The Comprehensive Aramaic Lexicon

10:01	ܟܕ ܕܝܢ ܐܦ ܗܢܐ ܡܘܬܐ ܕܫ݂ܘܐ ܕܒܟܠܙܒܢ ܢܬܬܢܐ ܣܝ݁ܒ݂ܪ܂ ܠܗ݀ܘ ܕܬܠܬܐ ܐܝܬܝܘ܂ ܟܕ ܒܥ݁ܝܢ ܡܢܗ ܣܓܝܐ̈ܐ݂ ܕܢܐܟܘܠ ܘܢܚܐ܃

10:02	ܗ݂ܘ ܕܝܢ ܒܩܠܐ ܪܡ݁ܐ ܐܡ݂ܪ܂ ܠܐ ܝܕܥܝܬܘܢ ܕܗ݀ܘ ܐܒܐ ܕܠܗܠܝܢ ܕܡܝܬܘ ܙܪ݂ܥ܃ ܗ݂ܘ ܐܦ ܠܝ ܙܪ݂ܥ݂܂ ܘܗ݂ܝ ܟܕ ܗ݂ܝ ܐܡܐ ܐܦ ܠܝ ܝܠܕܬ܂ ܘܒܗ ܟܕ ܒܗ ܒܝܘܠܦܢܐ ܐܬ݁ܪܒܝܬ܃

10:03	ܠܐ ܟܦܪ ܐܢܐ ܒܫܪܪܗܘܢ ܫܒܝܚܐ ܕܐܚ̈ܝ܃
10:05	ܡܪܝܪܐܝܬ ܕܝܢ ܠܦܪܗܣܝܐ ܕܝܠܗ ܩܒ݁ܠܘ܂ ܘܒܡܐ̈ܢܐ ܡܦܪ̈ܩܝ ܫܪ̈ܝܬܐ݂ ܐܝܕ̈ܘܗܝ ܘܪ̈ܓܠܘܗܝ ܦܫ݁ܚܘ ܘܦܪܩܘ܃
10:06	ܘܥܨ݁ܝܢ ܗܘܘ ܘܡܦܣܩܝܢ ܨܒ̈ܥܬܗ܂ ܘܕܪ̈ܥܘܗܝ ܘܩܦܣ̈ܐ ܕܒܘܪ̈ܟܘܗܝ ܘܝܨ̈ܝܠܘܗܝ ܡܬܒܪܝܢ ܗܘܘ܃
10:07	ܘܟܕ ܠܐ ܡܨܝܢ ܗܘܘ ܕܒܚܕ ܡܢ ܐܣܟܝܡ ܢܙܟܘܢܝܗܝ܂ ܫܪܘ ܡܐ̈ܢܐ ܕܒܗܘܢ ܪܒܝܨ ܘܒܪܫܥܬܗ ܡܝܬܝܢ ܗܘܘ ܠܗ ܥܠ ܓܝܓܠܐ܃
10:08	ܘܥܠܝܗ݀ ܚܘܡ̈ܪܘܗܝ ܡܬܦܪ̈ܩܢ ܗ̈ܘܝ܂ ܘܗܕܡ̈ܘܗܝ ܡܫܬܪܝܢ ܗܘܘ܂ ܘܚ݁ܙܐ ܗܘܐ ܠܒܣܪܗ ܕܡܬܦܩܥ܂ ܘܢܘ̈ܛܦܬܐ ܕܕܡܐ ܕܡܢ ܓܘܗ ܪܕ̈ܝܢ ܗ̈ܘܝ܃
10:09	ܟܕ ܕܝܢ ܩܪܝܒ ܗܘܐ ܠܡܡܬ݂܂ ܐܡ݂ܪ܃
10:10	ܚܢܢ ܐܘ ܛܪܘܢܐ ܛܡܐܐ ܡܛܘܠ ܝܘܠܦܢܐ ܘܫܪܪܐ ܕܐܠܗܐ ܗܠܝܢ ܣܒ݁ܠܝܢ ܚܢܢ܃
10:11	ܐܢܬ ܕܝܢ ܡܛܠ ܪܘܫܥܟ ܘܛܡܐܘܬܐ ܕ̈ܩܛܠܝܟ݂܂ ܫܢ̈ܕܐ ܕܠܐ ܡܫܬܪܝܢ ܥܬܝܕ ܐܢܬ ܠܡܣܝܒܪܘ܃
10:12	ܟܕ ܕܝܢ ܐܦ ܗܢܐ ܡܝ݂ܬ ܐܝܟ ܕܦܐܐ ܗܘܐ ܠܡܡܬ݁܂ ܠܐܝ݁ܢܐ ܕܐܝܬܘܗܝ ܐܚܐ ܕܗܠܝܢ ܩܕܡ̈ܝܐ܂ ܠܗ݀ܘ ܕܐܪܒܥܐ ܢܓܕܘܗܝ ܟܕ ܐܡ݁ܪܝܢ ܠܗ܃
10:13	ܠܐ ܬܫܢܐ ܐܦ ܐܢܬ ܗ݀ܝ ܫܢܝܘܬܐ ܕܫܢܘ ܒܗ݀ ܐܚ̈ܝܟ܃
10:14	ܗ݂ܘ ܕܝܢ ܐܡ݂ܪ ܠܗܘܢ܂ ܠܐ ܗܘܐ ܗܟܢܐ ܐܝܬ ܠܟܘܢ ܢܘܪܐ܂ ܕܛܒ ܡܢ ܗ݀ܝ ܩܕܡܝܬܐ ܕܐ̈ܚܝ ܚܡܝܡܐ ܕܬܣܪܕܘܢܢܝ݂܃
10:15	ܠܐ ܡܘܬܗܘܢ ܕܐ̈ܚܝ ܕܡ݂ܠܐ ܛܘ̈ܒܐ܂ ܘܠܐ ܐܒܕܢܗ ܕܛܪܘܢܐ ܕܠܥܠܡ܂ ܘܠܐ ܚܝܝ̈ܗܘܢ ܕܫܪ̈ܝܪܐ ܕܠܐ ܫ݁ܠܡܝܢ܂ ܕܠܐ ܟܦܪ ܐܢܐ ܒܐܚܘܬܐ ܦܐܝܬܐ ܕܐܚ̈ܝ܃
10:16	ܒܥܝ ܗܟܝܠ ܒܨܢܥ̈ܬܟ ܐܘ ܛܪܘܢܐ ܫ̈ܢܕܐ ܚ̈ܕܬܐ ܕܐܦ ܒܗܘܢ ܬܐܠܦ݂܂ ܕܐܚܘܗܘܢ ܐܢܐ ܕܗ݀ܢܘܢ ܕܣ݁ܝܒܪܘ ܫܢ̈ܕܝܟ܃
10:17	ܟܕ ܕܝܢ ܫܡ݂ܥ ܗܠܝܢ ܗ݀ܘ ܠܐ݁ܥ ܕܡܐ܂ ܘܨ݂ܗܐ ܠܩܛܠܐ ܘܛܡ݂ܐ ܛܡܐ̈ܐ ܐܢܬܝܟܣ܂ ܦܩ݂ܕ ܕܠܫܢܗ ܢܦܣܩܘܢ܃
10:18	ܗ݂ܘ ܕܝܢ ܐܡ݂ܪ܂ ܕܐܦܢ ܬܦܣܘܩ ܡܐܢܗ ܕܩܠܝ ܐܦ ܕܫܠܝܐ ܫܡ݁ܥ ܗܘ ܐܠܗܐ܃
10:19	ܗܐ ܡܪܫܠ ܠܟ ܠܫܢܐ ܦܣܘܩܝܗܝ܂ ܠܐ ܓܝܪ ܡܢ ܗܕܐ ܐܦ ܠܫܢ ܡܚܫ̈ܒܬܢ ܦܣ݁ܩ ܐܢܬ܃
10:20	ܟܕ ܗܢܝ ܠܢ ܡܛܠ ܐܠܗܐ ܪ̈ܝܫܝ ܗ̈ܕܡܝ ܦܓܪܢ ܠܚܒ݁ܠܐ ܝܗܒ݁ܝܢ ܚܢ݁ܢ܃
10:21	ܡܢܟ ܕܝܢ ܒܥܓܠ ܐܠܗܐ ܢ݂ܬ݂ܢܩܡ܂ ܠܠܫܢܐ ܓܝܪ ܕܙܡܝܪ̈ܬܐ ܐܠܗ̈ܝܬܐ ܙܡ݁ܪ ܗܘܐ ܦܣ݁ܩ ܐܢ݁ܬ܃