The Comprehensive Aramaic Lexicon

17:01	ܐܡ݁ܪܝܢ ܗܘܘ ܕܝܢ ܐܦ ܐܢ̈ܫܝܢ ܡܢ ܦܠ݂ܚ̈ܐ܂ ܕܟܕ ܥܬܝܕܐ ܗܘܬ ܕܬܬܐܚܕ ܐܦ ܗ݂ܝ ܠܡܘܬܐ܂ ܕܕܠܐ ܐܢܫ ܢܩܪܘܒ ܠܓܘܫܡܗ݀܂ ܗ݂ܝ ܡܢ ܨܒܝܢܗ݀ ܢܦܫܗ݀ ܥܠ ܢܘܪܐ ܫܕܬ܃
17:02	ܐܘ ܐܡܐ ܕܥܡ ܒܢܝܟܝ ܫܒܥܐ ܩܛܝܪܗ ܕܛܪܘܢܐ ܣܚܦܬܝ ܘܨܢ̈ܥܬܗ ܒܛܠܬܝ܂ ܘܚܠܝܨܘܬܐ ܕܗܝܡܢܘܬܟܝ ܚܘܝܬܝ܃
17:03	ܐܟܙܢܐ ܓܝܪ ܕܬܛܠܝܠܐ ܐܝܬܝܟܝ ܗ݂ܘܝܬܝ܂ ܘܥܠ ܒܢܝܟܝ ܐܝܟ ܕܥܠ ܥܡ̈ܘܕܐ ܡܫܪܪܐܝܬ ܣܡܝܟܐ ܗ݂ܘܝܬܝ܂ ܘܕܠܐ ܢܘ‍{‍ܪ‍}‍‍<‍ܕ‍>‍ܐ ܣܝܒܪܬܝ ܙܘܥܐ ܕܒܝܕ ܫ̈ܢܕܐ܃
17:04	ܐܬܬܟܠ ܗܟܝܠ ܡܟܝܠ ܐܘ ܐܡܐ ܙܗܝܬܐ܂ ܕܣܒܪܐ ܕܚܘܡܣܢܟܝ ܐܫܬܪܪ ܠܟܝ ܠܘܬ ܐܠܗܐ܃
17:05	ܠܐ ܗܟܢܐ ܣܗܪܐ ܒܫܡܝܐ ܗܕܝܪ݁܂ ܐܝܟ ܡܐ ܕܐܢܬ ܝܩܝܪܬܝ ܩܕܡ ܐܠܗܐ ܕܠܫܒܥܐ ܒ̈ܢܝܐ ܢܨܝ̈ܚܐ݂܂ ܐܚ݂ܕܬ ܒܐܝܕܝܗܘܢ܂ ܘܢܗܪܬ ܐܢܘܢ ܕܢܐܬܘܢ ܠܘܬ ܫܪܪܐ܂ ܘܐܝܬܝܟܝ ܒܫܡܝܐ ܥܡܗܘܢ܃
17:06	ܐܝܬܘܗܝ ܗܘܐ ܓܝܪ ܝܠܕܐ ܕܒܢܝܟܝ ܡܢ ܐܒܘܢ ܐܒܪܗܡ܃
17:07	ܘܐܠܘ ܦܫܝܩ ܗܘܐ ܠܢ ܕܥܠ ܡܕܡ ܬܫܥܝܬܐ ܕܪܚܡܬ ܫܪܪܟܝ ܠܡܨܪ܃ ܐܣܬܪܕܘ ܚܙ̈ܝܐ ܕܚ݁ܙܝܢ ܗܘܘ܂ ܕܐܡܐ ܕܫܒܥܐ ܒ̈ܢܝܢ ܡܛܠ ܫܪܪܐ ܫܢ̈ܕܐ ܡܫܚ̈ܠܦܐ ܣ݁ܒ݁ܠܐ܃
17:08	ܐܦ ܓܝܪ ܙܕ݁ܩ ܗܘܐ ܕܒܩܘܠܣܐ ܕܡܘܬܟܝ݁܂ ܠܡܟܬܒ ܗܠܝܢ ܥܠ ܩܒܪܟܝ܂ ܕܗ̈ܘܝ ܡܡ̈ܠܠܢ ܘܡ̈ܥܗܕܢ ܠܥܡܐ݁܃
17:09	ܕܬܢܢ ܟܗܢܐ ܣ݁ܒܐ ܘܐܢܬܬܐ ܣܒܬܐ ܘܫܒܥܐ ܒܢܝܗ݀ ܫܦܝܪ ܡܥܦܝܢ܂ ܡܛܠ ܛܪܘܢܐ ܕܨ݁ܒܐ ܗܘܐ ܠܡܣܬܪ ܛܘܟ̈ܣܐ ܕܢܡܘܣܐ ܘܕܘܒܪ̈ܐ ܕܥܒܪ̈ܝܐ܃
17:10	ܗ݀ܢܘܢ ܬܒܥܘ ܨܥܪܗ ܕܢܡܘܣܐ ܘܕܥܡܐ ܕܚ݁ܪܘ ܒܐܠܗܐ܂ ܘܥܕܡܐ ܠܡܘܬܐ ܫܢ̈ܕܐ ܣܝ݁ܒܪܘ܃
17:11	ܫܪܝܪܐܝܬ ܓܝܪ ܐܓܘܢܐ ܕܒܐܝ̈ܕܝܗܘܢ ܗ݂ܘܐ݂܂ ܐܓܘܢܐ ܗܘܐ ܕܡܛܠ ܐܠܗܐ܃
17:12	ܡܝܬܪܘܬܐ ܓܝܪ ܣ݁ܡܬܗ ܗܘܐ ܠܐܓܘܢܐ ܗ݀ܝܕܝܟ܂ ܟܕ ܒܝܕ ܡܣܝܒܪܢܘܬܐ ܒܚ݁ܪܐ ܗܘܬ ܠܗ݀ ܠܙܟܘܬܐ܂ ܘܝܗ݀ܒܐ ܗܘܬ ܠܐ ܡܬܚܒܠܢܘܬܐ ܒܚ̈ܝܐ ܕܠܐ ܡܝܬܝܢ܃
17:13	ܐܠܝܥܙܪ ܕܝܢ ܠܘܩܕܡ ܠܐܓܘܢܐ ܢܚ݂ܬ ܗܘܐ܂ ܘܫܒܥܐ ܛ̈ܠܝܝܢ ܘܐܡܗܘܢ܂ ܒܬܪ ܟܢ ܡܬܟܬܫܝܢ ܗܘܘ܃
17:14	ܘܛܪܘܢܐ ܒܥܠܕܪܐ ܐܝܬܘܗܝ ܗܘܐ܂ ܘܥܠܡܐ ܕܝܢ ܐܝܬܘܗܝ ܗܘܐ ܚܙܝܐ܃
17:15	ܕܚܠܬ ܐܠܗܐ ܕܝܢ ܙܟ݁ܝܐ ܗܘܬ܂ ܟܕ ܡܟܠܠܐ ܠܐܬ̈ܠܝܛܝܗ݀܃
17:16	ܡ݂ܢܘ ܗ݀ܘ ܕܠܐ ܬܗ݂ܪ ܒܐ̈ܬܠܝܛܐ ܕܡܝܬܪܘܬܐ ܐܠܗܝܬܐ܂ ܐܘ ܡܢܘ ܕܠܐ ܐܬܕܡܪ܃
17:17	ܗ݂ܘ ܛܪܘܢܐ ܩܢܘܡܗ ܘܟܘܠܗܘܢ ܒܢ̈ܝ ܡܠܟܗ ܬܗܪܘ ܗܘܘ ܒܡܚܡܣܢܢܘܬܗܘܢ܃
17:18	ܕܡܛܠܬܗ ܥܠ ܓܒ ܟܘܪܣܝܐ ܐܠܗܝܐ ܩܝ݁ܡܝܢ܂ ܘܒܐܬܪܐ ܕܡܠ݂ܐ ܢܝ̈ܚܐ ܘܛܘ̈ܒܐ ܡܕܝܪܝܢ܃
17:19	ܐܦ ܓܝܪ ܡܘܫܐ ܐܡ݂ܪ܂ ܕܟܠܗܘܢ ܩܕܝ̈ܫܐ ܬܚܝܬ ܐܝ̈ܕܝܗܘܢ ܐܝܬܝܗܘܢ܃
17:20	ܘܗ݀ܢܘܢ ܗܟܝܠ ܐܬܩܕܫܘ ܘܡܛܠ ܐܠܗܐ ܐܬܝ݁ܩܪܘ܂ ܘܠܐ ܗܘܐ ܒܠܚܘܕ ܒܗܢܐ ܐܝܩܪܐ܂ ܐܠܐ ܐܦ ܕܡܛܠܬܗܘܢ ܥܡܢ ܠܒܥ̈ܠܕܒܒܘܗܝ ܙܟ݂ܐ܃
17:21	ܘܛܪܘܢܐ ܡܣܡ ܒܪܫܐ ܩ݁ܒܠ܂ ܘܐܬܪܢ ܐܬܕܟܝ܃
17:22	ܐܝܟ ܗ݀ܘ ܓܝܪ ܕܕܡܗܘܢ ܕܛܘܒ̈ܢܐ ܗܠܝܢ ܚܠܦ ܚܛܗ̈ܘܗܝ ܕܥܡܐ ܐܬܐܫܕ܂ ܘܡܘܬܗܘܢ ܐܝܬܘܗܝ ܗܘܐ ܬܪܥܘܬܐ܂ ܒܛܝܠܘܬܐ ܕܐܠܗܐ ܠܐܝܣܪܐܝܠ ܕܡܡܚܝ ܗܘܐ ܦܪܩܬ܃
17:23	ܛܪܘܢܐ ܓܝܪ ܐܢܛܝܟܘܣ ܕܚܕ ܒܓܢܒܪܘܬܐ ܕܡܝܬܪܘܬܗܘܢ ܘܒܡܚܡܣܢܢܘܬܗܘܢ ܕܒܐ̈ܘܠܨܢܐ ܐܟܪܙ ܠܦܠܚ̈ܘܗܝ ܕܒܡܣܝܒܪܘܬܐ ܕܗܠܝܢ ܢܗܘܘܢ ܡܬܕܡܝܢ܂ ܘܓܪܓ ܐܢܘܢ ܕܡܢ ܕܡܘܬܐ ܗܕܐ܃

17:24	ܕܢܗܘܘܢ ܢܚܫܝܪ̈ܬܢܐ ܘܠܒܝ̈ܒܐ ܒܪܓܠܘܬܐ ܘܒܦܪܫܘܬܐ ܕܗܘܘ ܚ݁ܣܢܝܢ ܠܡ̈ܕܝܢܬܐ ܒܚܒ̈ܫܐ܂ ܘܒܕܓܘܢ ܙܟ݂ܐ ܘܚ݂ܪܒ ܠܟܠܗܘܢ ܒܥܠܕܒ̈ܒܘܗܝ܃