The Comprehensive Aramaic Lexicon

34:01	ܕܒܥܐ ܣܪܝܩܘܬܐ ܡܫܟܚ ܟܕܒܘܬܐ܂ ܘܚܠܡܐ ܚܕܘܬܐ ܣܪܝܩܬܐ܀܀
34:02	ܐܝܟ ܐܢܫ ܕܐܚܝܕ ܛܠܠܐ ܘܡܦܪܚ ܥܘܦܐ܂ ܗܟܢܐ ܗܘ ܡܢ ܕܡܗܝܡܢ ܠܚܙܘܐ ܕܠܠܝܐ܂
34:03	ܗܟܢܐ ܗܘ ܚܙܘܐ ܘܚܠܡܐ ܕܠܠܝܐ ܕܠܘܩܒܠ ܦܪܨܘܦܐ ܕܡܘܬܐ ܕܐ̈ܦܐ܂
34:04	ܘܡܢ ܪܝܫ ܥܡܗ ܢܦܩ ܙܟܘܬܐ܂ ܐܘ ܡܢܘ ܟܕܒܐ ܕܢܙܟܐ܂
34:05	ܟܠ ܢܚ̈ܫܐ ܘܩܨ̈ܡܐ ܘܚܠܡ̈ܐ ܛܥܝܘܬܐ܂ ܘܕܡܗܝܡܢ ܠܗܘܢ ܬܡܢ ܠܒܗ܂
34:06	ܘܐܢ ܡܢ ܩܕܡ ܐܠܗܐ ܐܬܦܩܕ ܠܡܛܥܐ ܒܚܘ̈ܫܒܢܝ ܠܠܝܐ܃ ܠܐ ܬܬܠ ܠܗܘܢ ܠܒܟ܂
34:07	ܣܓܝ̈ܐܐ ܓܝܪ ܕܒܚ̈ܠܡܐ ܛܥܘ ܐܘܪܚܐ ܘܐܬܬܩܠܘ ܒܫܒ̈ܝܠܝܗܘܢ܂
34:08	ܒܐܬܪܐ ܕܠܝܬ ܒܗ ܚܛܗ̈ܐ ܪܥ݁ܐ ܐܠܗܐ܂ ܡܛܠ ܕܚܟܡܬܐ ܕܥܘ̈ܠܐ ܒܠܠܝܐ ܡܬܗܝܡܢܐ܂
34:09	ܓܒܪܐ ܚܟܝܡܐ ܢܒܩܐ ܣܓܝ܂ ܘܕܟܫܪ ܠܟܠܡܕܡ ܒܨܐ܂
34:10	ܕܠܐ ܢܣܝ ܩܠܝܠ ܗܘ ܝܕܥ܂ ܘܕܢܣܝ ܐܣܓܝ ܚܟܡܬܐ܂
34:12	ܣܓܝ ܚܙܝܬ ܟܕ ܢܣܝܬ܂ ܨܒ̈ܘܬܐ ܣܓܝ̈ܐܬܐ ܥܠܝ ܥܒܪ܂
34:13	ܙܒ̈ܢܬܐ ܣܓܝ̈ܐܬܐ ܠܡܘܬܐ ܡܛܝܬ܂ ܘܐܬܦܨܝܬ ܡܛܠܬܗܝܢ܂
34:14	ܨܒܝܢܐ ܕܕܚܠܘ̈ܗܝ ܥܒܕ ܡܪܝܐ܂ ܡܛܠ ܕܪܒ ܗܘ ܣܒܪܗ ܘܦܪܩ܂
34:15	ܕܕܚܠ ܠܐܠܗܐ ܛܘܒܝܗ݀ ܠܪܘܚܗ܃ ܥܠ ܡܢܘ ܐܬܬܟܠ܂ ܘܡܢܘ ܗܘܐ ܠܗ ܣܡܘܟܐ܂
34:19	ܥܝܢܘ̈ܗܝ ܕܡܪܝܐ ܥܠ ܟܠܗܘܢ ܥܒ݂̈ܕܘܗܝ܂ ܘܡ݁ܓܢ ܘܦܪܩ܃ ܘܬܘܟܠܢܐ ܗܘ ܪܒܐ܂ ܘܡܣܬܪܢܐ ܡܢ ܣܢܐܐ܂ ܘܦܪܘܩܐ ܡܢ ܒܥܠܕܒܒܐ܂ ܘܡܫܘܙܒܢܐ ܗܘ ܡܢ ܡܚܘܬܐ܂ ܘܣܡ݁ܟ ܡܢ ܕܠܡܦܠ܂
34:20	ܚܕܘܬܐ ܕܠܒܐ ܘܢܘܗܪܐ ܕܥܝ̈ܢܐ܃ ܘܐܣܝܘܬܐ ܕܚܝ̈ܐ ܘܒܘܪ̈ܟܬܐ܂
34:21	ܗܠܝܢ ܟܠܗܝܢ ܐܥܦܐ ܥܠ ܙܕܝܩ̈ܐ ܢܐܬܝ̈ܢ܀ ܥܠܘ̈ܬܗܘܢ ܕܥܘ݁̈ܠܐ ܕܥ݂ܘܠܐ ܐܢܝ̈ܢ܂ ܘܠܐ ܡܬܩܒܠܝܢ ܩܘܪ̈ܒܢܝܗܘܢ܂
34:23	ܠܐ ܓܝܪ ܨܒܐ ܐܠܗܐ ܒܥܠܘ̈ܬܗܘܢ ܕܚܛܝ̈ܐ܂ ܘܐܦ ܠܐ ܒܣܘܓܐܐ ܕܩܘܪ̈ܒܢܝܗܘܢ ܫܒܩ ܠܗܘܢ܂
34:24	ܐܝܟ ܐܢܫ ܕܢܟܣ ܒܪܐ ܩܕܡ ܐܒܘܗܝ܂ ܗܟܢܐ ܡܢ ܕܡܩܪܒ ܩܘܪܒܢܐ ܡܢ ܕܡܣܟ̈ܢܐ܂
34:25	ܠܚܡܐ ܕܚܣܕܐ ܚܝܝ̈ܗܘܢ ܕܡܣܟ̈ܢܐ܃ ܘܕܟܠܐ ܠܗ ܡܢܗܘܢ ܐܫܕ ܕܡܐ ܙܟܝܐ܂
34:26	ܕܩܛܠ ܚܒܪܗ ܝܪܬ ܢܟ̈ܣܘܗܝ܂ ܘܕܐܫܕ ܕܡܐ ܙܟܝܐ ܠܐܠܗܐ ܓܠܙ܂ ܕܛܠܡ ܐܓܪܐ ܕܐܓܝܪܐ ܛܠܡ ܒܪܝܗ܃ ܘܗܘ ܡܩܒܠ ܦܘܪܥܢܐ ܒܝܫܐ܂
34:28	ܚܕ ܒܢܐ ܘܐܚܪܢܐ ܣܬܪ܂ ܡܢܐ ܐܗܢܝܘ܂ ܐܠܐ ܥܡܠܐ ܣܪܝܩܐ܂
34:29	ܚܕ ܡܒܪܟ ܘܐܚܪܢܐ ܡܠܝܛ܃ ܒܩܠܐ ܕܡܢ ܡܢ ܬܪ̈ܝܗܘܢ ܢܫܡܥ ܐܠܗܐ܂

34:30	ܕܣܚܐ ܡܢ ܡܝܬܐ ܘܗܦܟ ܩܪܒ ܠܗ܂ ܡܢܐ ܐܗܢܝ ܡܢ ܡܣܚܘܬܗ܂

34:31	ܘܕܨܐܡ ܥܠ ܚܛܗ̈ܘܗܝ ܘܗܦܟ ܥܒܪ ܠܗܘܢ ܨܠܘܬܗ ܡܢܘ ܫܡܥ܂ ܐܘ ܡܢܐ ܐܗܢܝ ܕܨܐܡ܂