The Comprehensive Aramaic Lexicon

44:01	ܘܐܦ ܐܢܐ ܐܫܒܚ ܠܐܢܫܐ ܕܛܝܒܘܬܐ܂ ܠܐܒ̈ܗܝܢ ܕܗܘܘ ܒܕܪ̈ܝܗܘܢ܂
44:02	ܣܓܝ ܐܝܩܪܐ ܢܦܠܘܓ ܠܗܘܢ܂ ܘܟܘܠܗ ܪܒܘܬܗܘܢ ܥܠ ܕܪ̈ܐ ܕܥܠܡܐ܂
44:03	ܘܚܘܝܘ ܒܢܒܝܘܬܗܘܢ
44:04	ܐܬܘ̈ܬܐ܂ ܘܡ̈ܠܟܐ ܒܣܟܘܠܬܢܘܬܗܘܢ܂ ܚܟ̈ܝܡܐ ܝܠܦܘ ܒܚܟܡܬܗܘܢ܂ ܘܫ̈ܠܝܛܢܐ ܒܕܩܘ ܒܬܫܒ̈ܚܬܗܘܢ܂
44:05	ܥܠ ܐܝ̈ܕܝ ܩܝܬܪ̈ܐ ܘܟܢܪ̈ܐ܂ ܘܐ݁ܡܪ̈ܝ ܡ̈ܬܠܐ ܒܟܬܒܐ ܕܐܢܫܐ ܕܬܘܩܦܐ܂
44:06	ܘܒܣܡܝ̈ܟܝ ܚܝܠܐ܂ ܘܫܠܝܢ ܥܠ ܬܘܩܢܗܘܢ܂
44:07	ܟܠܗܘܢ ܗܠܝܢ ܒܕܪ̈ܝܗܘܢ ܗܘܐ ܠܗܘܢ ܐܝܩܪܐ܂ ܘܒܝܘ̈ܡܬܗܘܢ ܬܫܒ̈ܚܬܗܘܢ܃
44:08	ܐܝܬ ܡܢܗܘܢ ܕܫܒܩܘ ܫܡܐ ܠܡܫܬܥܝܘ ܥܠ ܬܫܒܚ̈ܬܗܘܢ܂
44:09	ܘܐܝܬ ܡܢܗܘܢ ܕܠܝܬ ܠܗܘܢ ܕܘܟܪܢܐ܂ ܘܒܛܠܘ ܐܝܟ ܡܐ ܕܒܛܠܘ܀
44:10	ܒܪܡ ܗܠܝܢ ܐܢܫܐ ܕܛܝܒܘܬܐ ܘܕܙܕܝܩܘܬܐ܂ ܛܝܒܘܬܗܘܢ ܠܐ ܬܓܡܪ܂
44:11	ܘܥܡ ܙܪܥܗܘܢ ܩܝܡ ܛܘܒܗܘܢ܂ ܘܥܩܪܗܘܢ ܠܒ̈ܢܝ ܒܢܝܗܘܢ܂ ܘܒܩܝܡܗܘܢ
44:12	ܩܐܡ ܙܪܥܗܘܢ܂ ܘܒ̈ܢܝ ܒܢܝܗܘܢ ܒܥܒ̈ܕܐ ܛܒ̈ܐ܂
44:13	ܥܕܡܐ ܠܥܠܡ ܩܝܡ ܕܘܟܪܢܗܘܢ܃ ܘܐܝܩܪܗܘܢ ܠܐ ܢܬܛܥܐ܂
44:14	ܦܓܪ̈ܝܗܘܢ ܒܫܠܡܐ ܐܬܟܢܫܘ܂ ܘܫܡܗܘܢ ܚܝ ܡܢ ܕܪ ܠܕܪ
44:15	ܘܬܫܒܘܚܬܗܘܢ ܢܫܬܥܐ ܥܡܐ܃ ܀܂

44:17	ܢܘܚ ܙܕܝܩܐ ܐܫܬܟܚ ܒܕܪܗ ܫܠܡ܂ ܒܙܒܢܐ ܕܛܘܦܢܐ ܗܘܬ ܚܠܦܬܐ ܠܥܠܡܐ܂ ܘܡܛܠܬܗ ܗܘܬ ܡܫܘܙܒܘܬܐ܂ ܘܝܡܐ ܐܠܗܐ ܕܠܐ ܢܗܘܐ ܬܘܒ ܛܘܦܢܐ܂

44:18	ܡܘ̈ܡܬܐ ܕܝܡܐ ܠܗ ܒܫܪܪܐ܂ ܕܠܐ ܢܐܒܕ ܟܠ ܒܣܪ܀
44:19	ܐܒܪܗܡ ܐܒܐ ܕܟܢܘ̈ܫܬܐ ܕܥܡ̈ܡܐ܂ ܘܠܐ ܐܬܝܗܒ ܡܘܡܐ ܒܐܝܩܪܗ
44:20	ܕܥܒܕ ܦܬܓܡ̈ܘܗܝ ܕܥܠܝܐ܂ ܘܥܠ ܒܩܝܡܐ ܥܡܗ܂ ܒܒܣܪܗ ܐܬܩܝܡ ܠܗ ܩܝܡܐ܂ ܘܒܢܣܝܘܢܗ ܐܫܬܟܚ ܡܗܝܡܢ܂
44:21	ܡܛܠ ܗܢܐ ܒܡ̈ܘܡܬܐ ܝܡܐ ܠܗ ܐܠܗܐ܂ ܕܢܬܒܪܟܘܢ ܒܙܪܥܗ ܟܠܗܘܢ ܥܡ̈ܡܐ ܕܐܪܥܐ܂ ܘܠܡܣܓܝܘ ܙܪܥܗ ܐܝܟ ܚܠܐ ܕܝܡܐ܃ ܘܠܡܬܠ ܙܪܥܗ ܠܥܠ ܡܢ ܟܠܗܘܢ ܥܡ̈ܡܐ܂ ܠܡܘܪܬܘ ܐܢܘܢ܂ ܡܢ ܝܡܐ ܠܝܡܐ܂ ܘܡܢ ܦܪܬ ܥܕܡܐ ܠܣܘ̈ܦܝܗ ܕܐܪܥܐ܀
44:22	ܘܐܦ ܠܐܝܣܚܩ ܝܡܐ ܡܛܠ ܐܒܪܗܡ ܐܒܘܗܝ܂
44:23	ܘܒܘܪܟܬܐ ܕܟܠ ܩܕܡܝ̈ܐ܂ ܡܬܢܝܚܐ ܥܠ ܪܝܫܗ ܕܐܝܣܪܝܠ܃ ܕܩܪܝܗܝ ܒܪܝ ܒܘܟܪܝ ܐܝܣܪܝܠ܂ ܘܝܗܒ ܠܗ ܝܘܪܬܢܐ܂ ܘܐܩܝܡܗ ܐܒܐ ܠܫܒ̈ܛܐ܂ ܘܢܦܩ ܘܐܬܦܠܓ ܠܬܪܥܣܪ ܫܒ̈ܛܝܢ܂ ܘܢܦܩܘ ܡܢܗ ܓܒܪ̈ܐ ܙܕܝܩ̈ܐ܂ ܡܫܟܚ ܪ̈ܚܡܐ ܒܥ̈ܝܢܝ ܟܠܗܘܢ ܚܝ̈ܐ܂