The Comprehensive Aramaic Lexicon

59:01	ܘܡ̈ܝܐ ܪ̈ܒܝܥܝܐ ܢܗܝܪ̈ܐ ܕܚܙ݂ܝܬ݂܂ ܗ݂ܝ ܗܝ ܡܐܬܝܬܗ ܕܡܘܫܐ ܘܕܐܗܪܘܢ ܘܕܡܪܝܡ܂ ܘܕܝܫܘܥ ܒܪܢܘܢ ܘܕܟܠܒ݂܂ ܘܕܟܠܗܘܢ ܐܝܠܝܢ ܕܕܡ݁ܝܢ ܠܗܘܢ܂
59:02	ܒܗ݀ܘ ܓܝܪ ܙܒܢܐ ܫܪܓܗ ܕܢܡܘܣܐ ܕܠܥܠܡ ܐܢܗܪ ܠܟܠ ܐܝܠܝܢ ܕܝܬ݁ܒܝܢ ܗܘܘ ܒܚܫܘܟܐ܂ ܕܠܐܝܠܝܢ ܕܡܗܝܡܢܝܢ ܢܘܕܥ ܡܘܠܟܢܗ ܕܐܓܪܗܘܢ܂ ܘܠܐܝܠܝܢ ܕܟܦܪܝܢ ܬܫܢܝܩܐ ܕܢܘܪܐ ܕܢܛܝܪ ܠܗܘܢ܂
59:03	ܐܠܐ ܐܦ ܫܡܝܐ ܒܗ݀ܘ ܙܒܢܐ ܐܬܬܚܕܘ ܡܢ ܐܬܪܗܘܢ܂ ܘܕܬܚܝܬ ܬܪܘܢܘܣ ܕܚܝܠܬܢܐ ܐܬܬܙܝܥܘ܂ ܟܕ ܐܚܝܕ ܗܘܐ ܠܡܘܫܐ ܠܘܬܗ܂
59:04	ܚܘܝܗ ܓܝܪ ܙܘܗܪ̈ܐ ܣܓܝܐ̈ܐ ܥܡ ܕܘܒܪ̈ܐ ܕܢܡܘ̈ܣܐ ܘܫܘܠܡܐ ܕܙܒܢܐ ܐܝܟ ܕܐܦ ܠܟ܂ ܘܬܘܒ ܕܝܢ ܕܡܘܬܗ݀ ܕܨܗܝܘܢ ܘܡܘܫܚ̈ܬܗ݀ ܕܡܬܥܒܕܐ ‍[‍܂‍]‍ ܘܕܡܘܬܐ ܕܒܝܬ ܡܩܕܫܐ ܕܗܫܐ܂
59:05	ܐܠܐ ܐܦ ܗܝ݁ܕܝܢ ܚܘܝܗ ܗܘܐ ܡܘܫ̈ܚܬܗ݀ ܕܢܘܪܐ܂ ܐܦ ܥܘ̈ܡܩܘܗܝ ܕܬܗܘܡܐ܂ ܘܝܘܩܪܗܝܢ ܕܪ̈ܘܚܐ܂ ܘܡܢܝܢܐ ܕܛܘ̈ܦܝ ܡܛܪܐ܂

59:06	ܘܐܚܕܗ ܕܪܘܓܙܐ܂ ܘܣܘܓܐܐ ܕܢܓܝܪܘܬ ܪܘܚܐ܂ ܘܫܪܪܗ ܕܕܝ݂ܢܐ܂

59:07	ܘܥ݁ܩܪܗ݀ ܕܚܟܡܬܐ܂ ܘܥܘܬܪܐ ܕܣܟܘܠܬܢܘܬܐ܂ ܘܡܒܘܥܐ ܕܐܝܕܥܬܐ܂
59:08	ܘܪܘܡܗ ܕܐܐܪ܂ ܘܪܒܘܬܗ ܕܦܪܕܝܣܐ܂ ܘܫܘܠܡܗܘܢ ܕܥܠܡ̈ܐ܂ ܘܪܝܫ ܝܘܡܐ ܕܕܝܢ݂ܐ܂
59:09	ܘܡܢܝܢܐ ܕܩܘܪ̈ܒܢܐ܂ ܘܐܪ̈ܥܬܐ ܕܥܕܟܝܠ ܠܐ ܐܬ̈ܝ܂
59:10	ܘܦܘܡܗ݀ ܕܓܗܢܐ܂ ܘܩܝܡܐ ܕܬܒܥܬܐ܂ ܘܐܬܪܐ ܕܗܝܡܢܘܬܐ܂ ܘܕܘܟܬܐ ܕܣܒܪܐ ‍[‍܂
59:11	ܘܕܡܘܬܐ ܕܬܫܢܝܩܐ ܕܥܬܝܕ܂ ܘܣܘܓܐ ܕܡܠܐ̈ܟܐ ܕܡܢܝܢ ܠܝܬ ܠܗܘܢ܂ ܘܚܝ̈ܠܘܬܐ ܕܫܠܗܒܝܬܐ܂ ܘܙܗܪܗܘܢ ܕܒܪ̈ܩܐ܂ ܘܩܠܐ ܕܪ̈ܥܡܐ܂ ܘܣܕܪ̈ܝ ܪ̈ܝܫܐ ܕܡܠܐ̈ܟܐ܂ ܘܐܘܨܪ̈ܐ ܕܢܘܗܪܐ܂ ܘܚܘ̈ܠܦܐ ܕܙܒ̈ܢܐ܂ ܘܥܘ̈ܩܒܐ ܕܢܡܘܣܐ܂
59:12	ܗܠܝܢ ܐܢܘܢ ܡ̈ܝܐ ܪ̈ܒܝܥܝܐ ܘܢܗܝܪ̈ܐ ܕܚ݂ܙܝܬ܀