The Comprehensive Aramaic Lexicon

45:01	ܘܪܚܝܡ ܩܕܡ ܐܠܗܐ ܘܐܦ ܒܥ̈ܝܢܝ ܒܢܝܢܫ̈ܐ܂ ܡܘܫܐ ܕܘܟܪܢܗ ܠܒܘܪܟܬܐ܂

45:02	ܘܪܒܝܗ ܒܒܘܪ̈ܟܬܐ ܘܬܩܦܗ ܠܕܚܠܘ̈ܠܝܢ܂

45:03	ܘܐܩܝܡܗ ܩܕܡ ܡܠܟܐ ܘܦܩܕܗ ܥܠ ܥܡܐ܃ ܘܚܘܝܗ ܐܝܩܪܗ ܘܐܫܡܥܗ ܩܠܗ܃
45:04	ܒܗܝܡܢܘܬܗ ܘܒܡܟܝܟܘܬܗ܂ ܓܒܝܗܝ ܡܢ ܟܠܗܘܢ ܒܢܝ ܐܢܫܐ܂
45:05	ܘܩܪܒܗ ܠܥܪܦܠܗ܃ ܘܣܕܪ ܩܕܡܘܗܝ ܢܡܘܣܐ ܕܚܝ̈ܐ ܘܒܘܪ̈ܟܬܐ܂ ܠܡܠܦܘ ܠܕܒܝܬ ܐܝܣܪܝܠ ܢܡܘ̈ܣܘܗܝ܂ ܘܩܝ̈ܡܘܗܝ ܘܕܝܢ̈ܘܗܝ ܠܝܥܩܘܒ܃܀̤
45:06	ܘܐܪܝܡ ܐܟܘܬܗ ܩܕܝܫܐ ܠܐܗܪܘܢ ܡܢ ܫܒܛܐ ܕܠܘܝ܂
45:07	ܘܣܡܗ ܠܫܪܪܐ ܕܥܡܐ܂ ܘܝܗܒ ܥܠܘܗܝ ܡܢ ܐܝܩܪܗ ܘܫܘܒܚܗ܂ ܘܓܒܝܗܝ ܒܪܘܡܐ ܕܐܝܩܪܗ܃
45:08	ܘܐܠܒܫܗ ܢܚ̈ܬܐ ܕܬܟܠܬܐ܂ ܘܝܩܪܗ ܒܡ̈ܐܢܐ ܕܬܘܩܦܐ܂
45:15	ܘܣܡ ܥܠܘܗܝ ܡܘܫܐ ܐܝܕܗ܂ ܘܡܫܚܗ ܡܫܚܐ ܕܩܘܕܫܐ܂ ܘܗܘܬ ܠܗ ܠܩܝܡܐ ܕܠܥܠܡ܂ ܘܠܙܪܥܗ ܐܝܟ ܝܘ̈ܡܬܐ ܕܫܡܝܐ܂ ܠܡܫܡܫܘ ܘܠܡܒܪܟܘ ܠܥܡܗ ܒܫܡܗ܂
45:16	ܘܓܒܝܗܝ ܡܢ ܟܠܗܘܢ ܚ̈ܝܐ܂ ܠܡܩܪܒܘ ܥ̈ܠܘܬܐ ܘܕܒܚ̈ܐ ܘܒܣ̈ܡܐ܂ ܘܠܡܚܣܝܘ ܥܠ ܟܠܗ ܐܝܣܪܝܠ܂
45:17	ܘܝܗܒ ܠܗ ܦܘܩ̈ܕܢܐ ܘܐܫܠܛܗ ܒܩܝ̈ܡܐ ܘܕܝܢ̈ܐ܂
45:18	ܘܐܬܚܪܝܘ ܥܡܗ ܢܘܟܪ̈ܝܐ܂ ܘܛܢܘ ܒܗ ܒܡܕܒܪܐ ܐ̈ܢܫܝ ܕܬܢ ܘܐܒܝܪܡ܂ ܘܟܢܘܫܬܐ ܕܩܘܪܚ ܒܬܘܩܦܐ܂
45:19	ܘܚܙܐ ܐܠܗܐ ܘܪܓܙ܂ ܘܐܘܩܕ ܐܢܘܢ ܒܢܘܪܐ܂ ܘܩܪܐ ܠܗܘܢ ܡܚܘܬܐ܂ ܘܐܣܝܦ ܐܢܘܢ ܒܬܘܩܦܐ ܕܪܘܓܙܗ܃
45:20	ܘܣܡ ܥܠ ܐܗܪܘܢ ܐܝܩܪܐ܂ ܘܝܗܒ ܠܗ ܝܘܪܬܢܗ܂ ܪ̈ܫܝܬܐ ܕܩܘܕܫܐ܂ ܘܣܕܪ̈ܐ ܕܠܚܡܐ ܠܗ ܘܠܙܪܥܗ܂
45:22	ܒܠܚܘܕ ܒܐܪܥܗܘܢ ܠܐ ܝܪܬܘ ܝܘܪܬܢܐ܂ ܘܠܐ ܦܠܓܘ ܦܠܓܘܬܐ ܥܡܗܘܢ܂ ܡܛܠ ܕܡܪܝܐ ܡܢܬܗ ܘܝܪܬܘܬܗ ܒܝܬ ܐܝܣܪܐܝܠ݂݁܂
45:23	ܘܐܦ ܦܝܢܚܣ ܒܪ ܐܠܝܥܙܪ܂ ܒܓܢܒܪܘܬܗ ܢܣܒ ܠܗ ܬܠܬܐ ܐܝܩܪ̈ܝܢ܂ ܒܛܢܢܐ ܕܛܢ ܒܡܕܝܢܬܐ ܘܒܒܪ ܐܝܣܪܐܝܠ܂ ܘܕܩܡ ܒܬܘܪܥܬܐ ܕܥܡܐ ܘܒܥܐ ܥܠ ܐܝܣܪܝܠ܂
45:24	ܡܛܘܠ ܗܢܐ ܒܡܘ̈ܡܬܐ ܝܡܐ ܠܗ ܐܠܗܐ܂ ܕܢܒܢܐ ܠܗ ܡܕܒܚܐ܂ ܘܬܗܘܐ ܠܗ ܘܠܙܪܥܗ ܟܗܢܘܬܐ ܪܒܬܐ ܠܥܠܡ܃܀
45:25	ܘܐܦ ܕܘܝܕ ܒܪ ܐܝܫܝ܂ ܝܘܪܬܢܐ ܕܡ̈ܠܟܐ ܒܠܚܘܕܘܗܝ ܝܪܬ܂ ܝܘܪܬܢܐ ܕܐܗܪܘܢ ܠܗ ܘܠܙܪܥܗ܂
45:26	ܡܟܝܠ ܒܪܟܘ ܠܐܠܗܐ ܕܝܗܒ ܠܟܘܢ ܚܟܡܬܐ ܕܠܒܐ܂ ܠܡܕܢ ܠܥܡܗ ܒܫܡܗ܂ ܡܛܠ ܕܠܐ ܢܬܛܥܐ ܛܘܒܗܘܢ܂ ܘܫܘܠܛܢܗܘܢ ܠܟܠ ܕܪ̈ܐ ܕܥܠܡܐ܀