The Comprehensive Aramaic Lexicon

06:01	ܟܕ ܕܝܢ ܗܟܢܐ ܠܘܩܒܠ ܦܝܣܗ ܕܛܪܘܢܐ ܐܝܟ ܪܗܛܪܐ ܡܠܠ܂ ܩ݂ܪܒܘ ܠܘܬܗ ܐܚ̈ܝܕܝ ܪ̈ܘܡܚܐ܂ ܘܡܪܝܪܐܝܬ ܠܘܬ ܫܢ̈ܕܐ ܓܪܘܗܝ ܠܐܠܝܥܙܪ܃
06:02	ܘܠܘܩܕܡ ܐܫܠܚܘܗܝ ܠܣܒܐ ܕܡܟܢܟ ܗܘܐ ܒܐܣܟܡܐ ܕܕܚܠܬ ܐܠܗܐ܃
06:03	ܒܬܪ ܟܢ ܕܝܢ ܐܗܦܟܘ ܐܝܕ̈ܘܗܝ ܠܒܣܬܪܗ܂ ܘܒܫܘܛܐ ܡܢܓܕܝܢ ܗܘܘ ܠܗ܃
06:04	ܟܕ ܚܕ ܡܢ ܦܠܚ̈ܘܗܝ ܕܛܪܘܢܐ ܕܐܛܦܝܣ ܠܦܘܩ݂̈ܕܢܘܗܝ ܕܡ݁ܠܟܐ܂ ܒܩܠܐ ܪܡ݁ܐ ܩ݁ܥܐ ܗܘܐ ܠܗ܃
06:05	ܠܒܝܒܐ ܕܝܢ ܘܓܢܒܪܐ ܫܪܝܪܐܝܬ ܐܠܝܥܙܪ ܐܝܟ ܗ݀ܘ ܕܒܚܠܡܐ ܡܬܢܓܕ ܗܘܐ܂ ܐܦ ܠܐ ܒܚܕ ܡܢ ܐܣܟܝܡ ܡܢ ܪܥܝܢܗ ܡܫܬܚܠܦ ܗܘܐ܃
06:06	ܐܠܐ ܟܕ ܥܝܢ̈ܘܗܝ ܠܪܘܡܐ ܡ݁ܬܚ ܗܘܐ܂ ܒܝܕ ܢܓ̈ܕܐ ܒܣܪܗ ܕܣܒܐ ܐܬܒܣܒܣ ܗܘܐ܂ ܘܕܡܗ ܥܠܘܗܝ ܪܕ݁ܐ ܗܘܐ܂ ܟܕ ܒܐܠܥ̈ܘܗܝ ܡܙܩܬܝܢ ܗܘܘ ܠܗ܃
06:07	ܢܦ݂ܠ ܗܘܐ ܕܝܢ ܥܠ ܐܪܥܐ܂ ܡܛܠ ܕܠܐ ܡ݁ܣܝܒܪ ܗܘܐ ܓܘܫܡܗ ܟܐܒܐ܂ ܚܘܫܒܗ ܕܝܢ ܬܪܝܨ ܗܘܐ܂ ܘܠܐ ܡܨܛܠܐ ܗܘܐ ܠܟܐ ܘܠܟܐ܃
06:08	ܚܕ ܕܝܢ ܡܢ ܗ݀ܢܘܢ ܡܪܝܪ̈ܐ ܕܡܫܬܢܕܝܢ ܗܘܘ ܒܗ܂ ܟܕ ܟܪܣܗ ܡܒܥܛ ܗܘܐ ܠܗ܂ ܟܕ ܡ݁ܚܐ ܠܗ ܕܢܩܘܡ ܡܐ ܕܢܦ݂ܠ܃
06:09	ܡܣܝܒܪ ܗܘܐ ܕܝܢ ܟܐ̈ܒܐ ܘܡܒܣܪ ܥܠ ܩܛܝܪ̈ܐ܂ ܘܡܣܝܒܪ ܗܘܐ ܫܢ̈ܕܐ ܘܫܐ݁ܛ ܠܛܪܘܢܐ܃
06:10	ܘܐܝܟ ܐܬܠܝܛܐ ܚܠܝܨܐ ܟܕ ܒ݁ܠܥ ܗܘܐ ܙܟܐ ܗܘܐ ܣܒܐ ܠܗ݀ܢܘܢ ܕܡܫܬܢܕܝܢ ܗܘܘ ܒܗ܃
06:11	ܟܕ ܕܝܢ ܕ̈ܥܝܬܢ ܗ̈ܘܝ ܐ̈ܦܘܗܝ ܘܡܠܗܬ ܗܘܐ ܬܟܝܒܐܝܬ݂܂ ܬܗܝܪܝܢ ܗܘܘ ܒܓܢܒܪܘܬܐ ܕܢܦܫܗ܃
06:12	ܐܦ ܗ݂ܢܘܢ ܗܠܝܢ ܕܡܫܬܢܕܝܢ ܗܘܘ ܒܗ܂ ܘܥܠ ܗܕܐ ܐܝܬ ܐܡܬܝ ܕܡܛܠ ܕܚܝܣܝܢ ܗܘܘ ܥܠ ܣܝܒܘܬܗ܃
06:13	ܘܐܝܬ ܐܡܬܝ ܕܡܛܠ ܕܚ݁ܫܝܢ ܗܘܘ ܥܠܘܗܝ܂ ܘܐܝܬ ܐܡܬܝ ܕܡܛܠ ܕܬܗܝܪܝܢ ܗܘܘ ܒܚܘܡܣܢܗ܂ ܩ݁ܪܒܝܢ ܗܘܘ ܐܢ̈ܫܝܢ ܡܢ ܩܪ̈ܝܒܘܗܝ ܕܡ݁ܠܟܐ ܘܐ݁ܡܪܝܢ ܠܗ܃
06:14	ܒܒ݂̈ܝܫܬܐ ܗܠܝܢ ܕܠܐ ܒܘܝܢ ܢܦܫܟ ܡܘܒܕ ܐܢܬ ܐܠܝܥܙܪ݁܃
06:15	ܚܢܢ ܡܢ ܛܥܘ݂̈ܡܐ ܕܡܒܫܠܝܢ ܣܝ݁ܡܝܢܢ ܩܕܡܝܟ܂ ܘܐܢܬ ܥ݂ܒܕ ܢܦܫܟ܂ ܐܝܟ ܗ݀ܘ ܕܡܢ ܒܣܪܐ ܕܚܙܝܪܐ ܐ݁ܟܠ ܐܢܬ ܘܚܝܝ܃
06:16	ܐܠܝܥܙܪ ܕܝܢ ܐܝܟ ܗ݀ܘ ܕܒܫܢܕܐ ܐܚܪܢܐ ܕܡܢ ܗ݀ܘ ܩܕܡܝܐ ܡܪܝܪ ܢܦ݂ܠ܂ ܒܝܕ ܡ݂ܠܟܐ ܗܢܐ ܕܡܠܟܘܗܝ݂܂ ܒܩܠܐ ܪ݁ܡܐ ܩ݁ܥܐ ܗܘܐ܃
06:17	ܠܐ ܗܟܢܐ ܡܬܘܡ ܒܪܥܝܢܐ ܙܐܦܢܐ ܢܦܠܝܢ ܒܢܘ̈ܗܝ ܕܐܒܪܗܡ݁܂ ܕܒܝܕ ܪܕܘܦܝܗ݀ ܕܢܦܫܐ ܟܕܒܐܝܬ ܢܬܚܫܚ ܒܡܕܡ ܕܠܐ ܦܐܐ܂ ܟܕ ܢܣ݁ܒܝܢ ܚܢܢ ܦܪܨܘܦܐ ܐܚܪܢܐ܃
06:18	ܐܦ ܓ݁ܝܪ ܕܠܐ ܛܥܡܐ ܐܝܬܝܗ݀ ܗܕܐ܂ ܐܢܗ݂ܘ ܕܚ̈ܝܐ ܕܫܪܪܐ ܚܝܝܢ ܥܕܡܐ ܠܡܘܬܐ܂ ܗܫܐ ܕܝܢ ܢܫܬܚܠܦ܃
06:19	ܘܢܗܘܐ ܚܢܢ ܩܢܘܡܢ ܠܗܠܝܢ ܕܛ݂ܠܝܢ ܬܚܘܝܬܐ ܒܝܫܬܐ ܕܚܢܦܘܬܐ܂ ܟܕ ܝܗ݀ܒܝܢܢ ܠܗܘܢ ܛܘܦܣܐ ܕܡܟܘܠܬܐ ܛܡܐܬܐ݁܃
06:20	ܘܢܚܐ ܒܬܪ ܟܢ ܚ̈ܝܐ ܡܨܥ̈ܪܐ܂ ܘܗ݂ܢܘܢ ܗܠܝܢ ܟܕ ܥܒܝܕܝܢ ܚܢܢ ܓܘܚܟܐ ܠܥܠܡܐ ܥܠ ܫܦܠܘܬܢ܃
06:21	ܢܬܒܣܐ ܕܝܢ ܡܢ ܛܪܘܢܐ ܐܝܟ ܚ̈ܠܫܐ܂ ܚܠܦ ܢܡܘܣܢ ܕܝܢ ܐܠܗܝܐ݂܂ ܠܐ ܥܕܡܐ ܠܡܘܬܐ ܢܬܟܬܫ
06:22	ܥܠ ܐ̈ܦܝ ܗܠܝܢ܂ ܠܟܘ݁ܢ ܐܡ݁ܪܢܐ ܒܢܘ̈ܗܝ ܕܐܒܪܗܡ܂ ܓܢܒܪܐܝܬ ܥܠ ܐ̈ܦܝ ܫܪܪܐ ܡܘܬܘ܃

06:23	ܐܢܬܘܢ ܕܝܢ ܐܘ ܦܠܚ̈ܘܗܝ ܕܛܪܘܢܐ܂ ܡܢܐ ܡܬܡܬܢܝܢ ܐܢܬܘܢ ܡܢ ܕܠܡܝܬܝܘ ܥܠܝܢ ܐܘܠܨܢܐ܃

06:24	ܟܕ ܕܝܢ ܚܙܐܘܗܝ ܕܗܟܢܐ ܠܒܝܒ ܘܠܐ ܡܫܬܚܠܦ܂ ܐܦ ܠܐ ܒܚܘܣܢܐ ܕܥܠܘܗܝ ܚ݁ܣܘ ܥܠ ܢܘܪܐ ܡܩܪܒܝܢ ܗܘܘ ܠܗ܃
06:25	ܘܬܡܢ ܒܝܕ ܡܐ̈ܢܐ ܚܫܝܠܝ ܒܚܪܥܘܬܐ ܡܘܩܕܝܢ ܗܘܘ ܠܗ܂ ܘܣܪܝܘܬܐ ܒܢܚܝܪ̈ܘܗܝ ܢܣ݁ܟܝܢ ܗܘܘ܃
06:26	ܟܕ ܕܝܢ ܥܕܡܐ ܠܓܪ̈ܡܘܗܝ ܝܩ݁ܕ ܗܘܐ܂ ܘܩܪܝܒܐ ܗܘܬ ܢܦܫܗ ܕܬܣܩ݂܂ ܬܠܐ ܥܝܢܘ̈ܗܝ ܠܫܡܝܐ ܘܐܡ݂ܪ܃
06:27	ܐܢܬ ܝܕ݁ܥ ܐܢܬ ܐܠܗܐ ܕܦܩܚ ܗܘ ܠܝ ܐܝܟ ܕܐܬܦܪܩ ܒܫܢܕܐ ܓܝܪ ܡܘܩܕ̈ܢܐ ܡܐ݁ܬ ܐܢܐ ܚܠܦ ܢܡܘܣܐ܃
06:28	ܐܬܪܥܐ ܠܥܡܟ܂ ܘܢܣܦܩ ܠܟ ܕܝܢ݂ܐ ܕܝܠܢ ܚܠܦܝܗܘܢ܃
06:29	ܘܥܒܕܝܗܝ ܠܕܡܝ ܕܘܟܝܐ ܕܥܠ ܐ̈ܦܝܗܘܢ܂ ܘܚܠܦ ܢܦܫ̈ܬܗܘܢ ܣܒ ܢܦܫܝ݁܃
06:30	ܟܕ ܕܝܢ ܐܡ݂ܪ ܗܠܝܢ ܓܒܪܐ ܗܢܐ ܚܣܝܐ݂܂ ܢܨܝܚܐܝܬ ܒܓܘ ܫܢ̈ܕܐ ܡܝ݂ܬ܂ ܘܥܕܡܐ ܠܫܢ̈ܕܘܗܝ ܕܡܘܬܐ ܥܙ݂ܝ ܒܪܥܝܢܗ ܡܛܠ ܢܡܘܣܐ܀
06:31	ܓܠܝܐ ܗܝ ܗܟܝܠ ܕܡܫܠܛ ܗܘ ܥܠ ܚ̈ܫܐ ܪܥܝܢܐ ܕܐܝܬܘܗܝ ܒܕܚܠܬ ܐܠܗܐ܃
06:32	ܐܠܘ ܓܝܪ ܚ݁ܫܐ ܡܡܠܟܝܢ ܗܘܘ ܥܠ ܪܥܝܢܐ܂ ܠܗܘܢ ܝܗ݀ܒ ܗ݀ܘܝܬ ܣܗܕܘܬܐ ܕܙܟܘܬܐ܃
06:33	ܗܫܐ ܕܝܢ ܪܥܝܢܐ ܠܚܫ̈ܐ ܠܗ ܒܘܠܝܬܐ ܡܙܕ݁ܩܝܢܢ ܫܘܠܛܢܐ܃
06:34	ܘܙܕ݁ܩ ܠܢ ܕܢܘܕܐ܂ ܕܐܘܚܕܢܐ ܕܪܥܝܢܐ ܐܝܬܘܗܝ܂ ܐܝ݁ܟܐ ܕܐܦ ܥܠ ܚ̈ܫܐ ܕܥܪܨܝܢ ܡܢ ܠܒܪ ܡܡܠܟ܃
06:35	ܕܓܘܚܟܐ ܗܝ ܗܟܝܠ ܕܐܢܫ ܢܐܡܪ ܕܠܐ ܡܫܠܛ ܪܥܝܢܐ܂ ܐܝ݁ܟܐ ܕܠܐ ܗܘܐ ܒܠܚܘܕ ܠܚ̈ܫܐ ܚܘܝܢ ܕܙܟ݁ܐ܂ ܐܠܐ ܐܦ ܠܘܚ̈ܡܐ ܐܚܪ̈ܢܐ܂ ܘܠܐ ܝܗ݂ܒ ܠܗܘܢ ܐܬܪܐ ܕܢܚܣܢܘܢܝܗܝ܃