← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62084: P PrMan 9a1

Click on a word for lexical analysis
Click on a red-colored coordinate for comments and/or translations of the line

00 ܨܠ݁ܘܬܐ ܕܡܢܫܐ܂
01 ܡܪܝܐ ܐܠܗܐ ܕܐܒ̈ܗܝܢ܂ ܐܠܗܗ ܕܐܒܪܗܡ ܘܕܐܝܣܚܩ ܘܕܝܥܩܘܒ ܘܕܙܪܥܗܘܢ ܙܕܝܩܐ܃
02 ܗ݀ܘ ܕܥ݂ܒܕ ܫܡܝܐ ܘܐܪܥܐ ܥܡ ܟܠܗ ܨܒܬܗܘܢ܃
03 ܗ݀ܘ ܕܐ݂ܣܪ ܝܡܐ ܘܐܩܝ݂ܡܗ ܒܦܘܩܕܢܐ ܕܡܠܬܗ܂ ܗ݀ܘ ܕܐܚ݂ܕ ܬܗܘܡܐ ܘܚܬܡ݂ܗ ܒܫܡܗ ܕܚܝ݂ܠܐ ܘܡ݁ܫܒܚܐ܃
04 ܗ݀ܘ ܕܟܠܡܕܡ ܕܚ݁ܠ ܘܙܐ݁ܥ ܡܢ ܩܕܡ ܚ݁ܝܠܟ܃
05 ܡܛܠ ܕܠܐ ܡ݁ܣܬܝܒܪܐ ܪܒܘܬ ܝܐܝܘܬܐ ܕܬܫܒܘܚܬܟ܂ ܘܠܐ ܐܢܫ ܡ݁ܫܟܚ ܡ݁ܣܝܒܪ ܕܢܩܘܡ ܩܕܡ ܪܘܓܙܟ ܘܚܡ݂ܬܟ ܕܥܠ ܚ̈ܛܝܐ܃
06 ܕܠܐ ܣܟܐ ܕܝܢ ܘܕܠܐ ܟܝܠܐ ܐܝܬܝܗܘܢ ܪ̈ܚܡ݂ܐ ܕܡ̈ܘܠܟܢܝܟ܃
07 ܡܛܠ ܕܐܢܬ ܗܘ ܡܪܝܐ ܢܓܝܪ ܪܘܚܐ̤܂ ܘܡܪܚܡܢܐ ܘܣ݁ܓܝ ܚܢܢܐ݂܂ ܘܬܐ݁ܒ ܐܢܬ ܥܠ ܒܝ݂̈ܫܬܗܘܢ ܕܒܢܝܢܫܐ܂ ܐܢܬ ܡܪܝܐ ܐܝܟ ܒܣܝܡܘܬܐ ܕܛܝ݂ܒܘܬܟ ܐܫܬܘܕܝܬ ܫܘܒܩܢܐ ܠܐܝܠܝܢ ܕܬܝ݁ܒܝܢ ܡܢ ܚ̈ܛܗܝܗܘܢ܂ ܘܒܣܘܓܐܐ ܕܪ̈ܚܡ݂ܝܟ ܣܡ݂ܬ ܬܝ݁ܒܘܬܐ ܐܝܟ ܕܠܚܝ̈ܝܗܘܢ ܕܚ̈ܛܝܐ܃
08 ܐܢܬ ܗܟܝܠ ܡܪܝܐ ܐܠܗܐ ܕܙܕܝ̈ܩܐ݂܂ ܠܐ ܗܘܐ ܠܙܕܝ̈ܩܐ ܣܡ݂ܬ ܬܝܒܘܬܐ ܐܝܟ ܕܠܐܒܪܗܡ ܘܠܐܝܣܚܩ ܘܠܝܥܩܘܒ ܗ݀ܢܘܢ ܕܐܦܠܐ ܚ݂ܛܘ ܠܟ܂ ܐܠܐ ܣܡ݂ܬ ܬܝܒܘܬܐ ܠܝ ܕܝܠܝ ܚ݁ܛܝܐ܃
09 ܡܛܠ ܕܝܬܝܪ ܡܢ ܚܠܐ ܕܝܡܐ ܣܓܝ݂ܘ ܚ̈ܛܗܝ܂ ܘܠܝܬ ܠܝ ܢܦܐܫܐ ܕܐܪܝܡ ܥܝ̈ܢܝ ܡܢ ܣܘܓܐܐ ܕܥ݁ܘ̈ܠܝ܂ ܘܗܫܐ ܡܪܝܐ̤܂ ܟܐܢܐܝܬ ܡܬܐ݂ܠܨ ܐܢܐ܂ ܘܐܝܟ ܕܫܘ݁ܐ ܐܢܐ ܡ݁ܬܛܪܦ ܐ݂ܢܐ܂ ܕܗܐ ܐܣܝܪ ܐܢܐ܃
10 ܘܟܦܝ݂ܦ ܐܢܐ ܒܣܘܓܐܐ ܕܐܣܘܪ̈ܐ ܕܦܪܙܠ݂݁ܐ̤܂ ܐܝܟ ܕܠܐ ܐܪܝܡ ܪܝܫܝ ܠܥܠ܂ ܐܦܠܐ ܓܝܪ ܫ݁ܘܐ ܐܢܐ ܕܐܪܝܡ ܥܝ̈ܢܝ ܘܐܚܘܪ ܘܐܚ݁ܙܐ ܪܘܡܐ ܗ݀ܘ ܕܫܡܝܐ܂ ܡܛܠ ܣܘܓܐܐ ܕܡܒܐܫܢܘܬܐ ܕܪ̈ܘܫܥܝ̤܂ ܡܛܠ ܕܥ݁ܒܕܬ ܒܝ̈ܫܬܐ ܩܕܡܝܟ݂܂ ܘܐܪܓܙܬ ܠܚܡܬܟ܂ ܘܐ݁ܩܝܡܬ ܦܬܟܪ̈ܐ ܘܐܣ݁ܓܝ݂ܬ ܛ݁ܢܦܘܬܐ܃
11 ܘܗܫܐ ܗܐ ܟ݁ܐܦ ܐܢܐ ܒܘܪ̈ܟܘܗܝ ܕܠܒܝ ܩܕܡܝܟ݂܂ ܘܒ݁ܥܐ ܐܢܐ ܡܢ ܒܣܝܡܘܬܟ܃
12 ܚ݁ܛܝܬ ܡܪܝܐ ܚ݁ܛܝܬ܂ ܘܡܛܠ ܕܝܕܥ݁ ܐܢܐ ܚ̈ܛܗܝ݂܃
13 ܡ݁ܬܟܫܦ ܐܢܐ ܩܕܡܝܟ܂ ܫܒܘܩ ܠܝ ܡܪܝܐ ܘܠܐ ܬܘܒܕܝܢܝ ܥܡ ܣܟ̈ܠܘܬܝ܂ ܘܠܐ ܠܥܠܡ ܬܪܓܙ ܥܠܝ݂܂ ܘܠܐ ܬܛܪ ܠܝ ܒ̈ܝ݂ܫܬܝ܂ ܂ ܘܠܐ ܬܚ݁ܝܒܢܝ ܘܬܐܫܕܢܝ ܒ̈ܬܐܚܬܝܬܗ݀ ܕܐܪܥܐ܂ ܐܢܬ ܗܘ ܓܝܪ ܐܠܗܐ ܕܬܝ̈ܒܐ܃
14 ܐܦ ܗܟܝܠ ܚ݁ܘܐ ܡܪܝ ܛ݁ܝܒܘܬܟ܂ ܘܟܕ ܠܐ ܫ݁ܘܐ ܐܢܐ ܦܪܩ݁ ܐܢܬ ܠܝ ܐܝܟ ܣܘܓܐܐ ܕܪ̈ܚܡ݂ܝܟ܃
15 ܡܛܠܗܕܐ ܐ݁ܫܒܚܟ ܒܟܠܙܒܢ݂܂ ܘܒܟܠܗܘܢ ܝܘ̈ܡܬܐ ܕܚ̈ܝܝ܂ ܡܛܠ ܕܠܟ ܡ݁ܫܒܚܝܢ ܟܠܗܘܢ ܚ̈ܝܠܘܬܐ ܕܫܡܝܐ܂ ܘܠܟ ܡܙܡܪܝܢ ܠܥܠܡ ܘܠܥܠܡ ܥܠܡܝܢ܀