The Comprehensive Aramaic Lexicon

39:01	ܒܪܡ ܗܘ ܕܝܗܒ ܢܦܫܗ ܠܡܕܚܠ ܠܐܠܗܐ܃ ܘܠܡܣܬܟܠܘ ܢܡܘܣܐ ܕܚܝ̈ܐ܂ ܐܝܟ ܚܟܡܬܐ ܕܟܠܗܘܢ ܩܕܡ̈ܝܐ ܢܒܥܐ܂ ܘܠܘܬ ܢܒ̈ܝܐ ܩܕܡ̈ܝܐ ܢܬܦܢܐ܂
39:02	ܘܫܘ̈ܥܝܬܐ ܕܟܠ ܐܢܫܐ ܕܥܠܡܐ ܢܐܠܦ܂ ܘܕܥܡ̈ܝܩܢ ܢܬܚܫܒ܂
39:03	ܚܟܡܬܐ ܕܡ̈ܬܠܐ ܢܐܠܦ܂ ܘܒܟܠ ܣܬܝܪ̈ܬܐ ܢܣܬܟܠ܂
39:04	ܘܒܝܢܬ ܫܠܝ̈ܛܢܐ ܢܗܠܟ܂ ܘܒܝܢܬ ܡ̈ܠܟܐ ܘܪ̈ܘܪܒܢܐ ܢܫܡܫ܂ ܒܡܕܝ̈ܢܬܐ ܕܥܠܡܐ ܢܗܠܟ܂ ܛܒ ܘܒܝܫ ܒܐܢܫܐ ܢܟܣܐ܂
39:05	ܘܒܠܒܗ ܢܣܝܡ ܠܡܨܠܝܘ܂ ܘܡܢ ܩܕܡ ܐܠܗܐ ܢܒܥܐ ܪ̈ܚܡܐ܂ ܢܦܬܚ ܦܘܡܗ ܒܨܠܘܬܗ܃ ܘܥܠ ܚܛܗ̈ܘܗܝ ܢܒܥܐ ܛܒܬܐ܂
39:06	ܘܒܪܘܚܐ ܕܣܟܘܠܬܢܘܬܐ ܢܬܚܟܡ܂ ܘܗܘ ܢܦܩ ܡ̈ܬܠܐ ܚܕ ܬܪ̈ܝܢ܂ ܘܢܘܕܘܢ ܠܗ ܒܬܪ̈ܥܝܬܗܘܢ܂
39:07	ܗܘ ܢܣܬܟܠ ܒܡ̈ܬܠܐ ܕܚܟ̈ܝܡܐ܂ ܘܒܣܬܝܪ̈ܬܐ ܢܣܬܟܠ܂
39:08	ܗܘ ܢܦܩ ܝܘܠܦܢܐ ܕܚܟܡܬܐ܂ ܘܒܢܡܘܣܐ ܕܚܝ̈ܐ ܢܫܬܒܚ܂
39:09	ܘܢܐܠܦܘܢ ܣܓܝ̈ܐܐ ܡܢ ܚܟܡܬܗ܃ ܘܒܥܠܡܐ ܠܐ ܢܬܛܥܐ ܫܡܗ܃ ܘܠܐ ܢܒܛܠ ܕܘܟܪܢܗ ܥܕܡܐ ܠܥܠܡ܂ ܘܫܡܗ ܠܐ ܢܬܛܥܐ ܡܢ ܕܪ ܠܕܪ܂
39:10	ܚܟܡܬܗ ܢ̈ܬܢ݁ܝܢ ܟܢܘ̈ܫܬܐ܂ ܘܬܫܒ̈ܚܬܗ ܢܐܡܪ ܥܡܐ܂
39:11	ܐܢ ܢܨܒܐ ܒܐܠܦ ܢܫܬܒܚ܃ ܘܐܢ ܢܫܬܘܩ ܒܥܡܐ ܙܥܘܪܐ܂
39:12	ܐܣܬܟܠܘ ܘܐܡܪܘ ܝܘܠܦܢܝ܃ ܐܝܟ ܣܗܪܐ ܒܝܘܡܝ̈ ܬܪ̈ܥܣܪܐ܂
39:13	ܫܘܡܥܘܢܝ ܙܕܝܩ̈ܐ ܘܢܦܪܥ ܒܣܪܟܘܢ ܐܝܟ ܫܘܫ̈ܢܐ܂ ܘܐܝܟ ܐܪ̈ܙܐ ܕܫܬܝܠܝܢ ܥܠ ܡܝ̈ܐ܂ ܘܐܝܟ ܒܣ̈ܡܐ ܛܒ̈ܐ ܢܒܣܡ ܪܝܚܟܘܢ܂
39:14	ܐܝܟ ܪܝܚܐ ܕܠܒ̈ܢܢ ܒܐܪ̈ܙܘܗܝ܃ ܘܐܝܟ ܥܩܪܐ ܕܫܘܫܢܬ ܡܠܟܐ܂
39:15	ܐܪܝܡܘ ܩܠܟܘܢ ܘܫܒܚܘ ܐܟܚܕܐ܂ ܘܐܘܕܘ ܠܐܠܗܐ ܥܠ ܟܠܗܘܢ ܥ̈ܒ݁ܕܘܗܝ܂ ܡܢܘ ܓܒܪ̈ܘܬܗ ܒܬܫܒ̈ܚܬܐ܂ ܘܒܬܘܕܝܬܐ ܘܒܩܠܐ ܪܡܐ܃ ܘܗܟܢܐ ܐܡܪܘ܂
39:16	ܟܠܗܘܢ ܥܒ̈ܕܘܗܝ ܕܐܠܗܐ ܝܐܝܢ ܐܟܚܕܐ܂ ܘܟܠܗܘܢ ܠܨܒܘܬܗܘܢ ܐܬܒܪܝܘ܂

39:17	ܘܠܝܬ ܕܢܐܡܪ ܗܢܐ ܠܡܢܐ ܘܗܢܐ ܠܡܢܐ܂ ܡܛܘܠ ܕܟܠܗܘܢ ܒܘܠܝܬܐ ܥܒܝܕܝܢ܂ ܘܠܝܬ ܕܢܐܡܪ ܕܗܢܐ ܒܝܫ ܘܗܢܐ ܛܒ܃ ܡܛܠ ܕܟܘܠܗܘܢ ܒܥܕܢܗܘܢ ܡܬܓܒܪܝܢ܂ ܒܡܐܡܪܗ ܡܕܢܚ ܫܡܫܐ ܘܒܡܐܡܪܗ ܗܘ ܡܥܪܒ ܠܗ܂

39:18	ܒܚܕܘܬܐ ܨܒܝܢܗ ܡܬܥܒܕ܂ ܘܠܝܬ ܕܡܫܘܚܪ ܠܦܘܩܕܢܗ܃
39:19	ܥܒ̈ܕܝܗܘܢ ܕܟܠ ܒ̈ܢܝ ܒܣܪܐ ܠܩܘܒܠܗ܃ ܘܠܝܬ ܕܛܫܐ ܡܢ ܩܕܡܘܗܝ܂
39:20	ܠܝܬ ܕܩܠܝܠ ܘܣܓܝ ܩܕܡܘܗܝ܃ ܘܠܝܬ ܕܥܫܝܢ ܘܩܫܐ ܠܩܘܒܠܗ܂
39:22	ܒܘܪܟܬܗ ܐܝܟ ܢܗܪܐ ܕܪܕܐ܃ ܘܐܝܟ ܢܗܪܐ ܥܠܡ̈ܐ ܡܫܩܝܐ܂
39:23	ܗܟܢܐ ܒܪܘܓܙܗ ܥܡ̈ܡܐ ܕܐܢ܂ ܘܗܦܟ ܐܪܥܐ ܕܫܩܝܗܘܢ ܠܡܠܚܐ܂
39:24	ܐܘܪ̈ܚܬܗܘܢ ܕܙܕܝܩ̈ܐ ܬܪ̈ܝܨܢ ܩܕܡ ܐܦܘ̈ܗܝ܃ ܘܐܦ ܠܪ̈ܫܝܥܐ ܗܢ̈ܝܢ ܡܬܦ̈ܢܝܢ܂
39:25	ܛܒܬܐ ܡܢ ܒܪܫܝܬ ܠܛܒ̈ܐ ܐܬܒܪܝܬ܂ ܘܐܦ ܠܥܘ̈ܠܐ܂ ܐܢ ܠܛܒ ܘܐܢ ܠܒܝܫ܂
39:26	ܪܝܫ ܟܠܗܝܢ ܨܒ̈ܘܬܐ ܕܡܬܒ̈ܥܝܢ ܠܚܝ̈ܐ ܕܒܢܝܢ̈ܫܐ܂ ܡܝ̈ܐ ܘܢܘܪܐ܂ ܘܦܪܙܠܐ ܘܡܠܚܐ܂ ܘܬܪܒܐ ܘܚ̈ܛܐ܂ ܘܚܠܒܐ ܘܕܒܫܐ܂ ܘܥ̈ܢܒܐ ܘܚܡܪܐ ܘܡܫܚܐ܂ ܘܬܟܣܝܬܐ ܘܠܒܘܫܐ܂
39:27	ܟܠܗܝܢ ܗܠܝܢ ܠܛܒ̈ܐ ܡܛܐ̈ܒܢ܂ ܘܠܒܝ̈ܫܐ ܠܠܘܛܬܐ ܡܬܗ̈ܦܟܢ܃
39:28	ܐܝܬ ܪܘܚܐ ܕܠܦܪ̈ܥܐ ܐܬܒܪܝ܂ ܘܒܪܘܓܙܗܝܢ ܛܘܪ̈ܐ ܥܩܪ̈ܢ܂ ܒܥܕܢ ܪܘܓܙܐ ܚܝܠܗܝܢ ܡܚ̈ܘܝܢ܂ ܘܪܘܚܐ ܕܡܢ ܕܒܪܐ ܐܢ̈ܝܢ ܡܢܝ̈ܚܢ܃
39:29	ܢܘܪܐ ܘܒܪܕܐ ܘܟܐܦ̈ܐ ܕܡܘܬܐ܂ ܟܠܗܝܢ ܗܠܝܢ ܠܕܝܢܐ ܐܬܒܪܝ܂
39:30	ܚܝܘܬ ܫܢܐ܂ ܘܥܩܪ̈ܒܐ ܘܚܘܘ̈ܬܐ ܚܪܒܐ ܕܦܘܪܥܢܐ ܠܡܘܒܕܘ ܠܪ̈ܫܝܥܐ܂
39:31	ܒܥܕܢܐ ܕܦܩܕ ܠܗܘܢ ܚܕܝܢ܂ ܘܟܘܠ ܝܘ̈ܡܝܗܘܢ ܠܐ ܡܥܒܪܝܢ ܡܠܬܗ܂
39:32	ܡܛܠ ܕܡܢ ܒܪܫܝܬ ܐܬܒܪܝܘ܂ ܐܣܬܟܠܘ ܒܢܝܢܫܐ ܕܒܟܬܒܐ ܟܬ̈ܝܒܢ ܟܠܗܝܢ ܗܠܝܢ܂
39:33	ܘܟܠܗܘܢ ܥܒܕ̈ܘܗܝ ܛܒܝܢ܂ ܘܟܘܠ ܨܒܘ ܠܙܒܢܗ ܐܬܒܪܝܬ܂
39:34	ܘܠܝܬ ܕܢܐܡܪ ܗܢܐ ܒܝܫ ܡܢ ܗܢܐ܂ ܡܛܠ ܕܟܠܗܘܢ ܩܦܝܣܝܢ ܒܐܘܨܪ̈ܐ܂ ܘܠܥܕܢ ܙܒܢܗܘܢ ܡܬܓܒܪܝܢ܀
39:35	ܡܟܝܠ ܒܟܘܠܗ ܠܒܟܘܢ ܒܪܟܘ ܠܐܠܗܐ܂ ܘܫܒܚܘ ܠܫܡܗ܂