The Comprehensive Aramaic Lexicon

56:01	ܒܪܡ ܕܝܢ ܡܛܠ ܕܒܥ݂ܝܬ ܡܢ ܡܪܝܡܐ ܕܢܓܠܐ ܠܟ ܦܘܫܩܗ ܕܚܙܘܐ ܕܚ݂ܙܝܬ܂ ܐܫܬܠܚܬ ܐܢܐ ܕܐܡ݁ܪ ܠܟ܂
56:02	ܕܡܘܕܥܘ ܐܘܕܥܟ ܚܝܠܬܢܐ ܕܘܒܪ̈ܐ ܕܙܒ̈ܢܐ ܕܥܒ݂ܪܘ ܘܕܐܝܠܝܢ ܕܥܬܝܕܝܢ ܕܢܥܒܪܘܢ ܒܥܠܡܗ ܂ ܡܢ ܪܝܫ ܒܪܝܬܗ ܘܥܕܡܐ ܠܫܘܠܡܗ܂ ܕܐܝܠܝܢ ܕܒܢܟܠܐ ܘܕܐܝܠܝܢ ܕܒܫܪܪܐ܂܂܂
56:03	ܐܝܟ݁ܢܐ ܓܝܪ ܕܚ݂ܙܝܬ ܥ݁ܢܢܐ ܪܒܬܐ ܕܣܠ̤ܩܬ ܡܢ ܝܡܐ܂ ܘܐܙ̤ܠܬ ܘܟܣܝܬܗ݀ ܠܐܪܥܐ݂܂ ܗܘ݂ܝܘ ܐܘܪܟܗ ܕܥܠܡܐ ܗ݀ܘ ܕܥ݂ܒܕ ܚܝܠܬܢܐ܂ ܟܕ ܐܬܚܫܒ ܕܢܥܒܕ ܥܠܡܐ܂
56:04	ܘܗ݂ܘܐ ܕܟܕ ܢܦܩ݂ܬ ܗܘܬ ܡܠܬܐ ܡܢ ܩܕܡܘܗܝ܂ ܩܡ ܗܘܐ ܐܘܪܟܗ ܕܥܠܡܐ ܡܕܡ ܙܥܘܪ܂ ܘܐܬܬܩܢ ܐܝܟ ܣܘܓܐܐ ܕܣܘܟܠܗ ܕܗ݀ܘ ܕܫܠܚܗ܂

56:05	ܘܐܝܟ ܕܚܙ݂ܝܬ ܩܕܡܝ ܒܪܝܫܗ݀ ܕܥܢܢܐ ܡ̈ܝܐ ܐܘܟ̈ܡܐ ܕܩܕܡܝ ܢܚܬܘ ܥܠ ܐܪܥܐ܂ ܗ݂ܝ ܗܝ ܡܥܒܪܢܘܬܐ ܕܐܥܒܪ ܐܕܡ ܒܪܢܫܐ ܩܕܡܝܐ܂

56:06	ܡܛܠ ܓܝܪ ܕܟܕ ܐܥܒܪ ܡܘܬܐ ܕܠܐ ܒܙܒܢܗ ܗܘ݂ܐ܂ ܘܐܒܠܐ ܐܫܬܡܗ܂ ܘܥܩܬܐ ܐܬܥܬܕܬܝ‍[‍܂‍]‍ ܘܟܐܒܐ ܐܬܒܪܝ܂ ܘܥܡܠܐ ܐܫܬܟܠܠ܂ ܘܫܘܒܗܪܐ ܫܪܝ ܕܢܬܩܝܡ܂ ܘܫܝܘܠ ܬܒ݁ܥܐ ܕܬܬܚܕܬ ܒܕܡܐ܂ ܘܢܣܒܐ ܕܒܢ̈ܝܐ ܗ݂ܘܬ܂ ܘܪܬܚ݁ܐ ܕܐܒܗ̈ܐ ܐܬܥܒܕ܂ ܘܪܒܘܬܐ ܕܐܢܫܘܬܐ ܐܬܡܟ̤ܟܬ܂ ܘܛܝܒܘܬܐ ܚ݂ܡܬ܂
56:07	ܡܢܐ ܗܟܝܠ ܕܐܘܟܡ ܐܘ ܕܚܫܘܟ ܡܢ ܗܠܝܢ ܡܫܟܚ ܗܘܐ ܕܢܗܘܐ܂
56:08	ܗܢܘ ܫܘܪܝܗܘܢ ܕܡ̈ܝܐ ܐܘܟܡ̈ܐ ܕܚ݂ܙܝܬ܂
56:09	ܘܡܢ ܗܠܝܢ ܐ݁ܘܟ̈ܡܐ ܬܘܒ݂܂ ܐܘܟܡ̈ܐ ܡܬܝܠܕܝܢ ܗܘܘ܂ ܘܚܫܘܟ ܚܫܘ̈ܟܐ ܐܬܥܒܕ܂
56:10	ܗ݂ܘ ܓܝܪ ܠܢܦܫܗ ܗ݂ܘܐ ܩܝܢܕܘܢܘܣ݂܂ ܐܦ ܠܡܠܐ̈ܟܐ݂ ܗ݂ܘܐ ܩܝܢܕܘܢܘܣ܂
56:11	ܬܘܒ ܓܝܪ ܒܗ݀ܘ ܙܒܢܐ ܕܐܬܒܪܝ ܒܗ܂ ܐܝܬ ܗܘܐ ܠܗܘܢ ܚܐܪܘܬܐ܂
56:12	ܘܢܚܬܘ ܡܢܗܘܢ ܘܐܬܚܠܛܘ ܥܡ ܢܫ̈ܐ܂
56:13	ܘܗܝ݁ܕܝܢ ܐܝܠܝܢ ܕܗܟܢܐ ܥ݂ܒܕܘ݂܂ ܒܐܣܘܪ̈ܐ ܐܫܬܢܩܘ܂
56:14	ܫܪܟܐ ܕܝܢ݁ ܕܣܘܓܐܐ ܕܡܠܐ̈ܟܐ ܕܡܢܝܢ ܠܝܬ ܠܗܘܢ ܐܬܟܠܝܘ܂
56:15	ܘܐܝܠܝܢ ܕܥܡ݁ܪܝܢ ܗܘܘ ܒܐܪܥܐ ܐܒ݂ܕܘ ܐܟܚܕܐ܂ ܒܝܕ ܡ̈ܝܐ ܕܛܘܦܢܐ܂
56:16	ܗܠܝܢ ܐܢܘܢ ܡ̈ܝܐ ܩܕܡ̈ܝܐ ܐܘܟܡ̈ܐ܀