← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62078: P 1Mac7a1

Click on a word for lexical analysis
Click on a red-colored coordinate for comments and/or translations of the line

01:01 ܘܗܘܐ ܡܢ ܒܬܪ ܕܩܛܠ ܐܠܟܣܢܕܪܘܣ ܒܪ ܦܝܠܝܦܘܣ ܡܩܕܘܢܝܐ ܕܢܦܩ ܡܢ ܐܪܥܐ ܕܟܬ̈ܝܐ ܘܡܚܐ ܠܕܪܝܘܫ ܡܠܟܐ ܕܦܪܣ ܘܕܡܕܝ ܘܐܡܠܟ ܚܠܦܘܗܝ ܗܘ ܠܘܩܕܡ ܒܝܘܢ܂
01:02 ܘܥܒܕ ܩܪ̈ܒܐ ܣܓ̈ܝܐܐ ܘܐܚܕ ܚܣ̈ܢܐ ܘܩܛܠ ܡ̈ܠܟܐ ܕܐܪܥܐ܂
01:03 ܘܐܙܠ ܥܕܡܐ ܠܣܘ̈ܦܝܗ ܕܐܪܥܐ ܘܢܣܒ ܒܙܬܐ ܕܥܡ̈ܡܐ ܣܓ̈ܝܐܐ ܘܫܠܝܬ ܐܪܥܐ ܩܕܡܘܗܝ ܘܐܬܪܝܡ ܠܒܗ܂
01:04 ܘܟܢܫ ܚܝܠܐ ܕܥܫܝܢ ܛܒ ܘܐܫܬܠܛ ܒܐܪ̈ܥܬܐ ܕܥܡ̈ܡܐ ܘܛܪ̈ܘܢܐ ܘܗܘܘ ܠܗ ܠܡܕܐܬܐ܂
01:05 ܘܡܢ ܒܬܪ ܗܠܝܢ ܢܦܠ ܒܟܘܪܗܢܐ ܘܝܕܥ ܕܡܐܬ ܠܗ܂
01:06 ܘܩܪܐ ܠܥܒ̈ܕܘܗܝ ܡܝܩܪ̈ܐ ܐܝܠܝܢ ܕܐܬܪܒܝܘ ܥܡܗ ܡܢ ܛܠܝܘܬܗ ܘܦܠܓ ܠܗܘܢ ܡܠܟܘܬܗ ܥܕ ܗܘ ܚܝ܂
01:07 ܘܐܡܠܟ ܐܠܟܣܢܕܪܘܣ ܫ̈ܢܝܢ ܬܪܬܥܣܪܐ ܘܡܝܬ܂
01:08 ܘܐܚܕܘ ܥܒ̈ܕܘܗܝ ܚܕ ܚܕ ܡܢܗܘܢ ܒܐܬܪܗ܂
01:09 ܘܩܛܪܘ ܟܠܗܘܢ ܬܓ̈ܐ ܡܢ ܒܬܪ ܡܘܬܗ ܘܒܢܝܗܘܢ ܒܬܪܗܘܢ ܫ̈ܢܝܐ ܣܓܝܐ̈ܬܐ ܘܐܣܓܝܘ ܒܝܫ̈ܬܐ ܒܐܪܥܐ܂
01:10 ܘܢܦܩ ܡܢܗܘܢ ܥܩܪܐ ܕܪܘܫܥܐ ܐܢܛܝܘܟܘܣ ܐܦܝܦܢܘܣ ܒܪ ܐܢܛܝܘܟܘܣ ܡܠܟܐ ܕܐܝܬܘܗܝ ܗܘܐ ܗܡܝܪܐ ܒܪܗܘܡܝ ܘܐܡܠܟ ܒܫܢܬ ܡܐܐ ܘܬܠܬܝܢ ܘܫܒܥ ܫ̈ܢܝܢ ܠܡܠܟܘܬܐ ܕܝܘ̈ܢܝܐ܂
01:11 ܒܗܘܢ ܒܝܘܡ̈ܬܐ ܗܢܘܢ ܢܦܩܘ ܡܢ ܐܝܣܪܐܝܠ ܐܢܫܐ ܥܘ̈ܠܐ ܘܓܪܓܘ ܠܣܓܝܐ̈ܐ ܘܐܡܪܝܢ ܠܗܘܢ ܢܐܙܠ ܢܩܝܡ ܩܝܡܐ ܥܡ ܥܡ̈ܡܐ ܕܚܕܪ̈ܝܢ ܡܛܠ ܕܗܐ ܡܢ ܕܦܪ̈ܫܢ ܡܢܗܘܢ ܐܕܪ̈ܟܢ ܒܝܫ̈ܬܐ ܣܓܝܐ̈ܬܐ܂
01:12 ܘܛܐܒܬ ܡܠܬܐ ܒܥܝܢܝ̈ܗܘܢ܂
01:13 ܘܐܬܓܪܓܘ ܐܢ̈ܫܝܢ ܡܢ ܥܡܐ ܘܐܙܠܘ ܠܘܬ ܡܠܟܐ ܘܝܗܒ ܠܗܘܢ ܫܘܠܛܢܐ ܠܡܬܕܒܪܘ ܒܢܡܘܣܐ ܕܥܡ̈ܡܐ܂
01:14 ܘܒܢܘ ܓܡܢܣܝܘܢ ܒܐܘܪܫܠܡ ܐܝܟ ܥܒ̈ܝܕܬܐ ܕܥܡ̈ܡܐ܂
01:15 ܘܢܓܕܘ ܠܗܘܢ ܠܥܘܪܠܘܬܐ ܘܗܦܟܘ ܡܢ ܩܝܡܐ ܕܩܘܕܫܐ ܘܐܫܬܘܝܘ ܠܥܡ̈ܡܐ ܘܐܙܕܡܢܘ ܠܡܥܒܕ ܕܒܝܫ܂
01:16 ܘܬܩܢܬ ܡܠܟܘܬܐ ܩܕܡ ܐܢܛܝܘܟܘܣ ܘܣܒܪ ܠܡܡܠܟܘ ܥܠ ܡܨܪܝܢ ܐܝܟ ܕܢܡܠܟ ܥܠ ܬܪܬܝܢ ܡܠܟܘܢ܂
01:17 ܘܥܠ ܠܡܨܪܝܢ ܒܥܡ̈ܡܐ ܥܫ̈ܝܢܐ ܘܒܡܪ̈ܟܒܬܐ ܘܦܝ̈ܠܐ ܘܦܪ̈ܫܐ ܘܒܐ̈ܠܦܐ ܣܓܝܐ̈ܬܐ܂
01:18 ܘܣܕܪ ܩܪܒܐ ܠܘܩܒܠ ܦܛܘܠܡܐܘܣ ܡܠܟܐ ܕܡܨܪܝܢ ܘܗܦܟ ܦܛܘܠܡܐܘܣ ܡܢ ܩܕܡ ܐܦܘ̈ܗܝ ܘܥܪܩ܂
01:19 ܘܐܚܕ ܡܕܝ̈ܢܬܐ ܥܫ̈ܝܢܬܐ ܒܡܨܪܝܢ ܘܢܣܒ ܒܙܬܐ ܕܐܪܥܐ ܕܡܨܪܝܢ܀܀
01:20 ܘܗܦܟ ܐܢܛܝܘܟܘܣ ܡܢ ܒܬܪ ܕܡܚܐ ܠܡܨܪܝܢ ܒܫܢܬ ܡܐܐ ܘܐܪܒܥܝܢ ܘܬܠܬ ܫ̈ܢܝܢ ܘܣܠܩ ܥܠ ܐܝܣܪܐܝܠ ܘܐܘܪܫܠܡ ܒܥܡܐ ܥܫܝܢܐ܂
01:21 ܘܥܠ ܠܒܝܬ ܡܩܕܫܐ ܒܓܐܝܘܬܐ ܘܢܣܒ ܠܡܕܒܚܐ ܕܕܗܒܐ ܘܠܡܢܪܬܐ ܕܢܗܪܐ ܘܠܟܘܠܗܘܢ ܡܐ̈ܢܝܗ܂
01:22 ܘܐܦ ܠܦܬܘܪܐ ܕܐ̈ܦܐ ܘܢܘܩܝܐ ܘܦܝ̈ܠܣܐ ܘܟ̈ܦܐ ܕܕܗܒܐ ܘܦܪܣܐ ܘܟܠܝܠܐ ܘܨܒܬܐ ܕܕܗܒܐ ܕܐ̈ܦܝ ܗܝܟܠܐ ܘܩܠܦ ܟܠ ܡܕܡ܂
01:23 ܘܢܣܒ ܣܐܡܐ ܘܕܗܒܐ ܘܡܐ̈ܢܐ ܕܪܓܬܐ ܘܢܣܒ ܣܝܡ̈ܬܐ ܡܛܫ̈ܝܬܐ ܕܐܫܟܚ܂
01:24 ܘܢܣܒ ܟܠ ܘܐܙܠ ܠܐܪܥܗ ܘܥܒܕ ܒܗܘܢ ܚܪܒܐ ܪܒܬܐ܂
01:25 ܘܗܘܐ ܐܒܠܐ ܪܒܐ ܥܠ ܐܝܣܪܝܠ ܒܟܘܠܗܘܢ ܐܬܪ̈ܘܬܗܘܢ܂
01:26 ܡܛܠ ܗܢܐ ܪ̈ܘܪܒܢܐ ܐܬܬܢܚܘ ܘܣ̈ܒܐ ܘܥ̈ܠܝܡܐ ܘܒܬܘ̈ܠܬܐ ܐܬܟܪܗܘ ܘܫܘܦܪܐ ܕܢܫ̈ܐ ܐܬܚܒܠ܂
01:27 ܟܘܠ ܚܬܢܐ ܢܣܒ ܐܘܠܝܬܐ ܘܕܝܬܒܐ ܒܓܢܘܢܐ ܚܕܬܬ ܐܒܠܐ܂
01:28 ܘܐܬܬܙܝܥܬ ܐܪܥܐ ܥܠ ܥܡܘܪ̈ܝܗ ܘܟܘܠܗ ܒܝܬ ܝܥܩܘܒ ܠܒܫܘ ܒܗܬܬܐ܂
01:29 ܡܢ ܒܬܪ ܬܪ̈ܬܝܢ ܫ̈ܢܝܢ ܕܝܘܡ̈ܬܐ ܫܕܪ ܡܠܟܐ ܫܠܝ̈ܛܐ ܕܡܕܬܐ ܠܡܕܝ̈ܢܬܐ ܕܝܗܘܕܐ ܘܐܬܐ ܠܐܘܪܫܠܡ ܒܥܡܐ ܥܫܝܢܐ܂
01:30 ܘܡܠܠ ܠܗܘܢ ܡ̈ܠܐ ܕܫܠܡܐ ܒܢܟܠܐ ܘܗܝܡܢܘܗܝ ܘܢܦܠ ܥܠ ܡܕܝܢܬܐ ܡܢ ܫܠܝܐ ܘܡܚܗ ܡܚܘܬܐ ܪܒܬܐ ܘܐܘܒܕ ܥܡܐ ܣܓܝܐܐ ܡܢ ܐܝܣܪܐܝܠ܂
01:31 ܘܢܣܒ ܒܙܬܐ ܣܓܝܐܬܐ ܘܐܘܩܕܗ ܒܢܘܪܐ ܘܥܩܪ ܒ̈ܬܐ ܕܐܘܪܫܠܡ ܟܕ ܚܕܪܝܢ܂
01:32 ܘܫܒܐ ܢܫ̈ܐ ܘܛ̈ܠܝܐ ܘܒܥܝܪܐ ܝܪܬ܂
01:33 ܘܒܢܐ ܠܡܕܝܢܬܗ ܕܕܘܝܕ ܫܘܪ̈ܐ ܪ̈ܡܐ ܘܥܫ̈ܝܢܐ ܘܡܓ̈ܕܠܐ ܕܥܫܝܢܝܢ ܘܗܘܬ ܠܗܘܢ ܠܚܣܢܐ܂
01:34 ܘܣܡܘ ܬܡܢ ܥܡܐ ܚܛܝܐ ܓܒܪ̈ܐ ܥܒ̈ܪܝ ܢܡܘܣܐ ܘܐܬܚܝܠܘ ܒܗ܂
01:35 ܘܐܣܢܘ ܙܝܢܐ ܘܬܘܪܣܝܐ ܘܟܢܫܘ ܒܙܬܐ ܕܐܘܪܫܠܡ ܣܡܘ ܬܡܢ ܘܗܘܘ ܠܦܚܐ ܪܒܐ܂
01:36 ܘܠܡܟܪܢܘܬܐ ܕܩܘܕܫܐ ܘܠܡܐܟܠ ܩܪ̈ܨܐ ܕܐܝܣܪܝܠ ܒܟܠܙܒܢ܂
01:37 ܘܐܫܕܘ ܕܡܐ ܙܟܝܐ ܚܕܪ̈ܝ ܩܘܕܫܐ ܘܛܘܫܘ ܒܝܬ ܡܩܕܫܐ܂
01:38 ܘܥܪܩܘ ܥܡܘܪ̈ܐ ܕܐܘܪܫܠܡ ܡܛܠܬܗܘܢ ܘܗܘܬ ܒܝܬ ܡܥܡܪܐ ܠܢܘܟܪ̈ܝܐ ܘܗܘܬ ܢܘܟܪܝܐ ܠܦܐܪ̈ܝܗ ܘܒ̈ܢܝܗ ܫܒܩܘܗ܂
01:39 ܘܩܘ̈ܕܫܝܗ ܐܬܚܪܒܘ ܐܝܟ ܡܕܒܪܐ ‍{‍ܣ‍}‍‍<‍ܫ̈‍>‍ܒܝܗ ܠܚܣܕܐ ܘܝܩܝܪ̈ܝܗ ܠܫܝܛܘܬܐ܂
01:40 ܐܝܟ ܬܫܒܘܚܬܗ ܣܓܝ ܨܥܪܗ ܘܪܘܡܗ ܐܬܗܦܟ ܠܐܒܠܐ܂
01:41 ܘܟܬܒ ܡܠܟܐ ܒܟܠܗ ܡܠܟܘܬܗ ܕܢܗܘܘܢ ܟܠܗܘܢ ܥܡܐ ܚܕ܂
01:42 ܘܕܢܫܒܩܘܢ ܟܠ ܐܢܫ ܢܡܘ̈ܣܘܗܝ ܘܩܒܠܘ ܟܠܗܘܢ ܐܝܟ ܡܠܬܗ ܕܡܠܟܐ܂
01:43 ܘܣ̈ܓܝܐܐ ܡܢ ܐܝܣܪܐܝܠ‍{‍ ܐܝܣܪܐܝܠ‍}‍ ܐܨܛܒܝܘ ܒܦܘܠܚܢܗ ܕܡܠܟܐ ܘܕܒܚܘ ܠܦܬܟܪ̈ܐ ܘܐܚܠܘ ܫܒܬܐ܂
01:44 ܘܫܕܪ ܡܠܟܐ ܐܓܪ̈ܬܐ ܒܝܕ ܐܝܙܓ̈ܕܐ ܠܐܘܪܫܠܡ ܘܠܡ̈ܕܝܢܬܐ ܕܝܗܘܕܐ ܠܡܐܙܠ ܒܬܪ ܢܡ̈ܘܣܐ ܢܘܟܪ̈ܝܐ ܕܐܪܥܐ܂
01:45 ܘܠܡܟܠܐ ܕܒܚ̈ܐ ܫܠܡ̈ܐ ܘܢܘ̈ܩܝܐ ܡܢ ܩܘܕܫܐ ܘܠܡܚܠܘ ܫ̈ܒܐ ܘܥܕܥ̈ܕܐ܂
01:46 ܘܠܡܛܡܐܘ ܩܘܕܫܐ ܘܩܘ̈ܕܫܐ܂
01:47 ܘܠܡܒܢܐ ܦܪ̈ܟܐ ܘܢܘ̈ܣܐ ܠܦܬܟܪ̈ܐ ܘܠܡܕܒܚܘ ܚܙܝܪ̈ܐ ܘܒܥܝܪ̈ܐ ܛܡܐܬܐ܂
01:48 ܘܠܡܫܒܩ ܒܢܝܗܘܢ ܥܘܪ̈ܠܐ ܘܠܡܛܡܐܘ ܢܦܫܗܘܢ ܒܟܘܠ ܕܛܡܐ ܘܡܛܘܫ܂
01:49 ܐܝܟ ܕܢܛܥܘܢ ܢܡܘܣܐ ܘܠܡܚܠܦܘ ܟܠܗܘܢ ܢܡܘ̈ܣܐ܂
01:50 ܘܟܠ ܡܢ ܕܠܐ ܢܥܒܕ ܐܝܟ ܢܡܘܣܐ ܕܡܠܟܐ ܢܡܘܬ܂
01:51 ܐܝܟ ܡ̈ܠܐ ܗܠܝܢ ܟܬܒ ܒܟܘܠܗ ܡܠܟܘܬܗ ܘܐܩܝܡ ܦܩܘ̈ܕܐ ܥܠ ܟܘܠܗ ܡܠܟܘܬܗ ܘܥܠ ܟܠܗ ܥܡܐ ܘܦܩܕ ܠܡܕܒܚܘ ܒܡܕ̈ܝܢܬܐ ܕܝܗܘܕܐ ܒܟܠ ܡܕܝܢܐ ܘܡܕܝܢܐ܂
01:52 ܘܐܬܟܢܫܘ ܡܢ ܥܡܐ ܠܘܬܗܘܢ ܣܓܝܐ̈ܐ ܡܢ ܟܠܗ ܐܝܣܪܝܠ ܕܫܒܩܘ ܢܡܘܣܐ ܘܥܒܕܘ ܒܝܫܬܐ ܒܐܪܥܐ܂
01:53 ܘܣܡܘܗܝ ܠܐܝܣܪܐܝܠ ܒܛܫܝ̈ܬܐ ܒܟܠ ܒܝܬ ܥܪܘܩܝܗܘܢ܂
01:54 ܘܒܚܡܫܐ ܘܥܣܪܝܢ ܒܟܢܘܢ ܕܫܢܬ ܡܐܐ ܘܐܪܒܥܝܢ ܘܚܡܫ ܒܢܘ ܛܘܡܐܐ ܕܚܪܒܐ ܥܠ ܡܕܒܚܐ ܘܡܕܝ̈ܢܬܐ ܕܝܗܘܕܐ ܟܕ ܚܕܪ̈ܢ ܒܢܘ ܦܪ̈ܟܐ܂
01:55 ܘܥܠ ܬܪ̈ܥܐ ܕܒ̈ܬܐ ܘܒܫܘ̈ܩܐ ܣܝܡܝܢ ܗܘܘ ܒܣܡ̈ܐ܂
01:56 ܘܟܬ̈ܒܐ ܕܢܡܘܣܐ ܐܝܠܝܢ ܕܐܫܬܟܚܘ ܨܪܝܘ ܘܐܘܩܕܘ ܐܢܘܢ ܒܢܘܪܐ܂
01:57 ܘܠܘܬ ܡܢ ܕܡܫܬܟܚ ܗܘܐ ܟܬܒܐ ܕܩܝܡܐ ܘܐܝܢܐ ܕܡܨܛܒܐ ܗܘܐ ܒܟܬܒܐ ܕܢܡܘܣܐ ܦܘܩܕܢܐ ܕܡܠܟܐ ܩܛܠ ܗܘܐ ܠܗ܂
01:58 ܒܚܝܠܗܘܢ ܥܒܕܝܢ ܗܘܘ ܠܐܝܣܪܐܝܠ ܠܐܝܠܝܢ ܕܡܫܬܟܚܝܢ ܗܘܘ ܘܡܝܬܝܢ ܗܘܘ ܠܗܘܢ ܒܩܛܝܪܐ ܒܟܠ ܝܪܚ ܘܝܪܚ ܒܡܕܝ̈ܢܬܐ܂
01:59 ܘܒܚܡܫܐ ܘܥܣܪܝܢ ܒܝܪܚܐ ܡܕܒܚܝܢ ܗܘܘ ܥܠ ܥܠܬܐ ܕܐܝܬ ܗܘܬ ܥܠ ܡܕܒܚܐ܂
01:60 ܘܠܢܫܐ ܕܓܙܪ ܗ̈ܘܝ ܒܢܝܗܝܢ ܐܝܟ ܦܘܩܕܢܐ ܕܡܠܟܐ ܩܛܠܘ ܐ̈ܢܝܢ܂
01:61 ܘܬܠܘ ܠܝܠܘ̈ܕܐ ܒܨܘܪ̈ܝܗܝܢ ܘܠܒ̈ܢܝ ܒܝܬܗܘܢ ܕܐܝܠܝܢ ܕܓܙܪܘ ܐܢܘܢ܂
01:62 ܘܣܓ̈ܝܐܐ ܡܢ ܐܝܣܪܝܠ ܣܝܒܪܘ ܘܐܬܚܝܠܘ ܒܗܝܢ ܕܠܐ ܢܐܟܠܘܢ ܛܡܐܘܬܐ܂
01:63 ܘܩܒܠܘ ܠܡܡܬ ܕܠܐ ܢܬܛܡܐܘܢ ܒܡܐ̈ܟܠܬܐ ܘܠܐ ܢܫܪܘܢ ܩܝܡܐ ܕܩܘܕܫܐ ܘܡܝܬܘ܂
01:64 ܘܗܘܐ ܪܘܓܙܐ ܪܒܐ ܥܠ ܐܝܣܪܐܝܠ܀ ܀