← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62077: P 1Mac

Click on a word for lexical analysis
Click on a red-colored coordinate for comments and/or translations of the line

01:01 ܘܗܘܐ ܡܢ ܒܬܪ ܕܩܛܠ ܐܠܟܣܢܕܪܘܣ ܒܪ ܦܝܠܝܦܘܣ ܡܩܕܘܢܝܐ ܕܢܦܩ ܡܢ ܐܪܥܐ ܕܟܬܝ̈ܐ ܘܡܚܝܗܝ ܘܩܛܠܗ ܠܕܪܝܘܫ ܡܠܟܐ ܕܦܪ̈ܣܝܐ ܘܕܡ̈ܕܝܐ ܘܐܡܠܟ ܚܠܦܘܗܝ ܠܘܩܕܡ ܕܝܢ ܐܡܠܟ ܒܗܠܕܐ܂
01:02 ܘܥܒܕ ܩܪ̈ܒܐ ܪ̈ܘܪܒܐ ܘܐܚܕ ܚܣ̈ܢܐ ܣ̈ܓܝܐܐ ܘܩܛܠ ܠܡ̈ܠܟܝܗ ܕܐܪܥܐ܂
01:03 ܘܐܙܠ ܥܕܡܐ ܠܣ̈ܘܦܝܗ ܕܐܪܥܐ ܘܢܣܒ ܒܙܬܐ ܕܥܡ̈ܡܐ ܣ̈ܓܝܐܐ ܘܫܠܝܬ ܘܐܬܬܢܝܚܬ ܐܪܥܐ ܩܕܡܘܗܝ ܘܐܫܬܩܠ ܘܐܬܪܝܡ ܠܒܗ܂
01:04 ܘܟܢܫ ܠܗ ܚܝܠܐ ܥܫܝܢܐ ܘܣܓܝܐܐ ܘܐܫܬܠܛ ܥܠ ܥܡ̈ܡܐ ܘܥܠ ܐܡܘ̈ܬܐ ܘܥܠ ܛܪ̈ܘܢܐ ܘܗܘܘ ܠܗ ܡ̈ܣܩܝ ܡܕܐܬܐ܂
01:05 ܘܡܢ ܒܬܪ ܗܠܝܢ ܢܦܠ ܐܠܟܣܢܕܪܘܣ ܥܠ ܥܪܣܗ ܘܝܕܥ ܕܡܐܬ ܠܗ܂
01:06 ܘܩܪܐ ܠܥܒ̈ܕܘܗܝ ܡܫܒ̈ܚܐ ܗܢܘܢ ܕܐܬܪܒܝܘ ܥܡܗ ܡܢ ܛܠܝܘܬܗ ܘܦܠܓܗ ܠܗܘܢ ܡܠܟܘܬܗ ܥܕ ܗܘ ܚܝ܂
01:07 ܘܐܡܠܟ ܕܝܢ ܐܠܟܣܢܕܪܘܣ ܬܪ̈ܬܥܣܪ̈ܐ ܫܢ̈ܝܢ ܘܡܝܬ܂
01:08 ܘܐܚܕܘ ܥܒ̈ܕܘܗܝ ܟܠ ܚܕ ܚܕ ܡܢܗܘܢ ܐܬܪܗ܂
01:09 ܘܩܛܪܘ ܟܠܗܘܢ ܬ̈ܓܐ ܡܢ ܒܬܪ ܡܘܬܗ ܐܦ ܒܢܝܗܘܢ ܡܢ ܒܬܪܗܘܢ ܫ̈ܢܝܐ ܣܓܝܐ̈ܬܐ ܘܐܣܓܝܘ ܒܝܫ̈ܬܐ ܟܠ ܐܪܥܐ܂
01:10 ܘܢܦܩ ܡܢܗܘܢ ܥܩܪܐ ܕܚܛܝܬܐ ܐܢܛܝܟܘܣ ܐܦܝܦܢܘܣ ܒܪܗ ܕܐܢܛܝܟܘܣ ܡܠܟܐ ܗܘ ܕܐܝܬܘܗܝ ܗܘܐ ܗܡܝܪܐ ܒܪܗܘܡܐ ܘܐܡܠܟ ܒܫܢܬ ܡܐܐ ܘܬܠܬܝܢ ܘܫܒܥ ܕܡܠܟܘܬܐ ܕܝܘ̈ܢܝܐ܂
01:11 ܒܗܢܘܢ ܝܘܡ̈‍{‍ܡ‍}‍ܬܐ ܢܦܩܘ ܡܢ ܐܝܣܪܝܠ ܐܢܫ̈ܐ ܒܢ̈ܝ ܥܘ̈ܠܐ ܘܐܦܝܣܘ ܠܣܓ̈ܝܐܐ ܟܕ ܐܡܪܝܢ ܠܗܘܢ ܢܐܙܠ ܘܢܩܝܡ ܩܝܡܐ ܥܡ ܥܡ̈ܡܐ ܗܠܝܢ ܕܚܕܝܪ̈ܝܢ ܠܢ ܡܛܠ ܕܡܢ ܝܘܡܐ ܕܦܪܫܢ ܡܢܗܘܢ ܐܫܟܚܢ ܒܝܫ̈ܬܐ ܣܓܝܐ̈ܬܐ܂
01:12 ܘܫܦܪܬ ܡܠܬܐ ܒܥܝ̈ܢܝܗܘܢ܂
01:13 ܘܐܬܚܫܒܘ ܐܢܫܐ ܡܢ ܥܡܐ ܘܐܙܠܘ ܠܘܬ ܡܠܟܐ ܘܝܗܒ ܠܗܘܢ ܡܠܟܐ ܫܘܠܛܢܐ ܕܢܥܒܕܘܢ ܐܝܟ ܢܡܘܣܐ ܕܥܡ̈ܡܐ܂
01:14 ܘܒܢܘ ܒ̈ܢܝ ܥܘܠܐ ܐܣܛܕܝܘܢ ܒܐܘܪܫܠܡ ܐܝܟ ܢܡܘܣܗܘܢ ܕܥܡ̈ܡܐ܂
01:15 ܘܢܓܕܘ ܠܗܘܢ ܥܘܪܠܘܬܐ ܘܐܪܚܩܘ ܡܢ ܕܝܬܩܐ ܩܕܝܫܬܐ ܘܐܬܚܠܛܘ ܒܥܡ̈ܡܐ ܘܐܨܛܒܝܘ ܠܡܥܒܕ ܒܝܫ̈ܬܐ܂
01:16 ܘܐܬܥܬܕܬ ܘܐܬܛܝܒܬ ܡܠܟܘܬܐ ܩܕܡ ܐܢܛܝܟܘܣ ܘܨܒܐ ܕܢܡܠܟ ܐܦ ܥܠ ܐܪܥܐ ܕܡܨܪܝܢ ܐܝܟܢܐ ܕܢܡܠܟ ܥܠ ܬܪ̈ܬܝܗܝܢ ܡܠܟܘ̈ܬܐ܂
01:17 ܘܥܠ ܐܢܛܝܟܘܣ ܠܡܨܪܝܢ ܒܚܝܠܐ ܥܫܝܢܐ ܘܪܒܐ ܒܡܪ̈ܟܒܬܐ ܘܒܦ̈ܝܠܐ ܘܒܦܪ̈ܫܐ ܘܒܬܫܒܘܚܬܐ ܪܒܬܐ܂
01:18 ܘܥܒܕ ܩܪܒܐ ܥܡ ܦܛܠܡܐܘܣ ܡܠܟܐ ܕܡܨܪܝܢ ܘܐܙܕܟܝ ܦܛܠܡܐܘܣ ܡܢ ܩܕܡܘܗܝ ܘܥܪܩܘ ܘܢܦܠܘ ܩ̈ܛܝܠܐ ܣܓ̈ܝܐܐ܂
01:19 ܘܐܚܕܘ ܡܕܝܢ̈ܬܐ ܥܫܝܢ̈ܬܐ ܕܡܨܪܝܢ ܘܢܣܒܘ ܒܙܬܐ ܕܐܪܥܐ ܕܡܨܪܝܢ܂
01:20 ܘܗܦܟ ܐܢܛܝܟܘܣ ܡܢ ܒܬܪ ܕܡܚܗ ܠܡܨܪܝܢ ܒܫܢܬ ܡܐܐ ܘܐܪܒܥܝܢ ܘܬܠܬ ܘܣܠܩ ܐܦ ܥܠ ܐܝܣܪܝܠ ܘܐܬܐ ܠܐܘܪܫܠܡ ܒܚܝܠܐ ܥܫܝܢܐ܂
01:21 ܘܥܠ ܠܒܝܬ ܡܩܕܫܐ ܒܫܘܒܗܪܐ ܘܢܣܒ ܠܡܕܒܚܐ ܕܕܗܒܐ ܘܠܡܢܪܬܐ ܕܢܘܗܪܐ ܘܠܟܠܗܘܢ ܡܐ̈ܢܝ ܬܘܩܢܗ܂
01:22 ܘܠܦܬܘܪܐ ܕܠܚܡ ܐ̈ܦܐ ܘܠܢܘܩ̈ܝܐ ܘܠܦܝ̈ܠܣܐ ܘܠܡ̈ܐܢܝ ܕܒ̈ܚܐ ܘܩܘܪ̈ܒܢܐ ܕܕܗܒܐ ܘܠܐ̈ܦܝ ܬܪܥܐ ܘܠܟ̈ܠܝܠܐ ܘܠܟܠܗ ܨܒܬܐ/ܨܘܪܬܐ#1#/ ܕܕܗܒܐ ܕܒܐ̈ܦܝ ܗܝܟܠܐ ܘܩܠܦ ܟܠܗ ܥܒܕܐ܂
01:23 ܘܢܣܒ ܕܗܒܐ ܘܣܐܡܐ ܘܠܟܠܗܘܢ ܡܐ̈ܢܐ ܕܪܓܬܐ ܘܢܣܒ ܣܝ̈ܡܬܐ ܡܛܫ̈ܝܬܐ ܐܝܠܝܢ ܕܐܫܟܚ܂
01:24 ܘܢܣܒ ܟܠܡܕܡ ܐܢܛܝܟܘܣ ܘܐܙܠ ܠܐܪܥܗ ܘܥܒܕ ܩܛܠܐ ܪܒܐ ܘܡܠܠ ܒܫܒܗܪܢܘܬܐ ܪܒܬܐ܂
01:25 ܘܗܘܐ ܐܒܠܐ ܪܒܐ ܒܐܝܣܪܝܠ ܒܟܠ ܒܝܬ ܡܥܡܪܗܘܢ܂
01:26 ܘܐܬܬܢܚܘ ܪ̈ܫܢܐ ܘܣ̈ܒܐ ܘܥܠܝܡ̈ܐ ܘܒܬܘ̈ܠܬܐ ܐܫܬܦܠ ܘܐܫܬܚܠܦ ܫܘܦܪܗܝܢ ܕܢܫ̈ܐ܂
01:27 ܘܟܠ ܚܬܢܐ ܢܣܒ ܥܠܘܗܝ ܐܒܠܐ ܘܕܝܬܒܐ ܒܓܘ ܓܢܘܢܐ ܐܬܐܒܠܬ܂
01:28 ܘܐܬܬܙܝܥܬ ܐܪܥܐ ܥܠ ܥܡܘܪ̈ܝܗ ܘܟܠܗ ܒܝܬ ܝܥܩܘܒ ܠܒܫܘ ܒܗܬܬܐ܂
01:29 ܘܡܢ ܒܬܪ ܬܪ̈ܬܝܢ ܫ̈ܢܝܢ ܫܕܪ ܐܢܛܝܟܘܣ ܡܠܟܐ ܪܫܐ ܕܬܒܥܬܐ ܕܡܕܐܬܐ ܒܐܪܥܐ ܕܝܗܘܕ ܘܐܬܐ ܠܐܘܪܫܠܡ ܒܚܝܠܐ ܥܫܝܢܐ ܘܪܒܐ܂
01:30 ܘܡܠܠ ܡ̈ܠܐ ܕܫܠܡܐ ܒܢܟܠܐ ܘܗܝܡܢܘܗܝ ܘܢܦܠ ܥܠ ܡܕܝܢܬܐ ܡܢ ܫܠܝܐ ܘܡܚܗ ܡܚܘܬܐ ܪܒܬܐ ܘܐܘܒܕ ܥܡܐ ܣܓܝܐܐ ܡܢ ܐܝܣܪܐܝܠ܂
01:31 ܘܢܣܒ ܒܙܬܗ ܕܡܕܝܢܬܐ ܘܐܘܩܕܗ ܒܢܘܪܐ ܘܣܚܦ ܒ̈ܬܝܗ ܘܠܫܘܪܗ ܟܕ ܚܕܪ܂
01:32 ܘܫܒܐ ܢܫ̈ܝܗܘܢ ܘܒܢܝܗܘܢ ܘܒܥܝܪܗܘܢ ܘܝܪܬܘ ܒܗܘܢ ܝܘܪܬܢܐ܂
01:33 ܘܒܢܘ ܠܡܕܝܢܬܗ ܕܕܘܝܕ ܒܫܘܪܐ ܪܒܐ ܘܚܣܝܢܐ ܘܒܡ̈ܓܕܠܐ ܥܫܝ̈ܢܐ ܘܗܘܬ ܠܗ ܠܡܪܕܐ܂
01:34 ܘܐܘܬܒܘ ܒܗ ܥܡܐ ܚܛܝܐ ܐܢܫܐ ܥܒ̈ܕܝ ܥܘܠܐ ܘܐܬܥܫܢܘ ܒܗ܂
01:35 ܘܣܡܘ ܒܗ ܙܝܢܐ ܘܪ̈ܘܡܚܐ ܘܟܢܫܘ ܟܠܗ ܒܙܬܐ ܕܐܘܪܫܠܡ ܘܣܡܘ ܬܡܢ܂
01:36 ܘܗܘܬ ܠܦܚܐ ܪܒܐ ܘܗܘܬ ܠܥܘܘܟܐ ܠܒܝܬ ܡܩܕܫܐ ܘܠܬܘܩܠܬܐ ܘܠܡܟܫܘ̈ܠܐ ܒܝܫܐ ܠܐܝܣܪ̈ܝܠ ܒܟܠܙܒܢ܂
01:37 ܘܐܫܕܘ ܕܡܐ ܙܟܝܐ ܚܕܪ̈ܝ ܒܝܬ ܡܩܕܫܐ ܘܛܡܐܘܗܝ ܠܒܝܬ ܡܩܕܫܐ܂
01:38 ܘܥܪܩܘ ܡܛܠܬܗܘܢ ܝܬܒ̈ܝܗ ܕܐܘܪܫܠܡ ܘܗܘܬ ܒܝܬ ܡܥܡܪܐ ܠܢܘܟܪ̈ܝܐ ܘܗܘܬ ܢܘܟܪܝܬܐ ܠܝ̈ܠܕܝܗ ܘܒܢ̈ܝܗ ܫܒܩܘܗ܂
01:39 ܘܒܝܬ ܡܩܕܫܗ ܚܪܒ ܐܝܟ ܡܕܒܪܐ ܥܕܥ̈ܕܝܗ ܐܬܗܦܟܘ ܠܐܒܠܐ ܘܫܒ̈ܝܗ ܠܚܣܕܐ ܘܐܝܩܪܗ ܠܨܥܪܐ܂
01:40 ܐܝܟ ܣܘܓܐܐ ܕܬܫܒܘܚܬܗ ܗܟܢܐ ܣܓܝ ܨܥܪܗ ܘܪܘܡܪܡܗ ܐܬܗܦܟ ܠܡܘܟܟܐ܂
01:41 ܘܟܬܒ ܐܢܛܝܟܘܣ ܡܠܟܐ ܠܟܠܗ ܡܠܟܘܬܗ ܕܢܗܘܘܢ ܟܠܗܘܢ ܥܡܐ ܚܕ܂
01:42 ܘܢܫܒܘܩ ܟܠ ܐܢܫ ܢܡܘܣܗ ܘܩܒܠܘ ܟܠܗܘܢ ܥܡ̈ܡܐ ܕܢܥܒܕܘܢ ܐܝܟ ܡܠܬܗ ܕܡܠܟܐ܂
01:43 ܘܣܓ̈ܝܐܐ ܡܢ ܐܝܣܪܝܠ ܐܨܛܒܝܘ ܒܦܘܠܚܢܗ ܘܕܒܚܘ ܠܦܬܟܪ̈ܘܗܝ ܘܐܚܠܘ ܫܒܬܐ܂
01:44 ܘܫܕܪ ܡܠܟܐ ܐܢܛܝܟܘܣ ܒܝܕ ܫ̈ܠܝܚܘܗܝ ܠܐܪܫܠܡ ܘܠܩܘܪ̈ܝܐ ܕܝܗܘܕܐ ܕܢܐܙܠܘܢ ܒܬܪ ܢܡܘ̈ܣܐ ܢܘܟܪ̈ܝܐ ܕܐܪܥܐ܂
01:45 ܘܕܢܬܟܠܘܢ ܕܒ̈ܚܐ ܘܢܘ̈ܩܝܐ ܘܩܘܪ̈ܒܢܐ ܡܢ ܒܝܬ ܡܩܕܫܐ ܘܠܡܚܠܘ ܫܒ̈ܐ ܘܥ̈ܕܥܕܐ܂
01:46 ܘܠܡܛܡܐ ܠܒܝܬ ܡܩܕܫܐ ܘܩܘܕܫܐ܂
01:47 ܘܕܢܒܢܘܢ ܥܠܘ̈ܬܐ ܘܒܝܬ ܦܬܟ‍{‍ܝ‍}‍ܪ̈ܐ ܘܠܡܩܡܘ ܦܬܟܪ̈ܐ ܘܠܡܢܟܣܘ ܚܙܝܪ̈ܐ ܘܒܥܝܪܐ ܛܡܐܬܐ܂
01:48 ܘܠܡܫܒܩ ܒܢܝܗܘܢ ܟܕ ܠܐ ܓܙܝܪ̈ܝܢ ܘܠܡܣܝܒܘ ܢܦܫ̈ܬܗܘܢ ܒܟܠ ܛܡܐܘܬܐ ܘܠܡܚܠܘ ܐܢܘܢ܂
01:49 ܐܝܟ ܕܢܛܥܘܢ ܢܡܘܣܐ ܘܢܫܚܠܦܘܢ ܟܠܗܘܢ ܦܘܩ̈ܕܢܐ܂
01:50 ܘܟܠ ܡܢܘ ܕܠܐ ܢܥܒܕ ܐܝܟ ܡܠܬܗ ܕܡܠܟܐ ܢܡܘܬ܂
01:51 ܘܐܝܟ ܟܠܗܘܢ ܗܠܝܢ ܦܬܓܡ̈ܐ ܟܬܒ ܠܟܠܗ ܡܠܟܘܬܗ ܘܐܩܝܡ ܩܝܘ̈ܡܐ ܥܠ ܟܠܗ ܥܡܐ ܘܦܩܕ ܠܡܕܝܢ̈ܬܐ ܕܝܗܘ̈ܕܝܐ ܠܡܕܒܚܘ ܒܟܠ ܡܕܝܢܐ ܘܡܕܝܢܐ܂
01:52 ܘܐܬܟܢܫܘ ܠܘܬܗܘܢ ܣܓ̈ܝܐܐ ܡܢ ܥܡܐ ܟܠ ܡܢܘ ܕܫܒܩܘ ܢܡܘܣܐ ܘܥܒܕܘ ܒܝܫ̈ܬܐ ܣܓܝܐ̈ܬܐ ܒܐܪܥܐ܂
01:53 ܘܣܡܘܗܝ ܠܐܝܣܪܐܝܠ ܒܡܛܫܝ̈ܬܐ ܒܟܠ ܒܝܬ ܥܪ̈ܘܩܝܗܘܢ܂
01:54 ܘܒܚܡܫܥܣܪܐ ܒܝܪܚܐ ܒܟܢܘܢ ܩܕܝܡ ܒܫܢܬ ܡܐܐ ܘܐܪܒܥܝܢ ܘܚܡܫ ܒܢܘ ܛܡܐܘܬܐ ܕܚܘܪܒܐ ܥܠ ܡܕܒܚܐ ܒܡܕܝ̈ܢܬܐ ܕܝܗܘܕܐ ܘܒܢܘ ܚܕܪ̈ܘܗܝ ܥ̈ܠܘܬܐ܂
01:55 ܘܥܠ ܬܪ̈ܥܐ ܕܒ̈ܬܐ ܘܒܦܠܛܘ̈ܬܐ ܡܕܒܚܝܢ ܗܘܘ܂
01:56 ܘܟܬ̈ܒܐ ܕܢܡܘܣܐ ܕܐܫܟܚܘ ܣܕܩܘ ܘܐܘܩܕܘ ܐܢܘܢ ܒܢܘܪܐ܂
01:57 ܘܟܠ ܐܝܟܐ ܕܡܫܬܟܚ ܗܘܐ ܟܬܒܐ ܕܢܡܘܣܐ ܐܘ ܡܢܘ ܕܡܨܛܒܐ ܒܗ ܒܢܡܘܣܐ ܗܢܐ ܗܘܐ ܓܙܪ ܕܝܢܗ ܕܡܠܟܐ ܕܢܡܘܬ܂
01:58 ܘܗܟܢܐ ܒܥܘܫܢܐ ܐܠܨܝܢ ܗܘܘ ܠܐܝܣܪܝܠ ܠܟܠܗܘܢ ܐܝܠܝܢ ܕܡܫܬܟܚܝܢ ܗܘܘ ܒܡܕܝܢ̈ܬܐ ܒܟܠ ܝܪܚ ܒܝܪܚ܂
01:59 ܘܒܚܡܫܐ ܘܥܣܪܝܢ ܒܝܪܚܐ ܟܕ ܡܕܒܚܝܢ ܗܘܘ ܥܠ ܥܠܬܐ ܗܝ ܕܐܝܬ ܗܘܐ ܥܠ ܡܕܒܚܐ܂
01:60 ܡܝܬܝܢ ܗܘܘ ܢܫ̈ܐ ܐܝܠܝܢ ܕܓܙܪ ܒܢ̈ܝܗܝܢ ܘܡܩܛܠܝܢ ܗܘܘ ܠܗܝܢ ܐܝܟ ܦܘܩܕܢܐ܂
01:61 ܟܕ ܬܠܝܢ ܗܘܘ ܒܢܝܗܝܢ ܒܨܘܪ̈ܝܗܝܢ ܘܒܙܘ ܒܬ̈ܝܗܝܢ ܘܠܐܝܠܝܢ ܕܓܙܪܘ ܐܢܘܢ ܩܛܠܘ ܐܢܘܢ܂
01:62 ܘܣܓ̈ܝܐܐ ܡܢ ܐܝܣܪܝܠ ܐܬܚܝܠܘ ܘܐܬܥܫܢܘ ܕܠܐ ܢܐܟܠܘܢ ܕܡܣܝܒ܂
01:63 ܘܓܒܘ ܠܗܘܢ ܕܢܡܘܬܘܢ ܘܠܐ ܕܢܣܬܝܒܘܢ ܒܡܐ̈ܟܠܬܐ ܐܘ ܕܢܫܪܘܢ ܕܝܬܩܐ ܩܕܝܫܬܐ ܘܡܝܬܘ܂
01:64 ܘܗܘܐ ܪܘܓܙܐ ܪܒܐ ܒܐܝܣܪܐܝܠ܂