The Comprehensive Aramaic Lexicon

05:01	ܘܗܘܐ ܕܟܕ ܫܡܥܘ ܥܡ̈ܡܐ ܕܒܚܕܪ̈ܝܗܘܢ ܕܐܬܒܢܝ ܡܕܒܚܐ ܘܐܬܚܕܬ ܒܝܬ ܡܩܕܫܐ ܐܝܟ ܕܡܢ ܩܕܝܡ ܐܬܚܡܬܘ ܣܓܝ܂
05:02	ܘܐܬܚܫܒܘ ܕܢܣܩܘܢ ܢܥܛܘܢܝܗܝ ܠܙܪܥܗ ܕܝܥܩܘܒ ܗܢܘܢ ܕܥܡܪܝܢ ܒܝܢܬܗܘܢ ܘܫܪܝܘ ܡܩܛܠܝܢ ܘܚܪܒܝܢ ܒܥܡܐ܂
05:03	ܘܡܩܪܒ ܗܘܐ ܝܗܘܕܐ ܥܡ ܒܢ̈ܝ ܥܣܘ ܒܐܕܘܡ ܒܥܩܪܒܬ ܡܛܠ ܕܝܬܒܝܢ ܗܘܘ ܥܠ ܐܝܣܪܝܠ ܘܡܚܐ ܐܢܘܢ ܡܚܘܬܐ ܪܒܬܐ ܘܒܕܪ ܐܢܘܢ ܘܢܣܒ ܒܙܬܗܘܢ܂
05:04	ܘܐܬܕܟܪ ܒܝ̈ܫܬܐ ܕܒ̈ܢܝ ܒܝܐܢ ܗܢܘܢ ܕܐܝܬܝܗܘܢ ܗܘܘ ܠܥܡܐ ܠܦܚܐ ܘܠܡܟܫܘܠܐ ܕܟܡܢܝܢ ܗܘܘ ܠܗܘܢ ܒܝܬ ܐܘܪ̈ܚܬܐ܂
05:05	ܘܚܒܫ ܐܢܘܢ ܒܡ̈ܓܕܠܐ ܘܐܪܡܝ ܥܠܝܗܘܢ ܘܐܚܪܡ ܐܢܘܢ ܘܐܘܩܕ ܡܓ̈ܕܠܝܗ ܒܢܘܪܐ ܥܡ ܟܠ ܡܕܡ ܕܐܝܬ ܒܗܘܢ܂
05:06	ܘܥܒܪ ܝܗܘܕܐ ܥܠ ܒ̈ܢܝ ܥܡܘܢ ܘܐܫܟܚ ܥܡܐ ܥܫܝܢܐ ܘܐܝܕܐ ܬܩܝܦܬܐ ܘܛܝܡܬܐܘܣ ܗܘܐ ܡܕܒܪܢܗܘܢ܂
05:07	ܘܐܩܪܒ ܥܡܗܘܢ ܩܪ̈ܒܐ ܪ̈ܘܪܒܐ ܘܐܬܬܒܪܘ ܩܕܡ ܐ̈ܦܘܗܝ ܘܡܚܐ ܐܢܘܢ܂
05:08	ܘܟܒܫܗ ܠܝܥܙܝܪ ܘܠܒ̈ܢܬܗ ܘܗܦܟ ܝܗܘܕܐ ܠܐܕܘܡ܂
05:09	ܘܐܬܟܢܫܘ ܥܡ̈ܡܐ ܕܒܓܠܥܕ ܥܠ ܐܝܣܪܐܝܠ ܗܢܘܢ ܕܐܝܬܝܗܘܢ ܗܘܘ ܒܬܚܘ̈ܡܝܗܘܢ ܐܝܟ ܕܢܥܛܘܢ ܐܢܘܢ ܘܥܪܩܘ ܠܪܡܬܐ ܚܣܢܐ܂
05:10	ܘܫܕܪܘ ܐܓܪ̈ܬܐ ܠܘܬ ܝܗܘܕܐ ܘܐܚ̈ܘܗܝ ܘܐܡܪܝܢ ܠܗ ܐܬܟܢܫܘ ܥܠܝܢ ܥܡ̈ܡܐ ܕܚܕܪ̈ܝܢ ܐܝܟ ܕܢܥܛܘܢܢ܂
05:11	ܘܗܐ ܡܬܥܬܕܝܢ ܕܢܐܬܘܢ ܘܢܟܒܫܘܢ ܚܣܢܐ ܗܢܐ ܕܡܪܝܕܝܢ ܚܢܢ ܒܗ ܘܛܡܬܐܘܣ ܗܘܝܘ ܡܕܒܪܢܗܘܢ܂
05:12	ܗܫܐ ܕܝܢ ܬܐ ܘܦܪܘܩܝܢ ܡܢ ܐܝ̈ܕܝܗܘܢ ܡܛܠ ܕܢܦܠܘ ܡܢܢ ܥܡܐ ܣܓܝܐܐ܂
05:13	ܘܟܠܗܘܢ ܐ̈ܚܝܢ ܕܐܝܬܝܗܘܢ ܗܘܘ ܒܛܘܒܝܢ ܡܝܬܘ ܘܫܒܘ ܢܫ̈ܝܗܘܢ ܘܒܢ̈ܝܗܘܢ ܘܟܠܗ ܐܝܩܪܬܗܘܢ ܘܐܒܕܘ ܬܡܢ ܐܝܟ ܐܠܦ ܐܢܫܝܢ܂
05:14	ܘܥܕ ܗܠܝܢ ܐܓܪ̈ܬܐ ܡܬܩܪܝܢ ܗܘ̈ܝ ܘܗܐ ܡܠܐ̈ܟܐ ܐܚܪ̈ܢܐ ܐܬܘ ܡܢ ܓܠܝܠܐ ܟܕ ܡܣܕܩܝܢ ܢܚܬ̈ܝܗܘܢ ܘܡܣܒܪܝܢ ܐܝܟ ܗܠܝܢ ܡ̈ܠܐ܂
05:15	ܘܐܡܪܝܢ ܕܐܬܟܢܫܘ ܥܠܝܢ ܡܢ ܦܛܘܠܡܐܝܣ ܘܨܘܪ ܘܨܝܕܢ ܘܟܠܗ ܓܠܝܠܐ ܥܡ̈ܡܐ ܢܘܟܪ̈ܝܐ ܐܝܟ ܕܢܥܛܘܢܢ ܘܢܓܡܪܘܢܢ܂
05:16	ܘܟܕ ܫܡܥ ܕܝܢ ܝܗܘܕܐ ܘܟܠܗ ܥܡܐ ܠܗܠܝܢ ܦܬܓܡ̈ܐ ܐܬܟܢܫܘ ܟܢܘܫܬܐ ܪܒܬܐ ܕܢܬܡܠܟܘܢ ܕܡܢܐ ܢܥܒܕܘܢ ܠܐܚ̈ܝܗܘܢ ܐܝܠܝܢ ܕܐܝܬܝܗܘܢ ܗܘܘ ܒܐܘܠܨܢܐ ܕܡܬܐܠܨܝܢ ܗܘܘ ܡܢܗܘܢ܂
05:17	ܘܐܡܪ ܝܗܘܕܐ ܠܫܡܥܘܢ ܐܚܘܗܝ ܟܢܫ ܠܟ ܓܒܪ̈ܐ ܘܙܠ ܦܪܘܩ ܠܐ̈ܚܝܟ ܗܢܘܢ ܕܐܝܬ ܒܓܠܝܠܐ ܐܢܐ ܕܝܢ ܘܝܘܢܬܢ ܐܚܝ ܢܐܙܠ ܠܓܠܥܕ܂
05:18	ܘܫܒܩ ܠܝܘܣܦ ܒܪ ܙܟܪܝܐ ܘܠܥܙܪܝܐ ܡܕܒܪ̈ܢܐ ܕܥܡܐ ܥܡ ܫܪܟܗ ܕܚܝܠܐ ܕܒܝܗܘܕ ܕܢܗܘܘܢ ܢܛܪܝܢ܂
05:19	ܘܦܩܕ ܐܢܘܢ ܘܐܡܪ ܠܗܘܢ ܚܙܘ ܐܝܨܦܘ ܕܗܢܐ ܥܡܐ ܘܠܐ ܬܡܚܘܢ ܩܪܒܐ ܥܡ ܥܡ̈ܡܐ ܥܕܡܐ ܕܢܗܦܘܟ ܘܢܐܬܐ܂
05:20	ܘܐܬܦܠܓܘ ܥܡ ܫܡܥܘܢ ܬܠܬܐ ܐ̈ܠܦܝܢ ܓܒܪ̈ܝܢ ܕܢܐܙܠܘܢ ܥܡܗ ܠܓܠܝܠܐ ܘܥܡ ܝܗܘܕܐ ܬܡܢܝܐ ܐ̈ܠܦܝܢ ܠܓܠܥܕ܂
05:21	ܘܐܙܠ ܫܡܥܘܢ ܠܓܠܝܠܐ ܘܐܩܪܒ ܩܪ̈ܒܐ ܪ̈ܘܪܒܐ ܥܡ ܥܡ̈ܡܐ ܘܐܬܬܒܪܘ ܥܡ̈ܡܐ ܡܢ ܩܕܡ ܐ̈ܦܘܗܝ܂
05:22	ܘܪܕܦ ܒܬܪܗܘܢ ܥܕܡܐ ܠܦܛܘܠܡܐܝܣ ܘܢܦܠܘ ܡܢ ܥܡ̈ܡܐ ܐܝܟ ܬܠܬܐ ܐ̈ܠܦܝܢ ܓܒܪ̈ܝܢ ܘܢܣܒܘ ܒܙܬܗܘܢ܂
05:23	ܘܕܒܪ ܫܡܥܘܢ ܠܐܝܠܝܢ ܕܒܓܠܝܠܐ ܘܕܒܐܪܕܒܛ ܥܡ ܢܫ̈ܝܗܘܢ ܘܒܢ̈ܝܗܘܢ ܘܟܘܠܗ ܐܝܩܪܬܗܘܢ ܘܐܝܬܝ ܐܢܘܢ ܠܝܗܘܕ ܒܒܘܣܡܐ ܪܒܐ܂
05:24	ܘܝܗܘܕܐ ܡܩܒܝ ܘܝܘܢܬܢ ܐܚܘܗܝ ܥܒܪܘ ܝܘܪܕܢܢ ܘܐܙܠܘ ܡܪܕܐ ܬܠܬܐ ܝܘ̈ܡܝܢ ܒܡܕܒܪܐ܂
05:25	ܘܐܪܥܘ ܐܢܘܢ ܢܒ̈ܛܝܐ ܘܩܒܠܘ ܐܢܘܢ ܒܫܠܡܐ ܘܐܫܬܥܝܘ ܠܗܘܢ ܟܠܡܕܡ ܕܓܕܫ ܠܐ̈ܚܝܗܘܢ ܒܓܠܥܕ܂
05:26	ܘܕܣ̈ܓܝܐܐ ܡܢܗܘܢ ܐܚܝܕܝܢ ܒܒܘܨܪܐ ܘܒܒܘܣܪ̈ܝܐ ܘܒܐܠܝܡ ܘܒܟܣܦܘܪ ܘܒܡܩܪ ܘܒܩܪܢܐ ܗܠܝܢ ܟܠܗܝܢ ܡܕܝܢ̈ܬܐ ܕܪ̈ܘܪܒܢ ܘܥܫܝܢܢ܂
05:27	ܘܒܫܪܟܐ ܕܡܕܝܢ̈ܬܐ ܕܒܓܠܥܕ ܐܚܝܕܝܢ ܘܠܡܚܪ ܡܛܝܒܝܢ ܕܢܪܡܘܢ ܥܠ ܚܣ̈ܢܐ ܘܢܣܚܦܘܢ ܐܢܘܢ ܘܢܘܒܕܘܢ ܠܟܠܗܘܢ ܒܝܘܡܐ ܚܕ܂
05:28	ܘܗܦܟ ܝܗܘܕܐ ܘܟܠܗ ܡܫܪܝܬܗ ܒܐܘܪܚܐ ܕܡܕܒܪܐ ܠܒܘܨܪ̈ܐ ܘܡܢ ܫܠܝܐ ܢܦܠ ܥܠ ܡܕܝܢܬܐ ܘܩܛܠ ܒܗ ܟܠ ܕܟܪܐ ܒܦܘܡܐ ܕܚܪܒܐ ܘܢܣܒ ܟܠܗ ܒܙܬܗܘܢ ܘܐܘܩܕܗ ܒܢܘܪܐ܂
05:29	ܘܫܩܠ ܝܗܘܕܐ ܡܢ ܬܡܢ ܒܠܠܝܐ ܘܐܙܠܘ ܥܕܡܐ ܠܚܣܢܐ܂
05:30	ܘܗܘܐ ܠܨܦܪܗ ܕܝܘܡܐ ܐܪܝܡܘ ܥܝ̈ܢܝܗܘܢ ܘܚܙܘ ܘܗܐ ܥܡܐ ܣܓܝܐܐ ܕܠܝܬ ܠܗ ܡܢܝܢܐ ܕܫܩܝܠܝܢ ܣܒ̈ܠܬܐ ܘܚܒ̈ܠܐ ܘܡܩܪܒܝܢ ܗܘܘ ܕܢܟܒܫܘܢܝܗܝ ܠܚܣܢܐ܂

05:31	ܘܚܙܐ ܝܗܘܕܐ ܕܥܫܝܢ ܩܪܒܐ ܘܓܥܬܗ ܕܡܕܝܢܬܐ ܣܠܩܬ ܥܕܡܐ ܠܫܡܝܐ ܘܩܠܐ ܕܩܪ̈ܢܬܐ ܘܪܗܒܐ ܣܓܝܐܐ܂

05:32	ܘܐܡܪ ܝܗܘܕܐ ܠܓܒܪ̈ܐ ܕܚܝܠܐ ܐܩܪܒܘ ܝܘܡܢܐ ܥܠ ܐ̈ܦܝ ܐܚ̈ܝܟܘܢ܂
05:33	ܘܢܦܩ ܝܗܘܕܐ ܒܬܠܬܐ ܪ̈ܫܝܢ ܡܢ ܒܣܬܪܗܘܢ ܘܩܪܘ ܒܩܪ̈ܢܬܐ ܘܓܥܘ ܒܨܠܘܬܐ܂
05:34	ܘܝܕܥܬ ܡܫܪܝܬܗ ܕܛܝܡܬܐܘܣ ܕܡܩܒܝ ܗܘ ܘܥܪܩܘ ܡܢ ܩܕܡܘܗܝ ܘܡܚܐ ܐܢܘܢ ܡܚܘܬܐ ܪܒܬܐ ܘܢܦܠܘ ܡܢܗܘܢ ܒܗܘ ܝܘܡܐ ܐܝܟ ܬܡܢܝܐ ܐ̈ܠܦܝܢ ܓܒܪ̈ܝܢ܂
05:35	ܘܐܪܟܢ ܝܗܘܕܐ ܠܐܠܝܡ ܘܥܒܕ ܥܡܗ ܩܪܒܐ ܘܟܠ ܕܟܪܐ ܕܒܗ ܩܛܠܘ ܘܢܣܒܘ ܒܙܬܗ ܘܐܘܩܕܗ ܒܢܘܪܐ܂
05:36	ܘܡܢ ܬܡܢ ܫܩܠ ܝܗܘܕܐ ܘܟܒܫܗ ܠܟܣܦܘܪ ܘܠܡܩܪ ܘܠܒܘܣܪ̈ܝܐ ܘܠܫܪܟܐ ܕܡܕܝܢ̈ܬܐ ܕܒܓܠܥܕ܂
05:37	ܘܡܢ ܒܬܪ ܕܝܢ ܗܠܝܢ ܟܢܫ ܛܡܬܐܘܣ ܡܫܪܝܬܐ ܐܚܪܬܐ ܘܫܪܐ ܥܠ ܓܢܒ ܪܦܝܢ ܡܢ ܣܛܪܗ ܕܢܗܪܐ܂
05:38	ܘܫܕܪ ܝܗܘܕܐ ܕܢܓܫܘܢ ܠܡܫܪܝܬܗ ܘܐܬܘ ܘܐܡܪܘ ܠܗ ܐܬܟܢܫܘ ܥܠܝܟ ܟܠܗܘܢ ܥܡ̈ܡܐ ܕܚܕܪ̈ܝܢ ܚܝܠܐ ܪܒܐ ܘܥܫܝܢܐ܂
05:39	ܘܐܦ ܥܪ̈ܒܝܐ ܐܓܝܪ̈ܝܢ ܠܗܘܢ ܠܥܘܕܪܢܐ ܘܫܪܝܢ ܥܠ ܣܛܪܗ ܕܢܗܪܐ ܘܡܥܬܕܝܢ ܕܢܐܬܘܢ ܥܠܝܟ ܠܩܪܒܐ ܘܐܙܠ ܝܗܘܕܐ ܠܐܘܪܥܗܘܢ܂
05:40	ܘܐܡܪ ܛܝܡܬܐܘܣ ܠܪ̈ܒܝ ܚܝܠܗ ܟܕ ܢܬܩܪܒ ܝܗܘܕܐ ܘܡܫܪܝܬܗ ܥܠ ܓܢܒ ܣܦܬܗ ܕܢܗܪܐ ܐܢܗܘ ܕܢܥܒܪ ܒܩܕܡܐ ܠܘܬܢ ܠܐ ܡܫܟܚܝܢ ܐܢܚܢܢ ܕܢܩܘܡ ܩܕܡܘܗܝ ܡܛܠ ܕܡܛܡܨܝܘ ܢܬܡܨܐ ܚܝܠܢ܂
05:41	ܐܢ ܕܝܢ ܢܕܚܠ ܘܢܫܪܐ ܡܢ ܗܘ ܣܛܪܗ ܕܢܗܪܐ ܢܥܒܪ ܠܘܬܗ ܘܢܬܡܨܐ ܚܝܠܗ܂
05:42	ܘܟܕ ܡܛܝ ܝܗܘܕܐ ܠܢܗܪܐ ܐܩܝܡ ܠܣܦܪ̈ܘܗܝ ܕܥܡܐ ܥܠ ܢܗܪܐ ܘܦܩܕ ܐܢܘܢ ܘܐܡܪ ܠܗܘܢ ܠܐ ܬܫܒܩܘܢ ܐܦ ܠܐ ܠܐܢܫ ܕܢܫܪܐ ܐܠܐ ܢܐܬܘܢ ܟܠܗܘܢ ܠܩܪܒܐ܂
05:43	ܘܥܒܪ ܗܘ ܩܕܡܝ ܥܠܝܗܘܢ ܘܟܠܗ ܥܡܐ ܡܢ ܒܬܪܗ ܘܐܬܬܒܪܘ ܡܢ ܩܕܡܘܗܝ ܥܡ̈ܡܐ ܘܫܕܘ ܙܝܢܗܘܢ ܘܥܪܩܘ ܠܒܝܬ ܦܬܟܪ̈ܐ ܕܒܩܪܢܐ܂
05:44	ܘܟܒܫܘܗ ܠܡܕܝܢܬܐ ܕܒܝܬ ܝܗܘܕܐ ܘܠܒܝܬ ܦܬܟܪ̈ܐ ܐܘܩܕܘ ܒܢܘܪܐ ܥܡ ܟܠܡܕܡ ܕܐܝܬ ܒܗ ܘܐܙܕܟܝܬ ܩܪܢܐ ܘܠܐ ܬܘܒ ܡܫܟܚܐ ܗܘܬ ܠܡܩܡ ܩܕܡ ܝܗܘܕܐ܂
05:45	ܘܟܢܫ ܝܗܘܕܐ ܠܟܠܗ ܐܝܣܪܝܠ ܕܒܓܠܥܕ ܡܢ ܙܥܘܪܐ ܘܥܕܡܐ ܠܪܒܐ ܘܠܢܫ̈ܝܗܘܢ ܘܠܒܢ̈ܝܗܘܢ ܘܠܟܠܗ ܐܝܩܪܬܗܘܢ ܡܫܪܝܬܐ ܪܒܬܐ ܘܥܫܝܢܬܐ ܠܡܐܬܐ ܠܐܪܥܐ ܕܝܗܘܕ܂
05:46	ܘܐܬܐ ܥܕܡܐ ܠܥܘܦܪܐ ܘܗܝ ܡܕܝܢܬܐ ܗܝ ܪܒܬܐ ܕܝܬܒܐ ܥܠ ܐܘܪܚܐ ܘܥܫܝܢܐ ܣܓܝ ܘܠܝܬ ܠܡܣܛܐ ܡܢܗ ܠܐ ܠܝܡܝܢܐ ܐܦܠܐ ܠܣܡܠܐ ܐܠܐ ܐܢ ܠܡܥܒܪ ܒܓܘܗ܂
05:47	ܘܐܚܕܘ ܒܐ̈ܦܝܗܘܢ ܥܡܘܪ̈ܝܗ ܕܩܪܝܬܐ ܘܣܟܪܘ ܬܪ̈ܥܐ ܒܟܐ̈ܦܐ܂
05:48	ܘܫܕܪ ܠܘܬܗܘܢ ܝܗܘܕܐ ܒܡ̈ܠܐ ܕܫܠܡܐ ܘܐܡܪ ܠܗܘܢ ܐܥܒܪ ܒܐܪܥܟܘܢ ܘܐܙܠ ܠܐܪܥܢ ܘܐܢܫ ܠܐ ܢܒܐܫ ܠܟܘܢ ܐܠܐ ܒܠܚܘܕ ܒܪ̈ܓܠܝܢ ܢܥܒܪ ܘܠܐ ܨܒܘ ܕܢܦܬܚܘܢ ܠܗܘܢ܂
05:49	ܘܦܩܕ ܝܗܘܕܐ ܕܢܟܪܙܘܢ ܒܡܫܪܝܬܐ ܕܟܠܢܫ ܢܫܪܐ ܥܠ ܕܘܟܬܗ܂
05:50	ܘܫܪܘ ܐܢܫܐ ܕܚܝܠܐ ܘܐܩܪܒܘ ܥܡ ܡܕܝܢܬܐ ܟܠܗ ܗܘ ܝܘܡܐ ܘܟܘܠܗ ܠܠܝܐ ܘܐܫܬܠܡܬ ܡܕܝܢܬܐ ܒܐܝ̈ܕܘܗܝ܂
05:51	ܘܐܘܒܕ ܡܢܗ ܟܠ ܕܟܪܐ ܒܦܘܡܐ ܕܚܪܒܐ ܘܥܩܪܘܗ ܘܢܣܒܘ ܒܙܬܗ ܘܥܒܪܘ ܒܓܘ ܡܕܝܢܬܐ ܠܥܠ ܡܢ ܩ̈ܛܝܠܐ܂
05:52	ܘܥܒܪܘ ܝܘܪܕܢܢ ܠܦܩܥܬܐ ܪܒܬܐ ܠܘܩܒܠ ܒܝܬ ܝܫܢ܂
05:53	ܘܝܗܘܕܐ ܕܝܢ ܡܟܢܫ ܗܘܐ ܠܐܚܪ̈ܝܐ ܘܡܒܝܐ ܗܘܐ ܠܥܡܐ ܒܟܠܗ ܐܘܪܚܐ ܥܕܡܐ ܕܐܬܘ ܠܐܪܥܐ ܕܝܗܘܕ܂
05:54	ܘܣܠܩܘ ܠܛܘܪܐ ܕܨܗܝܘܢ ܒܒܘܣܡܐ ܘܒܚܕܘܬܐ ܘܩܪܒܘ ܩܘܪ̈ܒܢܐ ܘܝܩ̈ܕܐ ܕܠܐ ܢܦܠ ܡܢܗܘܢ ܐܦܠܐ ܚܕ ܘܗܦܟܘ ܒܫܠܡܐ܂
05:55	ܘܒܗܢܘܢ ܝܘܡ̈ܬܐ ܕܐܝܬܝܗܘܢ ܗܘܘ ܝܗܘܕܐ ܘܝܘܢܬܢ ܐܚܘܗܝ ܒܐܪܥܐ ܕܓܠܥܕ ܘܫܡܥܘܢ ܐܚܘܗܝ ܒܓܠܝܠܐ ܠܘܩܒܠ ܦܛܘܠܡܐܝܣ܂
05:56	ܫܡܥ ܝܘܣܦ ܒܪ ܙܟܪܝܐ ܘܥܙܪܝܐ ܪ̈ܫܐ ܕܚܝ̈ܠܘܬܐ ܠܓܢܒܪܘܬܗ ܘܠܢܨܚ̈ܢܘܗܝ ܘܠܩܪ̈ܒܘܗܝ ܕܝܗܘܕܐ ܘܐܡܪܘ܂
05:57	ܢܥܒܕ ܠܢ ܐܦ ܐܢܚܢܢ ܫܡܐ ܘܢܐܙܠ ܘܢܩܪܒ ܥܡ ܥܡ̈ܡܐ ܕܚܕܪܝܢ܂
05:58	ܘܦܩܕܘ ܠܚܝܠܐ ܕܥܡܗܘܢ ܘܐܙܠܘ ܠܝܡܢܝܢ܂
05:59	ܘܢܦܩ ܓܘܪܓܝܐ ܡܢ ܡܕܝܢܬܐ ܘܓܒܪ̈ܐ ܕܥܡܗ ܠܘܩܒܠܗܘܢ ܠܩܪܒܐ܂
05:60	ܘܐܙܕܟܝܘ ܝܘܣܦ ܘܥܙܪܝܐ ܘܪܕܦܘ ܒܬܪܗܘܢ ܥܕܡܐ ܠܬܚܘܡܐ ܕܐܕܘܡ ܘܢܦܠܘ ܒܗܘ ܝܘܡܐ ܡܢ ܥܡܐ ܕܐܝܣܪܐܝܠ ܐܝܟ ܬܪ̈ܝܢ ܐ̈ܠܦܝܢ ܓܒܪ̈ܝܢ܂
05:61	ܘܗܘܐ ܬܒܪܐ ܪܒܐ ܒܐܝܣܪܝܠ ܥܠ ܕܠܐ ܐܫܬܡܥܘ ܠܝܗܘܕܐ ܘܠܐܚ̈ܘܗܝ ܕܨܒܝܢ ܗܘܘ ܐܦ ܗܢܘܢ ܕܢܥܒܕܘܢ ܠܗܘܢ ܫܡܐ ܘܢܨܚܢܐ܂
05:62	ܗܢܘܢ ܕܝܢ ܠܐ ܐܝܬܝܗܘܢ ܗܘܘ ܡܢ ܙܪܥܐ ܕܗܢܘܢ ܓܒܪ̈ܐ ܕܒܐ̈ܝܕܝܗܘܢ ܥܒܕ ܐܠܗܐ ܦܘܪܩܢܐ ܠܐܝܣܪܝܠ܂
05:63	ܘܝܗܘܕܐ ܕܝܢ ܘܐ̈ܚܘܗܝ ܐܫܬܒܚܘ ܝܬܝܪܐܝܬ ܠܥܝܢ ܟܠܗ ܐܝܣܪܝܠ ܘܒܝܢܬ ܟܠܗܘܢ ܥܡ̈ܡܐ ܘܟܠ ܐܝܟܐ ܕܡܫܬܡܥ ܗܘܐ ܫܡܥܗܘܢ܂
05:64	ܡܬܟܢܫܝܢ ܗܘܘ ܘܐܬܝܢ ܡܫܒܚܝܢ ܠܗܘܢ܂
05:65	ܘܢܦܩ ܝܗܘܕܐ ܘܐܚ̈ܘܗܝ ܘܡܩܪܒܝܢ ܗܘܘ ܥܡ ܒܢ̈ܝ ܥܣܘ ܒܐܪܥܐ ܕܬܝܡܢܐ ܘܡܚܐܘܗ ܠܚܒܪܘܢ ܘܠܒܢ̈ܬܗ ܘܣܚܦܘ ܚ̈ܣܢܝܗ ܘܡܓ̈ܕܠܝܗ ܐܘܩܕܘ ܟܕ ܚܕܪ̈ܝܢ܂
05:66	ܘܫܩܠ ܝܗܘܕܐ ܡܢ ܬܡܢ ܕܢܐܙܠ ܠܐܪܥܐ ܕܦܠܫ̈ܬܝܐ ܘܥܒܪ ܗܘܐ ܒܫܡܪܝܢ܂
05:67	ܘܒܗܘ ܝܘܡܐ ܢܦܠܘ ܟܗ̈ܢܐ ܒܩܪܒܐ ܕܨܒܘ ܕܢܥܒܕܘܢ ܠܗܘܢ ܢܨܚܢܐ ܘܢܦܩܘ ܠܩܪܒܐ ܕܠܐ ܒܡܠܟܐ܂
05:68	ܘܐܪܟܢ ܝܗܘܕܐ ܠܙܘܛܘܣ ܠܐܪܥܐ ܕܦܠܫ̈ܬܝ̈ܐ ܘܣܚܦܘ ܥܠܘ̈ܬܗܘܢ ܘܓ̈ܠܝܦܐ ܕܦܬܟܪ̈ܝܗܘܢ ܐܘܩܕܘ ܒܢܘܪܐ ܘܒܙܘ ܒܙܬܗܝܢ ܕܡܕܝ̈ܢܬܐ ܘܗܦܟ ܠܐܪܥܐ ܕܝܗܘܕ܂