The Comprehensive Aramaic Lexicon

14:01	ܘܠܐ ܗܘܐ ܒܠܚܘܕ ܗܕܐ݂܂ ܐܠܐ ܐܦ ܡܓܪܓܝܢ ܗܘܘ ܠܗܘܢ ܠܡܬܠ ܢܦܫܗܘܢ ܠܐܘܠܨ̈ܢܐ܂ ܐܝܟܢܐ ܕܠܐ ܗܘܐ ܒܠܚܘܕ ܥܠ ܐܘ̈ܠܨܢܐ ܢܒܣܪܘܢ݂܂ ܐܠܐ ܐܦ ܠܚ̈ܫܐ ܕܪܚܡܬ ܐܚܘܬܐ ܢܙܟܘܢ܃
14:02	ܐܘ ܚܘܫ̈ܒܐ ܕܝܬܝܪ ܡܢ ܡ̈ܠܟ݁ܐ ܡܡܠܟܝܢ܂ ܘܡܢ ܚܐܪ̈ܐ ܚܐܪܝܝܢ ܗܘܘ܃
14:03	ܐܘ ܠܫܘܝܘܬܐ ܕܪܘܟܒܐ ܕܩܠܗܘܢ ܕܛ̈ܠܝܐ ܫܒܥܐ ܕܥܠ ܐ̈ܦܝ ܫܪܪܐ܃
14:04	ܘܠܐ ܚܕ ܡܢ ܫܒܥܐ ܛ̈ܠܝܐ ܩܢ݂ܛܘ܂ ܘܠܐ ܡܢ ܡܘܬܐ ܕܚ݂ܠܘ܃
14:05	ܐܠܐ ܐܝܟ ܗ݀ܘ ܕܠܐܘܪܚܐ ܕܠܐ ܡܝܘܬܘܬܐ ܪܗ݀ܛܝܢ ܗܘܘ݂܂ ܟܘܠܗܘܢ ܠܡܘܬܐ ܕܒܝܕ ܫܢ̈ܕܐ ܐܣܬܪܗܒܘ܃

14:06	ܐܟܙܢܐ ܓܝܪ ܕܐܝ̈ܕܝܐ ܘܪ̈ܓܠܐ ܫܘܝܐܝܬ ܒܝܕ ܙܘ̈ܥܐ ܕܢܦܫܐ ܡ̈ܬܢܓܕܢ݂܂ ܗܟܢܐ ܐܦ ܛ̈ܠܝܐ ܗ݀ܢܘܢ ܙܗ̈ܝܐ݁܂ ܐܝܟ ܕܡܢ ܢܦܫܐ ܠܐ ܡܝܘܬܬܐ ܡܢ ܕܚܠܬ ܐܠܗܐ ܥܠ ܡܘܬܐ ܕܚܠܦܝܗ݀ ܠܚܕ̈ܕܐ ܫܠ݂ܡܘ܃

14:07	ܐܘ ܫܒܬܐ ܩܕܝܫܬܐ ܕܐܚ̈ܐ ܐܘ̈ܝܐ܂ ܐܝܟܢܐ ܓܝܪ ܕܝܘ̈ܡܐ ܫܒܥܐ ܕܥ݁ܒܘܕܘܬܐ ܐܝܬܝܗܘܢ ܡܬܟܪ̈ܟܝ‍<‍ܢ‍>‍ ܥܠ ܢܛܘܪ̈ܬܐ ܕܢܡܘܣܐ܃
14:08	ܗܟܢܐ ܐܦ ܥܠܝܡ̈ܐ ܗܠܝܢ ܟܕ ܕܝܨ݁ܝܢ ܒܫܒܝܥܝܘܬܗܘܢ ܡܬܟܪܟܝܢ ܗܘܘ܂ ܟܕ ܕܚܠܐ ܕܫܢ̈ܕܐ ܫ݂ܪܝܢ ܗܘܘ܃
14:09	ܗܫܐ ܚܢܢ ܕܫ݁ܡܥܝܢܢ ܐܘܠܨ̈ܢܝܗܘܢ ܕܥ̈ܠܝܡܐ ܗ݀ܢܘܢ ܡ݁ܣܬܪܕܝܢܢ܂ ܗ݀ܢܘܢ ܕܝܢ ܠܐ ܗܘܐ ܒܠܚܘܕ ܕܚ݁ܙܝܢ ܗܘܘ ܐܦ ܡܚܙܐ܂ ܘܠܐ ܒܠܚ݁ܘܕ ܕܫ݁ܡܥܝܢ ܗܘܘ ܡܠܬܐ ܕܠܘܚܡܐ ܡ݂ܢ ܫܠܝ܂ ܐܠܐ ܐܦ ܟܕ ܚ݁ܫܝܢ ܗܘܘ ܙܟ݁ܝܢ ܗܘܘ܃
14:10	ܘܗܠܝܢ ܠܟܐܒ̈ܐ ܚܪ̈ܝܦܐ ܕܢܘܪܐ ܕܡܢܗܘܢ ܡܕܡ ܕܩ݂ܫܐ ܠܝܬ܂ ܒܕܚܪܝܦ ܗܘܐ ܕܝܢ ܘܩܠܝܠ ܚܝܠܗ݀ ܕܢܘܪܐ݂܂ ܥܓܠ ܫ݁ܪܝܐ ܗܘܬ ܓܘܫܡ̈ܝܗܘܢ܃
14:11	ܘܠܐ ܬܣܒܪܘܢ ܕܕܘܡܪܐ ܗ݀ܝ܂ ܐܢ ܗ݂ܘ ܕܪ̈ܥܝܢܗܘܢ ܚܡܣܢܘ ܕܓܒܪ̈ܐ ܗܢ݁ܘܢ ܒܓܘ ܫ̈ܢܕܐ݁܂ ܐܝ݁ܟܐ ܕܐܦ ܠܒܗ݀ ܕܐܢܬܬܐ ܗܕܐ ܥܠ ܚ̈ܫܐ ܕܡܢ ܗܠܝܢ ܥܙܝܙܝܢ ܐܫܝܚ܃
14:12	ܐܡܐ ܓܝܪ ܕܫܒܥܐ ܥܠܝܡ̈ܐ ܗܠܝܢ܂ ܣܝ݂ܒܪܬ ܥܠܝܗ݀ ܫܢ̈ܕܐ ܕܥܠ ܟܠ ܚܕ ܚܕ ܡܢܗܘܢ ܥܕ݁ܝܢ ܗܘܘ܃
14:13	ܐܬܒܩܘ ܓܝܪ ܟܡܐ ܣܓܝܐ̈ܝܢ ܥܘܪ̈ܙܠܝ ܫܪ̈ܫܘܗܝ ܕܚܘܒܐ ܕܠܘܬ ܒܢ̈ܝܐ܂ ܢܓ݁ܕ ܓܝܪ ܒܟܘܠܗܝ݂ܢ ܕܢܓܘܠܘܢ ܪ̈ܚ݂ܡܐ܃
14:14	ܐܝܟ ܕܐܦ ܚܝܘ̈ܬܐ ܕܠܐ ܡܠܬܐ ܐܣܝܪܘܬ ܚܘܒܐ ܕܠܕܒ̈ܢܝܢܫܐ ܕܡ݁ܝܢ ܩ݂ܢܝܢ ܠܘܬ ܗܠܝܢ܂ ܕܡܢܗܝܢ ܐܬܝܠܕܘ܃
14:15	ܐܦ ܓܝܪ ܡܢ ܦܪܚܬܐ ܗ݀ܝ ܕܒܫܝܢܐ ܘܒܓܘ ܒܝܬܐ܂ ܬܚܝܬ ܡܛܠܠܐ ܥܐܠܐ ܡܬܟܬܫܐ ܚܠܦ ܦܪ̈ܘܓܝܗ݀܃
14:16	ܐܝ݁ܕܐ ܕܝܢ ܕܒܪ̈ܫܝ ܛܘ݂̈ܪܐ ܘܒܫ̈ܢܢܬܐ ܕܫܩ̈ܝܦܐ ܘܒܚܘܪ̈ܐ ܕܐ̈ܝܠܢܐ݁܂ ܘܒܪ̈ܫܝܗܘܢ ܩܢ݂݁ܐ ܓܕ݁ܠܐ ܘܣܝܡ݁ܐ ܦܪ̈ܘܓܝܗ݀܃
14:17	ܠܐܚܘܕܗܘܢ ܟܠܝܐ ܟܕ ܛ݁ܝܪܐ ܥܠܝܗܘܢ ܘܡܬܟܪܟܐ܂ ܘܟܐ݁ܒ ܠܗ݀ ܡܢ ܪ̈ܚܡܝܗ݀܂ ܘܒܝܕ ܩܠܗ݀ ܩ݁ܪܝܐ ܠܗܘܢ ܘܟܡܐ ܕܡܨܝܐ ܡܥܕܪܐ ܠܒܢ̈ܝܗ݀܃
14:18	ܘܡܢܐ ܡܬܒܥܐ ܕܚܘܒܐ ܕܒܚܝ̈ܘܬܐ ܕܠܐ ܡܠܬܐ ܐܝܬ ܠܘܬ ܒܢܝܗܝܢ ܠܡܚܘܝܘ܃
14:19	ܐܝ݁ܟܐ ܕܐܦ ܕܒܘܪ̈ܝܬܐ ܒܙܒܢܐ ܕܟܟܪ̈ܝܬܐ ܩܛܪ̈ܢ܂ ܟ̈ܠܝܢ ܘܡܬܡܪܡܪ̈ܢ ܥܠ ܗܠܝܢ ܕܒܥܝܢ ܕܢܩܪܒܘܢ ܠܗܝܢ܂ ܘܐܝܟ ܕܒܦܪܙܠܐ ܒܝܕ ܥܘ̈ܩܣܝܗܝܢ ܛܪ̈ܝܢ ܠܐܝܠܝܢ ܕܡܬܩܪܒܝܢ ܠܒܢܝܗܝܢ܂ ܘܥܕܡܐ ܠܡܘܬܐ ܡܬܢܩ̈ܡܢ܃
14:20	ܐܠܐ ܠܢܦܫܐ ܕܐܝܟ ܕܐܒܪܗܡ ܐܝܬܝܗ݀ ܗܘܬ ܕܐܡܗܘܢ ܕ̈ܛܠܝܐ܂ ܠܐ ܐܙܝܥ ܚܘܒܐ ܕܒܢ̈ܝܐ܃