← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62081: P 4Mac

Click on a word for lexical analysis
Click on a red-colored coordinate for comments and/or translations of the line

previous chapter


02:01 ܘܠܘ ܕܕܘܡܪܐ ܗܝ ܐܢ ܗܘ ܕܐܪ̈ܓܝܓܬܗ݀ ܕܢܦܫܐ ܕܪ̈ܓܢ ܠܫܘܦܪܐ ܡ̈ܬܟܠܝܢ܃
02:02 ܗܟܢܐ ܓܝܪ ܝܘܣܦ ܡܬܩܠܣ܂ ܕܒܝܕ ܡܗܘܢܘܬܐ ܙܟ݂ܐ ܠܗܢܝܘܬܐ ܕܚܫܐ܃
02:03 ܟܕ ܓܝܪ ܐܝܬܘܗܝ ܛܠܝܐ ܘܒܗ݀ܘ ܥܘܙܐ ܕܒܗ ܠܫܘܬܦܘܬܐ ܐܢܫ ܡ݂ܛܐ݂܂ ܦܩܪܘܬܐ ܕܚ̈ܫܘܗܝ ܒܗ ܢܝ݁ܚ݂܃
02:04 ܠܐ ܗܘܐ ܕܝܢ ܠܦܩܪܘܬܐ ܒܠܚܘܕ ܕܝܠܗ ܕܣܘܥܪܢܐ ܡܬܚܙܐ ܪܥܝܢܐ ܕܡܨ݂ܐ ܠܡܙܟܐ݂܂ ܐܠܐ ܐܦ ܠܟܠ ܪ̈ܓܝܓܢ܃
02:05 ܐܡ݂ܪ ܓܝܪ ܢܡܘܣܐ܂ ܠܐ ܬܪܓ ܐܢܬܬ ܚܒܪܟ܂ ܘܠܐ ܟܠ ܡܕܡ ܕܐܝܬ ܠܚܒܪܟ܃
02:06 ܘܗܐ ܐܦ ܐܠܘ ܠܐ ܐܡ݁ܪ ܢܡܘܣܐ ܕܠܐ ܬܪܓ݂܂ ܡ݂ܨܐ ܗ݂ܘܝܬ ܐܦ ܗܟܢܐ ܕܐܦܝܣܟܘܢ܂ ܕܡ݂ܨܐ ܗܘ ܪܥܝܢܐ ܠܡܙܟܐ ܠܪ̈ܓܝܓܬܐ ܐܟܙܢܐ ܕܐܦ ܠܣܘܥܪ̈ܢܐ ܡܥܘܟ̈ܢܐ ܕܙܕܝܩܘܬܐ܃
02:07 ܘܐܠܐ ܐܝܟܢܐ ܟܕ ܐܝܬܘܗܝ ܐܢܫ ܠܥܒܐ ܐܘ ܪܘܝܐ݁܂ ܝ݁ܠܦ ܬܩܢܘܬܐ ܟܕ ܡܪܦܐ ܗܠܝܢ ܩܕ̈ܡܝܬܐ܂ ܐܠܘ ܠܐ ܓܠܝ݂ܐ ܕܡܫܠܛ ܗܘ ܥܠ ܚܫ̈ܐ ܪܥܝܢܐ ܕܫ݁ܠܡ ܠܕܚܠܬ ܐܠܗܐ܃
02:08 ܒܪܫܥܬܗ ܓܝܪ ܐܢ ܗ݂ܘ ܕܒܢܡܘܣܐ ܢܬܕܒܪ݂܂ ܐܦܢ ܐܝܬܘܗܝ ܪܚܡ݁ ܟܣܦܐ݂܂ ܥܨ݁ܐ ܢܦܫܗ ܘܡܘܙܦ ܠܣܢܝ̈ܩܐ܂ ܘܕܠܐ ܪܒܝܬܐ ܝܗ݀ܒ ܟܣܦܗ ܘܡܚܫܒ ܒܫ̈ܒܐ܂ ܘܫܒ݁ܩ ܡܢ ܡܐ ܕܡܬܚܝܒ ܠܗ܃
02:09 ܐܦܢ ܢܗܘܐ ܕܚܣܘܟܬܢܐ ܗܘܐ܂ ܡܙܕܟܐ ܡܢ ܢܡܘܣܐ ܡܛܠ ܪܥܝܢܐ ܡܝܬܪܐ܂ ܟܕ ܠܐ ܡܠܩܛ ܡܒܕܪ̈ܬܐ ܒܚܨܕܐ܂ ܘܠܐ ܡܒܥܪ ܟܪܡܗ܂ ܘܒܥ݁ܒܕܐ ܕܝܢ ܕܠܝܠܐ ܗܕܐ ܠܡܕܥ܂ ܕܡܫܠܛ ܗܘ ܥܠ ܚ̈ܫܐ ܪܥܝܢܐ܃
02:10 ܢܡܘܣܐ ܓܝܪ ܐܦ ܥܠ ܪܚܡܬܐ ܕܒ̈ܢܝܐ ܠܘܬ ܐܒܗ̈ܐ ܡܫܠܛ܂ ܟܕ ܠܐ ܡܬܟܚܕܝܢ ܡܢܗܘܢ ܘܡܫܠܡܝܢ ܙܕܩܗ܃
02:11 ܘܥܠ ܪܚܡܬ ܫܘܬܦܘܬܐ ܬܘܒ ܡܫܠܛ܂ ܕܐܢܗ݂ܘ ܕܒܠܐ ܢܡܘܣܐ ܬܗܘܐ ܢܟܣܗ݀܃
02:12 ܘܥܠ ܪܚܡܬܐ ܕܐܒܗ̈ܐ ܕܠܘܬ ܒܢ̈ܝܐ ܬܘܒ ܡܫܠܛ܂ ܘܒܐ̈ܝܕܝ ܐܒܗ̈ܝܗܘܢ ܣ݁ܐܡ ܒܪܫܗܘܢ ܡܛܠ ܒܝܫ݂ܘܬܗܘܢ܂ ܡܫܠܛ ܕܝܢ ܐܦ ܥܠ ܚܘܒܐ ܕܪ̈ܚ݁ܡܐ܂ ܟܕ ܡܟܣ ܠܗܘܢ ܡ݂ܛܠ ܪܘܫܥܗܘܢ ܒܐܝ̈ܕܝ ܪ̈ܚ݁ܡܝܗܘܢ܃
02:13 ܘܠܐ ܬܣܒܪܘܢ ܕܡܕܡ ܗܘ ܚܕܬ ܗܢܐ ܡܕܡ ܕܐܡ݁ܪܬ܂ ܐܝ݁ܟܐ ܕܐܦ ܠܒܥܠܕܒܒܘܬܐ ܡܨ݂ܐ ܪܥܝܢܐ ܠܡܙܟܐ܂ ܡܛܘܠ ܢܡܘܣܐ܃
02:14 ܟܕ ܠܐ ܦܣ݁ܩ ܐܝ̈ܠܢܐ ܫܦܝܪܐ ܕܣܢܐ̈ܘܗܝ ܐܠܐ ܡ݁ܢܛܪ ܠܗܘܢ ܕܢܗ݂ܘܘܢ ܠܒܥܠܕ̈ܒܒܘܗܝ ܘܡ݂ܩܝܡ ܠܐܝܠܝܢ ܕܪܡ݂ܝܢ܃
02:15 ܐܦ ܒܚ̈ܫܐ ܕܝܢ ܥܙ̈ܝܙܐ ܡܬܚܙܐ ܪܥܝܢܐ ܕܙܟ݁ܐ܂ ܗܢܘ ܕܝܢ ܠܪܚܡܬ ܪܫܢܘܬܐ ܘܠܪܚܡܬ ܬܫܒܘܚܬܐ܂ ܘܠܫܒܗܪܢܘܬܐ ܘܠܚܬܝܪܘܬܐ ܘܠܚܣܡܐ܃
02:16 ܠܟܠܗܘܢ ܓܝܪ ܗܠܝܢ ܚ̈ܫܐ ܣ̈ܢܝܐ ܥܨ݁ܐ ܘܡܫܥܒܕ ܐܝ݁ܢܐ ܕܚܝܐ ܢܟܦܐܝܬ܂ ܐܟܙܢܐ ܕܐܦ ܠܚܡܬܐ ܙ݁ܟܐ܂ ܐܦ ܥܠ ܗܕܐ ܓܝܪ ܡܫ݁ܠܛ ܗܘ܃
02:17 ܗܐ ܓܝܪ ܟܕ ܐܬܚܡܬ ܡܘܫܐ ܥܠ ܕܬܘܢ ܘܐܒܝܪܡ݂܂ ܠܐ ܣܥ݂ܪ ܠܘܬܗܘܢ ܡܕܡ ܕܚܡܬܐ܂ ܐܠܐ ܒܪܡܝܣܘܬܐ ܕܪܥܝܢܗ݂܂ ܚܡܬܗ ܟܒ݂ܫ ܐܝܟ ܕܒܕܝ݂ܢܐ܃
02:18 ܡܨ݂ܐ ܗܘ ܓܝܪ ܪܥܝܢܐ ܐܝܟ ܡܐ ܕܐܡ݁ܪܬ ܕܢܣܒ ܙܟܘܬܐ ܥܠ ܚ̈ܫܐ܂ ܕܠܗܠܝܢ ܢܫܗ݀ܐ ܘܠܗܠܝܢ ܢܦܟܗ܃
02:19 ܘܐܠܐ ܥܠ ܡܢܐ ܐܒܘܢ ܚܟܝܡ ܒܟܠ ܝܥܩܘܒ݁܂ ܠܫܡܥܘܢ ܘܠܠܘܝ ܥ݁ܕܠ܂ ܡܛܠ ܕܕܠܐ ܪܥܝܢܐ ܠܒ̈ܢܝ ܫܟܝܡ ܟܠܗ ܥܡܐ ܡܢ ܣܟܗ ܩ݁ܛܠܘ܂ ܟܕ ܐܡ݁ܪ܂ ܠܝܛ ܗܘ ܪܘܓܙܗܘܢ ܘܚܡܬܗܘܢ ܡܛܠ ܕܩܫܝܐ ܗܝ܃
02:20 ܐܠܘ ܓܝܪ ܠܐ ܡܨ݂ܐ ܗܘܐ ܪܥܝܢܐ ܠܡܚܣܢ ܠܚܡܬܐ݂܂ ܠܐ ܐܡ݁ܪ ܗܘܐ ܗܟܢܐ܃
02:21 ܟܕ ܓܝܪ ܒ݂ܪܐ ܐܠܗܐ ܠܒܪܢܫܐ݂܂ ܚܫ̈ܐ ܘܙܘ̈ܥܐ ܢ݂ܨܒ ܒܗ܃
02:22 ܟܕ ܕܝܢ ܒܝܕ ܪ̈ܓܫܐ ܠܪܥܝܢܐ ܚܣܝܐ ܥܠ ܟܘܠܗܘܢ ܐܡܠܟ܂ ܘܐܝܟ ܕܥܠ ܬܪܘܢܘܣ ܐ݂ܘܬܒ܃
02:23 ܝܗ݂ܒ ܠܗ ܠܗܢܐ ܢܡܘܣܐ܂ ܕܟܕ ܒܗ ܡܬܕܒܪ݂܂ ܢܡܠܟ ܡܠܟܘܬܐ ܟܢܝܟܬܐ ܘܙܕܝ݂ܩܬܐ ܘܓܢܒܪܬܐ܃
02:24 ܐܝܟܢܐ ܗܟܝܠ ܐܝܬ ܠܟܘܢ ܠܡܐܡܪ܂ ܐܢ ܐܝܢ ܥܠ ܟܠܗܘܢ ܚܫ̈ܐ ܡܡܠܟ ܪܥܝܢܐ܃

next chapter