪ ܥܕܢܐ܂ ܘܓܒܪܐ ܥܘܠܐ ܘܡܪܚܐ ܠܐ ܢܛܪ ܥܕܢܐ܂
20:08	ܐܝܬ ܕܒܣܘܓܐܐ ܕܫܘ̈ܥܝܬܗ ܡܣܬܢܐ܂ ܘܕܡܬܓܐܐ ܢܣܬܢܘܢ ܚܝܘ̈ܗܝ܂
20:09	ܐܝܬ ܡܕܡ ܕܠܒܝܫܬܗ ܗܘ ܕܓܒܪܐ܂ ܘܐܝܬ ܫܘ̈ܥܝܬܐ ܕܠܚܘܣܪܢܗ܂ ܐܝܟܢܐ ܓܝܪ ܕܬܫܕܐ ܟܐܦܐ ܒܥܘܦܐ ܘܬܦܪܚܝܘܗܝ܃ ܗܟܢܐ ܬܘܒܕ ܪܚܡܘܬܗ ܕܪܚܡܟ ܕܫܪܪܐ ܘܠܐ ܬܫܟܚܝܗ܂

20:12	ܐܝܬ ܕܝܙܦ ܣܓܝ ܐܝܟ ܙܥܘܪ܂ ܘܦܪܥ ܠܗ ܚܕ ܒܫܒܥܐ܂

20:14	ܡܘܗܒܬܗ ܕܣܟܠܐ ܠܐ ܫܘܝܐ ܠܗ܂ ܡܛܠ ܕܥܝ̈ܢܘܗܝ ܚܕ ܒܫܒܥܐ ܣܝܡܢ ܠܦܘܪܥܢܘܬܐ܂
20:15	ܙܥܘܪ ܝܗܒ ܘܣܓܝ ܡܚܣܕ܂ ܘܦܬܚ ܦܘܡܗ ܘܡܡܠܠ ܕܒܝܫ ܘܣܪܒ܂ ܝܘܡܢܐ ܡܘܙܦ ܘܡܚܪ ܬܒܥ܂ ܘܓܒܝܬܗ ܓܒܝܬܐ ܗܝ ܕܦܘܪܥܢܘܬܐ܂ ܐܝܠܝܢ ܕܗܟܢܐ ܐܝܬܝܗܘܢ܃ ܠܐܠܗܐ ܘܠܒܢܝܢ̈ܫܐ ܣܢܝܐܝܢ ܐܢܘܢ܂
20:16	ܣܟܠܐ ܐܡܪ ܠܝܬ ܠܝ ܪ̈ܚܡܐ܂ ܘܠܝܬ ܛܝܒܘ ܠܛܝܒܘܬܝ܂ ܐܟ̈ܠܝ ܠܚܡܝ ܐܝܟ ܫܘܥܐ ܕܟܐܦܐ܂
20:17	ܐܠܐ ܐܟܘܬܗ ܢܡܝܩܘܢ ܥܠܘܗܝ܃ ܐܝܟ ܡܝ̈ܐ ܕܐܫܝܕܝܢ ܥܠ ܫܘܥܐ ܕܟܐܦܐ܂ ܗܟܢܐ ܠܫܢܗ ܕܥܘܠܐ ܒܝܢܬ ܙܕܝܩ̈ܐ܂ ܐܝܟܢܐ ܕܠܐ ܡܫܟܚܐ ܐܠܝܬܐ ܕܬܬܐܟܠ ܕܠܐ ܡܠܚܐ܂ ܗܟܢܐ ܡܠܬܐ ܕܠܐ ܡܬܐܡܪܐ ܒܥܕܢܗ܂
20:20	ܒܦܘܡܗ ܕܣܟܠܐ ܬܬܩܠ ܡܠܬܐ܂ ܡܛܠ ܕܠܐ ܐܡܪ ܠܗ ܒܥܕܢܗ܂
20:21	ܐܝܬ ܕܡܬܦܠܛ ܡܢ ܚܛܗ̈ܐ ܡܛܠ ܨܪܝܟܘܬܗ܂ ܡܢܘ ܗܢܐ ܕܗܘܐ ܙܕܝܩܐ܂ ܘܥܠ ܥܘܬܪܗ ܡܬܬܢܝܚ܃
20:22	ܐܝܬ ܕܡܘܒܕ ܢܦܫܗ ܡܢ ܒܗܬܬܗ܃ ܘܡܢ ܟܘܣܝ ܐܦܘܗܝ ܓܡܪ܂
20:23	ܐܝܬ ܕܡܢ ܒܗܬܬܗ ܡܬܟܠ ܚܒܪܗ܃ ܘܩܢܐ ܠܗ ܣܢܐܐ ܡܓܢ܂
20:24	ܡܕܡ ܕܒܝܫ ܒܐܢ̈ܫܐ ܕܓܠܘܬܐ܂ ܘܒܦܘܡܗ ܕܣܟܠܐ܂ ܗܝ ܣܓܝܐܐ܂
20:25	ܡܬܪܓܪܓ ܠܡܓܢܒ ܐܦ ܠܡܕܓܠܘ܂ ܘܬܪ̈ܬܝܗܝܢ ܐܘܪ̈ܚܬܗ ܒܗܬܬܐ ܢܘܪ̈ܬܢ܂
20:26	ܡܛܠ ܕܚܪܬܗ ܕܒܪܢܫܐ ܕܓܠܐ ܠܠܘܛܬܐ ܘܒܗܬܬܗ ܥܡܗ ܬܐܒܕ܀
20:27	ܡܠܐ ܡ̈ܬܠܐ ܕܚܟܡܬܐ܂ ܐܝܟ ܙܥܘܪܐ ܢܚܘܐ ܢܦܫܗ܂ ܘܓܒܪܐ ܚܟܝܡܐ ܢܫܬܠܛ ܒܪ̈ܘܪܒܢܐ܂
20:29	ܩܘܪܒܢܐ ܘܫܘܚܕܐ ܡܒܗܬܝܢ ܥܝ̈ܢܐ܂ ܘܣܟܪ ܦܘܡܐ ܘܡܒܛܠ ܡܟܣܢܘܬܐ܂
20:30	ܚܟܡܬܐ ܛܡܝܪܬܐ ܘܣܝܡܬܐ ܕܡܛܫܝܐ܂ ܡܢܐ ܗܢܝܢܐ ܐܝܬ ܒܬܪ̈ܬܝܗܝܢ܂
20:31	ܛܒ ܗܘ ܓܒܪܐ ܕܡܛܫܐ ܣܟܠܘܬܗ ܛܒ ܡܢ ܓܒܪܐ ܕܡܛܫܐ ܚܟܡܬܗ܀