The Comprehensive Aramaic Lexicon

66:01	ܘܡ̈ܝܐ ܥܣܝܪ̈ܝܐ ܢܗܝܪ̈ܐ ܕܚܙ݂ܝܬ݂܂ ܗ݂ܝ ܗܝ ܫܦܝܘܬܐ ܕܬܘ̈ܠܕܬܗ ܕܝܘܫܝܐ܂ ܡ݁ܠܟܐ ܕܝܗܘܕܐ܂ ܕܒܗ݀ܘ ܙܒܢܐ ܗ݂ܘ ܒܠܚܘܕܘܗܝ ܡܫܥܒܕ ܗܘܐ ܠܚܝܠܬܢܐ ܡܢ ܟܠܗ ܠܒܗ ܘܡܢ ܟܠܗ݀ ܢܦܫܗ܂

66:02	ܘܗ݂ܘ ܕܟܝ ܠܐܪܥܐ ܡܢ ܦܬܟܪ̈ܐ܂ ܘܩ݁ܕܫ ܟܠܗܘܢ ܡܐ̈ܢܐ ܐܝܠܝܢ ܕܐܣܬܝܒܘ܂ ܘܩܘܪ̈ܒܢܐ ܦܢ݁ܝ ܠܡܕܒܚܐ܂ ܘܐܪܝܡ ܩܪܢܐ ܕܚ̈ܣܝܐ܂ ܘܪܡܪܡ ܠܙܝ̈ܩܐ܂ ܘܫ݁ܒܚ ܠܟܘܠܗܘܢ ܚܟܝ̈ܡܐ ܒܣܟܘܠܬܢܘܬܐ܂ ܘܐܗܦܟ ܟܗ̈ܢܐ ܠܬܫܡܫܬܗܘܢ܂ ܘܥ݂ܛܐ ܘܐܥܒܪ ܐܫܘ̈ܦܐ ܘܚܪ̈ܫܐ ܘܙܟܘܪ̈ܐ ܡܢ ܐܪܥܐ܂

66:03	ܘܠܐ ܗܘܐ ܒܠܚܘܕ ܠܪ̈ܫܝܥܐ ܕܚ݂ܝܝܢ ܗܘܘ ܩܛ݂ܠ݂܂ ܘܐܦ ܓܪ̈ܡܝܗܘܢ ܕܐܝܠܝܢ ܕܡܝܬܘ ܐܦܩܘ ܡܢ ܩܒܪ̈ܐ ܘܐܘܩܕܘ ܐܢܘܢ ܒܢܘܪܐ܂
66:04	ܘܥܕܥ̈ܕܐ ܘܫܒ̈ܐ ܐܩܝܡ ܒܩܘܕ̈ܫܝܗܘܢ܂ ܘܠܡܣ̈ܝܒܐ ܐܘܩܕ ܒܢܘܪܐ܂ ܘܠܢܒ̈ܝܐ ܕܓ̈ܠܐ ܕܡܛܥܝܢ ܗܘܘ ܠܥܡܐ݂܂ ܐܦ ܠܗ݀ܢܘܢ ܐܘܩܕ ܐܢܘܢ ܒܢܘܪܐ܂ ܘܠܥܡܐ ܕܡܫܬܡܥ ܗܘܐ ܠܗܘܢ ܟܕ ܚܝ̈ܝ݂ܢ܂ ܐܪܡܝ ܐܢܘܢ ܒܢܚܠܐ ܕܩܕܪܘܢ܂ ܘܟ݂ܫܐ ܥܠܝܗܘܢ ܟܐ̈ܦܐ܂
66:05	ܘܛܢ ܛܢܢܗ ܕܚܝܠܬܢܐ ܡܢ ܟܠܗ݀ ܢܦܫܗ܂ ܘܐܫܬܪܪ ܒܠܚܘܕܘܗܝ ܒܢܡܘܣܐ ܒܗ݀ܘ ܙܒܢܐ܂ ܐܝܟ ܕܠܐ ܢܫܒܘܩ ܠܐܢܫ ܥܘܪܠܐ ܐܘ ܕܡܪܫܥ ܒܟܠܗ݀ ܐܪܥܐ݁܂ ܟܘܠܗܘܢ ܝܘܡ̈ܬܐ ܕܚ̈ܝܘܗܝ܂
66:06	ܗܢܘ ܕܝܢ ܕܢܣܒ ܝܘܬܪܢܐ ܕܠܥܠܡ ܘܗ݂ܘ ܢܫܬܒܚ ܠܘܬ ܚܝܠܬܢܐ ܝܬܝܪ ܡܢ ܣܓܝܐ̈ܐ ܒܙܒܢܐ ܐܚܪܝܐ܂
66:07	ܡܛܠܬܗ ܓܝܪ ܕܗܢܐ ܘܡܛܠ ܐܝܠܝܢ ܕܕܡ݁ܝܢ ܠܗ ܐܬܒܪܝ ܘܐܬܥܬܕܝ ܬܫܒ̈ܚܬܐ ܡܝܩܪ̈ܬܐ ܗܠܝܢ ܕܐܬܐܡܪ ܠܟ ܡܢ ܩܕܝܡ܂
66:08	ܗܠܝܢ ܐܢܘܢ ܡܝ̈ܐ ܢܗܝܪ̈ܐ ܕܚ݂ܙܝܬ܀