The Comprehensive Aramaic Lexicon

08:01	ܟܕ ܕܝܢ ܫܠܡܘ ܠܡܚܫܡܘ݂܂ ܐܥܠܘܗܝ ܠܛܘܒܝܐ ܠܘܬܗ݀܂
08:02	ܗ݀ܘ ܕܝܢ ܟܕ ܐܙ݁ܠ ܗ݂ܘܐ݂܂ ܐܬܥܗܕ ܠܡ̈ܠܐ ܕܪܦܐܝܠ݁܂ ܘܢܣ݂ܒ ܠܩܛܡܐ ܕܒܣ̈ܡܐ ܘܣܡ ܥܠܘܗܝ ܠܒܗ ܕܗ݀ܘ ܢܘܢܐ ܘܟܒܕܐ݂܂ ܘܐܬܬܢ܂

08:03	ܟܕ ܕܝܢ ܐܪܝܚܗ ܗ݀ܘ ܫܐܕܐ ܠܪܝܚܐ݂܂ ܥܪܩ ܠܥ̈ܠܝܐ ܕܡܨܪܝܢ܂ ܘܐܣܪܗ ܡܠܐܟܐ܂

08:04	ܟܕ ܕܝܢ ܐܬܚܒܫܘ ܬܪܝܗܘܢ܂ ܩܡ ܛܘܒܝܐ ܡܢ ܥܪܣ݂ܐ ܘܐܡ݂ܪ܂ ܩܘܡ ܚܬܝ ܘܢܨܠܐ܂ ܐܝܟܢܐ ܕܥܠܝܢ ܢܪܚܡ ܡܪܝܐ݂܂
08:05	ܘܫ݁ܪܝ ܛܘܒܝܐ ܠܡܐܡܪ܂ ܡܒܪܟܐ ܐܝܬܝܟ ܐܠܗܐ ܕܐܒ̈ܗܐ ܕܝܠܢ݂܂ ܘܡܒܪܟܐ ܗ݂ܘ ܫܡܐ ܕܝܠܟ ܩܕܝܫܐ ܘܡܫܒܚܐ ܠܥܠܡ܂ ܢܒܪܟܘܢܟ ܫܡܝܐ ܘܟܠܗ݀ ܒܪܝܬܐ ܕܝܠܟ݂܂
08:06	ܐܢܬ ܥܒ݂ܕܬ ܠܐܕܡ݁܂ ܘܝܗܒܬ ܡܥܕܪܢܐ ܠܚܘܐ ܣܡܟܐ ܐܢܬܬܐ ܕܝܠܗ܂ ܡܢ ܗܠܝܢ ܗ݂ܘܐ ܙܪܥܐ ܕܒܢ̈ܝܢܫܐ܂ ܐܢܬ ܐܡܪܬ݁܂ ܕܠܐ ܫܦܝܪܐ ܕܢܗܘܐ ܐܝܬܘܗܝ ܒܪܢܫܐ ܒܠܚܘܕܘܗܝ ܢܥܒܕ ܠܗ ܡܥܕܪܢܐ ܕܕ݁ܡܐ ܠܗ܂
08:07	ܘܗܫܐ ܡܪܝܐ ܠܘ ܡܛܠ ܙܢܝܘܬܐ ܐܢܐ ܢܣܒ ܐܢܐ ܠܚܬܐ ܕܝܠܝ ܗܕܐ܂ ܐܠܐ ܒܫܪܪܐ܂ ܦܩܘܕ ܕܐܬ݂ܚܢܢ܂ ܘܥܡܗ݀ ܐܣܐܒ܂ ܘܐܡ݂ܪܬ ܥܡܗ ܐܡܝܢ܂
08:09	ܘܕܡܟܘ ܬܪܝܗܘܢ ܗ݀ܘ ܠܠܝܐ݁܂ ܘܟܕ ܩܡ ܪܥܘܐܝܠ݂܂ ܐܙܠ ܘܚ݂ܦܪ ܩܒܪܐ܂
08:10	ܟܕ ܐܡ݁ܪ܂ ܕܠܡܐ ܐܦ ܗܢܐ ܡܐ݁ܬ܂
08:11	ܘܐܬ݂ܐ ܪܥܘܐܝܠ ܠܒܝܬܗ݂܂
08:12	ܘܐܡ݂ܪ ܠܐܕܢܐ ܐܢܬܬܐ ܕܝܠܗ܂ ܫܕܪܝ ܚܕܐ ܡܢ ܐܡܗ̈ܬܐ݂܂ ܘܬܚܙܐ ܐܢ ܚܝ܂ ܐܢܕܝܢ ܠܐ݂܂ ܕܢܩܒܪܝܘܗܝ ܘܠܐ ܐܢܫ ܢܕܥ܂
08:13	ܘܥ݂ܠܬ ܗ݀ܝ ܐܡܬܐ ܟܕ ܦܬܚܬ ܬܪܥܐ݂܂ ܘܐܫܟܚܬ ܠܬܪܝܗܘܢ ܕܕܡܝܟܝܢ܂
08:14	ܟܕ ܢܦ݂ܩܬ ܕܝܢ݂܂ ܐܘܕܥܬ ܐܢܘܢ ܕܚܝ܂
08:15	ܘܒܪܟ ܠܐܠܗܐ ܪܥܘܐܝܠ ܟܕ ܐܡ݁ܪ܂ ܡܒܪܟܐ ܐܢܬ ܐܠܗܐ݂܂ ܒܟܠ ܒܘܪܟܬܐ ܕܟܝܬܐ ܘܩܕܝܫܬܐ܂ ܢܒܪܟܘܢܟ ܩܕ̈ܝܫܐ ܕܝܠܟ܂ ܟܠܗܝܢ ܒܪ̈ܝܬܐ ܕܝܠܟ܂ ܟܠܗܘܢ ܡ̈ܠܐܟܐ ܘܓܒܝ̈ܐ ܕܝܠܟ܂ ܢܒܪܟܘܢܟ ܟܠܗܘܢ ܥ̈ܠܡܐ܂
08:16	ܡܒܪܟܐ ܐܝܬܝܟ ܡܛܠ ܕܚܕܝܬܢܝ܂ ܘܠܐ ܗ݂ܘܐ ܠܝ ܐܝܟܢܐ ܕܡ݁ܣܒܪ ܗܘܝܬ܂ ܐܠܐ ܐܝܟ ܪ̈ܚ݂ܡܐ ܕܝܠܟ ܣܓ̈ܝܐܐ ܥܒܕܬ ܥܡܢ܂
08:17	ܡܒܪܟܐ ܐܝܬܝܟ ܡܛܠ ܕܪܚܡܬ ܥܠ ܬܪܝܢ ܝܚ̈ܝܕܝܐ܂ ܥܒ݂ܕ ܠܗܘܢ ܡܪܢ ܪ̈ܚܡܐ܂ ܫܡ݁ܠܐ ܚܝ݁ܐ ܕܝܠܗܘܢ ܒܚܘܠܡܢܐ݂ ܥܡ ܚܕܘܬܐ ܘܪ̈ܚ݂ܡܐ܂
08:18	ܦܩ݂ܕ ܕܝܢ ܠܒܢ̈ܝ ܒܝܬܐ ܠܡܛܡܪܗ ܠܩܒܪܐ܂
08:19	ܘܥܒ݂ܕ ܠܗܘܢ ܡܫܬܘܬܐ݂܂ ܕܝܘ̈ܡܬܐ ܐܪܒܬܥܣܪ܂
08:20	ܘܐܡ݂ܪ ܪܥܘܐܝܠ ܩܕܡ ܕܢܫܠܡܘܢ ܝܘܡ̈ܬܐ ܕܡܫܬܘܬܐ ܒܡܘ̈ܡܬܐ݂܂ ܕܠܐ ܢܦܘܩ݁܂ ܐܠܐ ܐܢ ܐܬܡ݁ܠܝܘ ܐܪܒܬܥܣܪ ܝܘܡ̈ܬܐ ܕܡܫܬܘܬܐ܂
08:21	ܘܗܝ݁ܕܝܢ ܟܕ ܢܣ݁ܒ ܦܠܓܐ ܕܗܠܝܢ ܕܐܝܬ ܗܘ̈ܝ ܠܗ݂܂ ܢܐܙܠ ܥܡ ܚܘܠܡܢܐ ܠܘܬ ܐܒܘܗܝ܂ ܘܗܠܝܢ ܕܫܪܟܐ݂܂ ܡܐ ܕܡܝܬܬ ܐܢܐ ܘܐܢܬܬܐ ܕܝܠܝ܂