The Comprehensive Aramaic Lexicon

46:01	ܓܒܪܐ ܓܢܒܪ ܚܝܠܐ ܝܫܘܥ ܒܪܢܘܢ܂ ܒܢܒܝܘܬܐ ܐܬܢܛܪ ܠܡܗܘܐ ܐܝܟ ܡܘܫܐ ܪܒܐ܂ ܠܡܝܬܝܘ ܒܐܝܕܗ ܦܘܪܩܢܐ ܠܪ̈ܚܡܘܗܝ܂ ܘܠܡܬܦܪܥܘ ܡܢ ܓܒܪ̈ܐ ܣ̈ܢܐܐ܂ ܘܠܡܘܪܬܘ ܠܒܢܝ ܐܝܣܪܝܠ ܐܪܥܐ ܕܡܘܠܟܢܐ܂
46:02	ܡܐ ܝܐܐ ܠܗ ܟܕ ܡܪܝܡ ܒܢܝܙܟܐ ܕܒܐܝܕܗ܂ ܘܟܕ ܡܢܝܦ ܥܠ ܡܕܝܢܬܐ܂
46:03	ܡܢܘ ܡܫܟܚ ܠܡܩܡ ܩܕܡܘܗܝ܂ ܡܛܠ ܕܩܪܒܗ ܕܡܪܝܐ ܗܘ ܥܒܕ܂
46:04	ܡܛܠ ܕܒܐܝ̈ܕܘܗܝ ܩܡ ܫܡܫܐ܂ ܘܗܘܐ ܝܘܡܐ ܚܕ ܬܪ̈ܝܢ ܝܘ̈ܡܝܢ܂
46:05	ܡܛܠ ܕܨܠܝ ܩܕܡ ܡܪܝܐ܂ ܘܥܢܝܗܝ ܘܝܗܒ ܒܐܝܕܗ ܬܘܩܦܐ ܘܥܢܝܗܝ ܒܟܐܦ̈ܐ ܕܒܪܕܐ܂ ܘܟܒܪܝܬܐ ܡܢ ܫܡܝܐ ܐܚܬ܂
46:06	ܘܚܒܛ ܥܠ ܥܡܐ ܣܢܐܐ ܘܐܘܒܕ ܠܟܠܗܘܢ܂ ܘܝܕܥܘ ܟܠܗܘܢ ܥܡ̈ܡܐ ܚܪ̈ܡܐ܂ ܕܐܠܗܐ ܗܘ܃ ܐܩܪܒ ܥܡܗܘܢ܂ ܘܐܦ ܗܘ ܫܠܡ ܒܬܪ ܐܠܗܐ܂
46:07	ܘܒܝܘ̈ܡܝ ܡܘܫܐ ܥܒܕ ܛܝܒܘܬܐ܂ ܗܘ ܘܟܠܒ ܒܪ ܝܘܦܢܐ܂ ܠܡܩܡ ܒܬܘܪܥܬܐ ܕܥܡܐ ܠܡܗܦܟܘ ܟܢܘܫܬܐ܂ ܘܠܡܒܛܠܘ ܛܒܐ ܒܝܫܐ ܡܢ ܐܪܥܐ ܕܡܘܠܟܢܐ܂
46:08	ܘܗܢܘܢ ܒܠܚܘܕܝܗܘܢ ܐܬܦܨܝܘ ܡܢ ܫܬܡܐܐ ܐ̈ܠܦܝܢ܂ ܠܡܥܠܘ ܐܢܘܢ ܠܝܪܬܘܬܗܘܢ܂ ܠܐܪܥܐ ܕܡܪܕܝܐ ܚܠܒܐ ܘܕܒܫܐ܂
46:09	ܘܝܗܒ ܠܟܠܒ ܬܘܩܦܐ ܘܥܕܡܐ ܠܣܝܒܘܬܗ ܐܬܩܝܡ ܥܡܗ ܠܡܫܠܛܘܬܗ ܥܠ ܬܘܩܦܗ ܕܐܪܥܐ܂ ܘܐܦ ܙܪܥܗ ܢܐܪܬ ܝܘܪܬܢܐ܂
46:10	ܡܛܠ ܕܢܕܥ ܙܪܥܗ ܕܝܥܩܘܒ܂ ܕܫܠܡ ܢܡܘܣܗ ܕܐܠܗܐ ܘܕܝܢܘ̈ܗܝ܂
46:11	ܓܒܪ ܓܒܪ܂ ܟܠ ܕܠܐ ܛܥܐ ܠܒܗܘܢ ܘܠܐ ܗܦܟ ܡܢ ܢܡܘܣܗ ܕܐܠܗܐ܂ ܢܗܘܐ ܕܘܟܪܢܗܘܢ ܠܒܘܪܟܬܐ܂
46:12	ܘܢܙܗܪܘܢ ܓܪ̈ܡܝܗܘܢ ܐܝܟ ܫܘ̈ܫܢܐ܂ ܘܢܫܒܩܘܢ ܫܡܗ ܛܒܐ ܠܒܢ̈ܝܗܘܢ܃ ܘܠܟܠܗ ܥܡܐ ܬܫܒܘܚܬܗܘܢ ܀̤
46:13	ܘܪܚܝܡ ܠܒܪܝܗ ܡܢ ܕܐܫܬܐܠ ܡܢ ܟܪܣܗ ܕܐܡܗ܂ ܢܙܝܪܐ ܒܢܒܝܘܬܐ ܫܡܘܐܠ ܕܝ݁ܢܐ ܘܟܗܢܐ܂ ܕܒܡܠܬܗ ܬܩܢܬ ܡܠܟܘܬܐ ܘܡܫܚ ܫܠܝܛܢ̈ܐ ܘܡ̈ܠܟܐ ܠܥܡܐ܂
46:14	ܒܢܡܘܣܗ ܦܩܕ ܟܢܘܫܬܐ܂ ܐܝܟܢܐ ܕܦܩܕ ܡܪܗ ܕܝܥܩܘܒ܂

46:16	ܘܐܦ ܗܘ ܬܒܪ ܣܢ̈ܐܐ ܡܢ ܟܠܗܘܢ ܚܕܪ̈ܘܗܝ ܒܡܣܩܗ ܐܡܪܐ ܕܚܠܒܐ܂

46:17	ܘܪܥܡ ܒܫܡܝܐ ܡܪܝܐ ܘܒܦܩܥܐ ܚܣܝܢܐ ܐܫܡܥ ܩܠܗ܂
46:18	ܘܬܒܪ ܟܠܗܘܢ ܫ̈ܠܝܛܢܐ ܕܨܘܪ܂ ܘܐܘܒܕ ܟܠܗܘܢ ܛܪ̈ܘܢܐ ܕܦܠܫ̈ܬܝܐ܂
46:19	ܘܒܙܒܢܐ ܕܡܬܢܝܚ ܥܠ ܥܪܣܗ܂ ܐܣܗܕ ܩܕܡ ܡܪܝܐ ܘܩܕܡ ܡܫܝܚܗ܂ ܕܫܘܚܕܐ ܘܩܘܪܒܢܐ ܡܢ ܐܢܫ ܠܐ ܢܣܒ܂ ܘܟܠܒܣܪ ܠܐ ܐܣܗܕ ܥܠܘܗܝ܂
46:20	ܘܡܢ ܒܬܪ ܡܘܬܗ ܐܫܬܐܠ܂ ܘܚܘܝ ܠܡܠܟܐ ܐܘܪܚܗ܂ ܘܐܪܝܡ ܡܢ ܐܪܥܐ ܩܠܗ ܒܢܒܝܘܬܐ ܠܡܒܛܠܘ ܚܛܗ̈ܐ܂