The Comprehensive Aramaic Lexicon

40:01	ܨܒ̈ܘܬܐ ܪ̈ܘܪܒܬܐ ܒܪܐ ܐܠܗܐ܂ ܘܓܢܣ̈ܐ ܬܩܝ̈ܦܐ ܥܠ ܒܢܝܢܫܐ܂ ܡܢ ܕܢܦܩܘ ܡܢ ܟܪܣܐ ܕܐܡܗܘܢ܃ ܘܥܕܡܐ ܕܣܡܟܝܢ ܠܐܪܥܐ ܕܚܝ̈ܐ܂
40:02	ܬܫܒܘܚܬܗܘܢ ܘܬܪܥܝܬܐ ܕܠܒܗܘܢ ܘܚܪܬܐ ܕܡ̈ܠܝܗܘܢ ܥܕܡܐ ܠܝܘܡܐ ܕܡܘܬܗܘܢ܂
40:03	ܡܢ ܝܬܒ̈ܝ ܟܘܪ̈ܣܘܬܐ ܕܡ̈ܠܟܐ ܘܥܕܡܐ ܠܝ̈ܬܒܝ ܥܦܪܐ ܘܩܛܡܐ܂
40:04	ܡܢ ܩܛܪ̈ܝ ܬܓܐ ܥܕܡܐ ܠܐܝܠܝܢ ܕܠܒܝܫܝܢ ܠܒܘܫܐ ܕܡܣܟܢܘܬܐ܃

40:05	ܪܘܓܙܐ ܘܛܢܢܐ ܘܟܪܝܘܬܐ ܘܕܚܠܬܐ ܘܕܚܠܬ ܡܘܬܐ܂ ܘܚܪܝܢܐ ܘܩܪܝܐ܂ ܘܒܥܕܢܐ ܕܡܬܢܝܚܝܢ ܥܠ ܥܪ̈ܣܬܗܘܢ܃ ܒܫܢܬܐ ܕܠܠܝܐ ܡܢܕ ܠܗܘܢ܂

40:06	ܕܢܬܡܠܟ ܒܚܙܘܐ ܕܠܠܝܐ܂ ܐܝܟ ܓܒܪܐ ܕܥܪܩ ܡܢ ܩܕܡ ܪܕܘܦܐ܂
40:07	ܐܢ ܨܒܝܢܐ ܒܠܒܗ܃ ܡܬܬܥܝܪ ܘܚܙܐ ܕܠܝܬ ܠܗ ܡܕܡ܂
40:08	ܥܡ ܟܠܗܘܢ ܒ̈ܢܝ ܒܣܪܐ ܨܦܬܗܘܢ ܥܡܗܘܢ܂ ܘܥܘܬܪܐ ܡܢܕ ܫܢܬܗܘܢ܂
40:11	ܟܠܡܕܡ ܕܡܢ ܐܪܥܐ ܗܘ ܠܐܪܥܐ ܗܦܟ܂ ܘܕܡܢ ܪܘܡܐ ܠܪܘܡܐ܂
40:12	ܟܠ ܡܢ ܕܚܛܐ ܘܡܕܓܠ ܢܒܛܠ܂ ܘܟܫܝܪ̈ܝ ܥܠܡܐ ܐܦ ܗܢܘܢ ܢܬܩܝܡܘܢ܂
40:13	ܢܟܣܐ ܕܫܘܩܪܐ ܐܝܟ ܢܚܠܐ ܢܬܓܪܦܘܢ܂ ܘܐܝܟ ܢܗܪ̈ܘܬܐ ܕܡܠܝܢ ܡܢ ܥ̈ܢܢܐ ܩ̈ܠܝܠܬܐ܃
40:14	ܟܕ ܗܢܘܢ ܓܠܝܙܝܢ ܢܓܡܪܘܢ܂
40:15	ܘܚܠܦܐ ܠܐܢܫ̈ܐ ܪ̈ܫܝܥܐ ܠܐ ܢܬܩܝܡ܂ ܥܩܪܗܘܢ ܓܝܪ ܕܚܛܝ̈ܐ ܐܝܟ ܫܒܠܐ ܕܝܥܬ ܥܠ ܫܢܐ ܕܫܩܝܦܐ
40:16	ܘܐܝܟ ܚܒܠܒܠܐ ܕܝܥܬ ܥܠ ܓܕܢܦܐ ܕܢܚܠܐ ܕܩܕܡ ܟܠ ܝܘܪܩ ܗܝ ܝܒܫܐ܂
40:17	ܘܥܒ̈ܕܐ ܕܟܐ̈ܢܐ ܒܥܕܢܐ ܢܬܒܪܟܘܢ܂ ܘܥܒ̈ܕܐ ܕܙܕܝ̈ܩܐ ܠܥܠܡ ܢܬܩܝܡܘܢ܂ ܘܕܡܬܩܪܒ ܠܗܘܢ ܐܝܟ ܐܢܫ ܕܡܫܟܚ ܣܝܡܬܐ܂
40:18	ܪܒܘܬܐ ܘܐܝܩܪܐ ܢܩܝܡܘܢ ܫܡܐ܂ ܘܡܢ ܬܪ̈ܝܗܘܢ ܡܢ ܕܡܫܟܚ ܚܟܡܬܐ܂
40:19	ܒܢܝܢܐ ܘܢܨܒܬܐ ܡܚܕܬܝܢ ܫܡܐ܂ ܘܡܢ ܬܪ̈ܝܗܘܢ ܐܢܬܬܐ ܛܒܬܐ܂
40:20	ܚܡܪܐ ܥܬܝܩܐ ܡܚܕܐ ܠܒܐ܂ ܘܛܒܐ ܡܢܗ ܪܚܡܘܬܗ ܕܪܚܡܐ܂
40:21	ܐܒܘܒܐ ܘܐܦܘܕܝܐ ܡܒܣܡܝܢ ܙܡܪܐ܂ ܡܢ ܬܪ̈ܝܗܘܢ ܠܫܢܐ ܕܟܝܐ܂
40:22	ܝܐܝܘܬܐ ܘܫܘܦܪܐ ܪܓܬܐ ܕܥܝܢ̈ܐ܂ ܘܡܢ ܬܪ̈ܝܗܘܢ ܫܒ̈ܠܐ ܕܚܩܠܐ܂
40:23	ܪܚܡܐ ܘܚܒܪܐ ܒܥܕܢܐ ܢܬܒܪܟܘܢ܂ ܘܡܢ ܬܪ̈ܝܗܘܢ ܐܢܬܬܐ ܚܟܝܡܬܐ܂
40:24	ܐܚܐ ܘܡܥܕܪܢܐ ܒܥܕܢܐ ܕܥܩܬܐ܂ ܘܡܢ ܬܪ̈ܝܗܘܢ ܙܕܩܬܐ ܦܪܩܐ܂
40:25	ܕܗܒܐ ܘܣܐܡܐ ܡܩܝ̈ܡܢ ܪܓܠܐ܂ ܘܡܢ ܬܪ̈ܝܗܘܢ ܡ݂ܠܟܐ ܛܒܐ܂
40:26	ܚܝܠܐ ܘܬܘܩܦܐ ܡܪܝܡܝܢ ܠܒܐ܂ ܘܡܢ ܬܪ̈ܝܗܘܢ ܕܚܠܬܗ ܕܐܠܗܐ܂ ܠܝܬ ܒܕܚܠܬܗ ܕܐܠܗܐ ܚܘܣܪܢܐ܂ ܘܠܝܬ ܠܡܒܥܐ ܥܡܗ ܡܥܕܪܢܐ܂ ܕܚܠܬܗ ܕܐܠܗܐ ܥܠ ܟܠܡܕܡ ܐܬܬܪܝܡܬ܃ ܐܚܘܕܝܗ ܒܪ̈ܝ ܘܠܐ ܬܪܦܝܗ܂ ܡܛܠ ܕܠܝܬ ܐܟܘܬܗ܂
40:27	ܕܚܠܬܗ ܕܐܠܗܐ ܒܥܕܢܐ ܡܬܒܪܟܐ܂ ܘܠܥܠ ܡܢ ܟܠ ܐܝܩܪ ܗܝ ܡܫܬܒܚܐ܀
40:28	ܒܪܝ ܡܢ ܕܫܐܠ ܠܟ ܠܐ ܬܟܠܝܘܗܝ܃ ܘܠܐ ܬܗܘܐ ܛܒ ܠܡܩܛܠ܂ ܐܠܐ ܗܘܝܬ ܛܒ ܠܡܚܝܘ܂
40:29	ܓܒܪܐ ܕܣܒܪ ܥܠ ܦܬܘܪܐ ܕܐܚܪ̈ܢܐ܂ ܠܐ ܐܢܫ ܢܚܫܒܝܘܗܝ ܐܝܟ ܕܚܝܐ ܗܘ܂ ܣܢܐ ܢܦܫܗ ܡܢ ܕܪܚܡ ܪ̈ܓܝܓܬܐ܂ ܘܠܓܒܪܐ ܕܝܕܥ ܗܠܝܢ ܟܐܒܐ ܐܢܝ̈ܢ ܕܡ̈ܥܝܐ܂
40:30	ܒܦܘܡܗ ܕܚܨܝܦܐ ܬܒܣܡ ܫܐܠܬܗ܃ ܘܐܝܟ ܢܘܪܐ ܝܩܕܐ ܒܓܘܗ܀