← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62066: Sirach

Click on a word for lexical analysis
Click on a red-colored coordinate for comments and/or translations of the line

previous chapter


38:01 ܝܩܪ ܐܣܝܐ ܥܕ ܠܐ ܢܬܒܥܐ ܠܟ܃
38:02 ܡܛܠ ܕܐܦ ܠܗ ܐܠܗܐ ܒܪܝܗܝ܃ ܡܢ ܩܕܡ ܐܠܗܐ ܢܬܚܟܡ ܐܣܝܐ܂ ܘܡܢ ܡ̈ܠܟܐ ܢܣܒ ܡܘܗ̈ܒܬܐ܂
38:03 ܡܢ ܬܪܥܝܬܗ ܕܐܣܝܐ ܢܪܡܪܡܘܢܗ܂ ܘܩܕܡ ܡ̈ܠܟܐ ܢܩܝܡܘܢܗ܀
38:04 ܐܠܗܐ ܡܢ ܐܪܥܐ ܒܪܐ ܣܡ̈ܡܢܐ܂ ܘܓܒܪܐ ܚܟܝܡܐ ܠܐ ܢܒܣܐ ܥܠܝܗܘܢ܂
38:05 ܒܝܕ ܩܝܣܐ ܓܝܪ ܚܠܝܘ ܡܝ̈ܐ ܡܪ̈ܝܪܐ܂ ܡܛܠ ܕܢܬܝܕܥ ܚܝܠܗ ܕܐܠܗܐ
38:06 ܕܝܗܒ ܠܒܢܝܢܫܐ ܚܟܡܬܐ ܠܡܫܬܒܚܘ ܒܓܒܪ̈ܘܬܗ܂
38:07 ܒܗܘܢ ܐܣܝܐ ܡܢܝܚ ܡܢ ܟܐܒ̈ܐ܂
38:08 ܘܐܦ ܒܣܡܐ ܡܬܩܢ ܒܣܡ̈ܢܐ܂ ܡܛܠ ܕܠܐ ܢܒܛܠ ܥܒܕܐ ܘܚܟܡܬܐ ܡܢ ܐܦܝ̈ ܐܪܥܐ܀܀
38:09 ܒܪܝ ܐܦ ܒܡܪܥܟ ܨܠܐ ܩܕܡ ܐܠܗܐ ܕܗܘܝܘ ܡܐܣܐ܂
38:10 ܐܥܒܪ ܥܘܠܐ ܘܫܘܩܪܐ܂ ܘܡܢ ܟܠ ܚܛܗ̈ܐ ܕܟܐ ܠܒܟ܂
38:12 ܘܐܦ ܠܐܣܝܐ ܗܒ ܐܬܪܐ܃ ܡܛܠ ܕܐܦ ܒܗ ܐܝܬ ܒܗ ܗܢܝܢܐ܂
38:13 ܡܛܠ ܕܐܝܬ ܙܒܢܐ ܕܒܐܝܕܗ ܡܨܠܚܐ ܐܣܝܘܬܐ܂
38:14 ܕܢܨܠܐ ܩܕܡ ܐܠܗܐ܂ ܘܢܬܩܢ ܒܐܝܕܗ ܚܘܠܡܢܐ܂ ܘܬܐܬܐ ܐܣܝܘܬܐ ܒܐܝܕܗ ܘܚܝ̈ܐ܂
38:15 ܡܛܠ ܕܡܢ ܕܚܛܐ ܩܕܡ ܐܠܗܐ ܡܬܝܗܒ ܠܐܝܕܝ̈ ܐܣܝܐ܂
38:16 ܒܪܝ ܥܠ ܡܝܬܐ ܐܣܓܐ ܕܡ̈ܥܐ܂ ܘܢܟܐܒ ܠܟ ܘܐܡܪ ܐܘܠܝܬܐ܂ ܘܐܝܟ ܡܐ ܕܘܠܐ ܠܗ ܟܢܘܫ ܦܓܪܗ܂ ܘܠܐ ܬܒܣܐ ܥܠ ܩܒܘܪܬܗ܂
38:17 ܚܡܪܐ ܘܣܝܒܪ̈ܬܐ ܠܒ̈ܢܝ ܐܢܫܐ ܕܡܪܩܕܝܢ܂ ܘܥܒܕ ܐܒܠܐ ܒܙܕܩܗ܃ ܝܘܡܐ ܘܬܪ̈ܝܢ ܡܛܠ ܒ̈ܢܝ ܐܢܫܐ܂ ܘܐܬܒܝܐ ܡܛܠ ܚܝ̈ܐ܂
38:18 ܡܛܠ ܕܡܢ ܟܪܝܘܬܐ ܡܬܝܠܕܐ ܥܩܬܐ܂
38:19 ܗܟܢܐ ܓܝܪ ܠܒܐ ܒܝܫܐ܂ ܝܬܝܪ ܡܢ ܡܘܬܐ ܬܒܪ ܒܨܦܬܐ ܠܡܣ̈ܟܢܐ ܘܡܝܬܐ ܥܩܬܐ܂ ܡܛܠ ܕܚܝ̈ܘܗܝ ܕܡܣܟܢܐ ܠܠܘܛܬܐ ܕܠܒܐ܀
38:20 ܠܐ ܬܬܠ ܠܒܟ ܠܡܘ̈ܡܬܐ܂
38:21 ܐܬܕܟܪ ܥܩܬܐ ܘܐܥܒܪ ܚܛܗ̈ܐ܂ ܘܠܐ ܬܬܟܠ ܥܠ ܥܘܬܪܐ ܡܛܠ ܕܠܝܬ ܒܗ ܣܒܪܐ܂ ܡܛܠ ܕܐܝܟ ܦܪܚܬܐ ܕܫܡܝܐ ܕܦܪܚܐ ܘܫܟܢܐ܂ ܗܟܢܐ ܗܘ ܥܘܬܪܐ ܩܕܡ ܒ̈ܢܝ ܐܢܫܐ܂ ܠܟ ܡܚܕܐ ܘܠܐܚܪܢܐ ܡܒܐܫ܂
38:22 ܐܬܕܟܪ ܕܦܘܣܩܢܐ ܗܘ ܠܟ܂ ܠܗ ܐܬܡܠܝ ܘܠܟ ܝܘܡܢܐ܂
38:23 ܐܝܟ ܕܒܛܠ ܡܝܬܐ ܗܟܢܐ ܒܛܠ ܕܘܟܪܢܗ܃ ܘܐܬܒܝܐ ܥܡ ܡܦܩܢܐ ܕܢܦܫܗ܂
38:24 ܚܟܡܬܗ ܕܣܦܪܐ ܬܘܣܦ ܠܗ ܚܟܡܬܐ܂ ܘܕܠܐ ܡܦܪܩ ܣܪ̈ܝܩܬܐ ܗܘ ܢܬܚܟܡ܂
38:25 ܡܢܐ ܓܝܪ ܢܬܚܟܡ ܐܚܝܕ ܚܪܒܐ ܕܦܕܢܐ܂ ܕܒܬܘܪ̈ܐ ܕܒܪ ܘܒܬܘܪ̈ܐ ܡܬܝܪ̈܂ ܘܫܘ̈ܥܝܬܗ ܥܡ ܒܢ̈ܝ ܬܘܪ̈ܐ ܗܝ܂
38:26 ܘܠܒܗ ܪܢܐ ܒܠܓܬܐ ܕܙܪܥܗ܂ ܘܫܗܪܗ ܠܡܓܡܪܘ ܥܒܕܗ܃
38:27 ܗܟܢܐ ܐܦ ܟܠܗܘܢ ܐܘ̈ܡܢܐ܂ ܡܬܬܙܝܥܝܢ ܐܟܚܕܐ܂ ܘܠܠܝܐ ܘܐܝܡܡܐ ܒܗܘܢ ܗܘ ܪܢܝܢ܂ ܒܥܒܕܐ ܕܓܠܦܐ ܘܕܛܒܥܐ ܘܕܡܪ̈ܓܢܝܬܐ܂ ܘܐܦ ܚܘܫܒ̈ܢܝܗܘܢ ܠܥܒܕܐ ܕܐܘܡܢܘܬܗܘܢ ܡܬܒܥܝܢ܂
38:28 ܠܡܬܒ ܥܠ ܟܘܪܐ ܘܠܡܣܬܟܠܘ ܒܡܐܢ̈ܝ ܡܬܩܠܐ܂ ܫܠܗ̈ܒܝܬܐ ܕܢܘܪܐ ܡܦܩ̈ܥܢ ܒܣܪܗ܃ ܘܝܩܕ ܒܚܡܬܐ ܕܢܘܪܐ܂ ܠܘܩܒܠ ܣܘܟܠܐ ܢܪܟܢ ܐܝܕܗ܂ ܘܠܘܩܒܠ ܨܘܪܬܐ ܕܥ݁ܒܕܗ݂ ܢ݂ܨ̈ܕܢ ܥ̈ܝܢܘܗܝ܃
38:29 ܗܟܢܐ ܐܦ ܦܚܪܐ ܕܝܬܒ ܥܠ ܓܝܓܠܐ܂ ܘܡܙܝܥ ܒܦܪܣܬܗ ܡܐܢܐ܂ ܥܝ̈ܢܘܗܝ ܒܡܐ̈ܢܝ ܟܠ ܥܒ݁ܕܗ܃
38:30 ܘܕܪ̈ܥܘܗܝ ܡܦܩ݁ܥܝܢ ܛܝܢܐ܂ ܘܥܕ ܠܐ ܡܐܬ ܟܦܝܦ ܘܓܗܝܢ܂ ܘܠܒܗ ܣܝܡ ܠܡܫ݁ܠܡܘ ܥܒ݁ܕܗ܂ ܘܫܗܪܗ݂ ܠܡܒ݂ܢܐ ܐܬܘܢܗ܂
38:31 ܟܠܗܘܢ ܗܠܝܢ ܡܛܠ ܟܘܫܪܗܘܢ܂ ܘܟܠ ܓܒܪ ܒܥܒܕܐ ܕܐܘܡܢܘܬܗܘܢ ܢܬܚܟܡܘܢ܂
38:32 ܘܒܠܥܕܝܗܘܢ ܠܐ ܡܬܝܬܒܐ ܡܕܝܢܬܐ܂ ܘܐܬܪ ܕܥܡܪܝܢ ܠܐ ܢܟܦܢܘܢ܂
38:33 ܒܪܡ ܠܡܠܟܐ ܕܥܡܐ ܠܐ ܢܬܒܘܢ܂ ܘܒܟܢܘܫܬܐ ܠܐ ܢܬܬܪܝܡܘܢ܂ ܘܥܠ ܟܘܪܣܝܐ ܕܕܝ݂ܢܐ ܠܐ ܢܬܒܘܢ܂ ܘܩܝܡ̈ܐ ܘܕܝ݂ܢ݂̈ܐ ܠܐ ܢܣܬܟܠܘܢ܂ ܠܐ ܢܬܒܝܢܘܢ ܝܘܠܦܢܐ ܕܚܟܡܬܐ܂ ܘܒܡ̈ܬܠܐ ܕܚܟܝܡ̈ܐ ܠܐ ܢܣܬܟܠܘܢ܂
38:34 ܡܛܘܠ ܕܒܥܒܝܕܬܗ ܕܥܠܡܐ ܗܢܘܢ ܢܗܝܪܝܢ܂ ܘܪܢܝܗܘܢ ܒܥܒ݁ܕܐ ܕܐܘܡܢܘܬܗܘܢ܂

next chapter