← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62069: P Baruch

Click on a word for lexical analysis
Click on a red-colored coordinate for comments and/or translations of the line

previous chapter


04:01 ܗܢܘ ܟܬܒܐ ܕܕܘܟܪܢܐ ܕܦܘܩܕܢܘܗܝ ܕܐܠܗܐ݁܂ ܘܢܡܘܣܐ ܕܐܝܬܘܗܝ ܠܥܠܡ܂ ܠܟܠܗܘܢ ܐܝܠܝܢ ܕܡܚܡܣܢܝܢ ܒܗ܂ ܬܗܘܐ ܠܗܘܢ݂ ܠܚܝ̈ܐ܂ ܘܐܝܠܝܢ ܕܫܒܩܝܢ ܠܗܘܢ݂ ܢܡܘܬܘܢ܂
04:02 ܐܬܦ݂ܢܝ ܘܐ݁ܬܝܠܦ ܝܥܩܘܒ̈ ܘܚܡܣܢ݂ ܘܗ݀ܠܟ ܒܐܘܪܚܗ݀܂ ܠܘܩܒܠ ܙܗܪܐ ܕܢܘܗܪܗ܂
04:03 ܠܐ ܬܬܠ ܠܐܚܪܝܢ ܬܫܒܘܚܬܟ ܘܐܝܩܪܟ݁܂ ܘܡܕܡ ܕܛܒ ܠܟ݁ ܘܦܩܚ ܠܟ ܠܥܡܐ ܢܘܟܪܝܐ܂
04:04 ܛܘܒ̈ܢܐ ܚܢܢ܂ ܘܛܘܒܝܟ ܐܝܣܪܝܠ܂ ܡܛܠ ܕܡܕܡ ܕܫܦܝܪ ܠܐܠܗܢ݂ ܝܕܥܝܢܢ܂
04:05 ܐܬܒܝܐܘ݁ ܥܡܗ݀ ܕܐܠܗܐ܂ ܕܘܟܪܢܐ ܠܐܝܣܪܝܠ܂
04:06 ܡܛܠ ܕܐܙܕܒ݁ܢܬܘܢ ܠܥܡ̈ܡܐ݂ ܠܐ ܗܘܐ ܠܐܒܕܢܐ܂ ܐܠܐ ܡܛܠ ܕܐܪܓܙܬܘܢ ܠܐܠܗܐ ܐܫܬܠܡܬܘܢ ܠܒ̈ܥܠܕܒܒܝܟܘܢ܂
04:07 ܐܪܓܙܬܘܢ ܓܝܪ݂ ܠܗܘ݁ ܕܥܒܕܟܘܢ ܠܐܠܗܐ ܕܠܥܠܡ܂ ܥܠ ܕܕܒܚ݁ܬܘܢ ܠܫܐ̈ܕܐ ܘܠܐ ܠܐܠܗܐ݁܂
04:08 ܘܛܥܝܬܘܢ ܠܡܪܒܝܢܟܘܢ ܠܐܠܗܐ ܕܠܥܠܡ܂ ܐܟ݂ܪܝܬܘܢ ܕܝܢ݂ ܐܦ ܠܡܪܒ݁ܝܢܬܟܘܢ ܐܘܪܫܠܡ܂
04:09 ܚ݁ܙܝܬ ܓܝܪ ܕܐܬ݂ܐ ܥܠܝܟܘܢ ܪܘܓܙܐ ܘܚܡܬܐ݁ ܡܢ ܩܕܡ ܡܪܝܐ ܘܐܡ݁ܪܬ܂ ܫܘܡܥܘܢܝ݁ ܥܡܘܪ̈ܐ ܕܨܗܝܘܢ܂ ܐܝܬܝ ܓܝܪ ܥܠܝ ܡܪܝܐ ܐܠܗܐ݂܂ ܐܒܠܐ ܪܒܐ ܕܠܥܠܡ܂
04:10 ܚ݁ܙܝܬ ܓܝܪ ܒܫܒܝܐ ܕܒܢ̈ܝ ܘܕܒܢ̈ܬܝ ܕܐܝܬܝ ܥܠܝܗܘܢ ܡܪܐ ܥ̈ܠܡܐ܂
04:11 ܪܒ݁ܝܬ ܐܢܘܢ ܓܝܪ ܒܚܕܘܬܐ݂ ܘܫ݁ܕܪܬ ܐܢܘܢ ܒܒܟܬܐ݁ ܘܒܐܒܠܐ݂ ܘܒܬܐ̈ܢܚܬܐ܂
04:12 ܠܐ ܐܢܫ ܢܚܕܐ ܠܐܪܡܠܘܬܝ ܕܐܫܬܒܩܬ݁܂ ܘܨ݁ܕܝܬ ܡܢ ܥܡܐ ܣܓܝܐܐ܂ ܡܛܠ ܚ̈ܛܗܐ ܕܒܢ̈ܝ܂ ܡܛܠ ܕܣ݂ܛܘ ܡܢ ܐܘܪܚܗ ܕܡܪܝܐ ܐܠܗܐ݂܂
04:13 ܘܦܘܩ̈ܕܢܘܗܝ ܘܕܝܢ݂̈ܘܗܝ ܠܐ ܝܕܥܘ܂ ܐܦ ܠܐ ܗܠܟܘ ܒܐܘܪܚܐ ܕܦܘܩ̈ܕܢܘܗܝ ܕܐܠܗܐ܂ ܐܦ ܠܐ ܒܫܒܝܠܐ ܕܡܪܕܘܬܐ ܕܩܘܫܬܐ݁܂ ܒܙܕܝܩܘܬܐ ܕܪܟܘ ܐܘ ܐܬܛܦܝܣܘ܂
04:14 ܐܢܬܘܢ ܥܡܘܪ̈ܐ ܕܨܗܝܘܢ݂܂ ܐܬܕ݂ܟܪܘ ܫܒܝܬܐ ܕܒܢ̈ܝ ܘܕܒܢ̈ܬܝ ܕܐܝܬܝ ܥܠܝܗܘܢ ܡܪܐ ܥ̈ܠܡܐ܂
04:15 ܐܝܬܝ ܓܝܪ ܥܠܝܗܘܢ ܥܡܐ݂ ܡܢ ܪܘܚܩܐ܂ ܥܡܐ ܚܨܝܦܐ ܘܡܡܠܠ ܒܠܫܢܐ ܐܚܪܢܐ܂ ܘܠܐ ܒܗܬܘ ܡܢ ܣܒ̈ܐ܂ ܘܥܠ ܥ̈ܠܝܡܐ݂ ܠܐ ܐܬܪܚ݁ܩܘ܂
04:16 ܘܫܒ݂ܘ ܘܕܒ݂ܪܘ ܠܚܒ̈ܝܒܝܗ݀ ܕܐܪܡܠܬܐ݂ ܘܠܒܢ̈ܬܗ݀܂ ܘܠܝܚܝܕܬܐ݁ ܘܠܡܫܘܚܕܬܐ݂ ܐܚܪܒܘ܂
04:17 ܐܢܐ ܓܝܪ݂ ܠܐ ܡܫܟܚܐ ܐܢܐ ܕܐܥܗܕܟܘܢ܂
04:18 ܗ݀ܘ ܓܝܪ ܡ݁ܢ ܕܐܝܬܝ ܥܠܝܟܘܢ ܒܝܫܬܐ݂܂ ܗ݂ܘ ܦܪܩ݁ ܠܟܘܢ ܡܢ ܐܝܕܐ ܕܒ̈ܥܠܕܒܒܝܟܘܢ܂
04:19 ܙܠܘ ܒ̈ܢܝ ܙܠܘ܂ ܐܢܐ ܓܝܪ ܐܫܬܒ݁ܩܬ ܚܪܒܬܐ݂ ܘܨ݁ܕܝܬܐ܂
04:20 ܫ݁ܠܚܬ ܐܣܛܠܐ ܕܫ݁ܠܡܐ݂܂ ܘܠܒܫܬ ܣܩܐ ܒܒܥܘܬܝ܂ ܐܓܥܐ ܠܘܬܟ ܚܝ ܥ̈ܠܡܐ݁ ܒܝ̈ܘܡܬܐ܂
04:21 ܐܬܬܥܝܪܘ ܒܢܝ݂ ܘܓܥܘ ܠܘܬ ܡܪܝܐ܂ ܘܢܦܨܝܟܘܢ ܡܢ ܐ̈ܝܕܝ ܥܫܝ̈ܢܐ܂ ܘܡܢ ܐܝ̈ܕܝ ܫ̈ܠܝܛܢܐ܂ ܘܡܢ ܐ̈ܝܕܝ ܒ̈ܥܠܕܒܒܐ܂
04:22 ܐܢܐ ܓܝܪ ܣܒ݁ܪܬ ܥܠ ܚܝ ܥ̈ܠܡܐ ܠܦܘܪܩܢܟܘܢ܂ ܘܐܬ݂ܬ ܠܝ ܚܕܘܬܐ ܡܢ ܩܕܡ ܡܪܝܐ ܐܠܗܐ ܕܠܥܠܡ܂ ܡܛܠ ܕܒܥܓܠ ܐܬ݁ܪܚܡ ܥܠܝܗܘܢ܂ ܡܛܠ ܪ̈ܚܡܘܗܝ ܕܐܠܗܐ ܦܪܘܩܗܘܢ ܕܠܥܠܡ܂
04:23 ܫܕܪܬܟܘܢ ܓܝܪ ܒܐܒܠܐ݂ ܘܒܒܟܬܐ܂ ܘܢܦܢܝܟܘܢ ܠܝ ܐܠܗܐ ܘܐܩ݁ܒܠܟܘܢ ܡܢܗ܂ ܒܚܕܘܬܐ݁ ܘܒܒܘܣܡܐ ܕܠܥܠܡ܂
04:24 ܕܐܝܟܢܐ ܕܗܫܐ ܚܙܘ ܥܡܘܪ̈ܝܗ݀ ܕܨܗܝܘܢ ܫܒܝܬܟܘܢ݂܂ ܗܟܢܐ ܒܥܓܠ ܢܚܙܘܢ ܦܘܪܩܢܟܘܢ ܕܡܢ ܠܘܬ ܡܪܝܐ݂ ܐܠܗܢ݁܂ ܘܢܝܬܟܘܢ݂ ܒܚܕܘܬܐ ܪܒܬܐ݁܂ ܘܒܬܫܒܘܚܬܐ ܘܒܢܘܗܪܗ ܕܡܪܐ ܥ̈ܠܡܐ܂
04:25 ܒ̈ܢܝ ܐܓܪܘ ܪܘܚܟܘܢ܂ ܘܣܝ݁ܒܪܘ ܪܘܓܙܐ ܕܡܢ ܡܪܝܐ ܐܠܗܐ ܐܬ݂ܐ ܥܠܝܟܘܢ܂ ܪܕܦܟ ܒܥܠܕܒܒܟ܂ ܡܛܠ ܗܢܐ݂ ܒܥܓܠ ܬܚܙܐ ܒܐܒܕܢܗ܂ ܘܥܠ ܨܘܪܗܘܢ ܬܕܪܘܟ܂
04:26 ܡܦܢ̈ܩܝ݂/ܡܦܢܩ̈ܢܝ/ ܐܙܠ݂ܘ ܒܫܒܝܐ܂ ܘܗܠܟܘ ܒܐܘܪ̈ܚܬܐ ܥܣ̈ܩܬܐ ܕܥܪ̈ܡܐ܂ ܘܐ݁ܬܒܕܪܘ ܒܐܘܪ̈ܚܬܐ ܥܣ̈ܩܬܐ܂ ܘܐܬ݁ܒܕܪܘ݂ ܐܝܟ ܓܙܪܐ܂ ܘܐܬ݁ܚ݂ܛܦ ܡܢ ܐ̈ܝܕܝ ܒ̈ܥܠܕܒܒܐ܂
04:27 ܐܬܒܝܐܘ ܒ̈ܢܝ ܘܐܙܥܩܘ ܠܘܬ ܡܪܝܐ ܐܠܗܐ܂ ܢܗܘܐ ܠܟܘܢ ܓܝܪ ܠܘܬ ܡܪܝܐ ܕܘܟܪܢܐ݁܂ ܡܢ ܗܘ݁ ܕܐܝܬܝ ܥܠܝܟܘܢ ܗܠܝܢ܂
04:28 ܡܛܠ ܕܐܝܟܢܐ ܕܛܥ݁ܐ ܗܘܐ ܪܥܝܢܟܘܢ ܡܢ ܡܪܝܐ݂܂ ܚܕ ܒܥܣܪ̈ܐ ܬܘܒܘ݂ ܘܐܬܦܢܘ ܠܘܬ ܡܪܝܐ܂ ܘܬܒܥܘܢܗܝ ܠܐܠܗܐ܂
04:29 ܗܘ݁ ܓܝܪ ܡ݁ܢ ܕܐܝܬܝ ܥܠܝܟܘܢ ܒܝܫ݂ܬܐ݂܂ ܗ݂ܘ ܢܝܬܐ ܥܠܝܟܘܢ ܚܕܘܬܐ݂ ܠܥܠܡ ܥܡ ܦܘܪܩܢܟܘܢ܂
04:30 ܐܬܒܝܐ ܐܘܪܫܠܡ܂ ܂ ܡܒܝܐ ܗܘ ܠܟܝ ܗܘ݁ ܡ݁ܢ ܕܣܡ ܠܟܝ ܫܡܐ܂
04:31 ܢܕܚ̈ܠܢ ܡܕܝܢ̈ܬܐ ܐܝܠܝܢ ܕܐܒܐܫ ܠܟܝ ܘܚܕܝ ܥܠ ܡܦܘܠܬܟܝ܂
04:32 ܢܬܪ̈ܗܒܢ ܡܕܝܢ̈ܬܐ ܐܝܠܝܢ ܕܫܥ݂ܒܕ ܠܒܢܝܟܝ܂ ܬܚܕܝܢ ܥܠ ܡܦܘܠܬܗܝܢ܂ ܢܕܚܠܘܢ ܐܝܠܝܢ ܕܐܒܐܫܘ ܠܟܝ܂ ܬܬ݂ܪܗܒ ܗܝ݁ ܕܩܒܠ݂ܬ ܠܒܢܝܟܝ܂
04:33 ܐܝܟܢܐ ܓܝܪ ܕܚ݁ܕ݂ܝܬ ܥܠ ܡܦܘܠܬܟܝ݂܂ ܗܟܢܐ ܬܬܥܝܩ ܘܬܟ݁ܪܐ ܠܗ݀ ܥܠ ܚܘܪܒܗ݀܂
04:34 ܘܐܫܩܘܠ ܡܢܗ݀ ܓܠܝܦ̈ܐ܂ ܘܕܝ݁ܨܐ ܕܟܢ̈ܫܐ ܣ̈ܓܝܐܐ݂ ܘܚܕܘܬܗ݀ ܬܗܘܐ ܠܐܒܠܐ܂
04:35 ܢܘܪܐ ܓܝܪ ܬܫܬܕܪ ܥܠܝܗ݀ ܡܢ ܠܘܬ ܚܝ ܥ̈ܠܡܐ݂ ܢܘܓܪܐ݂ ܕܝܘ̈ܡܬܐ܂ ܘܢܥܡ݂ܪܘܢ ܒܗ݀ ܫܐ̈ܕܐ ܟܠܗ ܙܒܢܐ܂
04:36 ܚܘܪܝ ܠܡܕܢܚܐ ܐܘܪܫܠܡ܂ ܂ ܘܚܙܝ ܚܕܘܬܐ ܕܡܢ ܠܘܬ ܐܠܗܐ ܐܬܝܐ ܠܟܝ܂
04:37 ܗܐ ܓܝܪ ܐܬ݁ܝܢ ܠܟܝ ܒܢܝܟܝ ܐܝܠܝܢ ܕܫܕܪܬܝ܂ ܐܬ݁ܝܢ݂ ܘܡܬ݁ܟܢܫܝܢ܂ ܡܢ ܡܕܢܚ̈ܘܗܝ ܕܫܡܫܐ ܘܥܕܡܐ ܠܡܥܪ̈ܒܘܗܝ܂ ܒܡܠܬܗ ܕܡܪܝܐ ܐܠܗܐ ܩܕܝܫܐ܂ ܘܚ݁ܕܝܢ ܒܬܫܒܘܚܬܗ ܕܐܠܗܐ܂

next chapter