The Comprehensive Aramaic Lexicon

13:01	ܐܢ ܗ݂ܘ ܗܟܝܠ ܕܥܕܡܐ ܠܚ̈ܫܐ ܕܡܘܬܐ ܫܒܥܐ ܛ̈ܠܝܐ ܒܣ݁ܪܘ܂ ܡܢ ܟܘܠ ܕܘܟ ܝܕܝܥܐ݂ ܕܡܫܠܛ ܗܘ ܪܥܝܢܐ ܥܠ ܚܫ̈ܐ܃
13:02	ܐܟܙܢܐ ܓܝܪ ܕܐܠܘ ܐܫܬܥܒܕܘ ܠܚ̈ܫܐ ܘܐܟܠܘ ܕܡܣܝܒ܂ ܐܡ݁ܪܝܢ ܗܘܘ ܕܐܙܕܟܝܘ ܠܚ̈ܫܐ ܗܠܝܢ܃
13:03	ܗܫܐ ܕܝܢ ܕܠܐ ܗܘܐ ܗܟܢܐ܂ ܐܠܐ ܒܪܥܝܢܐ ܕܥܠ ܐܠܗܐ ܡܩܒܠ ܙܟܘ ܠܟܐ̈ܒܐ܃
13:04	ܠܝܬ ܠܡܒܣܪܘ ܥܠ ܐܘܚܕܢܗ ܕܪܥܝܢܐ܂ ܚܣܢܘ ܓܝܪ ܠܟܐ̈ܒܐ ܘܠܚܫ̈ܐ܃
13:05	ܐܝ݁ܟܢܐ ܗܟܝܠ ܠܐ ܢܘܕܐ ܕܗܘܬ ܠܘܬܗܘܢ ܙܟܘܬܐ ܕܥܠ ܚܫ̈ܐ ܒܒܘܝܢܐ܂ ܗ݀ܢܘܢ ܕܡܢ ܫ̈ܢܕܐ ܕܢܘܪܐ ܠܐ ܐܫܬܐܠܘ܃
13:06	ܐܝ݁ܟܢܐ ܓܝܪ ܕܡܓ̈ܕܠܐ ܕܥܒܝܕܝܢ ܐܝܟ ܣܟܪ̈ܐ ܩܕܡ ܠܡܐ̈ܢܐ ܠܠܘܚ̈ܡܐ ܕܓ̈ܠܠܐ ܡܒܛܠܝܢ܃ ܘܝܗ݀ܒܝܢ ܠܗܠܝܢ ܕܡܢ ܡܪܕܝܬܐ ܐܬܝܢ ܕܠܠܡܐܢܐ ܢܝܚܐ ܢܫܟܚܘܢ܃
13:07	ܗܟܢܐ ܐܦ ܚܟܡܬܐ ܕܫܒܥܬ ܡܓ̈ܕܠܐ ܕܥܠܝ̈ܡܐ ܗܠܝܢ݁܂ ܠܠܡܐܢܐ ܕܕܚܠܬ ܐܠܗܐ ܐܝܟ ܕܠܓܘ ܡܢ ܚܣ̈ܢܐ ܚܒܫܬ܂ ܘܠܚܫܐ ܕܡܢ ܫ̈ܢܕܐ ܙܟܬ܃
13:08	ܓܘܕܐ ܓܝܪ ܙܗܝܬܐ ܒܕܚܠܬ ܐܠܗܐ ܐܩܝܡܘ܂ ܘܠܚܕ̈ܕܐ ܠܒܒܘ ܟܕ ܐܡ݁ܪܝܢ܃
13:09	ܐܚܝܢܐܝܬ ܢܡܘܬ ܐܚ̈ܐ ܥܠ ܐ̈ܦܝ ܢܡܘܣܐ܂ ܢܬܕܡܐ ܒܬܠܬܐ ܛ̈ܠܝܐ ܕܒܐܬܘܪ܂ ܗܢ݁ܘܢ ܕܥܠ ܚܫ̈ܐ ܐܡܣܪܘ܃
13:10	ܠܐ ܢܫܦܠ ܡܢ ܕܠܡܚܘܝܘ ܫܪܪܢ܃
13:11	ܘܗܢܐ ܐܬܠܒܒܘ ܐܚ̈ܝ ܐܡ݁ܪ ܗܘܐ܂ ܗܢܐ ܕܝܢ ܚܠܝܨܐܝܬ ܢܣܝܒܪ܃
13:12	ܐܚܪܢܐ ܕܝܢ ܟܕ ܡܬܥܗܕ ܐܡ݁ܪ ܗܘܐ܂ ܐܬܕܟܪܘ ܡܢ ܐܝ݁ܟܐ ܐܝܬܝܟܘܢ܂ ܘܡܢ ܐܝ݂ܕܐ ܕܐܝ݁ܢܐ ܐܒܐ ܣܝܒܪ ܐܝܣܚܩ ܕܢܬܢܟܣ܃
13:13	ܟܠ ܚܕ ܚܕ ܡܢܗܘܢ ܕܝܢ ܐܟܚܕܐ ܟܕ ܪܘ݁ܙܝܢ ܘܠܒܝܒܝܢ ܐܡ݁ܪܝܢ ܗܘܘ܂ ܕܠܐܠܗܐ ܢܦܫܢ ܢܓܥܠ݂ ܡܢ ܟܠܗ ܠܒܢ܂ ܠܗ݀ܘ ܕܝܗ݂ܒ ܢܦܫ̈ܬܐ܂ ܘܢܬܠ ܡܛܘܠ ܢܛܘܪ̈ܬܗ ܕܢܡܘܣܐ ܓܘܫܡܢ܃
13:14	ܠܐ ܢܕܚܠ ܡܢ ܡ݁ܢ ܕܡܣܬܒܪ ܕܩ݁ܛܠ܃
13:15	ܩܝܢܕܘܢܣ ܓܝܪ ܪܒܐ ܕܢܦܫܐ ܗܘ܂ ܕܒܫܘܢܩܐ ܕܠܥܠܡ ܣܝ݂ܡ ܥܠ ܗ݀ܢܘܢ ܕܥ݁ܒܪܝܢ ܥܠ ܦܘܩ̈ܕܢܘܗܝ ܕܐܠܗܐ܂ ܢܙܕܝܢ ܗܟܝܠ ܒܡܫܠܛܘܬܐ ܕܥܠ ܚ̈ܫܐ ܕܐܝܬ ܠܪܥܝܢܐ ܕܕܚ݁ܠ ܡܢ ܐܠܗܐ܃
13:16	ܟܕ ܓܝܪ ܗܟܢܐ ܢܡܘܬ݂܂ ܐܒܪܗܡ ܘܐܝܣܚܩ ܘܝܥܩܘܒ ܢܩܒܠܘܢܢ ܘܟܠܗܘܢ ܐܒܗ̈ܝܢ ܢܩܠܣܘܢܢ܃
13:17	ܘܠܟܠ ܚܕ ܚܕ ܡܢܗܘܢ ܕܡܬܢܬܦ ܗܘܐ ܡܢ ܐܚܘ̈ܗܝ܂ ܐܡ݁ܪܝܢ ܗܘܘ ܠܗ ܗ݀ܢܘܢ ܕܡܫܬܚܪܝܢ܂ ܠܐ ܬܒܗܬ ܐܚܘܢ܂ ܠܐ ܬܕܓܠ ܒܐܚ̈ܝܟ ܗܠܝܢ ܕܐܙ݂ܠܘ܃
13:18	ܠܐ ܕܝܢ ܟܣ݂ܝܐ ܡܢܟܘܢ ܪܚܡܬܐ ܕܟܝܢܐ ܕܐܢܫܘܬܐ܂ ܗ݀ܝ ܕܒܛܝܠܘܬܐ ܐܠܗܝܬܐ ܕܒܟܠ ܚܟܝܡܐ ܒܝܕ ܐܒ̈ܗܐ ܠܗ݀ܢܘܢ ܕܡܬܝܠܕܝܢ ܦܠܓܬ܂ ܘܒܝܕ ܟܪ݁ܣ ܐܡܐ ܒܗܘܢ ܢܨܒܬ܃

13:19	ܕܒܗ݀ ܙܒ̈ܢܐ ܫܘ̈ܝܐ ܐܚ̈ܐ ܓܡ݂ܪܘ܂ ܘܒܗ݀ ܟܕ ܒ݁ܗ ܐܬܓܒܠܘ܂ ܘܡܢܗ ܟܕ ܡܢܗ ܕܕܡܐ ܪܒܘ܂ ܘܡܢܗ݀ ܬܘܒ ܕܢܦܫܐ ܫܘܚܘ ܘܐܬܘ ܠܡܫܡܠܝܘܬܐ܃

13:20	ܘܒܙܒ̈ܢܐ ܫܘ̈ܝܐ ܐܬܝܠܕܘ܂ ܘܡܢܗܝܢ ܟܕ ܡܢܗ݂ܝܢ ܕܡܥ̈ܝܢܐ ܕܚ݂݁ܠܒܐ ܐܫܬܝܘ܂ ܘܒܗܝܢ ܒܟܢ̈ܦܬܐ ܐܬܛܥܢܘ܂ ܘܡܢ ܗܠܝܢ ܚܘܒܐ ܕܚܕ̈ܕܐ ܒܢ̈ܦܫܬܗܘܢ ܗܘܐ܃
13:21	ܘܥܙܝܙܐܝܬ ܫ݂ܘܚ݁܂ ܡܛܠ ܚܕ ܥܢܝܢܐ ܕܬܪܒܝܬܐ ܘܥܝܕܐ ܕܒܟܠ ܝܘܡ ܕܥܡ ܚܕ̈ܕܐ܂ ܘܒܡܪܕܘܬܐ ܕܣ݂ܦܪܐ ܘܒܕܘܪܫܐ ܕܝܠܢ ܕܒܢܡܘܣܐ ܐܠܗܝܐ܃
13:22	ܟܕ ܗܟܝܠ ܗܟܢܐ ܐܝܬܝܗ݀ ܚܒܝܒܘܬ ܪܚܡܬܐ ܕܐܚ̈ܐ܂ ܗܠܝܢ ܫܒܥܐ ܐܚ̈ܝܢ ܝܬܝܪܐܝܬ ܒܚܘܒܐ ܕܚܕ̈ܕܕܐ ܐܣܝܪܝܢ ܗܘܘ܃
13:23	ܡܛܠ ܓܝܪ ܕܒܗ ܒܢܡܘܣܐ ܐܬܪܕܝܘ܃ ܘܒܗ݀ ܟܕ ܒܗ݀ ܒܡܝܬܪܘܬܐ ܐܬܝܠܦܘ܃ ܘܒܚ̈ܝܐ ܕܙܕܝܩܘܬܐ ܥܡ ܚܕ̈ܕܐ ܐܬܪܒܝܘ݂܂ ܝܬܝܪܐܝܬ ܠܚܕܕܐ ܡܚܒܒܝܢ ܗܘܘ܃
13:24	ܛܢܢܐ ܓܝܪ ܕܫܦܝܪ̈ܬܐ ܕܒܟܠܗܘܢ ܐܝܬ ܗܘܐ݂܂ ܝܬܝܪܐܝܬ ܠܚܘܒܗܘܢ ܘܠܐܘܝܘܬܗܘܢ ܐܬܩܦ܃
13:25	ܥܡ ܕܚܠܬ ܐܠܗܐ ܓܝܪ݂܂ ܐܦ ܗ݂ܘ ܗܢܐ ܛܢܢܐ ܠܐܚܘܬܗܘܢ ܥܠܝܗܘܢ ܪܘܪܒܐܝܬ ܡܪܚܡ ܗܘܐ܃
13:26	ܐܠܐ ܘܟܕ ܛܒ ܐܦ ܟܝܢܐ ܘܥܝܕܐ ܘ̈ܙܢܝܐ ܕܕܘܒ̈ܪܐ ܡܝܬܪ̈ܐ ܚܘܒܐ ܕܐܚܘܬܗܘܢ ܡܫܘܚ ܗܘܐ ܩܒ݁ܠܘ ܥܠܝܗܘܢ ܡܛܠ ܫܪܪܐ ܗܠܝܢ ܕܡܫܬܚܪܝܢ ܕܢܚܙܘܢ ܠܐܚܝ̈ܗܘܢ ܕܒܫ̈ܢܕܐ ܡܬܐܠܨܝܢ܃