← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62066: Sirach

Click on a word for lexical analysis
Click on a red-colored coordinate for comments and/or translations of the line

previous chapter


23:01 ܐܠܗܐ ܐܒܝ ܘܡܪܗܘܢ ܕܚܝ̈ܝ܂ ܠܐ ܬܬܩܠܢܝ ܡܛܠܬܗܘܢ܂
23:02 ܡܢ ܕܝܢ ܐܩܝܡ ܥܠ ܬܪܥܝܬܝ ܫܘܛܐ܂ ܘܥܠ ܠܒܝ ܫܒܛܐ ܕܝܘܠܦܢܐ܂ ܕܗܘ ܡܪܝܐ ܢܚܘܣ ܥܠ ܚܘܒ̈ܝ܂ ܕܒܟܢܘܫܬܗܘܢ ܠܐ ܢܐܪܬܘܢ܂ ܘܠܐ ܢܪܚܡܘܢ ܠܡܚܒܠܘ܂
23:03 ܡܛܠ ܕܠܐ ܢܣܓܘܢ ܚܘܒ̈ܝ ܘܠܐ ܢܥܫܢܘܢ ܚ̈ܛܗܝ܂ ܘܢܓܠܘܢܢܝ ܩܕܡ ܒܥܠܕܒܒܐ ܘܢܚܕܐ ܠܝ ܣܢܐܐ܂ ܀
23:04 ܐܠܗܐ ܐܒܝ ܘܡܪܗܘܢ ܕܚܝ̈ܝ܂ ܠܐ ܬܪܡܝܢܝ ܒܛܥܝܘܬܗܘܢ܃ ܥܝܢܐ ܪܡܬܐ ܠܐ ܬܬܠ ܠܝ܂ ܘܠܒܐ ܦܚܙܐ ܐܪܚܩ ܡܢܝ܂ ܡܕܡ ܕܫܦܝܪ ܠܐ ܢܦܠܛܢܝ܃
23:06 ܘܦܚܙܐ ܕܒܣܪܐ ܠܐ ܢܦܚܙܢܝ܂ ܘܢܦܫܐ ܚܨܝܦܬܐ ܠܐ ܬܫܬܠܛ ܒܝ܀
23:07 ܝܘܠܦܢܐ ܕܦܘܡܝ ܫܡܥܘ ܒܢܝܐ ܘܕܡܙܕܗܪ ܠܐ ܢܬܚܣܕ܂
23:08 ܒܡܡܠܠܗ ܓܝܪ ܡܬܬܚܕ ܪܫܝܥܐ܂ ܘܣܟܠܐ ܒܦܘܡܗ ܡܬܬܩܠ܂
23:09 ܠܡܘ̈ܡܬܐ ܠܐ ܬܠܦ ܦܘܡܟ܂ ܘܒܝܬ ܕܝܢ̈ܐ ܠܐ ܬܗܘܐ ܝܬܒ܂
23:10 ܡܛܠ ܕܟܠ ܒܪܢܫܐ ܕܡܣܓܐ ܠܡܐܡܐ܃ ܡܢ ܡܚܘܬܐ ܠܐ ܙܟܐ܂ ܗܟܢܐ ܟܠ ܕܡܕܓܠ ܘܝܡܐ ܡܢ ܚܘܒܐ ܠܐ ܙܟܐ܂
23:11 ܓܒܪܐ ܝܡܝܐ ܩܢܐ ܚܘܒ̈ܐ܂ ܘܠܐ ܢܥܒܪ ܡܢ ܒܝܬܗ ܡܟܬܫܐ܂ ܐܢ ܒܛܘܥܝܝ ܝܡܐ ܚܛܗܐ ܥܠܘܗܝ܃ ܘܐܢ ܒܫܪܪܐ ܠܐ ܢܐܡܐ܂ ܡܛܠ ܕܟܠ ܕܝܡܐ ܒܟܠ ܥܕܢ ܣܢܝܐ ܗܝ ܘܠܐ ܙܟܐ܂
23:12 ܐܦܢ ܐܝܬ ܐܚܪܬܐ ܕܦܚܡܐ ܠܗ ܠܐ ܬܫܬܟܚ ܒܝܪܬܘܬܗ ܕܝܥܩܘܒ܂ ܘܐܦ ܡܢ ܕܢܓܕ ܢܦܫܗ ܡܢ ܗܠܝܢ ܢܚܐ܂ ܘܒܚܛܗ̈ܐ ܠܐ ܢܬܚܠܛ܂
23:13 ܘܐܦ ܠܣܟܠܘܬܐ ܠܐ ܬܠܦ ܦܘܡܟ܂ ܡܛܠ ܕܐܦ ܒܗ ܐܝܬ ܒܗ ܡ̈ܠܐ ܕܫܘܩܪܐ܂
23:14 ܐܬܕܟܪ ܕܐܒܐ ܘܐܡܐ ܐܝܬ ܠܟ܃ ܘܡܢ ܐܝܕܐ ܕܚܠܬܐ ܬܬܦܠܛ܂ ܕܠܐ ܬܬܩܠ ܩܕܡܝܗܘܢ܂ ܘܒܝܘܠܦܢܟ ܬܨܛܥܪ܂ ܘܬܐܡܪ ܕܐܠܘ ܠܐ ܐܬܒܪܝܬ܂ ܘܠܝܘܡܐ ܕܐܬܝܠܕܬ ܒܗ ܬܠܘܛ܂
23:15 ܓܒܪܐ ܓܝܪ ܕܝܠܦ ܡ̈ܠܐ ܒ̈ܛܠܬܐ܂ ܟܠ ܝܘܡ̈ܝ ܚܝܘ̈ܗܝ ܚܟܡܬܐ ܠܐ ܢܐܠܦ܂ ܘܠܐ ܝܘܠܦܢܐ ܡܩܒܠ ܓܒܪܐ ܕܦܚܙ ܒܨܥܪܐ ܕܒܣܪܗ܀
23:16 ܬܪ̈ܝܢ ܙܢܝ̈ܢ ܣܢܬ ܢܦܫܝ܂ ܘܕܬܠܬܐ ܡܣܩ ܪܘܓܙܐ܂ ܓܒܪܐ ܕܦܚܙ ܒܨܥܪܐ ܕܒܣܪܗ܃ ܠܐ ܢܬܬܢܝܚ ܥܕܡܐ ܕܬܐܩܕ ܒܗ ܢܘܪܐ܂
23:17 ܠܒܣܪܐ ܕܓܒܪܐ ܦܚܙܐ ܟܠ ܒܣܪ ܒܣܝܡ ܠܗ܂ ܘܠܐ ܢܬܟܠܐ ܥܕܡܐ ܕܢܐܒܕ܀܀
23:18 ܓܒܪܐ ܕܡܫܩܪ ܥܠ ܬܫܘܝܬܐ ܕܥܪܣܗ܂܃ ܘܐܡܪ ܒܢܦܫܗ ܡܢܘ ܚܙܐ ܠܝ܂܃ ܗܐ ܐܣ̈ܐ ܕܒܝܬܝ ܡܣܬܪ̈ܢ ܥܠܝ܂܃ ܘܛܠܠܐ ܕܒܝܬܝ ܡܓܢ ܥܠܝ܃ ܘܠܝܬ ܕܚܙܐ ܠܝ܃ ܡܢܘ ܟܠܐ ܠܝ ܕܐܚܛܐ܂
23:19 ܘܠܐ ܝܕܥ ܕܥܝܢܘܗܝ ܕܐܠܗܐ ܪ̈ܘܪܒܢ ܚܕ ܒܪܒܘ ܒܫܡܫܐ܂ ܘܚܙܐ ܐܘܪ̈ܚܬܐ ܕܟܠ ܒܢܝܢܫܐ܂ ܘܡܣܬܟܠ ܡܐ ܕܒܚܫܘܟܐ ܩܘܒܠܠܐ ܥܒ̈ܕܝܗܘܢ܂
23:20 ܡܛܠ ܕܥܕ ܠܐ ܗܘܐ ܟܠ ܡܕܡ ܓܠܐ ܗܘ ܩܕܡܘܗܝ܂ ܘܐܦ ܡܢ ܒܬܪ ܓܡܘܪܝܗ ܕܥܠܡܐ ܗܘ ܕܐܢ ܠܗ܂ ܘܒܡܕܡ ܕܠܐ ܣܒܪ ܒܪܢܫܐ ܕܡܬܬܚܕ܂
23:21 ܗܢܐ ܒܫܘܩ̈ܐ ܕܡܕܝܢܬܐ ܢܬܦܪܣܐ܂
23:22 ܗܟܢܐ ܐܦ ܐܢܬܬܐ ܕܣܪܚܐ ܥܠ ܒܥܠܗ܃ ܘܡܩܝܡܐ ܝܪܬܐ ܡܢ ܐܚܪܢܐ܂
23:23 ܚܕܐ ܕܕܓܠܬ ܒܢܡܘܣܐ ܕܐܠܗܐ܂ ܘܕܬܪ̈ܬܝܢ ܒܒܥܠ ܛܠܝܘܬܗ܂ ܘܕܬܠܬ ܒܙܢܝܘܬܐ ܕܓܘܪܐ܂ ܕܡܢ ܢܘܟܪܝܐ ܐܩܝܡܬ ܝܠܕܐ܃
23:24 ܐܦ ܗܝ ܡܢ ܟܢܘܫܬܐ ܬܦܘܩ܂ ܘܥܠ ܝܠܕܝ̈ܗ ܚܛܗ̈ܝܗ ܢܬܕܟܪܘܢ܂
23:25 ܠܐ ܢܪܡܘܢ ܒܢܝܗ ܥܩܪܐ ܒܐܪܥܐ܂ ܘܣܘ̈ܟܝܗ ܠܐ ܢܥܒ̈ܕܢ ܦܐܪ̈ܐ܂
23:26 ܘܢܫܬܒܩ ܠܠܘܛܬܐ ܕܘܟܪܢܗ܂ ܘܚܘ̈ܒܝܗ ܠܐ ܢܬܥܛܘܢ܂
23:27 ܘܢܕܥܘܢ ܟܠܗܘܢ ܥܡܘܪ̈ܝܗ ܕܐܪܥܐ܂ ܘܢܣܬܟܠܘܢ ܟܠ ܕܡܫܬܚܪܝܢ ܒܬܒܝܠ܂ ܕܠܝܬ ܕܛܒܐ ܡܢ ܕܚܠܬܗ ܕܐܠܗܐ܂ ܘܠܝܬ ܕܒܣܝܡ ܡܢ ܕܠܡܛܪ ܦܘܩ̈ܕܢܘܗܝ܀

next chapter