← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62077: P 1Mac

Click on a word for lexical analysis
Click on a red-colored coordinate for comments and/or translations of the line

14:01 ܘܒܫܢܬ ܡܐܐ ܘܫܒܥܝܢ ܘܬܪ̈ܬܝܢ ܟܢܫ ܕܡܛܪܝܘܣ ܠܚܝܠܗ ܘܐܙܠ ܠܡܕܝ ܕܢܟܢܫ ܠܗ ܚܝܠܐ ܘܢܩܪܒ ܥܡ ܛܪܝܦܘܢ܂
14:02 ܘܫܡܥ ܐܪܣܩ ܡܠܟܐ ܕܦܪܣ ܘܕܡܕܝ ܕܐܬܐ ܕܡܛܪܝܘܣ ܠܬܚܘ̈ܡܘܗܝ ܘܫܕܪ ܚܕ ܡܢ ܪ̈ܘܪܒܢܘܗܝ ܕܢܐܚܕܝܘܗܝ ܟܕ ܚܝ܂
14:03 ܘܐܙܠ ܘܡܚܗ ܠܡܫܪܝܬܗ ܕܕܡܛܪܝܘܣ ܘܐܚܕܗ ܘܐܝܬܝܗ ܠܘܬ ܐܪܣܩ ܘܐܪܡܝܗ ܒܝܬ ܐܣܝܪ̈ܐ܂
14:04 ܘܫܠܝܬ ܘܐܬܬܢܝܚܬ ܐܪܥܐ ܟܠܗܘܢ ܝܘ̈ܡܬܗ ܕܫܡܥܘܢ ܘܥܒܕ ܛܒ̈ܬܐ ܠܥܡܗ ܘܫܦܪ ܠܗܘܢ ܫܘܠܛܢܗ ܘܬܫܒܘܚܬܗ ܟܠܗܘܢ ܝܘ̈ܡܬܗ܂
14:05 ܘܥܡ ܟܠܗ ܬܫܒܘܚܬܗ ܫܩܠ ܠܝܘܦܐ ܠܠܡܐܢܐ ܘܥܒܕ ܡܥܠܢܐ ܠܐ̈ܠܦܐ ܕܝܡܐ܂
14:06 ܘܐܦܬܝ ܘܐܘܪܒ ܬܚܘ̈ܡܐ ܕܥܡܗ ܘܐܚܕܗ ܠܟܠܗ ܐܪܥܗܘܢ܂
14:07 ܘܟܢܫ ܫܒܝܬܐ ܣܓܝܐܬܐ ܘܐܫܬܠܛ ܥܠ ܓܙܝܪܐ ܘܥܠ ܒܝܬ ܫܘܪ̈ܐ ܘܥܠ ܒܝܬ ܡܪܕܐ ܘܥܛܐ ܘܐܪܝܡ ܡܢܗܘܢ ܟܘܠܗ ܛܡܐܘܬܐ ܘܠܐ ܐܝܬ ܗܘܐ ܕܩܐܡ ܠܩܘܒܠܗ܂
14:08 ܘܥܡܪܝܢ ܗܘܘ ܘܦܠܚܝܢ ܐܪܥܗܘܢ ܒܫܠܡܐ ܘܐܪܥܐ ܝܗܒܐ ܗܘܬ ܥ̈ܠܠܬܗ ܘܐܝ̈ܠܢܐ ܕܐܪܥܐ ܦܐܪ̈ܝܗܘܢ܂
14:09 ܣܒ̈ܐ ܒܫܘ̈ܩܐ ܝܬܒܝܢ ܗܘܘ ܘܟܠܗܘܢ ܥܠ ܛܒ̈ܬܐ ܡܬܡܠܟܝܢ ܗܘܘ ܘܥ̈ܠܝܡܐ ܐܬܟܣܝܘ ܬܫܒܘܚܬܐ ܘܠܐ ܡܐ̈ܢܐ ܕܩܪܒܐ܂
14:10 ܝܗܒ ܬܘܪܣܝܐ ܠܡܕܝ̈ܢܬܐ ܘܐܥܫܢ ܐܢܝܢ ܒܡܐ̈ܢܝ ܚܣ̈ܢܐ ܥܕܡܐ ܕܐܫܬܡܗ ܫܡܐ ܕܬܫܒܘܚܬܗ ܒܟܠܗܘܢ ܣܘ̈ܦܝܗ ܕܐܪܥܐ܂
14:11 ܘܥܒܕ ܫܠܡܐ ܒܐܪܥܐ ܘܐܬܒܣܡ ܐܝܣܪܝܠ ܒܘܣܡܐ ܪܒܐ܂
14:12 ܘܝܬܒܘ ܐܢܫ ܬܚܝܬ ܓܘ̈ܦܢܘܗܝ ܘܬܚܝܬ ܬܐܢ̈ܘܗܝ ܘܠܐ ܐܝܬ ܗܘܐ ܕܡܕܠܚ ܠܗܘܢ܂
14:13 ܘܐܬܓܡܪܘ ܘܐܬܛܠܩܘ ܡܢܗܘܢ ܒܥ̈ܠܕܒܒܐ ܘܩܪ̈ܒܬܢܐ ܡܢ ܐܪܥܐ ܘܐܦ ܡ̈ܠܟܐ ܐܬܬܒܪܘ ܒܗܢܘܢ ܝܘ̈ܡܬܐ܂
14:14 ܘܫܪܪ ܘܚܝܠ ܠܟܠܗܘܢ ܡܣ̈ܟܢܐ ܕܥܡܗ ܘܥܛܐ ܘܐܪܝܡ ܟܘܠ ܪܘܫܥܐ ܘܥܘܠܐ ܘܒܝܫܬܐ ܘܢܡܘܣܐ ܦܩܕ܂
14:15 ܘܩܘܕܫܐ ܫܒܚ ܘܐܣܓܝ ܡ̈ܐܢܐ ܕܒܝܬ ܡܩܕܫܐ܂
14:16 ܘܫܡܥܘ ܒܢ̈ܝ ܪܗܘܡܐ ܕܡܝܬ ܝܘܢܬܢ ܐܦ ܠܐܣܦܪ̈ܛܝܐ ܐܫܬܡܥ ܘܐܬܬܥܝܩܘ ܥܩܬܐ ܪܒܬܐ܂
14:17 ܟܕ ܕܝܢ ܫܡܥܘ ܕܫܡܥܘܢ ܐܚܘܗܝ ܗܘܐ ܚܠܦܘܗܝ ܪܒ ܟܗ̈ܢܐ ܘܐܚܕ ܐܪܥܐ ܘܡܕܝ̈ܢܬܐ ܘܟܠ ܕܒܗܝܢ܂
14:18 ܟܬܒܘ ܠܗ ܒܦܢܩܝܬܐ ܕܢܚܫܐ ܠܡܚܕܬܘ ܠܘܬܗ ܪܚܡܘܬܐ ܘܥܘܕܪܢܐ ܕܐܩܝܡܘ ܥܡ ܝܗܘܕܐ ܘܥܡ ܝܘܢܬܢ ܐܚ̈ܘܗܝ܂
14:19 ܘܐܬܩܪܝ ܩܕܡ ܟܢܫܐ ܒܐܘܪܫܠܡ܂
14:20 ܘܗܢܐ ܗܘ ܦܚܡܗ ܕܐܓܪܬܐ ܕܫܕܪܘ ܐܣܦܪ̈ܛܝܐ ܪ̈ܫܐ ܕܐܣܦܪ̈ܛܝܐ ܘܡܕܝ̈ܢܬܐ ܠܫܡܥܘܢ ܪܒ ܟܗ̈ܢܐ ܪܒܐ ܘܠܣܒ̈ܐ ܘܠܟܗ̈ܢܐ ܘܠܫܪܟܐ ܕܥܡܐ ܕܝܗ̈ܘܕܝܐ ܐܚ̈ܝܢ ܫܠܡ܂
14:21 ܣܒ̈ܐ ܕܐܫܬܕܪܘ ܠܘܬܢ ܐܘܕܥܘܢ ܥܠ ܫܠܡܐ ܕܐܝܬ ܠܘܬܟܘܢ ܘܥܠ ܐܝܩܪܟܘܢ ܘܥܠ ܬܫܒܘܚܬܟܘܢ ܘܚܕܝܢ ܣܓܝ ܒܡܐܬܝܬܗܘܢ܂
14:22 ܘܟܬܒܢ ܟܠ ܡܕܡ ܕܐܬܐܡܪ ܡܢܗܘܢ ܒܝܬ ܒܘܠܐ ܕܥܡܢ ܗܟܢܐ ܝܘܡܢܝܘܣ ܒܪ ܐܢܛܝܟܘܣ ܘܐܢܛܝܦܛܪܘܣ ܒܪ ܐܝܣܘܢ ܣܒ̈ܐ ܕܝܗ̈ܘܕܝܐ ܐܬܘ ܠܘܬܢ ܕܢܚܕܬܘܢ ܪܚܡܘܬܐ ܕܨܐܕܝܢ܂
14:23 ܘܫܦܪ ܠܥܡܐ ܕܢܩܒܠ ܡܢܗܘܢ ܪܚܡܘܬܐ ܘܩܒܠܘ ܐܢܘܢ ܠܓܒܪ̈ܐ ܒܬܫܒܘܚܬܐ ܘܣܡܘ ܦܚܡܐ ܕܐܓܪ̈ܬܗܘܢ ܒܝܬ ܓܙܐ ܕܟܬ̈ܒܐ ܕܢܗܘܝܢ ܠܥܡܐ ܕܐܣܦܪ̈ܛܝܐ ܠܕܘܟܪܢܐ ܦܚܡܗܝܢ ܕܝܢ ܕܗܠܝܢ ܘܥܢܝܢܗܝܢ ܟܬܒܘ ܠܫܡܥܘܢ ܪܒ ܟܗ̈ܢܐ܂
14:24 ܡܢ ܒܬܪ ܕܝܢ ܗܠܝܢ ܫܕܪ ܫܡܥܘܢ ܠܝܘܡܢܝܘܣ ܠܪܗܘܡܐ ܟܕ ܐܝܬ ܥܠܘܗܝ ܡܓܢܐ ܪܒܬܐ ܕܕܗܒܐ ܕܐܠܦ ܡܢܝܢ ܠܡܩܡܘ ܥܡܗܘܢ ܥܘܕܪܢܐ܂
14:25 ܟܕ ܫܡܥ ܕܝܢ ܥܡܐ ܗܠܝܢ ܡ̈ܠܐ ܐܡܪܘ ܡܢܐ ܛܝܒܘܬܐ ܢܦܪܥܝܘܗܝ ܠܫܡܥܘܢ ܪܒ ܟܗ̈ܢܐ ܘܠܒܢ̈ܘܗܝ ܀܀܀܂
14:26 ܐܬܚܝܠܘ ܓܝܪ ܗܘ ܘܐܚ̈ܘܗܝ ܘܟܠܗ ܒܝܬ ܐܒܘܗܝ ܘܐܩܪܒܘ ܥܡ ܒܥ̈ܠܒܒܘܗܝ ܕܐܝܣܪܝܠ ܘܕܚܩܘ ܐܢܘܢ ܡܢܗܘܢ ܘܐܝܪܬܘ ܐܢܘܢ ܘܐܩܝܡܘ ܠܫܡܥܘܢ ܚܐܪܘܬܐ ܘܟܬܒܘ ܒܦܢܩܝܬܐ ܕܢܚܫܐ ܘܣܡܘ ܥܠ ܐܣܛܘܢܐ ܒܛܘܪܐ ܕܨܗܝܘܢ܂
14:27 ܘܗܢܘ ܦܚܡܗ ܕܟܬܒܐ ܒܬܡܢܥܣܪܐ ܒܐܝܠܘܠ ܒܫܢܬ ܡܐܐ ܘܫܒܥܝܢ ܘܬܪ̈ܬܝܢ ܗܕܐ ܫܢܬܐ ܕܬܠܬ ܠܫܡܥܘܢ ܪܒ ܟܗ̈ܢܐ ܪܒܐ܂
14:28 ܒܐܝܣܪܝܠ ܒܟܢܘܫܬܐ ܪܒܬܐ ܕܟܗ̈ܢܐ ܘܕܥܡܐ ܘܪ̈ܫܝ ܥܡܐ ܘܕܣ̈ܒܐ ܕܐܪܥܐ ܐܘܕܥܢܟܘܢ܂
14:29 ܡܛܠ ܕܣܓܝ ܙܒܢ̈ܬܐ ܗܘܘ ܩܪ̈ܒܐ ܒܐܪܥܐ ܫܡܥܘܢ ܕܝܢ ܒܪܗ ܕܡܬܝܬܐ ܡܢ ܒܢܘܗܝ ܕܝܘܢܕܒ ܘܐܚܘ̈ܗܝ ܐܫܠܡܘ ܢܦܫ̈ܬܗܘܢ ܠܩܢܕܝܢܘܣ ܘܩܡܘ ܠܘܩܒܠ ܒܥܠܕܒ̈ܒܐ ܕܥܡܗܘܢ ܕܐܝܟܢܐ ܢܩܘܡ ܢܡܘܣܗܘܢ ܘܒܝܬ ܡܩܕܫܗܘܢ ܘܒܬܫܒܘܚܬܐ ܪܒܬܐ ܫܒܚܘܗܝ ܠܥܡܗܘܢ܂
14:30 ܘܟܢܫ ܝܘܢܬܢ ܠܥܡܗ ܘܗܘܐ ܠܗܘܢ ܪܒ ܟܗ̈ܢܐ ܘܐܬܟܢܫ ܠܘܬ ܥܡܗ܂
14:31 ܘܐܬܚܫܒܘ ܒܥܠܕܒܒܝܗܘܢ ܠܡܐܬܐ ܠܐܪܥܗܘܢ ܕܢܓܡܪܘܢܗ ܘܠܡܘܫܛܘ ܐܝܕܐ ܥܠ ܒܝܬ ܡܩܕܫܗܘܢ܂
14:32 ܗܝܕܝܢ ܩܡ ܫܡܥܘܢ ܘܐܩܪܒ ܥܠ ܐܦܝ̈ ܥܡܗ ܘܐܦܩ ܢܦܩܬܐ ܣܓܝܐܬܐ ܡܢ ܕܝܠܗ ܘܝܗܒ ܙܝܢܐ ܠܓܒܪ̈ܐ ܕܚܝܠܐ ܒ̈ܢܝ ܥܡܗ ܘܝܗܒ ܠܗܘܢ ܡܘܗܒ̈ܬܐ܂
14:33 ܘܐܥܫܢ ܡܕܝ̈ܢܬܐ ܕܝܗܘܕܐ ܘܠܒܝܬ ܫܘܪ̈ܐ ܕܥܠ ܬܚ̈ܘܡܝܗ ܕܝܗܘܕܐ ܐܝܟܐ ܕܣܝܡ ܗܘܐ ܡܢ ܩܕܝܡ ܙܝܢܐ ܕܡܕܝ̈ܢܬܐ ܘܐܩܝܡ ܬܡܢ ܢܛܘܪ̈ܐ ܓܒܪ̈ܐ ܝܗ̈ܘܕܝܐ܂
14:34 ܘܐܥܫܢ ܒܚܣ̈ܢܐ ܠܝܘܦܐ ܕܥܠ ܝܡܐ ܘܠܓܙܪ ܕܥܠ ܬܚܘܡܐ ܕܙܘܛܘܣ ܐܝܟܐ ܕܥܡܪܝܢ ܗܘܘ ܠܘܩܕܡ ܒܥܠܕܒ̈ܒܐ ܘܐܥܡܪ ܬܡܢ ܝܗܘ̈ܕܝܐ ܘܟܠܡܕܡ ܕܐܙܠ ܗܘܐ ܠܗܘܢ ܠܬܘܪܣܝܐ ܘܠܩܘܝܡܐ ܣܡ ܠܗܘܢ ܬܡܢ܂
14:35 ܘܚܙܐ ܥܡܐ ܥܒ̈ܕܘܗܝ ܕܫܡܥܘܢ ܘܬܫܒܘܚܬܐ ܕܨܒܐ ܗܘܐ ܠܡܥܒܕ ܠܥܡܗ ܘܣܡܘܗܝ ܠܗܘܢ ܡܕܒܪܢܐ ܘܪܒ ܟܗ̈ܢܐ ܡܛܠ ܕܗܘ ܗܠܝܢ ܟܠܗܝܢ ܥܒܕ ܗܘܐ ܘܙܕܝܩܘܬܐ ܘܗܝܡܢܘܬܐ ܕܢܛܪ ܠܥܡܗ ܘܒܟܠܡܕܡ ܕܐܝܬ ܨܒܐ ܕܢܪܡܪܡ ܠܥܡܗ܂
14:36 ܘܒܝܘ̈ܡܬܗ ܬܩܢܬ ܐܘܪܚܐ ܒܐܝܕܗ ܕܢܓܡܪ ܠܥ̈ܡܡܐ ܡܢ ܐܪܥܗܘܢ ܘܠܐܝܠܝܢ ܕܐܝܬ ܗܘܘ ܒܡܕܝܢܬܗ ܕܕܘܝܕ ܒܐܪܫܠܡ ܐܦ ܠܗܘܢ ܥܛܐ ܘܐܪܝܡ ܐܢܘܢ ܡܢ ܬܡܢ ܗܢܘܢ ܕܥܒܕܘ ܠܢܦܫܗܘܢ ܡܪܕܐ ܡܢ ܐܝܟܐ ܕܢܦܩܝܢ ܗܘܘ ܘܡܛܡܐܝܢ ܚܕܪ̈ܝ ܒܝܬ ܡܩܕܫܐ ܘܥܒܕܝܢ ܗܘܘ ܡܚܘܬܐ ܪܒܬܐ ܒܝܬ ܡܩܕܫܐ܂
14:37 ܘܐܥܡܪ ܒܗ ܫܡܥܘܢ ܓܒܪ̈ܐ ܝܗܘ̈ܕܝܐ ܘܐܥܫܢܗ ܒܚܣ̈ܢܐ ܘܢܗܘܐ ܒܝܬ ܡܪܕܐ ܠܡܕܝܢܬܐ ܘܠܐܬܪܐ ܘܐܪܝܡ ܘܥܠܝ ܫܘܪܗ ܕܐܘܪܫܠܡ܂
14:38 ܘܕܡܛܪܝܘܣ ܡܠܟܐ ܐܩܝܡ ܠܗ ܠܫܡܥܘܢ ܪܒܘܬ ܟܗܢܘܬܐ܂
14:39 ܘܥܒܕܗ ܡܢ ܪ̈ܚܡܘܗܝ ܕܡܠܟܐ ܘܫܒܚܗ ܒܬܫܒܘܚܬܐ ܪܒܬܐ܂
14:40 ܐܫܬܡܥ ܓܪ ܕܐܬܩܪܝܘ ܝܗܘ̈ܕܝܐ ܡܢ ܪ̈ܗܘܡܝܐ ܐܚ̈ܐ ܘܪ̈ܚܡܐ ܘܡܥܕܪ̈ܢܐ ܘܕܐܪܥܘ ܠܐܝܙܓܕܘ̈ܗܝ ܕܫܡܥܘܢ ܒܬܫܒܘܚܬܐ܂
14:41 ܘܕܨܒܘ ܝܗܘ̈ܕܝܐ ܘܟܗ̈ܢܐ ܕܢܗܘܐ ܡܕܒܪܢܐ ܘܪܒ ܟܗ̈ܢܐ ܠܥܠܡ ܥܕܡܐ ܕܢܩܘܡ ܢܒܝܐ ܡܗܝܡܢܐ܂
14:42 ܘܕܗܘ ܢܗܘܐ ܠܗܘܢ ܡܕܒܪܢܐ ܘܢܐܨܦ ܕܒܝܬ ܡܩܕܫܐ ܘܠܡܩܡܘ ܐܢܘܢ ܥܠ ܥܒ̈ܕܝܗܘܢ ܘܥܠ ܙܝܢܗܘܢ ܘܥܠ ܚܣܢ̈ܝܗܘܢ܂
14:43 ܘܕܢܗܘܐ ܝܨܦ ܥܠ ܒܝܬ ܡܩܕܫܐ ܘܕܗܘܘ ܡܫܬܡܥܝܢ ܠܗ ܟܠܢܫ ܘܕܗܘܘ ܡܬܟܬܒܝܢ ܒܫܡܗ ܟܠܗܘܢ ܟܬܒ̈ܐ ܕܡܣܒܐ ܘܕܡܬܠܐ ܕܒܐܪܥܗ ܘܕܢܗܘܐ ܡܟܣܝ ܐܪ̈ܓܘܢܐ ܘܕܗܒܐ܂
14:44 ܘܠܐ ܢܗܘܐ ܫܠܝܛ ܠܐ ܠܟܗ̈ܢܐ ܘܠܐ ܠܐܢܫ ܡܢ ܥܡܐ ܕܢܫܪܐ ܚܕܐ ܡܢ ܗܠܝܢ ܐܘ ܕܢܩܘܡ ܠܘܩܒܠ ܟܠ ܦܘܩܕܢܘ̈ܗܝ ܐܘ ܕܢܥܒܕ ܨ‍<‍ܘ‍>‍ܒ‍{‍ܘ‍}‍ ܐܢܫ ܒܠܥܕܘܗܝ ܘܕܢܗܘܐ ܡܟܣܝ ܐܪ̈ܓܘܢܐ ܘܣܝܗ ܦܝܒܠܐ ܕܕܗܒܐ܂
14:45 ܟܠ ܕܢܥܒܪ ܐܘ ܕܢܫܪܐ ܚܕܐ ܡܢ ܗܠܝܢ ܢܗܘܐ ܡܚܝܒ܂
14:46 ܘܐܨܛܒܝ ܟܠܗ ܥܡܐ ܕܗܠܝܢ ܟܠܗܝܢ ܢܗܘܝܢ ܠܫܡܥܘܢ ܘܕܢܥܒܕܘܢ ܐܝܟ ܗܠܝܢ ܦܬܓܡ̈ܐ܂
14:47 ܘܩܒܠ ܫܡܥܘܢ ܘܐܨܛܒܝ ܕܢܗܘܐ ܪܒ ܟܗ̈ܢܐ ܘܡܕܒܪܢܐ ܘܪܝܫ ܥܡܐ ܕܝܗܘ̈ܕܝܐ ܘܕܟܗ̈ܢܐ ܘܝܨܘܦܐ ܕܟܠܗܘܢ܂
14:48 ܘܐܡܪܘ ܕܢܬܟܬܒ ܗܢܐ ܟܬܒܐ ܒܦܢܩܝܬܐ ܕܢܚܫܐ ܘܢܣܝܡܘܢ ܐܢܝܢ ܒܝܬ ܡܩܕܫܐ ܒܐܬܪܐ ܐܝܕܝܥܐ܂
14:49 ܦܚܡܗܝܢ ܕܝܢ ܢܬܣܝܡ ܒܝܬ ܓܙܐ ܕܢܗܘܝܢ ܠܫܡܥܘܢ ܘܠܒ̈ܢܘܗܝ܂