The Comprehensive Aramaic Lexicon

26:01	ܐܢܬܬܐ ܛܒܬܐ ܛܘܒܘܗܝ ܠܒܥܠܗ܂ ܡܛܠ ܕܝܘ̈ܡܬܐ ܕܚܝܘ̈ܗܝ ܐܥܝܦܝܢ ܐܢܘܢ܂
26:02	ܐܢܬܬܐ ܛܒܬܐ ܬܬܝܗܒ ܠܓܒܪܐ ܕܕܚܠ ܡܢ ܡܪܝܐ ܚܠܦ ܥܒ̈ܕܘܗܝ ܛܒ̈ܐ܂
26:03	ܐܢܬܬܐ ܚܝܠܬܢܝܬܐ ܬܒܣܡ ܒܥܠܗ܃ ܘܫ̈ܢܝ ܚܝܘܗ̈ܝ ܒܚܕܘܬܐ ܢܫܠܡ܂
26:04	ܐܢ ܥܬܝܪ ܘܐܢ ܡܣܟܝܢ܂ ܠܒܗ ܛܒ ܒܟܘܠ ܥܕܢ܂ ܘܐܦܘ̈ܗܝ ܢܗܝܪ̈ܢ܂ ܀
26:05	ܡܢ ܬܠܬ ܙܥ ܠܒܝ܂ ܘܡܢ ܐܪ̈ܒܥ ܣܓܝ ܕܚܠܬ܂ ܪܛܘܢܝܐ ܕܟܢܘܫܬܐ ܒܣܘܓܐܐ ܕܥܡܐ܂
26:06	ܘܡܚܘܬܐ ܕܠܫܢܐ ܟܠܗܝܢ ܐܟܚܕܐ܂
26:07	ܢܝܪܐ ܩܫܝܐ ܐܢܬܬܐ ܒܝܫܬܐ܂ ܘܡܢ ܕܡܣܝܒܪ ܠܗ ܐܚܕ ܥܩܪܒܐ܂
26:08	ܪܘܓܙܐ ܪܒܐ܂ ܐܢܬܬܐ ܪܘܝܬܐ ܘܦܗܝܬܐ܂ ܗܝ ܨܥܪܗ ܠܐ ܡܟܣܝܐ܂
26:09	ܙܢܝܘܬܗ ܕܐܢܬܬܐ ܒܡܪܡܘܬ ܥ̈ܝܢܝܗ܂ ܘܡܢ ܓܒܝܢܝܗ ܬܬܝܕܥ܂
26:10	ܥܠ ܚܨܝܦܬܐ ܐܣܓܐ ܢܛܘܪ̈ܐ܂ ܡܛܠ ܕܠܝܬ ܠܗ ܢܝܚܐ ܐܠܐ ܐܢ ܓܢܒܬ܂
26:11	ܒܬܪ ܚܨܝܦܬ ܥ̈ܝܢܐ ܗܪܛ ܘܠܐ ܬܫܬܘܚܪ ܕܠܡܐ ܬܕܓܠ ܒܟ܂
26:12	ܐܝܟ ܨܗܝܐ ܕܥܐܠ ܡܢ ܐܘܪܚܐ܃ ܘܦܘܡܗ ܦܬܝܚ ܠܡ̈ܝܐ ܩܪܝܪ̈ܐ܃ ܘܡܢ ܟܠ ܡ̈ܝܢ ܫܬܐ܃ ܘܥܠ ܟܠ ܩܝܣ ܡܣܬܡܟ܃ ܘܩܕܡ ܟܠ ܓܐܪܐ ܦܬܝܚ ܩܛܪܩܗ܃ ܗܟܢܐ ܗܝ ܐܢܬܬܐ ܓܝܪܬܐ܂ ܕܠܟܠ ܐܢܫ ܦܬܝܚ ܪܚܡܗ܀
26:14	ܡܘܗܒܬܗ ܕܡܪܝܐ ܐܢܬܬܐ ܛܒܬܐ܂ ܠܝܬ ܕܡ̈ܝܐ ܠܒܨܝܪܘܬ ܓܓܪܬܐ܂

26:15	ܛܝܒܘܬܐ ܥܠ ܛܝܒܘܬܐ ܐܢܬܬܐ ܒܗܘܬܢܝܬܐ ܘܠܝܬ ܡܬܩܠܐ ܠܒܨܝܪܘܬ ܦܘܡܐ܂

26:16	ܐܝܟ ܫܡܫܐ ܕܕܢܚ ܒܪܩܝܥܐ ܕܫܡܝܐ܂ ܗܟܢܐ ܫܘܦܪܗ ܕܐܢܬܬܐ ܛܒܬܐ ܒܡܘܬܒ ܒܝܬܗ܃
26:17	ܐܝܟ ܫܪܓܐ ܕܡܢܗܪ ܥܠ ܡܢܪܬܐ ܕܩܘܕܫܐ ܫܘܦܪܗ ܕܐܢܬܬܐ ܒܡܩܡ ܒܝܬܗ܂
26:18	ܐܝܟ ܚܘܡܪ̈ܐ ܕܕܗܒܐ ܥܠ ܐܣܛܘܢܐ ܕܣܐܡܐ܂ ܝܐ̈ܝܢ ܥܩܒ̈ܬܗ ܒܡܬܩܢ ܒܝܬܗ܀܂ ܀
26:28	ܥܠ ܬܪ̈ܬܝܢ ܨܒ̈ܘܢ ܬܘܪ ܠܒܝ܂ ܘܥܠ ܬܠܬ ܣܓܝ ܐܬܐܒܫ ܠܝ܂ ܥܠ ܓܒܪܐ ܒܪ ܚܐܪ̈ܐ ܕܐܬܡܣܟܢ ܘܐܨܛܪܟ ܘܥܠ ܐܢܫ̈ܐ ܡܪ̈ܝ ܫܡܐ ܕܐܬܒܨܪܘ ܡܢ ܐܝܩܪܗܘܢ܂ ܘܥܠ ܡܢ ܕܗܦܟ ܡܢ ܕܚܠܬܗ ܕܐܠܗܐ܂ ܠܥܒܕ ܥܘܠܐ ܐܫܠܡܝܗܝ ܠܝܘܡܐ ܕܩܛܠܐ܂
26:29	ܒܩܫܝܘܬܐ ܪܒܬܐ ܡܬܦܨܐ ܬܓܪܐ ܡܢ ܚܛܗ̈ܐ܂ ܐܠܐ ܒܗܕܐ ܒܗܕܐ ܡܬܬܩܠ܂ ܚܢܘܝܐ ܕܝܢ ܠܐ ܡܙܕܕܩ ܡܢ ܚܛܗ̈ܐ܂