The Comprehensive Aramaic Lexicon

09:01	ܘܟܕ ܩܡ ܥܙܪܐ ܡܢ ܕܪܬܐ ܕܗܝܟܠܐ܂ ܐܙܠ ܠܒܝܬ ܓܙܐ ܕܝܘܢܬܢ ܒܪܗ ܕܐܠܝܫܒ
09:02	ܘܒܬ ܬܡܢ܂ ܟܕ ܠܚܡܐ ܠܐ ܛܥ݂ܡ݂܂ ܘܠܐ ܡܝ̈ܐ ܐܫܬܝ܂ ܟܕ ܐܒܝܠ ܚܠܦ ܠܐ ܢܡܘܣ̈ܝܘܬܐ ܗܠܝܢ ܪ̈ܘܪܒܬܐ ܕܣܘܓܐܐ܀

09:03	ܘܗܘ݂ܬ ܟܪܘܙܘܬܐ ܒܟܠܗ݀ ܝܗܘܕ ܘܒܐܘܪܝܫܠܝܡ ܠܟܠܗܘܢ ܗ݀ܢܘܢ ܕܡܢ ܫܒܝ݂ܬܐ ܕܢܥܠܘܢ ܠܐܘܪܝܫܠܡ܂

09:04	ܘܟܠܗܘܢ ܗ݀ܢܘܢ ܕܐܢ ܠܐ ܢܦܓܥܘܢ ܒܗܠܝܢ ܬܪ̈ܝܢ ܐܘ ܬܠܬܐ ܝܘ̈ܡܬܐ ܐܝܟ ܕܝ݂ܢܐ ܕܩܫܝ̈ܫܐ ܘܪ̈ܝܫܝ ܡܘܬܒܐ ܢܬܟ݁ܗܢܘܢ ܒܥܝܪ̈ܐ ܕܝܠܗܘܢ܂ ܘܗ݂ܘ ܢܬܢ݁ܟܪܐ ܡܢ ܣܘܓܗ݀ ܕܫܒܝ݂ܬܐ܂
09:05	ܘܐܬܟܢܫܘ ܟܠܗܘܢ ܗ݀ܢܘܢ ܕܡܢ ܫܪܒܬܐ ܕܝܗܘܕܐ ܘܕܒܢܝܡܝܢ܂ ܒܬܠܬܐ ܝܘ̈ܡܬܐ ܠܐܘܪܝܫܠܝܡ܂ ܗܢܐ ܗܘ ܝܪܚܐ ܬܫܝܥܝܐ݂܂ ܒܥܣܪܝܢ ܒܝܪܚܐ܂
09:06	ܘܝܬܒ݂ܘ ܐܟܚܕܐ ܟܠܗ ܣܘܓܐܐ݂܂ ܒܪ̈ܘܚܬܐ/ܒܐܘܪ̈ܚܬܐ/ ܕܗܝܟܠܐ܂ ܟܕ ܪܥܠܝܢ܂ ܗܘܘ ܡܛܠ ܕܣܬܘܐ ܩ݁ܐܡ ܗܘܐ ܀
09:07	ܘܟܕ ܩܡ ܥܙܪܐ݂܂ ܐܡ݂ܪ ܠܗܘܢ܂ ܐܢܬܘܢ ܐܥ݂ܘܠܬܘܢ ܘܐܥܡܪܬܘܢ ܥܡܟܘܢ ܢܫ̈ܐ ܐܚܪ̈ܢܝܬ ܓܢܣܐ܂ ܠܡܘܣܦܘ ܚܛܗ̈ܐ ܕܐܝܣܪܐܝܠ܂
09:08	ܐܦܢ ܗܫܐ݂܂ ܗܒܘ ܬܘܕܝܬܐ ܘܬܫܒܘܚܬܐ ܠܡܪܝܐ ܐܠܗܐ ܕܐܒ̈ܗܐ ܕܝܠܢ܂
09:09	ܘܥܒܸܕܘ ܨܒܝܢܐ ܕܝܠܗ܂ ܘܐܬܦܪܫܘ ܡܢ ܥܡ̈ܡܐ ܕܐܪܥܐ܂ ܘܡܢ ܢܫ̈ܐ ܗܠܝܢ ܐܚܪ̈ܢܝܬ ܓܢܣܐ ܀
09:10	ܘܐܙܥܩܘ ܗܘܘ ܣܘܓܐܐ ܘܐܡ݂ܪܘ ܒܩܠܐ ܪܡܐ܂ ܗܟܢܐ ܐܝܟ ܕܐܡ݂ܪܬ ܢܥ݂ܒܕ܂
09:11	ܐܠܐ ܗ݂ܘ ܣܘܓܐܐ ܣ݁ܓܝ܂ ܘܫ݁ܥܬܐ ܣܬܘܝܬܐ ܗܝ܂ ܘܠܐ ܡܨ݂ܝܢܢ ܠܡܩܡ ܬܚܝܬ ܐܬܝܪ܂ ܘܥ݁ܒܕܐ ܠܐ ܐܝܬܘܗܝ ܠܢ ܝܘܡܐ ܚܕ ܘܠܐ ܬܪ̈ܝܢ܂ ܣܘܓܐܐ ܓܝܪ ܚܛܝܢܢ ܒܗܠܝܢ܂
09:12	ܢܩܘܡܘܢ ܗܟܝܠ ܪ̈ܝܫܢܐ ܩܕܡܝ̈ܐ ܕܣܘܓܐܐ܂ ܘܟܠܗܘܢ ܗ݀ܢܘܢ ܕܡܢ ܒܝܬ ܡܥܡܪܐ ܕܝܠܢ܂ ܗܢܘܢ ܕܐܝܬ ܠܢ ܢܫ̈ܐ ܐܚܪ̈ܢܝܬ ܓܢܣܐ ܢܐܬܘܢ܂ ܟܕ ܢܣ݁ܒܝܢ ܙܒ݂݁ܢܐ
09:13	ܘܡܢ ܟܠ ܕܘܟܬܐ܂ ܩܫܝ̈ܫܐ ܘܕܝ̈ܢܐ܂ ܥܕܡܐ ܕܢܫ݂ܪܐ ܠܪܘܓܙܐ ܕܡܪܝܐ ܕܣܘܥܪܢܐ ܗܢܐ ܀
09:14	ܝܘܢܬܢ ܕܝܢ ܗ݀ܘ ܕܚܙܐܝܠ ܘܚܙܝܐ ܗ݀ܘ ܕܬܘܩܢܐ܂ ܩ݁ܒ݂ܠܘ ܕܐܝܟ ܗܠܝܢ܂ ܘܡܘܫܐ ܘܝܢܐܒ܂ ܘܠܘܝ ܘܫܒܛܝܐ ܐܡܨܥܘ ܒܝܢܬܗܘܢ
09:15	ܘܥܒ݂ܕܘ ܐܝܟ ܟܠܗܝܢ ܗܠܝܢ܂ ܗܢܘܢ ܕܡܢ ܫܒܝ݂ܬܐ ܀
09:16	ܘܓܒ݂ܐ ܠܗ ܥܙܪܐ ܗ݀ܘ ܟܗܢܐ܂ ܓܒܪ̈ܐ ܪ̈ܝܫܢܐ ܕܫܪ̈ܒܬܐ ܕܝܠܗܘܢ܂ ܟܠܗܘܢ ܒܫܡܐ܂ ܘܝܬܒ݂ܘ ܐ݁ܟܚܕܐ ܒܢܘܡܢܝܐ ܕܝܪܚܐ ܕܥܣܪܐ܂ ܠܡܩܡܘ ܣܘܥܪܢܐ܂
09:17	ܘܐ̈ܬ݂ܝ ܠܐ̈ܦܝ ܫܘ̈ܠܡܐ܂ ܗܠܝܢ ܕܝܠܗܘܢ܂ ܓܒܪ̈ܐ ܗ݀ܢܘܢ ܕܐܚܝܕܝܢ ܗܘܘ ܢܫ̈ܐ ܐܚܪ̈ܢܝܬ ܓܢܣܐ܂ ܥܕܡܐ ܠܢܘܡܢܝܐ ܕܝܪܚܐ ܩܕܡܝܐ܂
09:18	ܘܐܫܬܟܚܘ ܡܢ ܟܗ̈ܢܐ ܗ݀ܢܘܢ ܕܐܬܟܢܫܘ ܕܢܫ̈ܐ ܐܚܪ̈ܢܝܬ ܓܢܣܐ ܐܝܬ ܠܗܘܢ܂
09:19	ܡܢ ܒ̈ܢܝܐ ܕܝܫܘܥ ܗܘ ܕܝܘܙܕܩ ܘܡܢ ܐܚ̈ܐ ܕܝܠܗ ܡܬܝܐ ܘܐܠܝܥܙܪ ܘܝܘܪܝܒܐ܂ ܘܝܘܢܕܒ܂
09:20	ܘܐܪܡܝܘ ܐ‍[‍ܝܕ‍]‍ܐ ܠܡ݁ܦܩܘ ܠܢܫ̈ ܕܝܠܗܘܢ ܀ ܘܠܚܘܣܝܐ ܕܟܪ̈ܐ܂ ܚܠܦ ܠܐ ܝܕܥܬܐ ܕܝܠܗܘܢ ܀
09:21	ܘܡܢ ܒ̈ܢܝܐ ܕܐܡܪܝܐ ܚܢܢܝܐ ܘܙܟܪܝܐ ܘܡܐܢܝ ܘܫܡܥܝܐ ܘܡܢ ܒ̈ܢܝܐ ܕܐܘܡܢ ܡܥܣܝܐ ܘܡܥܢܐ ܘܫܡܥܝܐ ܘܢܪܝܐܝܠ ܘܥܙܪܝܐ ܀
09:22	ܡܢ ܒ̈ܢܝܐ ܕܦܝܢܚܣ ܐܠܚܢܢ ܘܡܥܣܝܐ ܐܫܡܥܝܠ ܘܢܬܢܐܝܠ ܘܩܝܢܝܪܘܣ ܘܫܥܐܬܐ
09:23	ܘܡܢ ܠܘ̈ܝܐ ܙܒܕܐ ܘܫܡܥܝ ܘܩܘܠܝܐ ܗܢܐ ܐܝܬܘܗܝ ܩܠܝܐܛܝܘܣ ܘܦܬܘܫ ܘܝܗܘܕܐ ܘܝܘܢܢ܂
09:24	ܘܡܢ ܡܙܡܪ̈ܢܐ ܟܗ̈ܢܝܐ ܐܠܝܣܒ ܒܟܘܪܐ܂
09:25	ܘܡܢ ܒ̈ܢܬܐ ܕܫܘܠܡ ܘܛܘܒܠܢ܂
09:26	ܡܢ ܐܝܣܪܐܝܠ ܀ ܡܢ ܒ̈ܢܝܐ ܕܦܪܘܨ ܐܝܪܡܝܐ܂ ܝܕܥܝܐ ܘܡܠܟܝ܂ ܘܡܝܚܐܝܠ ܐܠܝܥܙܪ ܘܚܫܒܠܝܐ܂ ܘܒܢܝܐ ܀
09:27	ܡܢ ܒ̈ܢܝܐ ܕܐܘܠܥ ܘܕܡܬܢܝܐ ܘܕܙܟܪܝܐ ܥܙܘܪܐܝܠ ܘܫܐܘܥܕܝܐ ܘܝܪܝܡܘܬ ܘܝܕܥܝܐ ܀
09:28	ܘܡܢ ܒ̈ܢܝܐ ܕܬܬܘܡ܂ ܐܠܝܕܥ ܐܠܝܫܡܥ ܥܘܬܢܝܐ ܛܪܝܡܘܣ ܘܫܒܛܝܐ ܘܙܪܕܝܐ܂܀
09:29	ܘܡܢ ܒ̈ܢܝܐ ܕܒܝܒܠ ܝܘܚܢܢ ܘܚܢܢܝܐ ܘܙܟܪܝܐ ܘܚܡܬܝܐ܂
09:30	ܘܡܢ ܒܢܝܡܝܢ܂ ܘܠܡ܂ ܡܠܘܟܘܣ܂ ܝܕܥܝܐ܂ ܝܫܘܒ܂ ܘܐܓܝܠܘܫ܂ ܘܝܪܝܡܘܬ܂
09:31	ܘܡܢ ܒ̈ܢܝܐ ܕܥܕܝ ܢܚܬܘܫ ܒܣܐܘܣ ܐܝܣܡܘ ܘܣܝܣܐܝܠ ܘܒܥܢܐ ܘܡܢܫܐ܂܀
09:32	ܘܡܢ ܒ̈ܢܝܐ ܕܚܢܢ ܐܠܝܘܥܐ ܘܐܘܫܝܐ ܘܡܠܟܝ ܘܫܒܐܐ ܘܣܝܡܘܢܝܟܘܢܘܣ ܚܡܝܐ ܀
09:33	ܘܡܢ ܒ̈ܢܝܐ ܕܢܚܫܘܡ ܡܛܬܢܝܐ ܘܡܛܬܢܐ ܘܒܢܝܐ ܘܐܠܝܦܠܛ ܘܡܢܫܐ ܘܫܘܡܥܝ܂܀
09:34	ܘܡܢ ܒ̈ܢܝܐ ܕܒܥܢܝ ܐܝܪܝܡܝܐ ܘܡܘܥܕܫ ܐܝܫܡܥܐܝܠ ܒܪܗ ܕܐܠܡܕܐ ܘܦܝܫܝܐ ܘܚܙܘ ܘܐܒܝܨܗܝܘܢ ܘܐܠܝܬܫܘܥ ܘܐܡܛܝܠܝܡܘܣ ܐܠܝܫܡܝܫ ܫܠܡܝܐ ܢܬܢܝܐ܂ ܘܡܢ ܒܢܝܐ ܕܙܪܚ ܫܝܫܝ ܐܨܒܪܝܐ ܚܙܝܠ ܫܡܘܛ ܙܡܪܝ܂ ܝܘܣܦ݁܀
09:35	ܡܢ ܒ̈ܢܝܐ ܕܢܘܥܡܐ ܡܪܛܝܐ܂ ܙܒܕܝܐ ܚܕܝܐ ܝܘܐܬܪ ܒܢܝܐ ܀
09:36	ܟܠܗܘܢ ܗܠܝܢ ܐܥ݂ܡܪܘ ܥܡܗܘܢ ܢ̈ܫܐ ܐܚܪ̈ܢܝܬ ܓܢܣܐ܂ ܘܫ݁ܡ݂ܗܘ ܐܢܝ̈ܢ ܥܡ ܒܢܝܗ̈ܝܢ܂܀
09:37	ܘܥ݂ܡܪܘ ܟܗ̈ܢܐ ܘܠܘ̈ܝܐ ܗ݀ܢܘܢ ܕܡܢ ܐܝܣܪܐܝܠ ܒܐܘܪܝܫܠܝܡ܂ ܒܢܘܡܢܝܐ ܕܝܪܚܐ ܫܒܝܥܝܐ܂ ܘܒ̈ܢܝܐ ܕܐܝܣܪܐܝܠ ܒܒܝܬ ܡܥܡܪܐ ܕܝܠܗܘܢ܂܀
09:38	ܘܐܬܟܢܫܘ ܟܠܗ ܣܘܓܐܐ ܐܟܚܕܐ܂ ܥܠ ܐܪܘܚܬܐ ܗ݀ܝ ܕܠܘܬ ܡܕܢܚܐ ܕܣܦܐ ܟܗܢܝܐ܂
09:39	ܘܐܡ݂ܪܘ ܠܥܙܪܐ ܪܝܫ ܟ̈ܗܢܐ ܘܩ݁ܪܘܝܐ܂ ܐܝܬܐ ܢܡܘܣܐ ܕܡܘܫܐ݁܂ ܗ݀ܘ ܕܐܬܝܗܒ ܡܢ ܡܪܝܐ ܐܠܗܐ ܕܐܝܣܪܐܝܠ܂܀
09:40	ܘܐܝܬܝ ܥܙܪܐ ܪܝܫ ܟ̈ܗܢܐ ܠܢܡܘܣܐ݂܂ ܠܟܠܗ ܣܘܓܐܐ ܕܝܠܗܘܢ܂ ܡܢ ܒܪܢܫܐ ܥܕܡܐ ܠܐܢܬܬܐ܂ ܘܠܟܠܗܘܢ ܟܗ̈ܢܐ݁܂ ܠܡܫܡܥ ܠܢܡܘܣܐ݂܂ ܒܢܘܡܝܢܝܐ ܕܝܪܚܐ ܫܒܝܥܝܐ܂
09:41	ܘܩ݂ܪܐ ܗܘܐ ܒܐܪܘܚܬܐ܂ ܘܩܕܡ ܬܪܥܐ ܟܗܢܝܐ܂ ܡܢ ܨ݁ܦܪܐ ܥܕܡܐ ܠܛܗܪܐ܂ ܩܕܡ ܓܒܪ̈ܐ ܘܢܫ̈ܐ܂ ܘܝܗ݂ܒܘ ܟܠܗ ܣܘܓܐܐ ܠܗܘܢܗܘܢ ܒܢܡܘܣܐ ܀
09:42	ܘܩ݂ܡ ܥܙܪܐ ܗ݀ܘ ܟܗܢܐ ܘܩܪܘܝܐ ܕܢܡܘܣܐ ܥܠ ܒܐܝܡܐ ܕܩܝܣܐ ܗ݀ܝ ܕܐܬ݂ܥܬܕܬ݁܂
09:43	ܘܩܡܘ ܥܡܗ܂ ܡܬܝܐ܂ ܫܡܘܥ܂ ܚܢܢܝܐ܂ ܥܙܪܝܐ܂ ܐܘܪܝܐ܂ ܚܙܩܝܐ܂ ܒܥܠܫܡܘܫ ܡܢ ܝܡܝܢܐ܂
09:44	ܘܡܢ ܣܡܠܐ܂ ܦܥܠܕܢܐ܂ ܡܝܫܐܝܠ܂ ܡܠܟܝܐ܂ ܕܘܬܐ܂ ܬܣܘܒ܂ ܢܐܒܪܐܠܝ܂ ܙܟܪܝܐ܂
09:45	ܘܟܕ ܢܣ݂ܒ ܥܙܪܐ ܠܟܬܒܐ ܕܢܡܘܣܐ ܩܕܡܘܗܝ ܕܣܘܓܐܐ ܝܬܝ݂ܒ ܗܘܐ ܓܝܪ ܒܪܝܫܐ ܡܫܒܚܐܝܬ܂ ܩܕܡ ܟܠܗܘܢ܂
09:46	ܘܟܕ ܫܪܐ ܗܘܐ ܠܗ ܠܢܡܘܣܐ݂܂ ܟܠܗܘܢ ܬܪ̈ܝܨܐ ܩܡܘ ܀ ܘܒܲܪܟ ܥܙܪܐ ܠܡܪܝܐ ܡܪܝܡܐ ܐܚܝܕ ܟܠ܂
09:47	ܘܐܙܥܩܘ ܟܠܗ ܥܡܐ ܐܡܝܢ ܐܡܝܢ݁ ܘܟܕ ܐܪܝܡܘ ܠܥܠ ܐܝܕܝ̈ܐ ܢܦ݂ܠܘ ܥܠ ܐܪܥܐ܂ ܣܓܕܘ ܠܡܪܝܐ܂
09:48	ܝܫܘܥ ܘܒܢܝܐ܂ ܘܫܪܒܝܐ܂ ܘܢܪܥܢܝܐ܂ ܥܣܒܝܐ܂ ܫܒܛܝܐ܂ ܚܘܕܝܐ܂ ܡܥܢܐ܂ ܘܩܠܝܛܐ܂ ܥܙܪܝܐ܂ ܓܘܙܒܕ܂ ܚܢܢܝܐ܂ ܦܐܬܘܫ܂ ܠܘ̈ܝܐ ܡܠܦܝܢ ܗܘܘ ܢܡܘܣܐ ܕܡܪܝܐ܂ ܘܠܘܬܗ ܕܣܘܓܐܐ ܩܪܝܢ ܗܘܘ ܠܢܡܘܣܗ ܕܡܪܝܐ ܟܕ ܡܬܢܦܚܝܢ ܗܘܘ ܐܟܚܕܐ ܘܠܩܪܝܢܐ
09:49	ܘܐܡ݂ܪ ܐܦܪܐܛܝܣ ܠܥܙܪܐ ܗ݀ܘ ܪܝܫ ܟ̈ܗܢܐ ܘܩ݁ܪܘܝܐ܂ ܘܠܠܘ̈ܝܐ ܗ݀ܢܘܢ ܕܡ܂ܠܦܝܢ ܗܘܘ ܠܣܘܓܐܐ܂ ܥܠ ܟܠ܂
09:50	ܝܘܡܐ ܗܢܐ ܩܕܝܫܐ ܐܝܬܘܗܝ ܠܡܪܝܐ܂ ܘܟܠܗܘܢ ܒ݁ܟܝܢ ܗܘܘ ܟܕ ܫܡ݂ܥܘ ܠܢܡܘܣܐ܂
09:51	ܗܠܟܘ܂ ܐܟܘܠܘ ܫܘ̈ܡܢܐ݂܂ ܘܐܫܬܘ ܚ̈ܠܝܐ܂ ܘܫ݁ܕܪܘ ܫܘܕܪ̈ܐ݂܂ ܠܗ݀ܢܘܢ ܕܠܐ ܐܝܬ ܠܗܘܢ܂
09:52	ܩܕܝܫܐ ܗܘ ܓܝܪ ܝܘܡܐ ܠܡܪܝܐ܂ ܘܠܐ ܬܬܥܝܩܘܢ܂ ܡܪܝܐ ܓܝܪ ܡܫܒܚ ܠܟܘܢ ܀
09:53	ܘܠܘ̈ܝܐ ܦܩܕܝܢ ܗܘܘ ܠܟܠܗ ܟܢܫܐ ܟܕ ܐܡ݁ܪܝ݂ܢ܂ ܝܘܡܐ ܗܢܐ ܩܕܝܫܐ ܗܘ݂܂ ܠܐ ܬܬܥܝܩܘܢ܂
09:54	ܘܐ݁ܙܠܝܢ ܗܘܘ ܟܠܗܘܢ ܠܡܐܟܠ ܘܠܡܫܬܐ݂ ܘܠܡܬܒܣܡܘ܂ ܘܠܡܬܠ ܫܘܕܪ̈ܐ ܠܗ݀ܢܘܢ ܕܠܐ ܐܝܬ ܠܗܘܢ܂ ܘܠܡܚܕܐ ܪܘܪܒܐܝܬ܂
09:55	ܡܛܠ ܓܝܪ ܕܐܬܢܦܚܘ ܗܘܘ ܒܡ̈ܠܐ ܗܠܝܢ ܕܝܠܦܘ ܗܘܘ ܘܐܬܟܢ݂ܫܘ܂