The Comprehensive Aramaic Lexicon

07:001	ܘܗ݂ܘܐ ܡܢ ܒܬܪ ܕܫܠܡ݁ܬ ܠܡܡܠܠܘ ܡ̈ܠܐ ܗܠܝܢ܂ ܗܐ ܐܫܬܠܚ ܠܘܬܝ ܡܠܐܟܐ ܗ݀ܘ ܕܐܫܬܠܚ ܗܘܐ ܠܘܬܝ ܒ̈ܠܝܠܘܬܐ ܩܕܡ̈ܝܐ܂
07:002	ܘܐܡ݂ܪ ܠܝ܂ ܩܘܡ ܥܙܪܐ ܘܫܡ݂ܥ ܡ̈ܠܐ ܐܝ݁ܠܝܢ ܕܐܬ݁ܝܬ ܕܐܡ݁ܪ ܠܟ܂
07:003	ܘܐܡ݁ܪܬ ܠܗ ܡܠܠ ܡܪܝ ݁݁ ܘܥ݂ܢܐ ܘܐܡ݂ܪ ܠܝ܂ ܝܡܐ ܐܢ ܢܗܘܐ ܣܝ݂ܡ ܒܐܬܪܐ ܪܘܝܚܐ܂ ܐܝܟ ܕܢܗܘܐ ܦ݂ܬܐ ܘܠܐ ܡܣܬܝܟ܂
07:004	ܡܥܠܢܗ ܕܝܢ ܣܝ݂ܡ ܒܐܬܪܐ ܐܠܝܨܐ܂ ܐܝܟ ܕܢܗܘܐ ܕܡܐ ܠܢܗܪܐ܂
07:005	ܐܢܕܝܢ ܐܢܫ ܢܨܒܐ ܕܢܥܘܠ ܠܝܡܐ ܘܢܚܙܝܘܗܝ܂ ܘܢܗܘܐ ܡܪܐ ܥܠܘܗܝ܂ ܐܢܗ݂ܘ ܗܟܝܠ ܕܠܐ ܢܥܒܪ ܠܗ ܒܐܘܠܨܢܐ ܠܐܪܘܚܬܐ ܐܝ݁ܟܢ ܡܫܟܚ ܕܢܐܬܐ ܀
07:006	ܫܡ݂ܥ ܬܘܒ ܡܕܡ ܐܚܪܢ܂ ܡܕܝܢܬܐ ܐܝܬ ܕܒܢ݂ܝܐ ܘܣܝ݂ܡܐ ܒܐܬܪܐ ܪܒܐ ܕܦܩܥܬܐ܂ ܘܐܝܬܝܗ݀ ܕܝܢ ܗ݀ܝ ܡܕܝܢܬܐ ܕܡܠܝܐ ܛ݁ܒ̈ܬܐ ܣܓܝܐ̈ܬܐ
07:007	ܘܡܥܠܢܗ݀ ܐܠܝܨ ܘܣ݂ܝܡ ܒܪܘܡܐ܂ ܐܝܟ ܕܢܗܘܐ ܡܢ ܝܡܝܢܐ ܢܘܪܐ݂ ܘܡܢ ܣܡܠܐ ܡ̈ܝܐ ܕܥܡܝܩܝܢ܂
07:008	ܘܫܒܝܠܐ ܚܕ ܕܣ݂ܝܡ ܒܝܢܬ ܗܠܝܢ ܬܪ̈ܝܗܘܢ܂ ܒܝܢܬ ܢܘܪܐ ܠܡ̈ܝܐ܂ ܐܝܟ ܕܠܐ ܣ݁ܦܩ ܫܒܝܠܐ ܗ݀ܘ܂ ܐܠܐ ܐܢ ܠܦܣܬܐ ܕܒܪ ܐܢܫܐ ܒܠܚܘܕ܂
07:009	ܐܢܗ݂ܘ ܕܝܢ ܕܡܬܝܗܒܘ ܬܬܝܗܒ ܗ݀ܝ ܡܕܝܢܬܐ ܠܝܪܬܘܬܐ܂ ܐܢܗ݂ܘ ܕܗ݀ܘ ܝܪܘܬܐ ܠܐ ܢܥܒܪ ܩܝܢܕܘܢܘܣ ܕܣ݂ܝܡ ܐܝܟܢܐ ܡܫܟܚ ܕܢܣܒܝܗ݀ ܠܝܪܬܘܬܗ
07:010	ܘܐܢܐ ܐܡ݁ܪܬ ܠܗ܂ ܐܝܢ ܗܟܢܐ ܗܘ ܡܪܝ ܀
07:011	ܘܥܢ݂ܐ ܘܐܡ݂ܪ ܠܝ܂ ܗܟܢܐ ܗܝ ܐܦ ܡܢܬܗ ܕܐܝܣܪܝܠ܂ ܡܛܠܬܗܘܢ ܓܝܪ ܥܒܕܬܗ ܠܥܠܡܐ ܘܟܕ ܐܥܒܪ ܐܕܡ ܦܘܩ̈ܕܢܝ ܐܬܚܝܒ ܗ݀ܘ ܡܕܡ ܕܐܬܥܒܕ܂
07:012	ܘܡܛܠ ܗܢܐ ܗܘܘ ܠܗܘܢ ܡ̈ܥܠܢܘܗܝ ܕܥܠܡܐ ܗܢܐ ܕܗܫܐ ܐܠܝܨܝܢ܂ ܘܡܠ݂ܝܢ ܬܢ̈ܚܬܐ ܘܥܡܠܐ ܘܩܝܢܕܘܢܘܣ ܣܓܝܐܐ܂ ܘܠܐܘܬܐ ܪܒܬܐ ܥܡ ܟܘܪ̈ܗܢܐ ܘܚܫ̈ܐ ܀
07:013	ܡ̈ܥܠܢܘܗܝ ܕܝܢ ܕܗ݀ܘ ܥܠܡܐ ܕܥܬܝܕ݂܂ ܪܘܝܚܝܢ ܘܕܠܐ ܨܦܬܐ ܐܝܬܝܗܘܢ܂ ܘܥ݁ܒܕܝܢ ܦܐܪ̈ܐ ܕܠܐ ܡ݁ܝܬܝܢ܂
07:014	ܐܢ ܗܟܝܠ ܠܐ ܢܥܒܪܘܢ ܚ̈ܝܐ ܒܐܘ̈ܠܨܢܐ ܘܒܒ݂ܝ̈ܫܬܐ ܗܠܝܢ ܠܐ ܡܫܟܚܝܢ ܐܝܠܝܢ ܕܣܝ݂ܡܝܢ ܠܗܘܢ܂
07:015	ܗܫܐ ܕܝܢ ܥܠ ܡܢܐ ܡܬܬܙܝܥ ܐܢܬ܂ ܕܟܕ ܡܬܚܒܠ ܐܢܬ܂ ܘܠܡܢܐ ܡܫܬܓܫ ܐܢܬ ܟܕ ܡܝܘܬܐ ܐܢܬ܂
07:016	ܘܡܛܠ ܡܢܐ ܠܐ ܢܣ݂ܒܬ ܥܠ ܠܒܟ ܡܕܡ ܕܥܬܝܕ ܐܠܐ ܡܕܡ ܕܩܐ݁ܡ ܀
07:017	ܘܥ݁ܢܝܬ ܘܐܡ݁ܪܬ ܡܪܝܐ ܡܪܝ܂ ܐܠܐ ܗܐ ܦܪܫ݂ܬ ܒܢܡܘܣܟ܂ ܕܙܕܝ̈ܩܐ ܗܘ ܝܪ̈ܬܝܢ ܠܗܝܢ ܠܗܠܝܢ܂ ܪ̈ܫܝܥܐ ܕܝܢ ܐܒ݁ܕܝܢ܂
07:018	ܙܕܝ̈ܩܐ ܗܟܝܠ ܫܦܝܪ ܡܣܝܒܪܝܢ ܐܘ̈ܠܨܢܐ܂ ܡܛܠ ܕܡܣܒܪܝܢ ܕܢܐܬܘܢ ܠܪܘܚܬܐ܂ ܪ̈ܫܝܥܐ ܕܝܢ ܐܘ̈ܠܨܢܐ ܣܒ݁ܠܝܢ݂܂ ܘܪܘܚܬܐ ܠܐ ܚܙ݁ܝܢ܂
07:019	ܘܥ݂ܢܐ ܘܐܡ݂ܪ ܠܝ܂ ܠܐ ܗ݂ܘܝܬ ܐܢܬ ܚܟܝܡ ܝܬܝܪ ܡܢ ܐܠܗܐ܂ ܘܠܐ ܣܟܘܠܬܢ ܝܬܝܪ ܡܢ ܡܪܝܡܐ܂
07:020	ܢܐܒܕܘܢ ܗܟܝܠ ܣܓܝܐ̈ܐ ܐܝܠܝܢ ܕܐܬܘ܂ ܥܠ ܕܐܬܒܣܝ ܒܗܘܢ ܢܡܘܣܐ ܕܐܬܣܝܡ ܡܢܝ܂
07:021	ܦܘܩܕܢܐ ܓܝܪ ܦܩ݁ܕ ܐܠܗܐ ܠܐܝܠܝܢ ܕܐܬܘ܂ ܟܕ ܐܬܘ ܗܝ݁ܕܝܢ ܕܡܢܐ ܢܥܒܕܘܢ ܘܢܚܘܢ܂ ܘܡܢܐ ܢܛܪܘܢ ܘܠܐ ܢܫܬܢܩܘܢ܂
07:022	ܗ݂ܢܘܢ ܕܝܢ ܥܨܘ ܘܠܐ ܐܫܬܡܥܘ ܠܗ܂ ܘܐܬܩܢܘ ܠܗܘܢ ܡܚ̈ܫܒܬܐ ܣܪ̈ܝܩܬܐ܂
07:023	ܘܐܘܣܦܘ ܠܗܘܢ ܨܢܥ̈ܬܐ ܕܡ̈ܦܠܬܐ܂ ܘܥܠ ܗܠܝܢ ܟܘܠܗܝܢ ܐܡ݂ܪܘ݂܂ ܕܠܝܬ ܗܘ ܡܪܝܡܐ܂ ܘܠܐ ܝܕܥܘ ܐܘܪ̈ܚܬܗ܂
07:024	ܘܠܢܡܘܣܗ ܫ݁ܛܘ܂ ܘܒܩܝܡ̈ܘܗܝ ܟܦ݁ܪܘ܂ ܘܒܦܘܩܕ̈ܢܘܗܝ ܠܐ ܗܝܡ݁ܢܘ܂ ܘܥܠ ܥ݁ܒ̈ܕܘܗܝ ܒܣܘ܂
07:025	ܡܛܠ ܗܢܐ ܐܘ ܥܙܪܐ܂ ܣܦܝ̈ܩܬܐ ܠܣܦ̈ܝܩܐ܂ ܘܡ̈ܠܝܬܐ ܠܐܝܠܝܢ ܕܡ݂ܠܝܢ܂
07:026	ܗܐ ܓܝܪ ܝܘܡ̈ܬܐ ܐܬ݁ܝܢ܂ ܘܢܗܘܐ ܡܐ ܕܐܬ̈ܝ ܐܬܘ̈ܬܐ ܕܩܕ݁ܡܬ ܐܡ݁ܪܬ ܠܟ݂܂ ܘܬܬܓܠܐ ܟܠܬܐ ܕܡܬܚܙܝܐ ܐܝܟ ܡܕܝܢܬܐ܂ ܘܬܬܚܙܐ ܗ݀ܝ ܕܦܪܝܫܐ ܗܫܐ܂
07:027	ܘܟܠ ܡ݁ܢ ܕܢܬܦܨܐ ܡܢ ܒܝ݂̈ܫܬܐ ܗܠܝܢ ܕܐܬܐܡܪ ܡܢ ܩܕܝܡ݂܂ ܗ݂ܘ ܢܚܙܐ ܬܡܝ̈ܗܬܝ܂
07:028	ܢܬܓܠܐ ܓܝܪ ܒܪܝ ܡܫܝܚܐ ܥܡ ܐܝܠܝܢ ܕܥܡܗ܂ ܘܢܒܣ݁ܡ ܠܐܝܠܝܢ ܕܐܫܬܚܪܘ݂܂ ܬܠܬܝܢ ܫ̈ܢܝܢ܂
07:029	ܘܢܗܘܐ ܡܢ ܒܬܪ ܗܠܝܢ ܫܢ̈ܝܐ܂ ܢܡܘܬ ܒܪܝ ܡܫܝܚܐ܂ ܘܟܠܗܘܢ ܐܝܠܝܢ ܕܐܝܬ ܒܗܘܢ ܢܫܡܬܐ ܕܒܪܢܫܐ܂
07:030	ܘܢܗܦܘܟ ܥܠܡܐ ܠܫܬܩܗ ܩܕܡܝܐ݂܂ ܫܒܥܐ ܝܘܡ̈ܝܢ܂ ܐܝܟ ܕܗܘܬ ܡܢ ܒܪܫܝܬ܂ ܐܝܟ ܕܠܐ ܐܢܫ ܢܫܬܚܪ ܀
07:031	ܘܢܗܘܐ ܡܢ ܒܬܪ ܫܒܥܐ ܝܘܡ̈ܝܢ݂܂ ܢܬܬܥܝܪ ܗ݀ܘ ܥܠܡܐ ܕܗܫܐ ܠܝܬܘܗܝ ܥܝܪ܂ ܘܢܡܘܬ ܚ݁ܒܠܐ܂
07:032	ܘܐܪܥܐ ܬܬܠ ܠܐܝܠܝܢ ܕܫܟܝܒܝܢ ܒܗ݀܂ ܘܥܦܪܐ ܢܬܠ ܠܐܝܠܝܢ ܕܕܡܟܝܢ ܒܗ܂ ܘܐܘܨܪ̈ܐ ܢܬܠܘܢ ܢܦܫ̈ܬܐ ܕܐܬܣܝܡ ܒܗܘܢ܂
07:033	ܘܢܬܓܠ݂ܐ ܡܪܝܡܐ ܥܠ ܟܘܪܣܝܐ ܕܕܝ݂ܢܐ܂ ܘܢܐܬܐ ܫܘܠܡܐ܂ ܘܢܥܒܪܘܢ ܪ̈ܚ݂ܡܐ ܘܪܘܚܦܐ ܢܪܚܩ܂ ܘܢܓܝܪܘܬ ܪܘܚܐ ܬܬܟܢܫ܂
07:034	ܕܝܢ݂ܝ ܕܝܢ ܕܝܠܝ ܢܫܬܚܪ ܒܠܚܘܕ܂ ܘܫܪܪܐ ܢܩܘܡ܂ ܘܗܝܡܢܘܬܐ ܬܪܘܙ܂
07:035	ܘܥ݁ܒܕܐ ܢܐܬܐ܂ ܘܐܓܪܐ ܢܬܝܕܥ܂ ܘܙܕܝܩ̈ܘܬܐ ܢܬܥܝܪ̈ܢ܂ ܘܪ̈ܘܫܥܐ ܠܐ ܢܕܡܟܘܢ܂
07:036	ܘܢܬܚܙܐ ܥܘܒܐ ܕܬܫܢܝܩܐ܂ ܘܠܩܘܒܠܗ ܕܝܢ ܕܗܢܐ ܐܬܪܐ ܕܢܝܚܐ܂ ܢܬܓܠܐ ܬܢܘܪܐ ܕܓܗܢܐ܂ ܘܠܩܘܒܠܗ ܬܘܒ ܦܪܕܝܣܐ ܕܒܘܣܡ̈ܐ܂
07:037	ܘܢܐܡܪ ܗܝ݁ܕܝܢ ܡܪܝܡܐ ܠܘܩܒܠ ܗ݀ܢܘܢ ܥܡܡ̈ܐ ܕܡܬܬܥܝܪܝܢ܂ ܚܘܪܘ ܘܚܙܘ ܒܡܢܐ ܟܦ݁ܪܬܘܢ܂ ܐܘ ܠܡ݂ܢܘ ܠܐ ܦܠ݂ܚܬܘܢ ܐܘ ܦܘܩܕ̈ܢܘܗܝ ܕܡ݂ܢܘ ܐܣܠܝܬܘܢ܂
07:038	ܚܙܘ ܗܟܝܠ ܠܘܩܒܠܟܘ݁ܢ܂ ܗܐ ܗܪܟܐ ܢܝ̈ܚܐ ܘܦܘ̈ܢܩܐ܂ ܘܬܡܢ ܢܘܪܐ ܘܬܫܢܝܩܐ܂ ܗܠܝܢ ܢܡܠܠ݂ ܠܗܘܢ ܒܗ݀ܘ ܝܘܡܐ ܕܕܝܢ݂ܐ܂
07:039	ܗ݀ܘ ܓܝܪ ܝܘܡܐ ܕܕܝ݂ܢܐ ܗܟܢܐ ܐܝܬܘܗܝ܂ ܠܐ ܫܡܫܐ ܐܝܬ ܒܗ܂ ܘܠܐ ܣܗܪܐ ܘܠܐ ܟܘܟ̈ܒܐ܂
07:040	ܘܠܐ ܥܢ̈ܢܐ ܘܠܐ ܒܪ̈ܩܐ܂ ܘܠܐ ܪ̈ܥܡܐ܂ ܘܠܐ ܪ̈ܘܚܐ܂ ܘܠܐ ܡ̈ܝܐ܂ ܘܠܐ ܐܐܪ܂ ܘܠܐ ܚܫܘܟܐ݂܂ ܘܠܐ ܪܡܫܐ܂ ܘܠܐ ܨܦܪܐ܂
07:041	ܘܠܐ ܩܝܛܐ܂ ܘܠܐ ܣܬܘܐ܂ ܘܠܐ ܪܝܫ ܫܢܬܐ܂ ܘܠܐ ܚܘܡܐ܂ ܘܠܐ ܓܠܝܕܐ܂ ܘܠܐ ܥܪܝܐ ܘܠܐ ܒܪܕܐ܂ ܘܠܐ ܛܠܐ܂ ܘܠܐ ܡܛܪܐ܂
07:042	ܘܠܐ ܛܗܪܐ܂ ܘܠܐ ܠܠܝܐ܂ ܘܠܐ ܐܝܡܡܐ܂ ܘܠܐ ܢܘܗܪܐ܂ ܘܠܐ ܢܗܝܪܐ܂ ܘܠܐ ܒܗܩܐ ܘܠܐ ܙܗܪܐ܂ ܐܠܐ ܐܢ ܒܠܚܘܕ ܙܠܝܩܐ ܕܬܫܒܘܚܬܗ ܕܡܪܝܡܐ܂ ܕܡܢܗ ܥܬܝܕܝܢ ܕܢܗܘܘܢ ܚ݁ܙܝܢ ܡܕܡ ܕܡܬܩܢ܂
07:043	ܢܘܓܪܐ ܕܝܢ ܢܗܘܐ ܠܗ ܐܝܟ ܫܒܬܐ ܕܫ̈ܢܝܐ܂
07:044	ܗܢܘ ܕܝܢ ܘܢܡܘܣܗ ܘܠܟ ܒܠܚܘܕܝܟ ܐܘ݂ܕܥܬܢ ܐܢܘܢ܂
07:045	ܘܥ݁ܢܝܬ ܘܐܡ݁ܪܬ܂ ܡܪܝܐ ܡܪܝ ܐܦ ܗ݀ܝܕܝܢ ܐܡ݁ܪܬ܂ ܘܗܫܐ ܬܘܒ ܐܡ݁ܪܢܐ܂ ܕܛܘܒܝܗܘܢ ܠܟܠ ܐܝܠܝܢ ܕܐܬܘ ܘܢܛ݂ܪܘ ܦܘܩ̈ܕܢܐ ܐܝܠܝܢ ܕܡܬܣܝܡܝܢ ܡܢܟ܂
07:046	ܐܠܐ ܥܠ ܐܝܠܝܢ ܕܒܥܘܬܝ ܥܠܝܗܘܢ܂ ܡ݂ܢܘ ܓܝܪ ܡܢ ܐܝܠܝܢ ܕܐ݂ܬܘ ܕܠܐ ܚܛܘ܂ ܐܘ ܡ݂ܢܘ ܡܢ ܝܠܝ̈ܕܐ ܕܠܐ ܥ݂ܒܪ ܦܘܩܕܢܟ܂
07:047	ܘܗܫܐ ܚܙܝܐ ܕܠܙܥܘܪ̈ܐ ܗܘ ܥܬܝܕ ܗ݀ܘ ܥܠܡܐ ܕܐ݁ܬܐ ܕܢܥܒܕ ܒܘܣܡܐ܂ ܠܣܓ̈ܝܐܐ ܕܝܢ ܬܢܝܩܐ
07:048	ܐܝܬܘܗܝ ܓܝܪ ܒܢ ܠܒܐ ܒܝ݂ܫܐ݂܂ ܕܗ݂ܘ ܐܛܥܝܢ ܡܢ ܗܠܝܢ܂ ܘܕܒܪܢ ܠܚܒ݁ܠܐ ܘܐܘܪ̈ܚܬܐ ܕܡܘܬܐ ܚܘ݁ܝܢ܂ ܘܫܒ̈ܝܠܐ ܕܐܒܕܢܐ ܐܘܕܥܢ܂ ܘܐܪܚܩܢ ܡܢ ܚ̈ܝܐ܂ ܘܗܕܐ ܠܐ ܗܘܐ ܠܙܥܘܪ̈ܐ܂ ܐܠܐ ܚ݁ܒܪ ܕܠܟܠܗܘܢ ܐܝܠܝܢ ܕܗܘܘ ܀
07:049	ܘܥ݂ܢܐ ܘܐܡ݂ܪ ܠܝ܂ ܫܡܥܝܢܝ ܥܙܪܐ ܘܐܡ݁ܪ ܠܟ܂ ܘܡܢܕܪܝܫ ܐܪܬܝܟ܂
07:050	ܡܛܠ ܗܢܐ ܠܐ ܥܒ݂ܕ ܡܪܝܡܐ ܚܕ ܥܠܡܐ ܐܠܐ ܬܪܝܢ܂
07:051	ܐܢܬ ܕܝܢ ܕܐܡ݂ܪܬ ܕܠܐ ܣܓܝܐܝܢ ܙܕܝܩ̈ܐ ܐܠܐ ܙܥܘܪܝܢ݂܂ ܫܡ݂ܥ ܠܘܩܒܠ ܗܠܝܢ܂
07:052	ܟܐ̈ܦܐ ܡܝܩܪ̈ܬܐ ܐܢ ܢܗ̈ܘܝܢ ܠܟ ܘܙܥܘܪ̈ܝܢ ܠܘܩܒܠ ܡܢܝܢܗܝܢ ܕܗܠܝܢ݂܂ ܐܬܩܢ ܠܟ ܐܒܪܐ ܘܚܨܦܐ܂
07:053	ܘܐܡ݂ܪܬ ܕܐܝ݁ܟܢܐ ܡܪܝ ܡܫܟܚ݁ܐ܂ ܀
07:054	ܘܥ݂ܢܐ ܘܐܡ݂ܪ ܠܝ܂ ܠܐ ܗܘܐ ܒܠܚܘܕ ܗܕܐ݂܂ ܐܠܐ ܫܐܠܝܗ݀ ܠܐܪܥܐ ܘܬܐܡܪ ܠܟ܂ ܘܐܡ݂ܪ ܠܗ݀ ܘܬܫܬܥܐ ܠܟ܂
07:055	ܐܡ݂ܪ ܠܗ݀܂ ܕܗܒܐ ܝܠ݂ܕܬ ܘܣܐܡܐ ܘܢܚܫܐ܂ ܘܦܪܙܠܐ ܘܐܒܪܐ܂ ܘܚܨܦܐ܂
07:056	ܣܓܝ ܗܘ ܕܝܢ ܣܐܡܐ ܡܢ ܕܗܒܐ܂ ܘܢܚܫܐ ܡܢ ܣܐܡܐ܂ ܘܦܪܙܠܐ ܡܢ ܢܚܫܐ܂ ܘܐܒܪܐ ܡܢ ܦܪܙܠܐ܂ ܘܚܨܦܐ ܡܢ ܐܒܪܐ܂
07:057	ܦܚܡ ܗܟܝܠ ܐܢܬ ܘܚܙܝ܂ ܕܐܝܠܝܢ ܡܝܩܪ̈ܢ ܘܚܒ̈ܝܒܢ܂ ܣܓܝܐ̈ܬ݂ܐ ܐܘ ܙܥܘܪ̈ܝܬܐ܂
07:058	ܘܥܢ݁ܝܬ ܘܐܡ݁ܪܬ܂ ܡܪܝܐ ܡܪܝ܂ ܣܓܝܐ̈ܬܐ ܕܙ̈ܠܝܠܢ ܘܙܥܘܪ̈ܝܬܐ ܝܩܝܪ̈ܢ܂
07:059	ܘܥ݂ܢܐ ܘܐܡ݂ܪ ܠܝ܂ ܦܚ݁ܡ ܗܟܝܠ ܐܢܬ ܒܢܦܫܟ ܡܕܡ ܕܐܬ݂ܪܥܝܬ܂ ܡܛܘܠ ܕܟܠ ܕܐܝܬ ܠܗ ܩܠܝܠ ܗܘ ܕܙܥܘܪ ܚ݁ܕܐ ܒܗ ܝܬܝܪ ܡܢ ܗ݀ܘ ܕܐܝܬ ܠܗ ܣܓܝܐ̈ܬܐ܂
07:060	ܗܟܢܐ ܐܝܬܘܗܝ ܡܘܠܟܢܗ ܕܕܝܢ݂ܝ܂ ܚܕܐ ܐܢܐ ܓܝܪ ܘܡܬܒܣܡ ܐܢܐ ܒܙܥܘܪ̈ܐ ܕܚܝܝܢ܂ ܡܛܠ ܕܗ݂ܢܘܢ ܐܢܘܢ ܐܝܠܝܢ ܕܗܫܐ ܬܫܒܘܚܬܝ ܡܫܪܪܝܢ܂ ܘܐܝܠܝܢ ܕܡܛܠܬܗܘܢ ܫܡܝ ܐܫܬܒܚ ܗܫܐ܂
07:061	ܘܠܐ ܡܬܬܥܝܩ ܐܢܐ ܥܠ ܣܘܓܐܗܘܢ ܕܐܝܠܝܢ ܕܐܒ݁ܕܝܢ܂ ܗ݂ܢܘܢ ܐܢܘܢ ܓܝܪ ܗܠܝܢ ܕܗܫܐ ܐܬܕܡܝܘ ܠܗܒܠܐ܂ ܘܐܝܟ ܬܢܢܐ ܗ݂ܢܘܢ ܐܬܚܫܒܘ܂ ܘܐܝܟ ܫܠܗܒܝܬܐ ܐܬܦܚܡܘ ܕܕܠܩܘ݁ ܘܕܥܟܘ ܀
07:062	ܘܥ݁ܢܝܬ ܘܐܡ݁ܪܬ܂ ܐܘ ܡܢܐ ܥܒ̤ܕܬܝ ܐܪܥܐ ܕܗܠܝܢ ܐܬܝܠܕܘ ܡܢܟܝ܂ ܘܐ݁ܙܠܝܢ ܠܐܒܕܢܐ܂ ܐܢܕܝܢ ܡ‍{‍ܪ‍}‍‍<‍ܕ‍>‍ܥܐ ܡܢ ܥܦܪܐ ܗ݀ܘܐ܂ ܐܝܟ ܫܪܟܐ ܕܒ݂ܪ̈ܝܬܐ܂
07:063	ܦܩܚ ܗܘܐ ܕܐܠܘ ܐܦ ܗ݂ܘ ܥܦܪܐ܂ ܠܐ ܕܝܢ ܗ݂ܘܐ܂ ܡܛܠ ܕܡ‍{‍ܪ‍}‍‍<‍ܕ‍>‍ܥܐ ܠܐ ܢܗܘܐ ܡܢ ܬܡܢ܂
07:064	ܗܫܐ ܕܝܢ ܡܕܥܐ ܥܡܢ ܪܒ݁ܐ܂ ܘܡܛܠ ܗܢܐ ܡܫܬܢܩܝܢ ܚܢܢ܂ ܡܛܠ ܕܟܕ ܝܕ݁ܥܝܢ ܚܢܢ ܐܒ݁ܕܝܢܢ܂
07:065	ܢܬܐ̈ܒܠܢ ܫܪ̈ܒܬܗܘܢ ܕܒܢܝܢܫܐ܂ ܚܝ̈ܘܬܐ ܕܝܢ ܕܕܒܪܐ ܬܚܕܐ܂ ܢܐܠܘܢ ܟܘܠܗܘܢ ܝܠܝ݂̈ܕܐ܂ ܒܥܝܪܐ ܕܝܢ ܘܥܢܐ ܢܬܒܣܡܘܢ
07:066	ܕܠܗܘܢ ܦܩ݁ܚ ܣ݁ܓܝ ܛܒ ܡܢܢ܂ ܡܛܠ ܕܠܐ ܡܣܟܝܢ ܠܕܝ݂ܢܐ܂ ܐܦ ܠܐ ܝܕ݁ܥܝܢ ܬܫܢܝܩܐ܂ ܐܦ ܠܐ ܚ̈ܝܐ ܡܢ ܒܬܪ ܡܘܬܐ ܐܬܡܠܟܘ ܠܗܘܢ܂
07:067	ܚܢܢ ܓܝܪ ܡܢܐ ܝܬ݁ܪܝܢܢ ܕܡܚܐ ܚ݁ܝܝܢ ܚܢܢ܂ ܐܠܐ ܡܫܬܢܩܘ ܡܫܬܢܩܝܢ ܚܢܢ܂
07:068	ܟܠܗܘܢ ܓܝܪ ܝܠܝܕ̈ܐ ܡܬܦܠܦܠܝܢ ܐܢܘܢ ܒܚܛܗ̈ܐ܂ ܘܡ݂ܠܝܢ ܐܢܘܢ ܥ݂ܘܠܐ ܘܝܩܝܪ̈ܢ ܥܠܝܗܘܢ ܡ̈ܦܠܬܗܘܢ܂
07:069	ܘܐܠܘ ܡܢ ܒܬܪ ܡܘܬܐ ܠܐ ܐܬ݁ܝܢ ܠܕܝܢ݂ܐ ܣ݁ܓܝ ܦܩ݁ܚ ܗܘܐ ܠܢ ܀
07:070	ܘܥ݂ܢܐ ܘܐܡ݂ܪ ܠܝ܂ ܘܟܕ ܡܪܝܡܐ ܡܥܒܕ ܥ݁ܒܕ ܗܘܐ ܠܗ ܠܥܠܡܐ܂ ܘܠܐܕܡ ܘܠܟܘܠ ܐܝܠܝܢ ܕܗܘܘ ܡܢܗ ܠܘܩܕܡ ܥܬܕ ܕܝܢ݂ܐ܂ ܘܐܝܠܝܢ ܕܕܝ݂ܢܐ ܐ̈ܢܝܢ܂
07:071	ܘܗܫܐ ܡܢ ܡ̈ܠܝܟ ܐܣܬܟܠ ܕܐܡ݂ܪܬ ܕܡܕܥܐ ܥܡܢ ܪܒܐ܂
07:072	ܥܡܘܪ̈ܝܗ݀ ܗܟܝܠ ܕܐܪܥܐ݂ ܡܛܠ ܗܕܐ ܗܘ ܡܫܬܢܩܝܢ܂ ܕܟܕ ܐܝܬ ܒܗܘܢ ܡܕܥܐ ܐܥܘܠܘ܂ ܘܩ݂ܒܠܘ ܦܘܩ̈ܕܢܐ ܘܠܐ ܢܛ݂ܪܘ ܐܢܘܢ܂ ܐܦ ܠܢܡܘܣܐ ܕܐܬܬܣܝܡ ܠܗܘܢ ܛܠܡܘܗܝ܂
07:073	ܐܦ ܡܢܐ ܐܝܬ ܗܘܐ ܠܗܘܢ ܕܢܐܡܪܘܢ ܒܕܝ݂ܢܐ܂ ܐܘ ܐܝܟ݁ܢܐ ܢܦܬܚܘܢ ܦܘܡܗܘܢ܂ ܘܢܡܠܠܘܢ ܒܙܒܢܐ ܐܚܪܝܐ܂
07:074	ܟܡܐ ܓܝܪ ܙܒܢܐ ܐܓܪ ܪܘܚܗ ܡܪܝܡܐ ܠܥܡܘܪ̈ܘܗܝ ܕܥܠܡܐ܂ ܘܠܐ ܗܘܐ ܡܛܠܬܗܘܢ ܕܝܠܗܘܢ܂ ܐܠܐ ܡܛܠ ܙܒ̈ܢܐ ܕܣܝ݂ܡܝ݂ܢ ܀
07:075	ܘܥ݁ܢܝܬ ܘܐܡܪܬ܂ ܐܢ ܐܫܟ݁ܚܬ ܪ̈ܚܡܐ ܩܕܡܝܟ ܡܪܝܐ ܡܪܝ݂܂ ܐܘܕܥܝܗܝ ܠܥܒܕܟ ܐܦ ܗܕܐ܂ ܐܝܢ ܡܢ ܒܬܪ ܡܘܬܐ ܗܫܐ܂ ܟܕ ܝܗ݀ܒܝܢܢ ܟܠ ܚܕ ܚܕ ܡܢܢ ܢܦܫܢ܂ ܐܢ ܡܬܢܛܪܘ ܡܬܢܛܪܝܢܢ ܒܢܝܚܐ ܥܕܡܐ ܕܢܐܬܘܢ ܗ݀ܢܘܢ ܙܒ̈ܢܐ݁܂ ܕܒܗܘܢ ܥܬܝܕ ܐܢܬ ܕܬܚܕܬ ܒܪ݂ܝܬܟ܂ ܐܘ ܡܢ ܗܫܐ ܡܫܬܢܩܝܢܢ܂
07:076	ܘܥ݂ܢܐ ܘܐܡ݂ܪ ܠܝ ܐܘܕܥܟ ܐܦ ܥܠ ܗܕܐ܂ ܐܢܬ ܕܝܢ ܠܐ ܬܚܠܛ ܢܦܫܟ ܥܡ ܥܨ̈ܝܐ܂ ܘܠܐ ܬܡܢܐ ܩܢܘܡܟ ܥܡ ܐܝܠܝܢ ܕܡܫܬܢܩܝܢ܂
07:077	ܐܝܬ ܗܘ ܠܟ ܓܝܪ ܐܘܨܪܐ ܕܥ̈ܒܕܐ ܕܣܝܡ ܠܘܬ ܡܪܝܡܐ܂ ܘܠܐ ܢܬܚܙܐ ܠܟ ܥܕܡܐ ܠܙܒ̈ܢܐ ܐܚܪ̈ܝܐ܂

07:078	ܥܠ ܡܘܬܐ ܕܝܢ ܗܕܐ ܗܝ ܡܠܬܐ܂ ܐܡܬܝ ܕܢܦܘܩ ܩܨܐ ܕܓܙܪ ܕܝ݂ܢܐ ܡܢ ܠܘܬ ܡܪܝܡܐ ܥܠ ܒܪܢܫܐ ܕܢܡܘܬ܂ ܡܐ ܕܡܬܦܪܫܐ ܢܫܡܬܐ ܡܢ ܦܓܪܐ܂ ܕܬܫܬܕܪ ܠܘܬ ܗ݀ܘ ܕܝܗܒܗ݀ ܒܩܕܡܐ ܣ݁ܓܕܐ ܠܬܫܒܘܚܬܗ ܕܐܠܗܐ܂

07:079	ܘܐܢ ܕܝܢ ܐܝܬܝܗ݀ ܡܢ ܛܠܘܡ̈ܐ ܐܘ ܡܢ ܐܝܠܝܢ ܕܠܐ ܢܛ݂ܪܘ ܐܘܪ̈ܚܬܗ ܕܡܪܝܡܐ܂ ܐܘ ܡܢ ܐܝܠܝܢ ܕܣܢܘ ܐܢܘܢ ܠܕܚ̈ܠܘܗܝ ܕܐܠܗܐ܂
07:080	ܗܠܝܢ ܢܦܫ̈ܬܐ ܠܐܘܨܪ̈ܐ ܠܐ ܥ̈ܠܢ܂ ܐܠܐ ܡܢ ܗܫܐ ܗ̈ܘܝ݂ܢ ܒܬܫܢܝܩܐ܂ ܘܡܬ̈ܬܢܚܢ ܘܡܬ̈ܬܥܝܩܢ ܒܫܒܥ ܐܘܪ̈ܚܢ܂
07:081	ܐܘܪܚܐ ܩܕܡܝܬܐ ܕܥ̈ܨܝ ܠܢܡܘܣܗ ܕܡܪܝܡܐ܂
07:082	ܐܘܪܚܐ ܕܬܪܬܝܢ ܕܠܐ ܡ̈ܨܝܢ ܕܢܬܗ̈ܦܟܢ ܘܢܥܒ̈ܕܢ ܛ݁ܒ̈ܬܐ ܕܚ̈ܝܝܢ ܒܗܝܢ ܀
07:083	ܐܘܪܚܐ ܕܬܠܬ ܕܚܙ̈ܝܢ ܐܓܪܐ ܕܣ݂ܝܡ ܠܐܝܠܝܢ ܕܗܝ݂ܡܢܘ ܀
07:084	ܐܘܪܚܐ ܕܐܪܒܥ ܡܐ ܕܝ݂ܕܥ ܘܐܣܬܟܠ ܬܫܢܝܩܐ ܕܥܬܝܕ ܠܗܝܢ ܒܐܚܪܝܬܐ܂ ܗ݀ܘ ܕܒܗ ܡܬܟ̈ܘܢܢ ܢܦܫܬ̈ܗܘܢ ܕܪ̈ܫܝܥܐ܂ ܡܛܠ ܕܟܕ ܐܝܬ ܗܘܐ ܠܗܝܢ ܙܒܢܐ ܕܦܘܠܚܢܐ ܠܐ ܐܫܬܥܒܕܝ ܠܦܘܩ̈ܕܢܘܗܝ ܕܡܪܝܡܐ ݁܃݁ ܀݁܃݁
07:085	ܐܘܪܚܐ ܕܚܡܫ݂܂ ܕܚ̈ܙܝܢ ܐܘܨܪ̈ܐ ܕܢܦܫ̈ܬܐ ܐܚܪ̈ܢܝܬܐ ܕܡܬܢܛܪ̈ܢ ܡܢ ܡܠܐ̈ܟܐ ܒܢܝܚܐ ܣܓܝܐܐ ܀
07:086	ܐܘܪܚܐ ܕܫܬ܂ ܕܚ̈ܙܝܢ ܬܫܢܝܩܐ ܕܡܢ ܗܫܐ ܡܛܝܒ ܠܗܝܢ ݁܃݁ ܀܀
07:087	ܐܘܪܚܐ ܕܫܒܥ ܕܗ݂ܝ ܪܒܐ ܡܢ ܟܠܗܝܢ ܐܘܪ̈ܚܬܐ ܕܐܬܐܡܪ ܡܢ ܩܕܝܡ܂ ܕܫ̈ܝܚܢ ܒܒܗܬܬܐ ܘܓܡܝܪ̈ܢ ܒܬܚܡܨܬܐ܂ ܘܚܡ݁ܝܢ ܒܕܚܠܬܐ ܕܚ݁ܙܝܢ ܬܫܒܘܚܬܗ ܕܡܪܝܡܐ܂ ܗ݀ܘ ܕܗܫܐ ܚܛܝܢ ܩܕܡܘܗܝ܂ ܕܒܚܝ̈ܝܗܝܢ܂ ܘܩܕܡ ܗ݀ܘ ܕܥܬܝ̈ܕܢ ܕܒܐܚܪܝܬܐ ܢܬܬܕ̈ܝܢܢ ܀
07:088	ܕܗܠܝܢ ܕܝܢ ܕܢܛ݂ܪܘ ܐܘܪܚܗ ܕܡܪܝܡܐ܂ ܗܕܐ ܗܝ ܐܘܪܚܐ ܟܕ ܢܡܛܐ ܝܘܡܐ ܕܢܬܦܪ̈ܩܢ ܡܢ ܡܐܢܐ ܗܢܐ ܕܡܬܚܒܠ܂
07:089	ܒܗܘ݁ ܓܝܪ ܙܒܢܐ ܕܥܡ݁ܪ ܒܗ ܐܫܬܥܒܕ ܠܡܪܝܡܐ ܒܠܐܘܬܐ܂ ܘܒܟܠ ܫ̈ܥܝܢ ܣܝ݁ܒܪ ܩܘܢܕܘܢܘܣ ܡܛܠ ܕܓܡܝܪܐܝܬ ܢ݁ܛܪ̈ܢ ܢܡܘܣܗ܂ ܗ݀ܘ ܕܣܡ ܠܗܝܢ ܢܡܘܣܐ܂
07:090	ܡܛܠ ܗܢܐ܂ ܗܢܘ ܦܬܓܡܐ ܕܥܠܝܗܝܢ܂
07:091	ܠܘܩܕܡ ܚܙ̈ܝܢ ܒܚܕܘܬܐ ܣܓܝܐܬܐ ܬܫܒܘܚܬܗ ܕܡܪܝܡܐ ܗ݀ܘ ܕܕܒ݁ܪ ܐ̈ܢܝܢ܂ ܘܡܬ̈ܬܢܝܚܢ ܘܐ̈ܬܝܢ ܒܫܒܥ ܐܘܪ̈ܚܢ ܀
07:092	ܐܘܪܚܐ ܩܕܡܝܬܐ܂ ܡܛܠ ܕܒܠܐܘܬܐ ܣܓܝܐܬܐ ܐܬܟܬܫ ܠܡܙܟܐ ܡܚܫܒܬܐ ܒܝܫ݂ܬܐ ܕܐܬܓܒ̤ܠܬ ܥܡܗܝܢ܂ ܕܠܐ ܢܛܥ̈ܝܢ ܡܢ ܚ̈ܝܐ ܠܡܘܬܐ ܀
07:093	ܐܘܪܚܐ ܕܬܪܬܝܢ܂ ܕܚ̈ܙܝܢ ܗܘܦܟܐ ܕܡܬܗ̈ܦܟܢ ܘܡܬܛܪ̈ܦܢ ܒܗ ܢܦܫ̈ܬܗܘܢ ܕܪ̈ܫܝܥܐ܂ ܘܬܫܢܝܩܐ ܕܢܛܝܪ ܠܗܘܢ ܀ ݁܃݁
07:094	ܐܘܪܚܐ ܕܬܠܬ ܕܚ݁ܙܝܢ ܣܗܕܘܬܐ ܕܡܣܗܕ ܥܠܝܗܝܢ ܓܒܘܠܗܝܢ܂ ܡܛܠ ܕܒܚܝ̈ܝܗܝܢ ܢܛܪ ܢܡܘܣܐ ܕܐܬܗܝܡܢ ܀
07:095	ܐܘܪܚܐ ܕܐܪܒܥ ܕܚ̈ܙܝܢ ܘܡܣ̈ܬܟܠܢ ܢܝܚܐ ܕܗܫܐ ܡܐ ܕܐܬܟܢܫ ܒܐܘܨܪ̈ܝܗܝܢ܂ ܡ̈ܬܬܢܝܚܢ ܒܢܝܚܐ ܣܓܝܐܐ܂ ܘܡܢ ܡܠܐ̈ܟܐ ܡܬܢܛܪ̈ܢ ܘܬܫܒܘܚܬܐ ܕܢܛܝܪܐ ܠܗܝܢ ܠܐܚܪܝܬܐ ܀
07:096	ܐܘܪܚܐ ܕܚܡܫ݂܂ ܕܚ݁ܕܝܢ ܕܐܝ݁ܟܢܐ ܥ݂ܪܩ ܗܫܐ ܡܢ ܡܐ ܕܡܬܚܒܠ܂ ܘܐܝܟ݁ܢܐ ܝܪ̈ܬܢ ܡܕܡ ܕܥܬܝܕ܂ ܘܬܘܒ ܚ݁ܙܝܢ ܐܘܠܨܢܐ ܘܣܘܓܐܐ ܕܥܡܠܐ ܕܐܬܚܪܪ ܡܢܗ݀܂ ܘܪ̈ܘܚܬܐ ܕܥܬ̈ܝܕܢ ܕܢܩ̈ܒܠܢ܂ ܘܦܘܢ̈ܩܐ ܕܢܣ̈ܒܢ ܘܗܘ̈ܝܢ ܕܠܐ ܡܝ̈ܬܢ ݁܃݁ ܀ ݁܃݁
07:097	ܐܘܪܚܐ ܕܫܬ݂܂ ܐܡܬܝ ܕܢܬܚܘܐ ܠܗܝܢ ܕܐܝܟ݁ܢܐ ܥܬܝ̈ܕܢ ܐܦܝܗ̈ܝܢ ܕܢܢܗܪ̈ܢ ܐܝܟ ܫܡܫܐ܂ ܘܕܐܝܟ݁ܢܐ ܥܬ̈ܝܕܢ ܕܢܬܕܡ̈ܝܢ ܠܢܘܗܪܐ ܕܟܘܟ̈ܒܐ ܘܬܘܒ ܠܐ ܡ̈ܬܚܒܠܢ ݁܃݁ ܀
07:098	ܐܘܪܚܐ ܕܫܒܥ ܕܗ݂ܝ ܪܒܐ ܡܢ ܟܠܗܝܢ ܗܠܝܢ ܕܐܬܐܡܪ ܡܢ ܩܕܝܡ ܕܡܫܬܒܗܪ̈ܢ ܒܦܪܗܣܝܐ܂ ܘܡܬܠܒ̈ܒܢ ܘܠܐ ܒܗ̈ܬܢ܂ ܘܡܣܬܪ̈ܗܒܢ ܕܢܚ̈ܙܝܢ ܐܦܘ̈ܗܝ ܕܗ݀ܘ ܕܐܫܬܥܒܕ ܠܗ ܒܚܝܝ̈ܗܝܢ܂ ܘܕܗ݀ܘ ܕܥܬ̈ܝܕܢ ܕܢܫ̈ܬܒܚܢ ܡܢܗ܂ ܘܕܢܩ̈ܒܠܢ ܡܢܗ ܐܓܪܐ܂
07:099	ܗܠܝܢ ܐ̈ܢܝܢ ܐܘܪ̈ܚܬܐ ܕܢܦܫܬ̈ܗܘܢ ܕܙܕܝ̈ܩܐ܂ ܕܡܢ ܗܫܐ ܡܣܬܒܪ̈ܢ ܀ ܀ ܘܐܘܪ̈ܚܬܐ ܕܬܫܢ̈ܝܩܐ ܕܐܬܐܡܪ ܡܢ ܩܕܝܡ ܢܩܒܠܘܢ ܡܢ ܗܫܐ ܥܨܝ̈ܐ܂ ܗܠܝܢ ܢܦܫܬ̈ܐ ܠܐܘܨܪ̈ܐ ܠܐ ܥ̈ܠܢ ܐܠܐ ܡܢ ܗܫܐ ܗܘ̈ܝܢ ܡܬܛܪ̈ܦܢ ܒܬܫܢܝܩܐ܂ ܘܡܬܬ̈ܢܚܢ ܘܡܬܐ̈ܒܠܢ ܒܫܒܥ ܐܘܪ̈ܚܢ ݁܃݁ ܀
07:100	ܘܥ݁ܢܝܬ ܘܐܡ݁ܪܬ ܂ ܡܟܝܠ ܡܬܝܗܒ ܗܘܐ ܠܗܝܢ ܐܬܪܐ ܐܘ ܙܒܢܐ ܠܢܦܫ̈ܬܐ ܡܢ ܒܬܪ ܕܦܪ̈ܩܢ ܡܢ ܦܓܪ̈ܐ ܕܢܚ̈ܙܝܢ ܡܕܡ ܕܐܡ݂ܪܬ ܠܝ ܀
07:101	ܘܥ݂ܢܐ ܘܐܡ݂ܪ ܠܝ܂ ܫܒܥܐ ܐܢܘܢ ܝܘܡ̈ܝܢ ܕܚܐܪܘܬܗܝܢ ܕܒܗ݀ܢܘܢ ܫܒܥܐ ܝܘܡ̈ܝܢ ܚܙ̈ܝܢ ܡ̈ܠܐ ܗܠܝܢ ܕܐܬܐܡܪ ܡܢ ܩܕܝܡ ܘܡܢ ܒܬܪܟ݂ܢ܂ ܢܬܟ̈ܢܫܢ ܠܐܘܨܪ̈ܝܗܝܢ ܀܀
07:102	ܘܥ݁ܢܝܬ ܘܐ݁ܡܪܬ܂ ܐܢ ܐܫܟ݁ܚܬ ܪ̈ܚ݂ܡܐ ܒܥ̈ܝܢܝܟ݂ ܐܘܕܥܝܢܝ ܠܥܒ݂ܕܟ ܬܘܒ ܐܦ ܗܕܐ܂ ܕܐܢ ܒܝܘܡܐ ܕܕܝ݂ܢܐ ܡܫܟܚܝܢ ܙܕܝ̈ܩܐ ܕܢܫܐܠܘܢ ܐܢܘܢ ܠܪ̈ܫܝܥܐ܂ ܐܘ ܕܢܒܥܘܢ ܥܠܝܗܘܢ ܡܢ ܡܪܝܡܐ܂
07:103	ܐܘ ܐܒܗ̈ܐ ܚܠܦ ܒܢܝܗܘܢ܂ ܐܘ ܒܢ̈ܝܐ ܚܠܦ ܐܒܗ̈ܝܗܘܢ܂ ܐܘ ܐܚ̈ܐ ܚܠܦ ܐܚ̈ܝܗܘܢ ܐܘ ܐܚ̈ܝܢܐ ܚܠܦ ܐܚ̈ܝܢܝܗܘܢ܂ ܐܘ ܪ̈ܚ݁ܡܐ ܚܠܦ ܪ̈ܚܡܝܗܘܢ ܀
07:104	ܘܥ݂ܢܐ ܘܐܡ݂ܪ ܠܝ܂ ܡܛܠ ܕܐܫܟܚܬ ܪ̈ܚܡܐ ܩܕܡ ܥܝܢ̈ܝ݂܂ ܐܦ ܥܠ ܗܕܐ ܐܘܕܥܟ܂ ܝܘܡܗ ܕܕܝ݂ܢܐ݂܂ ܝܘܡܐ ܗܘ ܓܙܝܪܐ܂ ܘܠܟܠ ܡܚܘܐ ܚܬܡܐ ܕܫܪܪܐ܂ ܐܝ݁ܟܢܐ ܓܝܪ ܕܗܫܐ ܠܐ ܡܫܕܪ ܐܒܐ ܠܒܪܗ܂ ܐܘ ܒܪܐ ܠܐܒܘܗܝ܂ ܐܘ ܡܪܐ ܠܥܒ݂ܕܗ܂ ܐܘ ܪܚ݁ܡܐ ܠܚܒܝܒܗ܂ ܕܚܠܦܘܗܝ ܢܬܟܪܗ܂ ܐܘ ܕܢܕܡܟ ܐܘ ܕܢܐܟܘܠ ܐܘ ܕܢܬܐܣܐ ܀
07:105	ܗܟܢܐ ܐܦ ܗܝ݁ܕܝܢ ܠܐ ܡܫܟܚ ܐܢܫ ܕܢܒܥܐ݁܂ ܥܠ ܐ̈ܦܝ ܐܢܫ ܒܗ݀ܘ ܝܘܡܐ܂ ܐܦܠܐ ܕܢܘܩܪ ܐܢܫ ܥܠ ܐܢܫ܂ ܟܠܗܘܢ ܓܝܪ ܗܝ݁ܕܝܢ ܢܛܥܢܘܢ ܐܢܫ ܐܢܫ ܙܕܝܩܘܬܗ ܐܘ ܥܘ݂ܠܗ܂
07:106	ܘܥ݁ܢܝܬ ܘܐܡ݁ܪܬ܂ ܘܐܝܟܢܐ ܡܪܝ ܐܫܟܚܢ ܕܒ݂ܥܐ ܡܢ ܩܕܝܡ ܐܒܪܗܡ ܥܠ ܣܕܘܡ̈ܝܐ܂ ܐܦ ܡܘܫܐ ܒܡܕܒܪܐ ܥܠ ܐܒܗ̈ܬܐ ܟܕ ܚܛܘ܂
07:107	ܘܝܫܘܥ ܒܪ ܢܘܢ ܡܢ ܒܬܪܗ ܥܠ ܐܝܣܪܝܠ܃ ܒܝܘܡ̈ܬܗ ܕܥܟܪ܂
07:108	ܘܫܡܘܐܝܠ ܒܝܘܡ̈ܝ ܫܐܘܠ ܘܕܘܝܕ ܥܠ ܬܒܪܗ ܕܥܡܐ܂ ܘܫܠܝܡܘܢ ܥܠ ܗܢ݁ܘܢ ܕܒܝܬ ܡܩܕܫܐ܂
07:109	ܘܐܠܝܐ ܥܠ ܐܝܠܝܢ ܕܩܒܠܘ ܡܛܪܐ܂ ܘܥܠ ܡܝܬܐ ܡܛܠ ܕܢܚܐ܂
07:110	ܘܚܙܩܝܐ ܥܠ ܥܡܐ ܒܝܘܡ̈ܬܗ ܕܣܢܚܝܪܝܒ܃ ܘܣ̈ܓܝܐܐ ܚܠܦ ܣܓܝܐ̈ܐ܂
07:111	ܐܢ ܗܟܝܠ ܗܫܐ ܕܟܕ ܚܒ݁ܠܐ ܪܒܐ ܗ݂ܘܐ܂ ܘܛܠܘܡܝܐ ܣܓ݂ܐ܂ ܒܥܘ ܙܕܝ̈ܩܐ ܥܠ ܪ̈ܫܝܥܐ܂ ܘܠܡܢܐ ܡܪܝ ܐܦ ܗ݀ܝܕܝܢ ܠܐ ܢܗܘܐ ܗܟܢܐ ܀
07:112	ܘܥܢܐ ܘܐܡ݂ܪ ܠܝ܂ ܗܢܐ ܥܠܡܐ ܐܝܬ ܠܗ ܫܘܠܡܐ܂ ܘܬܫܒܘܚܬܗ ܕܐܠܗܐ ܠܐ ܗܘܐ ܐܡܝܢܐܝܬ ܡܩܘܝܐ ܒܗ܂ ܡܛܠ ܗܢܐ ܒܥܘ ܚܝ̈ܠܬܢܐ ܥܠ ܗ݀ܢܘܢ ܕܠܝܬ ܒܗܘܢ ܚܝܠܐ܂
07:113	ܝܘܡܗ ܕܝܢ ܕܕܝܢ݂ܐ ܫܘܠܡܗ ܗܘ ܕܗܢܐ ܥܠܡܐ݂܂ ܘܪܝܫܗ ܕܥܠܡܐ ܕܥܬܝܕ ܗ݀ܘ ܕܠܐ ܡܐ݁ܬ ܕܒܗ ܥ݁ܒܪ ܚܒ݁ܠܐ ܀
07:114	ܘܡܫܬܪܝܐ ܫܪܝܚܘܬܐ܂ ܘܡܬܒܛܠܐ ܟܦܘܪܘܬܐ܂ ܘܪܒ݁ܝܐ ܙܕܝܩܘܬܐ܂ ܘܕܢ݁ܚ ܫܪܪܐ܂
07:115	ܗܝ݁ܕܝܢ ܗܟܝܠ ܠܐ ܡܫܟܚ ܐܢܫ ܕܢܪܚܡ ܥܠ ܐܝ݁ܢܐ ܕܐܙܕܟܝ ܒܕܝ݂ܢܐ܂ ܐܦܠܐ ܕܢܒܐܫ ܠܐܝ݁ܢܐ ܕܙܟ݂ܐ ܒܕܝܢ݂ܐ܂
07:116	ܘܥܢ݁ܝܬ ܘܐܡ݁ܪܬ܂ ܕܗܕܐ ܗܝ ܡܠܬܝ ܩܕܡܝܬܐ ܘܐܚܪܝܬܐ ܕܦܩܚ ܗܘܐ ܠܗ݀ ܠܐܪܥܐ ܕܠܐ ܬܬܠܝܘܗܝ ܠܐܕܡ܂ ܐܘ ܕܟܕ ܝܗܒ݂ܬܗ ܐܪܬܝܬܗ ܕܠܐ ܢܚܛܐ܂
07:117	ܡܢܐ ܓܝܪ ܗܢܝܢܐ ܐܝܬ ܠܗܘܢ ܠܟܘܠܗܘܢ ܐܝܠܝܢ ܕܐܬܘ܂ ܕܗܐ ܚ̈ܝܝܢ ܒܥܩ̈ܬܐ܂ ܘܡܐ ܕܡܝ݂ܬܘ ܡܣܟܝܢ ܠܬܫܢܝܩܐ܂
07:118	ܐܘ ܡܢܐ ܥܒܕܬ ܐܕܡ܂ ܐܢ ܓܝܪ ܐܢܬ ܚܛܝܬ݂܂ ܐܠܐ ܠܐ ܗܘܬ ܒܝ݂ܫܬܐ ܕܝܠܟ ܒܠܚܘܕܝܟ܂ ܐܠܐ ܐܦ ܕܝܠܢ ܐܝܠܝܢ ܕܡܢܟ ܗ݀ܘܝܢ܂
07:119	ܡܢܐ ܓܝܪ ܝܘܬܪܢܐ ܐܝܬ܂ ܕܗܐ ܐܬܡܠܟ ܠܢ ܙܒܢܐ ܕܠܐ ܡܐ݁ܬ܂ ܚܢܢ ܕܝܢ ܥ݁ܒ̈ܕܐ ܡܝ̈ܬܐ ܥܒܕܢ܂
07:120	ܘܕܐܬܝܕܥ ܠܢ ܣܒܪܐ ܕܠܐ ܓܐ݁ܙ܂ ܚܢܢ ܕܝܢ ܒܝ݂ܫܐܝܬ ܐܣܬܪܩܢ܂
07:121	ܘܕܗܐ ܢܛܝܪܝܢ ܐܘܨܪ̈ܐ ܕܠܐ ܨܦܬܐ ܘܕܠܐ ܟܘܪܗܢܐ܂ ܚܢܢ ܕܝܢ ܒܝܫ݂ܐܝܬ ܐܬܗܦܟܢ ܚܢܢ܂
07:122	ܘܕܥܬܝܕܐ ܬܫܒܘܚܬܗ ܕܡܪܝܡܐ ܕܬܓܢ ܥܠ ܐܝܠܝܢ ܕܒܢܟܦܘܬܐ ܚܝܘ܂ ܚܢܢ ܕܝܢ ܒܐܘܪ̈ܚܬܐ ܒܝ݂ܫ̈ܬܐ ܪܕܝܢ܂
07:123	ܘܕܡܬܚܙܐ ܦܪܕܝܣܐ ܗ݀ܘ ܕܠܐ ܚܡ݁ܝܢ ܦܐܪ̈ܘܗܝ܂ ܕܒܗ ܐܝܬ ܦܘ̈ܢܩܐ ܘܐܣܝܘܬܐ܂
07:124	ܚܢܢ ܕܝܢ ܠܐ ܥܐܠܝܢܢ܂ ܡܛܠ ܕܠܐܬܪ̈ܘܬܐ ܒܝ݂ܫ̈ܐ ܦܠܚܢܢ܂
07:125	ܘܕܥܬ̈ܝܕܢ ܐܦܝܗ̈ܘܢ ܕܩܕܝ̈ܫܐ ܕܢܢܗܪ̈ܢ ܝܬܝܪ ܡܢ ܟܘܟ̈ܒܐ܂ ܘܐ̈ܦܝܢ ܕܝܠܢ ܢܐܟܡ̈ܢ ܝܬܝܪ ܡܢ ܚܫܘܟܐ܂
07:126	ܕܠܐ ܓܝܪ ܐܬܒܝܢ ܚܢܢ ܒܚܝ̈ܝܢ ܟܕ ܡܥܘܠܝܢ ܗ̈ܘܝܢ ܕܥܬܝܕܝܢܢ ܕܢܚܫ ܡܢ ܒܬܪ ܡܘܬܢ܂
07:127	ܘܥ݂ܢܐ ܘܐܡܪ ܠܝ܂ ܗܕܐ ܗܝ ܡܚܫܒܬܐ ܕܐܓܘܢܐ܂ ܗ݀ܘ ܕܡܬܟܬܫ ܥܠ ܐܪܥܐ݂܂ ܒܪܢܫܐ ܕܡܬܝܠܕ܂
07:128	ܐܢ ܡܙܕܟܐ ܢܚܫ ܗ݀ܘ ܡܕܡ ܕܐܡ݁ܪܬ܂ ܘܐܢ ܕܝܢ ܢܙ݁ܟܐ ܢܩܒܠ ܗ݀ܘ ܡܕܡ ܕܐܡ݁ܪܬ܂
07:129	ܡܛܠ ܕܗܕܐ ܗܝ ܐܘܪܚܐ ܗ݀ܝ ܕܐܡ݂ܪ ܡܘܫܐ݁܂ ܟܕ ‍<‍ܐ‍>‍ܚܝ ܗܘܐ ܠܥܡܐ ܘܐܡ݂ܪ ܠܗܘܢ܂ ܗܐ ܝܗ݀ܒܬ ܩܕܡܝܟܘܢ ܝܘܡܢܐ݂܂ ܚ̈ܝܐ ܘܡܘܬܐ܂ ܛ݁ܒܬ̈ܐ ܘܒܝ݂ܫ̈ܬܐ܂ ܓܒܘ ܠܟܘܢ ܗܟܝܠ ܚ̈ܝܐ ܕܬܚܘܢ܂ ܐܢܬܘܢ ܘܙܪܥܟܘܢ܂
07:130	ܘܥܨܘ ܘܠܐ ܐܬܛܦܝܣܘ ܠܗ܂ ܘܠܐ ܠܢܒ̈ܝܐ ܕܡܢ ܒܬܪܗ܂ ܐܦ ܠܝ ܕܡ݁ܠܠܬ ܥܡܗܘܢ
07:131	ܡܛܠ ܗܢܐ ܠܐ ܬܗܘܐ ܥܩܬܐ ܥܠ ܐܒܕܢܗܘܢ܂ ܐܝܟ݁ܢܐ ܕܗܘ݁ܝܐ ܚܕܘܬܐ ܥܠ ܚܝܝ̈ܗܘܢ ܕܐܝܠܝܢ ܕܐܬܛܦܝܣܘ ܀
07:132	ܘܥ݁ܢܝܬ ܘܐܡ݁ܪܬ ܠܗ܂ ܝܕ݁ܥ ܐܢܐ ܡܪܝ݂ ܕܗܫܐ ܐܬܩܪܝ ܡܪܝܡܐ ܡܪܚܡܢܐ܂ ܡܛܠ ܕܡܪܚܡ ܥܠ ܐܝܠܝܢ ܕܥܕܟܝܠ ܠܐ ܐܬܘ ܠܥܠܡܐ܂
07:133	ܘܚܢܢܐ ܡܛܠ ܕܚܐ݁ܢ ܠܐܝܠܝܢ ܕܡܬܦܢܝܢ ܥܠ ܢܡܘܣܗ܂
07:134	ܘܢܓܝܪ ܪܘܚܐ ܡܛܠ ܕܡܓܪ ܪܘܚܗ ܥܡܢ ܥܡ ܐܝܠܝܢ ܕܚ݁ܛܝܢ܂ ܡܛܘܠ ܕܥ݂̈ܒܕܘܗܝ ܚܢܢ܂
07:135	ܘܝܗ݀ܘܒܐ ܡܛܠ ܕܨ݁ܒܐ ܗܘ ܠܡܬܠ ܝܬܝܪ ܡܢ ܕܠܡܬܒܥ܂
07:136	ܘܣ݁ܓܝ ܪ̈ܚ݂ܡܐ܂ ܡܛܠ ܕܝܬܝܪܐܝܬ ܡܣܓܐ ܪ̈ܚ݂ܡܐ ܥܠ ܐܝܠܝܢ ܕܐܝܬܝܗܘܢ ܗܫܐ܂ ܘܥܠ ܐܝܠܝܢ ܕܥ݂ܒܪܘ܂ ܘܥܠ ܐܝܠܝܢ ܕܥܬܝܕܝܢ܂
07:137	ܐܢ ܓܝܪ ܠܐ ܢܣܓܐ ܐܢܘܢ ܠܪ̈ܚܡܘܗܝ܂ ܠܐ ܡܫܟܚ ܥܠܡܐ ܕܢܚܐ ܥܡ ܥ݁ܡܘܪ̈ܘܗܝ܂
07:138	ܘܝܗܘܒܐ ܡܛܠ ܕܐܠܐ ܢܬܠ ܒܛܒܘܬܗ݂܂ ܐܝܟ ܕܢܬܩܠܠܘܢ ܥ݁ܘ̈ܠܐ ܡܢ ܥܘ݂ܠܗܘܢ܂ ܘܐܠܐ ܠܐ ܡܫܟܚ ܗܘܐ ܕܢܚܐ ܚܕ ܡܢ ܪܒܘ ܡܢ ܒ̈ܢܝ ܐܢܫܐ
07:139	ܘܕܝܢܐ ܡܛܠ ܕܐܠܐ ܢܕܥ ܡܢ ܢܦܫܗܘܢ ܕܐܝܠܝܢ ܕܐܬܒܪܝܘ ܒܡܠܬܗ܂ ܘܢܛܥܐ ܣܘܓܐܐ ܕܥܘ݂ܠܗܘܢ܂ ܘܐܠܐ ܠܐ ܡܫܬܚܪ ܗܘܐ ܡܢ ܣܘܓܐܐ ܕܠܝܬ ܠܗ ܡܢܝܢܐ܂ ܐܠܐ ܐܢ ܩܠܝܠ ܙܥܘܪ̈ܐ ܀