The Comprehensive Aramaic Lexicon

03:01	ܢܦܫܬ̈ܗܘܢ ܕܝܢ ܕܙܕܝ̈ܩܐ ܒܐ̈ܝܕܘܗܝ ܐ̈ܢܝܢ ܕܐܠܗܐ܂ ܘܠܐ ܩܪܒ ܠܗܝܢ ܬܫܢܝܩܐ܂
03:02	ܐܣܬܒܪܘ ܒܥܝܢ̈ܝ ܫ̈ܛܝܐ ܕܡܝܬܝܢ ܐܢܘܢ܂ ܘܐܬܚܫܒܬ ܡܦܩܬܗܘܢ ܒܝܫܐ܂
03:03	ܘܐܝܟ ܫܚܝܩܐ ܡܦܩܬܗܘܢ ܕܡܢ ܠܘܬܢ܂ ܗܢܘܢ ܕܝܢ ܐܝܬܝܗܘܢ ܒܫܠܡܐ܂
03:04	ܐܢ ܓܝܪ ܒܥܝܢ̈ܝ ܒܢ̈ܝ ܐܢܫܐ ܢܬܚܝܒܘܢ ܣܒܪܗܘܢ ܡܠܐ ܚ̈ܝܐ܂
03:05	ܕܩܠܝܠ ܒܩܐ ܐܢܘܢ ܘܩܠܝܠ ܐܬܪܕܝܘ ܣܓܝ ܢܐܪܬܘܢ܂ ܡܛܠ ܕܐܠܗܐ ܢܣܝ/ܫܢܢ#3#/ ܐܢܘܢ܂ ܘܐܫܟܚ ܐܢܘܢ ܕܫܘܝܢ ܠܗ܂
03:06	ܐܝܟ ܕܗܒܐ ܒܟܘܪܐ ܒܩܐ ܐܢܘܢ܂ ܘܐܝܟ ܥ̈ܠܘܬܐ ܘܕܒܚ̈ܐ ܫ̈ܠܡܐ ܩܒܠ ܐܢܘܢ܂
03:07	ܘܒܙܒܢܐ ܢܗܘܐ ܒܘܩܪܗܘܢ/ܒܘܩܪܢܗܘܢ#3#/ ܘܐܝܟ ܒ̈ܠܨܘܨܝܬܐ ܒܩ̈ܢܝܐ܂ ܢܪܗܛܘܢ ܙܕܝ̈ܩܐ ܒܝܢ̈ܬ ܪ̈ܫܝܥܐ܂
03:08	ܢܪܘܙܘܢ ܥܡ̈ܡܐ ܘܢܚ̈ܕܝܢ ܐ̈ܡܘܬܐ܂ ܘܢܡܠܟ ܥܠܝܗܘܢ ܡܪܝܐ ܠܥܠܡ܂
03:09	ܘܐܝܠܝܢ ܕܬܟܝܠܝܢ ܥܠܘܗܝ ܡܣܬܟܠܝܢ ܒܩܘܫܬܐ܂ ܘܕܡܗܝܡܢܝܢ ܒܚܘܒܐ ܡܩܘܝܢ ܠܗ܂ ܡܛܘܠ ܕܛܝܒܘܬܐ ܘܪ̈ܚܡܐ ܠܓܒ̈ܘܗܝ ܝܗܒ܂ ܘܣܘܥܪܢܗ ܥܠ ܚܣ̈ܝܘܗܝ܂
03:10	ܘܪ̈ܫܝܥܐ ܐܝܟ ܡܚܫ̈ܒܬܗܘܢ ܢܩܒܠܘܢ ܨܥܪܐ܂ ܗܢܘܢ/ܗܠܝܢ#3#/ ܕܒܣܘ ܒܡܪܝܐ ܘܐܪܚܩܘ ܡܢ ܙܕܝܩ̈ܘܗܝ܂
03:11	ܚܟܡܬܐ ܓܝܪ/ܕܝܢ#3#/ ܘܡܪܕܘܬܐ ܡ݁ܢ ܕܡܣܠܐ܂ ܕܘܝܐ ܗܘ ܘܣܪܝܩ ܗܘ ܣܒܪܗ܂ ܘܠܐܘܬܗܘܢ ܠܝܬ ܒܗ݀ ܐܝܕܥܬܐ܂ ܘܥܒ̈ܕܝܗܘܢ ܠܐ ܟܫܪܝܢ܂
03:12	ܘܢܫ̈ܝܗܘܢ ܠܐ ܚ̈ܟܝܡܢ܂ ܘܒܝܫ̈ܝܢ ܒܢܝܗܘܢ܂ ܘܠܝܛܐ ܬܘܠܕܬܗܘܢ܂

03:13	ܡܛܠ ܕܛܒ ܗܘ ܠܥܩܪܬܐ ܕܠܐ ܐܬܛܢܦܬ܂ ܗܝ ܕܠܐ ܝܕܥܬ ܥܪܣܐ ܕܡܦܘܠܬܐ܂ ܬܣܒ ܦܐܪ̈ܐ ܡܐ ܕܡܬܦܩܕܢ ܢܦܫ̈ܬܐ܂

03:14	ܘܡܗܝܡܢܐ ܕܠܐ ܥܒܕ ܐ̈ܝܕܘܗܝ ܥܒܪ ܢܡܘܣܐ܂ ܘܠܐ ܐܬܚܫܒ ܥܠ ܡܪܝܐ ܒܝܫܬܐ܂ ܬܬܝܗܒ ܠܗ ܡܛܠ ܛܝܒܘܬܗ ܘܗܝܡܢܘܬܗ ܛܝܒܘܬܐ ܓܒܝܬܐ ܘܝܘܪܬܢܐ ܕܪܓܬܐ ܒܒܝܬܗ ܕܡܪܝܐ܂
03:15	ܐܓܪܐ ܒܚܝܪܐ ܠܠܐܘܬܐ ܛܒܬܐ܂ ܘܠܐ/ܕܠܐ#3#/ ܢܬܥܩܪܘܢ ܫܪ̈ܫܝܗ݀ ܕܢܟܦܘܬܐ܂
03:16	ܘܒܢܝܗܘܢ ܕܓܝܪ̈ܐ ܠܐ ܢܫܬܟܠܠܘܢ܂ ܘܡܬܚܒܠ ܙܪܥܐ ܡܢ ܡܕܡܟܐ ܕܥܒܪ ܢܡܘܣܐ܂
03:17	ܢܣܓܐ ܥܘܡܪܗܘܢ ܠܠܐ ܡܕܡ ܢܬܚܫܒܘܢ܂ ܘܣܘܦܐ ܕܣܝܒܘܬܗܘܢ ܠܨܥܪܐ܂
03:18	ܘܐܢ ܟܕ ܡܣܪܗܒܐܝܬ ܢܡܘܬܘܢ ܠܝܬ ܠܗܘܢ ܣܒܪܐ܂ ܐܦ ܠܐ ܒܘܝܐܐ/ܒܘܝܐܝܐ#3#/ ܒܝܘܡܐ ܝܕܝܥܐ܂
03:19	ܫܪܒܬܐ ܓܝܪ ܕܪ̈ܫܝܥܐ ܡܪܝܪ ܣܘܦܗ݀܂