The Comprehensive Aramaic Lexicon

07:01	ܗܝܕܝܢ ܣܝܣܝܢܘܣ ܗܘܦܪܟܐ ܕܣܘܪܝܐ ܥܡܝܩܬܐ ܘܕܦܘܢܝܩܐ ܘܣܬܪܘܒܘܪܙܝܢܘܣ ܘܚܒܪ̈ܐ ܕܐܟܚܕܐ ܟܕ ܢܩܦܘ ܠܗܠܝܢ ܕܡܢ ܡܠܟܐ ܕܪܝܘܫ ܐܬܦܩܕܝܢ
07:02	ܩܝܡܝܢ ܗܘܘ ܥܠ ܥܒ̈ܕܐ ܕܟܗܢܝ̈ܬܐ ܟܕ ܝܬܝܪ ܝܨܝܦܐܝܬ ܡܥܕܪܝܢ ܗܘܘ ܠܩܫܝ̈ܫܐ ܕܝܘ̈ܕܝܐ ܘܩܝܘ̈ܡܐ ܟܗ̈ܢܝܐ
07:03	ܘܡܬܬܨܠܚ̈ܢܐ ܗܘܘ ܥܒ̈ܕܐ ܟܗ̈ܢܝܐ ܟܕ ܡܬܢܒܝܢ ܗܘܘ ܚܓܝ ܘܙܟܪܝܐ ܢܒ̈ܝܐ
07:04	ܘܫܡܠܝܘ ܗܠܝܢ ܒܝܕ ܦܘܩܕܢܐ ܕܡܪܝܐ ܐܠܗܐ ܕܐܝܣܪܐܝܠ ܘܥܡ ܦܘܩܕܢܐ ܕܟܘܪܫ ܘܕܕܪܝܘܫ ܘܕܐܪܬܚܫܫܬ ܡ̈ܠܟܐ ܕܦܪ̈ܣܝܐ ܥܕܡܐ ܠܫܢܬܐ ܫܬܝܬܝܬܐ ܕܕܪܝܘܫ ܡܠܟܐ ܕܦܪ̈ܣܝܐ
07:05	ܐܫܬܡܠܝ ܗܘ ܩܕܝܫܐ ܥܕܡܐ ܠܬܠܬܐ ܘܥܣܪ̈ܝܢ ܕܝܪܚܐ ܐܕܪ ܕܫܢܬܐ ܫܬܝܬܝܬܐ ܕܡܠܟܐ ܕܪܝܘܫ
07:06	ܘܥܒܕܘ ܒܢܝܐ ܕܐܝܣܪܐܝܠ ܘܟܗ̈ܢܐ ܘܠܘ̈ܝܐ ܘܗܢܘܢ ܕܫܪܟܐ ܕܡܢ ܫܒܝܬܐ ܗܢܘܢ ܕܐܬܬܘܣܦܘ ܢܩܝܦܐܝܬ ܠܗܢܝܢ ܕܒܟܬܒܐ ܕܡܘܫܐ
07:07	ܘܩܪܒܘ ܠܚܘܕܬܐ ܕܗܝܟܠܗ ܕܡܪܝܐ ܬܘܪ̈ܐ ܡܐܐ ܕܟܪ̈ܐ ܡܐܬܝ̈ܢ ܐܡܪ̈ܐ ܐܪ̈ܒܥܡܐܐ
07:08	ܨܝܦܪ̈ܝܐ ܕܚܠܦ ܚܛܗ̈ܐ ܕܟܠܗ ܐܝܣܪܐܝܠ ܬܪ̈ܥܣܪ ܐܝܟ ܡܢܝܢܐ ܡܢ ܪ̈ܝܫܢܝ ܫܪ̈ܒܬܐ ܕܐܝܣܪܐܝܠ ܬܪ̈ܥܣܪ
07:09	ܘܩܡܘ ܟܗ̈ܢܐ ܘܠܘ̈ܝܐ ܐܝܟ ܫܪ̈ܒܬܐ ܥܠ ܥܒ̈ܕܐ ܕܡܪܝܐ ܐܠܗܐ ܕܐܝܣܪܐܝܠ ܢܩܝܦܐܝܬ ܠܟܬܒܐ ܕܡܘܫܐ ܘܬܪ̈ܥܐ ܥܠ ܟܠܚܕ ܡܢ ܬܪ̈ܥܐ
07:10	ܘܥܒܕܘ ܒܢܝܐ ܕܐܝܣܪܐܝܠ ܗܢܘܢ ܕܡܢ ܫܒܝܬܐ ܦܨܚܐ ܒܐܪ̈ܒܥܣܪܐ ܕܝܪܚܐ ܩܕܡܝܐ ܡܛܠ ܕܐܬܕܟܝܘ ܟܗ̈ܢܐ ܘܠܘ̈ܝܐ ܐܟܚܕܐ
07:11	ܘܟܠܗܘܢ ܒܢܝܐ ܕܫܒܝܬܐ ܠܐ ܐܬܕܟܝܘ ܗܘܘ ܡܛܠ ܕܠܘ̈ܝܐ ܟܠܗܘܢ ܐܟܚܕܐ ܐܬܕܟܝܘ
07:12	ܘܕܒܚܘܗܝ ܠܦܨܚܐ ܠܟܠܗܘܢ ܒ̈ܢܝܐ ܕܫܒܝܬܐ ܘܠܐܚ̈ܐ ܕܝܠܗܘܢ ܠܟܗ̈ܢܐ ܘܠܗܘܢ

07:13	ܘܐܟܠܘ ܒܢܝܐ ܕܐܝܣܪܐܝܠ ܗܢܘܢ ܕܡܢ ܫܒܝܬܐ ܟܠܗܘܢ ܗܢܘܢ ܕܐܬܦܪܫܘ ܡܢ ܢܕܝܕܘܬܐ ܕܥܡ̈ܡܐ ܕܐܪܥܐ ܟܕ ܒܥܝܢ ܠܡܪܝܐ

07:14	ܘܥܒܕܘ ܠܥܐܕܐ ܕܦܛܝܪ̈ܐ ܫܒܥܐ ܝܘ̈ܡܐ ܟܕ ܚܕܝܢ ܩܕܡ ܡܪܝܐ
07:15	ܡܛܠ ܕܫܚܠܦ ܠܡܚܫܒܬܐ ܕܡܠܟܐ ܕܐܬܘܪ̈ܝܐ ܥܠܝܗܘܢ ܠܡܚܝܠܘ ܐܝܕܝ̈ܗܘܢ ܥܠ ܥܒ̈ܕܐ ܕܡܪܝܐ ܐܠܗܐ ܕܐܝܣܪܐܝܠ