The Comprehensive Aramaic Lexicon

28:01	ܘܓܒܪܐ ܢܟܘܠܬܢܐ ܡܘܒܕ ܐܘܪܚܗ܂ ܘܦܘܪܥܢܐ ܡܢ ܩܕܡ ܐܠܗܐ ܢܫܟܚ܂ ܡܛܠ ܕܟܠ ܚܛܗܘ̈ܗܝ ܡܛܪ ܢܛܝܪܝܢ ܠܗ܃
28:02	ܫܒܘܩ ܡܐ ܕܒܠܒܟ܂ ܘܒܬܪܟܢ ܨܠܐ܂ ܘܟܠ ܚܛܗ̈ܝܟ ܢܫܬܒܩܘܢ ܠܟ܂
28:03	ܒܪܢܫܐ ܠܒܪ ܐܢܫܐ ܢܛܪ ܪܘܓܙܐ܃ ܡܢ ܩܕܡ ܐܠܗܐ ܡܢܐ ܒܥܐ ܐܣܝܘܬܐ܂
28:05	ܗ݀ܘ ܕܒܪܢܫܐ ܗܘ ܠܐ ܨܒܐ ܠܡܫܒܩ܂ ܠܗ ܡܢܘ ܫܒܩ ܠܗ ܚܛܗ̈ܘܗܝ܃
28:06	ܐܬܕܟܪ ܡܘܬܐ ܘܐܥܒܪ ܒܥܠܕܒܒܘܬܐ܂ ܘܠܫܝܘܠ ܘܠܐܒܕܢܐ ܘܐܬܟܠܝ ܡܢ ܕܠܡܚܛܐ܂
28:07	ܐܬܕܟܪ ܦܘܩܕܢܐ ܘܠܐ ܬܣܢܐ ܚܒܪܟ ܩܕܡ ܐܠܗܐ܂ ܘܗܒ ܠܗ ܡܐ ܕܚܣܝܪ ܠܗ܂
28:08	ܐܪܚܩ ܡܢ ܗܪܬܐ ܘܢܬܪܚܩܘܢ ܡܢܟ ܚܛܗ̈ܐ܂
28:09	ܒܪܢܫܐ ܓܝܪ ܥܘܠܐ ܕܪܚܡ ܕܝܢܐ܂ ܒܥܠܕܒܒܘܬܐ ܪܡܐ ܒܝܬ ܐܚ̈ܐ܀܀
28:10	ܟܠ ܕܬܪܡܐ ܒܢܘܪܐ ܢܐܩܕ܂ ܘܟܠ ܕܬܣܓܐ ܒܕܝܢܐ ܡܣܓܐ ܣܓܐ܂ ܐܝܟ ܬܫܒܘܚܬܐ ܕܐܝܕܝ̈ܐ ܕܐܢܫܐ ܗܟܢܐ ܪܘܓܙܗ܃ ܘܐܝܟ ܣܘܓܐܐ ܕܢܟ̈ܣܘܗܝ ܗܟܢܐ ܪܡܐ ܪܘܚܗ܃
28:11	ܨܪܘܐ ܘܥܝܛܪܢܐ ܡܘܩܕܝܢ ܢܘܪܐ܂ ܘܕܝ݂ܢ̈ܐ ܣܓܝ̈ܐܐ ܐܫܕܝܢ ܕܡܐ܂
28:12	ܐܢ ܬܦܘܚ ܒܢܘܪܐ ܬܐܩܕ܂ ܘܐܢ ܬܪܘܣ ܥܠܝܗ ܡܝ̈ܐ ܬܕܥܟ܂ ܘܬܪ̈ܬܝܗܝܢ ܡܢܟ ܐܢ̈ܝܢ܀܀
28:13	ܘܐܦ ܠܫܢܐ ܬܠܝܬܝܐ ܠܝܛ ܢܗܘ‍[‍ܐ‍]‍܂ ܕܩ̈ܛܠܐ ܣܓܝ̈ܐܐ ܐܪܡܝ܂
28:14	ܠܫܢܐ ܬܠܝܬܝܐ ܣܓ̈ܝܐܐ ܒܫܒܝܐ ܐܦܩ܂ ܘܒܕܪ ܐܢܘܢ ܡܢ ܥܡܐ ܠܥܡܐ܂ ܘܐܦ ܠܐܢܫ̈ܐ ܡܝܩܪ̈ܐ ܕܡܕܝܢ̈ܬܐ ܡܢ ܒ̈ܬܝܗܘܢ ܛܪܕ܂ ܘܒ̈ܬܐ ܕܡܠܟ̈ܐ ܡܚܪܒܘ ܐܚܪܒ܂
28:15	ܠܫܢܐ ܬܠܝܬܝܐ܂ ܣܓܝ̈ܐܐ ܐܦܩ ܒܫܒܝܐ ܘܐܪܚܩ ܐܢܘܢ ܡܢ ܢܟ̈ܣܝܗܘܢ܃
28:17	ܡܚܘܬܐ ܕܚܘܛܪܐ ܥܒܕܐ ܫܘܚܢܐ܂ ܘܡܚܘܬܐ ܕܠܫܢܐ ܬܒܪܐ ܓܪ̈ܡܐ܂
28:18	ܣܓܝ̈ܐܝܢ ܐܢܘܢ ܩܛܝ̈ܠܝ ܚܪܒܐ܂ ܒܪܡ ܠܐ ܐܝܟ ܩܛܝ̈ܠܝ ܠܫܢܐ܂
28:19	ܛܘܒܘܗܝ ܠܓܒܪܐ ܕܐܬܦܨܝ ܡܢܗ܂ ܘܒܚܡܬܗ ܠܐ ܐܬܚܠܛ܂ ܛܘܒܘܗܝ ܠܡܢ ܕܠܐ ܢܓܕ ܒܢܝܪܗ܃ ܘܒܐܣܘܪ̈ܘܗܝ ܠܐ ܐܬܐܣܪ܂
28:20	ܡܛܠ ܕܢܝܪܐ ܩܫܝܐ ܢܝܪܗ܂ ܘܐܣܘܪ̈ܘܗܝ ܐܣܘܪ̈ܐ ܐܢܘܢ ܕܦܪܙܠܐ܂
28:21	ܡܘܬܐ ܒܝܫܐ ܡܘܬܗ܂ ܘܢܝܚܐ ܐܝܬ ܒܫܝܘܠ ܛܒ ܡܢ ܕܠܘܬܗ܂
28:22	ܠܐ ܬܐܩܕ ܒܙܕܝܩ̈ܐ܂ ܘܙܠܝܩ̈ܐ ܕܢܘܪܐ ܠܐ ܢܘܩܕܘܢܗ܂

28:23	ܟܠ ܕܫܒܩܝܢ ܕܚܠܬܗ ܕܐܠܗܐ ܒܗ ܢܦܠܘܢ܂ ܘܒܗܘܢ ܬܐܩܕ ܢܘܪܐ ܘܠܐ ܬܕܥܟ܃ ܘܬܫܠܛ ܒܗܘܢ ܐܝܟ ܐܪܝܐ܂ ܘܐܝܟ ܢܡܪܐ܂ ܬܒܣܒܣ ܐܢܘܢ܂

28:24	ܐܝܟܢܐ ܓܝܪ ܕܣܐܓ ܐܢܬ ܟܪܡܟ ܒܗ̈ܛܛܐ܂ ܗܟܢܐ ܐܦ ܠܦܘܡܟ ܥܒܕ ܬܪ̈ܥܐ ܘܣܘܟܪ̈ܐ܂ ܠܟܣܦܟ ܘܠܕܗܒܟ ܥܒܕ ܐܢܬ ܚܬܡܐ܂
28:25	ܘܠܡܠܬܟ ܥܒܕ ܡܬܩܠܐ܂
28:26	ܐܙܕܗܪ ܕܠܡܐ ܬܦܠ܂ ܕܠܐ ܬܬܪܡܐ ܩܕܡ ܣܢܐܟ܂