The Comprehensive Aramaic Lexicon

22:01	ܐܝܟ ܟܐܦܐ ܨܚܢܬܐ ܕܪܡܝܐ ܝܡ ܒܫܘܩܐ܃ ܘܟܠܢܫ ܥܪܩ ܡܢ ܪܝܚܗ܂ ܗܟܢܐ ܐܝܬܘܗܝ ܣܟܠܐ܂ ܘܟܠ ܐܢܫ ܡܬܪܚܩ ܡܢܗ܂
22:02	ܥܕ ܢܦܩ ܐܢܫ ܠܒܪ ܠܫܘܩܐ ܘܡܨܥܪ ܢܦܫܗ܂ ܘܟܠ ܡܢ ܕܚܙܐ ܠܗ ܡܛܪܦ ܐܝܕܘ̈ܗܝ܂ ܀
22:03	ܒܗܬܬܐ ܗܘ ܠܐܒܐ ܒܪܐ ܣܟܠܐ܂ ܘܢܩܒܬܐ ܠܚܘܣܪܢܐ ܗܘ ܡܬܝܠܕܐ܂
22:05	ܐܒܘܗ ܘܐܡܗ ܬܒܗܬ ܣܟܠܬܐ܂ ܘܡܢ ܬܪ̈ܝܗܘܢ ܗܝ ܬܨܛܥܪ܂
22:06	ܐܝܟ ܙܡܪܐ ܒܝܬ ܒܟ̈ܐ܂ ܫܘܥܝܬܐ ܕܠܐ ܒܥܕܢܗ܂ ܘܡܪܕܘܬܐ ܘܝܘܠܦܢܐ ܒܟܠ ܥܕܢ܃ ܚܟܡܬܐ ܗܝ܂
22:07	ܐܝܟ ܐܢܫ ܕܡܕܒܩ ܚܨ̈ܦܐ܂ ܗܟܢܐ ܡܢ ܕܡܠܦ ܠܣܟܠܐ܂ ܘܐܝܟ ܐܢܫ ܕܡܥܝܪ ܕܡܟܐ ܡܢ ܫܢܬܐ ܥܡܝܩܬܐ܂
22:08	ܘܐܝܟ ܐܢܫ ܕܐܟܠ ܠܚܡܐ ܟܕ ܠܐ ܟܦܢ܂ ܗܟܢܐ ܡܢ ܕܡܠܦ ܠܣܟܠܐ܂ ܘܡܐ ܕܓܡܪ ܡ̈ܠܝܟ ܐܡܪ ܠܟ܂ ܡܢܐ ܐܡܪܬ܀
22:11	ܥܠ ܡܝܬܐ ܠܡܒܟܐ ܕܐܬܟܠܝ ܡܢ ܢܘܗܪܐ܂ ܘܥܠ ܣܟܠܐ ܕܐܬܟܠܝ ܡܢ ܚܟܡܬܐ܂ ܠܝܬ ܠܡܒܟܐ ܥܠ ܡܝܬܐ ܕܡܬܢܝܚ܂ ܒܝܫ̈ܝܢ ܐܢܘܢ ܓܝܪ ܡܢ ܡܘܬܐ ܚܝ̈ܐ ܒܝ̈ܫܐ܂
22:12	ܒܝܬ ܒܟܐ ܓܝܪ ܕܡܝܬܐ ܫܒܥܐ ܝܘ̈ܡܝܢ܂ ܘܒܝܬ ܒܟܐ ܕܣܟܠܐ ܟܠ ܝܘ̈ܡܝ ܚܝܘ̈ܗܝ܀
22:13	ܥܡ ܣܟܠܐ ܠܐ ܬܫܦܪ ܫܘ̈ܥܝܬܐ܂ ܘܥܡ ܚܙܝܪܐ ܠܐ ܬܐܙܠ ܒܐܘܪܚܐ܂ ܐܪܚܩ ܡܢܗ ܕܠܐ ܢܥܝܩ ܠܟ܂ ܘܠܐ ܢܛܢܦܟ ܟܕ ܗܘ ܡܬܢܦܨ܂ ܐܪܚܩ ܡܢܗ ܘܬܫܟܚ ܢܝܚܐ܂ ܘܠܐ ܢܠܐܝܟ ܒܣܘܓܐܐ ܕܫܘ̈ܥܝܬܗ܂
22:14	ܡܢ ܐܒܪܐ ܓܝܪ ܣܓܝ ܝܩܪ܂ ܘܡܢܘ ܫܡܗ ܐܠܐ ܣܟܠܐ܂ ܀

22:15	ܚܠܐ ܘܡܠܚܐ ܘܛܥܢܐ ܕܦܪܙܠܐ ܢܝ݂ܚ ܠܡܫܩܠ܂ ܡܢ ܕܠܡܥܡܪ ܥܡ ܓܒܪܐ ܣܟܠܐ܂

22:16	ܐܝܟ ܥܪܩܬܐ ܕܩܝܣܐ ܕܐܣܝܪܐ ܒܐܣ̈ܐ ܕܙܘܝ̈ܬܐ ܕܒܝܬܐ܂ ܗܟܢܐ ܗܘ ܠܒܐ ܡܗܘܢܐ ܒܡ݂ܠܟܐ ܕܪܥܝܢܗ܃ ܘܟܠ ܕܚܠܐ ܠܐ ܬܙܝܥܝܘܗܝ܂
22:17	ܠܒܐ ܚܟܝܡܐ ܒܡܚܫܒܬܐ ܕܪܥܝܢܗ܃ ܐܝܟ ܨܦܬܐ ܕܓ̈ܠܦܐ ܥܠ ܐܣ̈ܐ ܡܨܒܬܬܐ܂
22:18	ܨܪܪܐ ܙܥܘܪܐ ܥܠ ܟܐܦܐ ܕܪܡܐ܂ ܘܕܩܠܝܠ ܛܒ ܩܕܡ ܪܘܚܐ ܠܐ ܡܫܟܚ ܠܡܩܡ܂ ܐܝܟ ܡܐܢܐ ܕܟܬܢܐ ܘܥܡܪܐ ܚܘܪܐ ܩܕܡ ܥܠܥܠܐ ܠܐ ܢܬܩܝܡܘܢ܂ ܗܟܢܐ ܠܒܗ ܕܣܟܠܐ ܒܡܥ̈ܘܗܝ ܬܒܝܪ܂ ܘܩܕܡ ܥܩܬܐ ܠܐ ܡܫܟܚ ܠܡܩܡ܂ ܀܀
22:19	ܡܚܘܬܐ ܕܥ̈ܝܢܐ ܡܚܬܐ ܕܡ̈ܥܐ܂ ܘܡܚܘܬܐ ܕܠܒܐ ܡܥܒܪܐ ܪܚܡܘܬܐ܃
22:20	ܕܫܕܐ ܟܐܦܐ ܒܨܦܪܐ ܡܦܪܚ ܠܗ܂ ܘܡܢ ܕܓܠܙ ܚܒܪܗ ܡܥܒܪ ܪܚܡܘܬܗ܂
22:21	ܥܠ ܪܚܡܟ ܠܐ ܬܫܬܚܠܦ܂ ܘܐܢ ܐܫܬܚܠܦܬ ܠܐ ܬܣܒܪ ܕܐܝܬ ܠܟ ܥܡܗ ܪܚܡܘܬܐ܂ ܥܠ ܪܚܡܐ ܐܦܢ ܬܫܡܘܛ ܣܝܦܐ ܠܐ ܬܘܚܠ܂ ܐܝܬ ܠܗ ܓܝܪ ܡܦܩܢܐ܂
22:22	ܘܐܢ ܥܠ ܪܚܡܟ ܬܦܬܚ ܦܘܡܟ ܠܐ ܬܕܚܠ܂ ܡܛܠ ܕܐܝܬ ܠܗ ܓܝܪ ܬܪܥܘܬܐ܂ ܒܪ ܚܣ̈ܕܐ ܡܢ ܕܓܠܐ ܪܐܙܐ܂ ܘܡܚܘܬܐ ܕܣܬܪܐ ܡܥܒܪܐ ܪܚܡܘܬܐ܂
22:23	ܣܡܘܟ ܪܚܡܟ ܒܡܣܟܢܘܬܗ܃ ܕܐܦ ܒܛܒ̈ܬܗ ܬܫܬܘܬܦ܂ ܒܥܕܢ ܥܩܬܗ ܗܘܝ ܠܗ ܚܒܪܐ܂ ܕܐܦ ܒܝܘܪܬܢܗ ܬܐܪܬ܂
22:24	ܩܕܡ ܢܘܪܐ ܥܛܪ ܬܢܢܐ܃ ܘܩܕܡ ܐܫܕ ܕܡܐ ܨܥܪܐ܂
22:25	ܐܢ ܐܬܡܣܟܢ ܪܚܡܟ ܠܐ ܬܒܗܬܝܘܗܝ܃ ܘܡܢ ܩܕܡܘܗܝ ܠܐ ܬܛܫܐ܂
22:26	ܐܢ ܓܠܐ ܠܟ ܚܒܪܟ ܪܐܙܐ܂ ܠܐ ܬܦܩܝܘܗܝ܃ ܕܠܐ ܟܠ ܕܢܫܡܥܟ ܢܙܕܗܪ ܡܢܟ܃ ܘܐܝܟ ܣܪܘܚܐ ܢܚܫܒܟ܀
22:27	ܡܢ ܕܝܢ ܐܩܝܡ ܥܠ ܦܘܡܝ ܢܛܘ̈ܪܐ܂ ܘܥܠ ܣܦܘ̈ܬܝ ܚܬܡܐ ܕܐܝܩܪܐ܃ ܕܠܐ ܐܡܪ ܒܗܘܢ ܢܟܠܐ܂ ܘܠܫܢܝ ܠܐ ܢܘܒܕܢܝ܂