The Comprehensive Aramaic Lexicon

03:01	ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ݂܂ ܢܦܫܐ ܕܒܐܘܠܨܢܐ ܘܪܘܚܐ ܕܒܟܪܝܘܬܐ܂ ܘܦܓܪܐ ܡܥܩܐ݂ ܓܥܘ ܠܘܬܟ܂
03:02	ܫܡܥ ܡܪܝܐ ܐܠܗܐ݂ ܘܐܬ݁ܪܚܡ܂ ܡܛܠ ܕܡܪܚܡܢܐ ܐܢܬ ܘܡܪܚܦܢܐ܂ ܘܪܚ݁ܡ ܥܠܝܢ݂ ܡܛܠ ܕܚ݂ܛܝܢ ܩܕܡܝܟ܂
03:03	ܡܛܠ ܕܐܢܬ ܩܝ݁ܡ ܐܢܬ ܠܥܠܡ ܘܚܢܢ ܐܒܕܝܢܢ݂ ܠܥܠܡ܂
03:04	ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ݂܂ ܫܡܥ ܨܠܘܬܐ ܕܐܝܠܝܢ ܕܡܝܬܘ ܒܐܝܣܪܝܠ݂܂ ܐܦ ܕܒܢܝܗܘܢ ܐܝܠܝܢ ܕܚܛܘ ܩܕܡܝܟ݁܂ ܘܠܐ ܫܡܥܘ ܒܩܠܗ ܕܡܪܝܐ܂ ܘܕܒܩ ܒܢ ܠܘ̈ܛܬܐ݂ ܘܒܝܫ݂݁ܬܐ܂
03:05	ܠܐ ܬܬܕ݂ܟܪ ܥܘ݂ܠܐ݂ ܘܣ̈ܟܠܘܬܐ ܕܐ̈ܒܗܝܢ܂ ܐܠܐ ܐܬܕ݂ܟܪ ܐܝܕܟ܂ ܘܠܫܡܟ ܒܙܒܢܐ ܗܢܐ܂
03:06	ܡܛܠ ܕܐܢܬ ܗܘ ܡܪܝܐ ܐܠܗܢ܂ ܘܢܫܒܚܘܢܟ ܡܪ̈ܝܐ܀
03:07	ܡܛܠ ܗܢܐ ܝܗ݂ܒܬ ܕܚܠܬܟ ܒܠܒܢ ܕܢܩܪܐ ܠܫܡܟ ܩܕܝܫܐ݂ ܘܢܫܒܚܟ ܒܫܒܝܬܢ܂ ܡܛܠ ܕܐܗܦܟܢ ܥܠ ܠܒܢ ܟܠܗܝܢ ܒܝܫ̈ܬܐ ܘܥܘ݂ܠܐ ܕܐ̈ܒܗܝܢ ܗܠܝܢ ܕܚܛ݂ܘ ܩܕܡܝܟ܂
03:08	ܘܗܐ ܚܢܢ ܝܘܡܢܐ ܒܫܒܝܬܢ ܕܒܕܪܬܢ ܠܠܘܛܬܐ ܘܠܚܣܕܐ݁܂ ܘܠܚܘܣܕܐ ܘܠܚܝܒܘܬܐ ܐܝܟ ܟܠܗܝܢ ܣ̈ܟܠܘܬܐ ܘܥܘ݂ܠܐ ܕܐ̈ܒܗܝܢ݁܂ ܐܝܠܝܢ ܕܡܪܕܘ ܡܢܟ ܡܪܝܐ ܐܠܗܢ܂
03:09	ܫܡ݂ܥ ܐܝܣܪܝܠ܂ ܦܘܩܕܢܐ ܕܚܝ̈ܐ܂ ܘܨܘܬܘ ܠܡܕܥ ܣܘܟܠܐ ܘܚܟܡܬܐ܂
03:10	ܡܢ݂ܘ ܐܝܣܪܐܝܠ܂ ܡܛܠ ܕܒܐܪܥܐ ܕܒ̈ܥܠܕܒܒܐ݂ ܒܠܝ݂ܬ܂ ܘܒܐܪܥܐ ܢܘܟܪܝܬܐ ܐܬܛܢ݂ܦܬ݂܂
03:11	ܥܡ ܡ̈ܝܬܐ ܐܬܚ݂ܫܒܬ݂ ܘܥܡ ܢܚ̈ܬܝ ܫܝܘܠ܂
03:12	ܕܫܒܩ݂ܬ ܡܒܘܥܐ ܕܚܟܡܬܐ܂
03:13	ܐܠܘ ܗܠ݂ܟܬ ܒܐܘܪܚܗ ܕܐܠܗܐ݂܂ ܥܡ݁ܪ ܗܘܝܬ ܒܫܠܡܐ ܙܒܢܐ ܕܠܥܠܡ ܥܠܡܝܢ܂
03:14	ܐܝܠܦ ܐܝܟܐ ܗܝ ܚܟܡܬܐ݁܂ ܘܐܝܟܘ ܚܝܠܐ ܘܐܝܟܘ ܣܘܟܠܐ܂ ܕܬܕܥ ܐܝܟ ܚܕܐ݁܂ ܐܝܟܘ ܢܘܓܪ̈ܐ ܕܝܘܡ̈ܬܐ ܕܚ̈ܝܐ܂ ܐܝ݁ܟܐ ܐܢܘܢ ܚ̈ܝܐ܂ ܐܝܟܘ ܢܘܗܪܐ ܕܚ̈ܝܐ܂
03:15	ܘܫܠܡܐ݂ ܡ݁ܢܘ ܐܫܟܚ ܐܬܪܗ܂ ܐܘ ܡܢ݂ܘ ܥܠ݂ ܠܐܘܨܪܗ ܘܠܒܝܬ ܓܙܗ܂
03:16	ܐܝܟܐ ܐܢܘܢ ܫ̈ܠܝܛܐ ܕܥܠܡܐ܂ ܘܐܝܠܝܢ ܕܡܫ݁ܬܠܛܝܢ ܥܠ ܚܝܘܬܐ ܕܐܪܥܐ݁܂
03:17	ܘܐܝܠܝܢ ܕܒܦܪܚܬܐ ܕܫܡܝܐ ܡܫܬܥܝܢ݁܂ ܘܟܣܦܐ ܣ݁ܝܡܝܢ ܠܗܘܢ ܒܣ̈ܝܡܬܐ݁܂ ܘܕܗܒܐ ܗ݀ܘ ܕܬܟܝܠܝܢ ܥܠܘܗܝ ܒܢ̈ܝ ܐܢܫܐ܂ ܘܠܝܬ ܣܘܦܐ ܠܩܢܝܢܗܘܢ܂
03:18	ܐܝܠܝܢ ܕܟܣܦܐ ܩ݂ܢܝܢ݂ ܘܫܩܝܠܝܢ ܨܦܬܗ܂ ܘܠܝܬ ܡܢܝܢܐ ܠܥܒܝ̈ܕܬܗܘܢ
03:19	ܐܬܚ݁ܒܠܘ ܘܢܚ݂ܬܘ ܠܫܝܘܠ܂ ܘܐܚܪ̈ܢܐ݂ ܩ݁ܡܘ ܚܠܦܝܗܘܢ܂
03:20	ܥ̈ܠܝܡܐ ܚܙܘ ܢܘܗܪܐ݂ ܘܥܡ݂ܪܘ ܒܐܪܥܐ܂ ܘܐܘܪܚܐ ܕܣܘܟܠܐ ܘܕܚܟܡܬܐ݂ ܠܐ ܝܕܥ݂ܘ܂
03:21	ܘܠܐ ܐܣ݁ܬܟܠܘ ܫܒܝ̈ܠܝܗ݂݁ ܐܦ ܠܐ ܐܚܡܣܘܗ݀܂ ܘܒܢܝܗܘܢ ܡܢ ܐܘܪܚܗ݂݀ ܐܪܚܩܘ ܢܦܫܗܘܢ݂ ܘܡܪܕܘ܀
03:22	ܠܐ ܐܫܬܡ݂ܥܬ݂ ܒܟܢܥܢ݂܂ ܐܦ ܠܐ ܐܬܚ݂ܙܝܬ ܒܬܝܡܢ݂܂
03:23	ܐܦ ܠܐ ܒܢ̈ܝ ܗܓܪ ܗܢ݂ܘܢ ܗܠܝܢ ܕܒܥ݁ܝܢ ܣܘܟܠܐ ܕܥܠ ܐܪܥܐ݁܂ ܬܓܪ̈ܝܗ݀ ܕܡܘ݂ܪܬ݂ ܘܕܬܝܡܢ݂܂ ܘܐܝܠܝܢ ܕܡܫܬ݁ܥܝܢ ܫ̈ܘܥܝܬܐ܂ ܘܐܝܠܝܢ ܕܡܥܩ݁ܒܝܢ ܘܒܥ݁ܝܢ ܣܘܟܠܐ܂ ܐܘܪܚܐ ܕܝܢ ܕܚܟܡܬܐ݂ ܠܐ ܝܕܥ݂ܘ܂ ܐܦܠܐ ܐܕܪܟܘ ܫܒ̈ܝܠܝܗ݀܂
03:24	ܐܘ ܐܝܣܪ̈ܝܠ ܟܡܐ ܪܒ ܒܝܬܗ ܕܡܪܝܐ ܐܠܗܐ܂ ܘܐܪܝܟ݂ ܘܐܪܘܝܚ ܐܬܪܐ ܕܩܢܝܢܗ܂
03:25	ܘܠܝܬ ܠܗ ܣܘܦܐ܂ ܘܪܡ ܗܘ݂ ܘܠܝܬ ܠܗ ܡܘܫܚܐ܂
03:26	ܬܡܢ ܐܬܝܠܕܘ ܓܢܒܪ̈ܐ ܗܠܝܢ ܕܫܡܗ̈ܬܐ ܕܡܢ ܒܪܫܝܬ݁܂ ܗܠܝܢ ܕܗܘ݂ܘ ܪ̈ܘܪܒܐ ܛܒ݂ ܘܝܕܥܝܢ ܩܪܒܐ܂
03:27	ܠܐ ܗܘܐ ܠܗܠܝܢ ܓܒ݂ܐ ܐܠܗܐ܂ ܐܦ ܠܐ ܐܘܪܚܐ ܕܚܟܡܬܐ ܝܗ݂ܒ ܠܗܘܢ܂
03:28	ܘܐܒܕܘ݂ ܡܛܠ ܕܠܝܬ ܗܘܐ ܒܗܘܢ ܚܟܡܬܐ ܘܣܘܟܠܐ܂ ܘܐܒܕܘ ܡܢ ܒܠܝ ܡܚܫܒܬܐ܂ ܡܛܠ ܕܠܝܬ ܗܘܐ ܒܗܘܢ ܬܪܥܝܬܐ܂
03:29	ܡ݁ܢ ܣܠ݂ܩ ܠܫܡܝܐ ܘܢܣܒܗ݀ ܘܐܚܬܗ݀ ܡܢ ܥܢܢܐ܂
03:30	ܐܘ ܡܢܘ ܥܒ݂ܪ ܥܒ݂ܪ̈ܘܗܝ ܘܚܪܬܗ ܕܝܡܐ݁܂ ܘܐܫܟܚܗ݀ ܘܐܣܩܗ݀ ܐܝܟ ܕܠܕܗܒܐ ܓܒܝ݂ܐ܂
03:31	ܠܝܬ ܕܝܕܥ݁ ܐܘܪܚܗ݂݁݁ ܐܦܠܐ ܕܡܬܪܥܐ ܫܒܝ̈ܠܝܗ݀܂
03:32	ܐܠܐ ܗ݀ܘ ܕܝܕܥ݁ ܟܠ݂ ܗܘܝܘ ܝ݁ܕܥ ܠܗ݀܂ ܐܫܟܚܗ݀ ܒܚܟܡܬܗ܂ ܗ݀ܘ ܕܐܬܩܢ ܐܪܥܐ ܠܥܠܡ ܥܠܡܝܢ܂ ܡܠ݂ܗ݀ ܒܥܝܪܐ ܕܐܪ̈ܒܥܬ ܪ̈ܓܠܝܗ݀܂
03:33	ܗܘ݁ ܕܡܫܕܪ ܢܘܗܪܐ ܘܐ݁ܙܠ݁܂ ܘܩܪܝܗܝ ܘܐܫܬ݂ܡܥ ܠܗ܂ ܘܥܢܝܗܝ݂ ܒܐܪܬܝܬܐ܂
03:34	ܟܘ̈ܟܒܐ ܕܝܢ ܐܢܗܪܘ ܒܕܘܟܝ̈ܬܗܘܢ݂ ܘܐܬ݁ܒܣܡܘ܂
03:35	ܘܩ݁ܪܐ ܠܗܘܢ ܘܐܡܪܝܢ݂ ܗܐ ܚܢܢ܂ ܐܢܗܪܘ݂ ܒܚܕܘܬܐ ܠܗ݀ܘ ܡ݁ܢ ܕܥܒ݂ܕ ܐܢܘܢ܂ ܀܀
03:36	ܗܢܘ ܐܠܗܐ ܘܠܝܬ ܐܚܪܝܢ ܠܒܪ ܡܢܗ܂ ܘܠܐ ܢܬܚ݂ܫܒ ܠܒܪ ܡܢܗ ܐܚܪܝܢ܂
03:37	ܗܢܘ ܕܐܫܟܚ ܟܠܗ ܐܘܪܚܐ ܕܚܟܡܬܐ݁܂ ܘܝܗܒܗ݀ ܠܝܥܩܘܒ ܥܒ݂ܕܗ݂܂ ܘܠܐܝܣܪܝܠ ܚܒܝܒܗ܂

03:38	ܘܡܢ ܒܬܪ ܗܠܝܢ܂ ܥܠ ܐܪܥܐ ܐܬܓܠܝ݂ ܘܐܬܚܙܝ܂ ܘܒܝܬ ܒܢ̈ܝ ܐܢܫܐ ܐܬܗ݀ܦܟ܂