The Comprehensive Aramaic Lexicon

31:01	ܫܗܪܐ ܡܕܝܒ ܒܣܪܗ ܕܥܬܝܪܐ܂ ܘܨܦܬܐ ܡܦ݂ܪܕܐ ܫܢܬܗ܃
31:02	ܨܦܬܐ ܕܡܙܘܢܐ ܕܚܩܐ ܢܘܡܬܐ܃ ܘܡܪܥܐ ܬܩܝܦܐ ܡ݁ܦܪܕ ܫܢܬܐ܂
31:03	ܥܡܠ ܥܬܝܪܐ ܠܡܟܢܫܘ ܠܗ ܢܟ̈ܣܐ܂ ܘܡܬܢܝܚ ܠܡܩܒܠܘ ܬܦܢܝܩ̈ܐ܂
31:04	ܥܡܠ ܡܣܟܢܐ ܠܚܣܝܪܘܬܐ ܕܥܘܡܪܗ܃ ܘܐܢ ܢܬܢܝܚ܂ ܢܗܘܐ ܨܪܝܟܐ܂
31:05	ܕܪܚܡ ܡܡܘܢܐ ܠܐ ܢܙܟܐ܂ ܘܕܪܕܦ ܒܬܪ ܩܢܝܢܐ ܒܗ ܢܛܥܐ܂
31:06	ܣܓܝ̈ܐܐ ܓܝܪ ܕܗܘܘ ܥܬܝܪ̈ܐ ܘܐܬܬܟܠܘ ܥܠ ܢܟ̈ܣܝܗܝܢ܃ ܘܠܐ ܐܫܟܚܘ ܠܡܦܨܝܘ ܐܢܘܢ ܡܢ ܒܝܫܬܐ܂ ܐܦܠܐ ܠܡܦܪܩ ܐܢܘܢ ܒܝܘܡܐ ܕܩܨܗܘܢ܂
31:07	ܡܛܠ ܕܬܘܩܠܬܐ ܗܘ ܡܡܘܢܐ ܠܣܟ̈ܠܐ܃ ܘܟܠ ܡܢ ܕܛܥܐ ܒܗ ܗܘ ܡܬܬܩܠ܂
31:08	ܛܘܒܘܗܝ ܠܥܬܝܪܐ ܕܐܫܬܟܚ ܕܠܐ ܡܘܡܐ܂ ܘܒܬܪ ܡܡܘܢܐ ܠܐ ܛܥܐ܂
31:09	ܡܢܘ ܗܢܐ ܘܢܫܒܚܝܘܗܝ܃ ܕܣܓܝ ܓܒܪ̈ܘܬܐ ܥܒܕ ܒܥܡܗ܂
31:10	ܡܢܘ ܗܢܐ ܕܐܬܕܒܩ ܒܗ ܘܗܘܐ ܠܗ ܫܠܡܐ܃ ܘܗܘܐ ܠܗ ܠܬܫܒܘܚܬܐ܂ ܡܢܘ ܗܢܐ ܕܐܫܟܚ ܠܡܛܥܐ ܘܠܐ ܛܥܐ܂ ܘܠܡܒܐܫܘ ܠܚܒܪܗ ܘܠܐ ܐܒܐܫ
31:11	ܡܛܠ ܗܢܐ ܢܥܫܢ ܛܘܒܗ܂ ܘܬܫ̈ܒܚܬܗ ܢܬܢܝ̈ܢ ܟܢ̈ܘܫܬܐ܀
31:12	ܒܪܝ ܐܢ ܬܬܒ ܥܠ ܦܬܘܪܗ ܕܓܒܪܐ ܥܬܝܪܐ ܠܐ ܬܦܬܚ ܓܓܪܬܟ ܥܠܘܗܝ܃ ܘܠܐ ܬܐܡܪ ܕܠܐ ܣܦܩ ܠܝ܂
31:13	ܡܛܠ ܕܒܝܫܘܬ ܥܝܢܐ ܣܢܐ ܐܠܗܐ܂ ܘܕܒܝܫ ܡܢܗ ܠܐ ܒܪܐ܂ ܡܛܠ ܗܢܐ ܡܢ ܩܕܡ ܟܠܡܕܡ ܙܝܥܐ ܥܝܢܐ܂ ܘܡܢ ܐܦ̈ܐ ܕܡܥܐ ܕܡ̈ܥܐ܂
31:14	ܡܐ ܕܚܙܝܬ ܠܐ ܬܘܫܛ ܐܝܕܟ܂ ܘܒܠܓܬܐ ܠܐ ܬܚܒܘܨ ܐܝܕܟ܃
31:15	ܕܥ ܕܚܒܪܟ ܐܝܟ ܕܝܠܟ܂
31:16	ܠܥܣ ܐܝܟ ܓܒܪܐ ܡܕܡ ܕܣܝܡ ܩܕܡܝܟ܂ ܘܠܐ ܬܗܘܐ ܓܓܪܢ ܕܠܐ ܬܣܬܢܐ܂
31:17	ܐܙܕܗܪ ܡܛܠ ܡܪܕܘܬܐ܂
31:18	ܘܟܕ ܬܬܒ ܒܝܬ ܣܓܝ̈ܐܐ ܠܡܠܥܣ܂ ܠܐ ܬܘܫܛ ܐܝܕܟ ܩܕܡܝܗܘܢ܂

31:19	ܡܕܡ ܓܝܪ ܙܥܘܪ ܡܣܬܗ ܕܙܕܝܩܐ܃ ܘܥܠ ܡܫܟܒܗ ܠܐ ܢܬܬܙܝܥ܂ ܟܐܒܐ ܘܫܗܪܐ ܘܫܚܩܐ ܘܫܘܢܩܐ ܘܗܦܟ ܓܘܐ ܥܡ ܓܒܪܐ ܝܥܢܐ܂

31:20	ܫܢܬܐ ܕܚܠܝܡܘܬܐ ܥܡ ܓܒܪܐ ܕܒܣܝܡܐܝܬ ܥܒܝܕ܂ ܕܥܕܡܐ ܠܨܦܪܐ ܢܕܡܟ ܘܢܦܫܗ ܠܘܬܗ܂
31:21	ܘܐܢ ܬܬܐܠܨ ܒܡܐܟ̈ܠܬܐ܂ ܓܕ ܢܦܫܟ ܡܢ ܡܨܥܬ ܓܘܐ ܘܬܬܢܝܚ܀
31:22	ܫܡܥ ܒܪ̈ܝ ܘܠܐ ܬܒܣܪ ܥܠܝ܃ ܘܠܚܪܬܐ ܬܫܟܚ ܡܠܝ̈܂ ܒܟܠ ܥܒܕܝ̈ܟ ܗܘܝܬ ܡܟܝܟ܂ ܘܟܠ ܒܝܫܐ ܠܐ ܬܬܩܪܒ ܠܟ܂
31:23	ܥܝܢܐ ܛܒܬܐ ܥܠ ܠܚܡܐ ܡܒܪܟܐ܂ ܘܣܗܕܘܬܐ ܛܒܬܐ ܡܗܝܡܢܐ܂
31:25	ܐܦ ܥܠ ܚܡܪܐ ܠܐ ܬܬܓܒܪ܂ ܡܛܠ ܕܠܣ̈ܓܝܐܐ ܐܘܒܕ ܥܬܝܩܐ܂
31:26	ܐܟܙܢܐ ܓܝܪ ܕܟܘܪܐ ܒ݁ܩܐ ܥܒ݁ܕܗ ܕܩܝܢܝܐ܂ ܗܟܢܐ ܚܡܪܐ ܡܓܪܝܢܐ ܗܘ ܕܥܘܠܐ܂
31:27	ܐܝܟ ܡܝ̈ܐ ܚܝ̈ܐ ܚܡܪܐ ܠܒܪܢܫܐ ܟܕ ܢܫܬܝܘܗܝ ܒܘܠܝܬܗ܂ ܡܢܐ ܐܢܘܢ ܚܝܘ̈ܗܝ ܕܚܣܝܪ ܚܡܪܐ܂ ܕܗܘ ܡܢ ܒܪܫܝܬ ܠܚܕܘܬܐ ܐܬܒܪܝ܂
31:28	ܚܕܘܬܐ ܕܠܒܐ ܘܬܦܢܝܩ̈ܐ ܘܥ̈ܕܢܐ ܛܒ̈ܐ܂ ܚܡܪܐ ܕܡܫܬܬܐ ܒܘܠܝܬܗ܂
31:29	ܟܐܒܐ ܘܡܣܟܢܘܬܐ ܘܟܐܒ ܪܫܐ܂ ܚܡܪܐ ܕܡܫܬܬܐ ܒܚܪܝܢܐ܂
31:30	ܣܓܝܐܘܬܐ ܕܚܡܪܐ ܥܒܕܬ ܠܣܟܠܐ ܬܘܩܠܬܐ܂ ܚܣܪ ܚܝܠܗ ܘܣ̈ܓܝ ܨܘܠܦ̈ܬܗ܂
31:31	ܒܡܫܬܝܐ ܕܚܡܪܐ ܠܐ ܬܟܣ ܪܚܡܟ܂ ܘܠܐ ܬܗܪܝܘܗܝ ܒܚܕܘܬܗ܃ ܡ̈ܠܐ ܕܚܘܣܪܢܐ ܠܐ ܬܐܡܪ ܠܗ܂ ܘܠܐ ܬܨܐ ܥܡܗ ܠܥܝܢ ܒܢܝܢܫܐ܂