The Comprehensive Aramaic Lexicon

09:01	ܐܠܗܐ ܕܐ̈ܒܗܬܝ ܘܡܪܗܘܢ ܕܪ̈ܚܡܐ܂ ܐܢܬ ܥܒܕܬ ܟܠ ܡܕܡ ܒܡܠܬܟ܂
09:02	ܘܒܚܟܡܬܟ ܬܩܢܬ ܠܒܪ ܐܢܫܐ܂ ܕܢܫܬܠܛ ܥܠ ܒܪ̈ܝܬܟ ܕܥܒܕܬ܂
09:03	ܕܢܕܒܪ ܠܒܪܝܬܐ ܕܥܠܡܐ ܒܩܘܫܬܐ ܘܒܙܕܝܩܘܬܐ܂ ܘܒܢܦܫܐ ܕܟܐܢܘܬܐ ܢܕܘܢ ܕܝܢܐ܂
09:04	ܗܒ ܠܝ ܚܟܡܬܐ ܡܢ ܩܕܡ ܟܘܪܣܝܟ ܘܠܐ ܬܣܠܝ݂ܢܝ ܡܢ ܥܒ̈ܕܝܟ܂
09:05	ܡܛܠ ܕܐܢܐ ܥܒܕܟ ܐܢܐ܂ ܥܒܕܟ ܐܢܐ ܘܒܪܗ݀ ܕܐܡܬܟ܂ ܘܓܒܪܐ ܟܪܝܗܐ ܘܙܥܘܪ ܙܒܢܐ܂ ܘܚܣܝܪ ܡܕܥܐ ܒܕܝܢܐ ܘܒܢܡܘܣܐ܂
09:06	ܐܢ ܢܗܘܐ ܓܝܪ ܐܢܫ ܡܫܟܠܠ ܒܒܢ̈ܝ ܐܢܫܐ܂ ܡܐ ܕܫܢܝܬ ܪܘܚܐ ܕܡܢ ܠܘܬܟ ܡܢܗ ܠܡܕܡ ܠܐ ܡܬܚܫܒ܂
09:07	ܐܢܬ ܗܘ ܕܓܒܝܬܢܝ ܡ݁ܠܟܐ ܠܡܠܟܘܬܗ ܕܥܡܟ܂ ܘܕܝ݁ܢܐ ܠܒ̈ܢܝܟ ܘܠܒܢ̈ܬܟ܂
09:08	ܘܐܡܪܬ ܕܐܒܢܐ ܗܝܟܠܐ ܒܛܘܪܟ ܩܕܝܫܐ܂ ܘܒܡܕܝܢܬܐ ܕܡܥܡܪܟ ܡܕܒܚܐ܂ ܕܡܘܬܐ ܕܡܫܟܢܟ ܩܕܝܫܐ܂ ܗ݀ܘ ܕܥܬܕܬ ܡܢ ܩܕܝܡ܂
09:09	ܘܥܡܟ ܗܝ ܚܟܡܬܐ ܕܝܕܥܐ ܥܒ̈ܕܝܟ܂ ܘܥܡܟ ܗܘܬ ܟܕ ܥܒܕܬ ܥ̈ܠܡܐ܂ ܘܝܕܥܐ ܕܡܢܐ ܫܦܝܪ ܩܕܡ ܥܝܢ̈ܝܟ܂ ܘܡܢܐ ܬܪܝܨ ܒܦܘ̈ܩܕܢܝܟ܂
09:10	ܫܕܪܝܗ݀ ܡܢ ܫܡ̈ܝ ܩܘܕܫܟ܂ ܘܡܢ ܟܘܪܣܝܐ ܕܪܒܘܬܟ ܫܕܪܝܗ݀܂ ܕܬܐܬܐ ܘܬܠܐܐ ܥܡܝ܂ ܕܐܕܥ ܡܢܐ ܫܦܝܪ ܩܕܡܝܟ܂
09:11	ܗܝ ܓܝܪ ܝܕܥܐ ܟܘܠ ܡܕܡ ܘܡܣܬܟܠܐ܂ ܘܬܕܒܪܢܝ ܒܟܠܗܘܢ ܥܒ̈ܕܝ ܚܟܝܡܐܝܬ܂ ܘܒܬܫܒܘܚܬܗ݀ ܬܢܛܪܢܝ܂
09:12	ܘܢܗܘܘܢ ܡܩܒܠܝܢ ܟܠܗܘܢ ܥܒ̈ܕܝ܂ ܘܕܐܗܘܐ ܫܘܐ ܠܟܘܪܣܝܗ ܕܐܒܝ܂
09:13	ܡܢܘ ܓܝܪ ܐܢܫܐ ܕܝܕܥ ܡܠܟܗ ܕܐܠܗܐ܂ ܐܘ ܡ݁ܢ ܗܘ ܡܬܚܫܒ ܕܡܢܘ ܨܒܝܢܗ ܕܡܪܝܐ܂
09:14	ܡܚܫ̈ܒܬܗܘܢ ܓܝܪ ܕܡܝ̈ܘܬܐ ܡܚ̈ܝܠܢ ܐ̈ܢܝܢ܂ ܘܠܐ ܡܫܪ̈ܪܢ ܡܚܫ̈ܒܬܗܘܢ܂
09:15	ܦܓܪܐ ܓܝܪ ܕܚܒܠܐ ܝܩܝܪ ܥܠ ܢܦܫܐ܂

09:16	ܗܐ ܐܝܠܝܢ ܕܒܐܪܥܐ ܐ̈ܢܝܢ ܡܢ ܡܚܣܢ ܡܕܪܟܝܢܢ܂ ܘܕܩܕܡ/ܘܩܕܡ#3#/ ܥܝܢ̈ܝܢ ܒܠܐܘܬܐ ܡܫܟܚܝܢ ܚܢܢ܂ ܘܐܝܠܝܢ ܕܒܐ̈ܝܕܝܢ ܒܥܡܠܐ ܡܫܟܚܝܢܢ܂ ܥܠ ܐܝܠܝܢ ܕܝܢ ܕܒܫܡܝܐ ܐ̈ܢܝܢ ܡܢܘ ܡܫܟܚ ܠܡܥܩܒܘ܂

09:17	ܡܠ݂ܟܟ ܕܝܢ ܡܢܘ ܝܕܥ ܐܠܐ ܐܢܬ܂ ܝܗܒܬ ܚܟܡܬܐ܂ ܘܫܕܪܬ ܪܘܚܟ ܕܩܘܕܫܐ ܡܢ ܫ̈ܡܝܟ܂
09:18	ܘܗܟܢܐ ܐܬܬܪܨܘ ܫܒܝ̈ܠܐ ܥܠ ܐܪܥܐ܂ ܘܝܠܦܘ ܒ̈ܢܝ ܐܢܫܐ ܨܒܝܢܟ ܘܒܚܟܡܬܟ ܚܝܘ܂