Click on a word for lexical analysis
Click on a red-colored coordinate for comments and/or translations of the line
| 55:01 | ܘܗ݂ܘܐ ܕܟܕ ܫܠܡ݁ܬ ܠܡܡܠܠܘ ܡ̈ܠܝܗ݀ ܕܨܠܘܬܐ ܗܕܐ݂܂ ܝܬ݁ܒܬ ܬܡܢ ܬܚܝܬ ܐܝܠܢܐ ܕܐܬܬܢܝܚ ܒܛܠܠܐ ܕܣܘ̈ܟܐ܂ |
| 55:02 | ܘܡܬܕܡܪ ܗܘ݁ܝܬ ܘܡܬܬܡܗ ܘܡܬܪܢܐ ܒܡܚ݂̈ܫܒܬܝ ܥܠ ܣܘܓܐܐ ܕܛ݁ܒܘܬܐ ܕܕܚ݂ܩܘ ܡܢܗܘܢ ܚܛ̈ܝܐ ܕܥܠ ܐܪܥܐ܂ ܘܥܠ ܬܫܢܝܩܐ ܣܓܝܐܐ ܕܒܣܪܘ ܥܠܘܗܝ܂ ܟܕ ܝܕ݁ܥܝܢ ܕܡܫܬܢܩܝܢ ܥܠ ܕܚܛ݁ܝܢ܂ |
| 55:03 | ܘܟܕ ܗܠܝܢ ܘܐܝܠܝܢ ܕܕ̈ܡܝܢ ܠܗܝܢ ܡ݁ܬܚܫܒ ܗܘ݁ܝܬ܂ ܘܗܐ ܐܫܬܠܚ ܠܘܬܝ ܪܡܐܝܠ ܡܠܐܟܐ ܗ݀ܘ ܕܩܐ݁ܡ ܥܠ ܚܙܘ̈ܢܐ ܕܫܪܪܐ ܘܐܡ݂ܪ ܠܝ܂ |
| 55:04 | ܠܡܢܐ ܡܕܠܚ ܠܟ ܠܒܟ ܒܪܘܟ܂ ܘܠܡܢܐ ܫܓ݁ܫܐ ܠܟ ܡܚܫܒܬܟ܂ |
| 55:05 | ܐܢ ܓܝܪ ܫܡܥܐ ܗܘ ܫܡܥ݂ܬ ܒܠܚܘܕ ܥܠ ܕܝ݂ܢܐ ܗܟܢܐ ܐܬܬ݂ܙܝܥܬ݂܂ ܡܢܐ ܟܕ ܬܚܙܝܘܗܝ ܒܥܝܢܝ̈ܟ ܥܝܢܒܓܠܐ܂ |
| 55:06 | ܘܐܢ ܡܢ ܣܘܟܝܐ ܕܡܣܟܐ ܐܢܬ ܠܝܘܡܗ ܕܚܝܠܬܢܐ܂ ܗܟܢܐ ܐܫ݂ܬܪܝܬ܂ ܡܢܐ ܟܕ ܬܡܛܐ ܐܢܬ ܠܡܐܬܝܬܗ܂ |
| 55:07 | ܘܐܢ ܥܠ ܡܠܬܐ ܕܛܒ݂ܐ ܕܬܫܢܝܩܐ ܕܐܝܠܝܢ ܕܐܣܟܠܘ ܗܢܐ ܟܠܗ ܐܬܪܗܒܬ܂ ܚܕ ܟܡܐ ܟܕ ܗ݀ܘ ܥ݁ܒܕܐ ܢܓܠܐ ܬܡܝܗ̈ܬܐ܂ |
| 55:08 | ܘܐܢ ܫܡ̈ܗܐ ܕܛ݁ܒ̈ܬܐ ܘܕܒܝ݂̈ܫܬܐ ܕܐ̈ܬܝܢ ܗܝ݁ܕܝܢ ܫܡ݂ܥܬ ܘܐܬܬܥ݂ܝܩܬ܂ ܡܢܐ ܟܕ ܬܚܙܐ ܡܕܡ ܕܓܠܝܐ ܪܒܘܬܐ ܕܠܗܠܝܢ ܡܟܣ ܘܠܗܠܝܢ ܡܒܣܡ܀ |