The Comprehensive Aramaic Lexicon

12:01	ܘܩ݂ܪܐ ܛܘܒܝܛ ܠܛܘܒܝܐ ܒܪܐ ܕܝܠܗ ܘܐܡ݂ܪ ܠܗ܂ ܚܙܝ ܒܪܝ ܐܓܪܗ ܕܒܪܢܫܐ ܗ݀ܘ ܕܥܕܪ ܥܡܟ܂ ܘܠܡܘܣܦܘ ܠܗ ܙ݁ܕܩ܂܂
12:02	ܘܐܡ݂ܪ ܐܒܝ܂ ܠܐ ܚܣܪ ܐܢܐ ܕܝܗܒ ܐܢܐ ܠܗ ܦܠܓܐ ܕܗܠܝܢ ܕܐܝܬܝܬ݁܂܂
12:03	ܡܛܠ ܕܐܝܬܝܢܝ ܠܟ ܚܠܝܡܐ݁܂ ܘܠܐܢܬܬܐ ܕܝܠܝ ܐܢܝܚ݁܂ ܘܠܟܣܦܐ ܠܝ ܐܝܬܝ܃ ܘܠܟ ܒܗ݀ ܒܕܡܘܬܐ ܐܚܠܡ܂܂܂
12:04	ܘܐܡ݂ܪ ܠܗ ܣܒܐ܂ ܙܕ݁ܩ ܠܗ܂܂
12:05	ܘܩܪܝܗܝ ܠܡܠܐܟܐ ܘܐܡܪ ܠܗ܂ ܣ݂ܒ ܦܠܓܐ ܕܟܠܗܝܢ ܗܠܝܢ ܕܐܝܬܝܬ܂܂
12:06	ܗܝܕܝܢ ܗ݂ܘ ܡܠܐܟܐ ܟܕ ܩ݂ܪܐ ܠܬܪܝܗܘܢ ܡܛܫܝܐܝܬ ܐܡܪ ܠܗܘܢ܂ ܒܪܟܘ ܠܐܠܗ݂܂ ܘܠܗ ܐܘܕܘ ܩܕܡ ܟܠܗܘܢ ܗܢ݁ܘܢ ܕܚܝܝܢ܃ ܡܛܠ ܗܢܝܢ ܕܥܒ݂ܕ ܥܡܟܘܢ܂ ܛܒܐ ܗ݂ܝ܂ ܠܡܒܪܟܘ ܠܐܠܗܐ݁܂ ܘܠܡܪܡܪܡܘ ܫܡܐ ܕܝܠܗ݀܂ ܟܕ ܠܡ̈ܠܐ ܕܥ̈ܒܕܐ ܕܐܠܗܐ ܡܝܩܪܐܝܬ ܡܚܘܝܢ ܐܢܬܘܢ܂ ܘܠܐ ܬܡ݁ܐܢܘܢ ܠܡܘܕܝܘ ܠܗ܂܂
12:07	ܪܙܐ ܕܡ݁ܠܟܐ ܫܦܝܪܐ ܗ݂ܝ ܠܡܛܫܝܘ܂ ܠܥ݁ܒ̈ܕܐ ܕܝܢ ܕܐܠܗܐ ܠܡܘܕܥܘ ܡܫܒܚܐܝܬ܂ ܛܒܬܐ ܥܒܕܘ ܘܒܝ݂ܫܬܐ ܠܐ ܡܫܟܚܐ ܠܟܘܢ܂܂
12:08	ܛܒܐ ܗ݂ܝ ܨܠܘܬܐ݂܂ ܥܡ ܨܘܡܐ ܘܡܪܚܡܢܘܬܐ ܘܙܕܝܩܘܬܐ܂ ܛܒ ܗ݂ܘ ܩܠܝܠ ܥܡ ܙܕܝܩܘܬܐ܂ ܐܘ ܣܓܝ ܥܡ ܥܘܠܘܬܐ܂ ܫܦܝܪܐ ܗ݂ܝ ܠܡܥܒܕ ܡܪܚܡܢܘܬܐ݂܂ ܐܘ ܕܢܣܝܡ ܒܣ̈ܝܡܬܐ ܕܗܒܐ܂܂
12:09	ܡܪܚܡܢܘܬܐ ܡܢ ܡܘܬܐ ܡܦܨܝܐ݂܂ ܘܗ݂ܝ ܡܕܟܝܐ ܟܠ ܚܛܝܬܐ ܗ݀ܢܘܢ ܕܥܒܕܝܢ ܡܪܚܡܢܘܬܐ ܘܙܕܝܩܘܬܐ ܢܣܒܥܘܢ ܚ̈ܝܐ܂܂

12:10	ܗ݀ܢܘܢ ܕܝܢ ܕܚ݁ܛܝܢ܂ ܡܩܪ̈ܒܢܐ ܐܝܬܝܗܘܢ ܕܚ̈ܝܐ ܕܝܠܗܘܢ܂܂

12:11	ܠܐ ܐܛܫܐ ܡܢܟܘܢ ܟܠ ܡܠܬܐ܂ ܐܡܪܬ ܗܟܝܠ܃ ܕܪܐܙܐ ܕܡ݁ܠܟܐ ܠܡܛܫܝܘ ܫܦܝܪܐ ܗ݂ܝ܂ ܠܥ݁ܒ̈ܕܐ ܕܝܢ ܕܐܠܗܐ ܠܡܘܕܥܘ ܡܫܒܚܐܝܬ݁݁܂
12:12	ܘܗܫܐ ܟܕ ܨܠܝܬ ܐܢܬ ܘܟܠܬܐ ܕܝܠܟ ܣܪܐ݂܂ ܐܢܐ ܐܥܠܬ ܠܕܘܟܪܢܐ ܕܨܠܘܬܐ ܕܝܠܟܘܢ ܩܕܡ ܩܕܝܫܐ݁ ܘܟܕ ܩ݁ܒܪ ܗܘܝܬ ܠܗ݀ܢܘܢ ܡܝ̈ܬܐ݂܂ ܗ݂ܘ ܗܟܘܬ ܩܪܝܒ ܗܘܝܬ ܠܘܬܟ܂܂
12:13	ܘܟܕ ܠܐ ܐܡܐܢܬ ܠܡܩܡ ܘܠܫܒܘܩ ܠܫܪܘܬܐ ܕܝܠܟ܃ ܐܝܟܢܐ ܕܟܕ ܐ݁ܙܠ ܐܢܬ ܬܥܦܐ ܠܗ݀ܘ ܡܝܬܐ܃ ܠܐ ܛܥܬܢܝ ܟܕ ܥ݁ܒܕ ܗܘܝܬ ܛܒ̈ܬܐ܃ ܐܠܐ ܥܡܟ ܐܝܬܝ ܗܘܝܬ܂܂܂
12:14	ܘܗܫܐ ܫܕܪܢܝ ܐܠܗܐ ܠܡܐܣܝܘ ܠܟ݂܂ ܘܠܟܠܬܐ ܕܝܠܟ ܣܪܐ܂܂
12:15	ܐܢܐ ܐܝܬܝ ܪܦܐܝܠ ܚܕ ܡܢ ܗܠܝܢ ܫܒܥܐ ܡ̈ܠܐܟܐ ܩܕ̈ܝܫܐ݁܂ ܗ݀ܢܘܢ ܕܡܣܩܝܢ ܘܥܐܠܝܢ ܩܕܡ ܬܫܒܘܚܬܗ ܕܩܕܝܫܐ݁܂
12:16	ܘܐܫܬܓܫܘ ܬܪܝܗܘܢ܂ ܘܢܦܠ ܥܠ ܦܪܨܘܦܐ ܡܛܠ ܕܕܚܠܘ݁܂
12:17	ܘܐܡܪ ܠܗܘܢ ܠܐ ܬܕܚܠܘܢ܂ ܫܝܢܐ ܠܟܘܢ ܢܗܘܐ܂ ܠܐܠܗܐ ܕܝܢ ܒܪܟܘ ܠܥܠܡ܂܂܂
12:18	ܡܛܠ ܕܠܘ ܒܛܝܒܘܬܐ ܕܝܠܢ܂ ܐܠܐ ܒܨܒܝܢܐ ܕܐܠܗܐ ܕܝܠܢ ܐ݁ܬܝܬ܂ ܡܢ ܗܪܟܐ݂܂ ܒܪܟܘܢܝܗܝ ܠܥܠܡ܂܂
12:19	ܟܠܗܘܢ ܝܘܡ̈ܬܐ ܗ݀ܢܘܢ ܕܡܬܚܙܐ ܗܘܝܬ ܠܟܘܢ܂ ܘܠܐ ܐܟܠܬ ܘܠܐ ܐܫܬܝܬ܂ ܐܠܐ ܚܙܘܐ ܐܢܬܘܢ ܚܙܝܢ ܗܘܝܬܘܢ܂܂܂
12:20	ܘܗܫܐ ܐܘܕܐ ܠܐܠܗܐ܂ ܡܛܠ ܕܣ݁ܠܩ ܐܢܐ ܠܘܬ ܗ݀ܘ ܕܫܕܪܢܝ܂ ܘܟܬܘܒܘ ܟܠܗܝܢ ܗܠܝܢ ܕܐܫܬܡܠܝܝܢ ܒܟܬܒܐ܂܂܂
12:21	ܘܩܡܘ ܘܠܐ ܚܙܐܘܗܝ܂ ܘܡܘܕܝܢ ܗܘܘ ܥܒ̈ܕܐ ܗܠܝܢ ܪܘܪ̈ܒܐ ܘܬܡ̈ܝܗܐ ܕܝܠܗ ܘܕܐܬܚܙܝ ܠܗܘܢ ܡܠܐܟܗ ܕܡܪܝܐ݁܂