The Comprehensive Aramaic Lexicon

17:00	ܙܡܝ݂ܪܬܐ ܕܫܬܝܢ
17:01	ܡܪܝܐ ܐܢܬ ܗ݂ܘ ܡ݂݁ܠܟܢ܂ ܗܫܐ ܘܠܥ݁ܠܡ܂ ܡܛܠ ܕܒܟ ܐܠܗܐ ܬܫ݂ܬܒܗܪܝ ܢܦܫܢ
17:02	ܘܡܢܐ ܐܢܘܢ݁ ܚܝ̈ܘܗܝ ܕܒܪܐܢܫܐ ܥܠ ܐܪܥܐ܂ ܐܝܟ ܙ݂݁ܒܢܗ ܓܝܪ ܗܟܢܐ ܐܦ ܒܣ݂ܪܗ
17:03	ܚܢܢ ܕܝܢ ܡܣܒܪܝܢܢ ܥܠ ܐܠܗܐ ܦ݁ܪܘܩܢ܂ ܡܛܠ ܕܐܘܚܕܢܗ ܕܐܠܗܢ ܠܥ݁ܠܡ ܒܪ̈ܚ݂ܡܐ
17:04	ܘܡܠܟܘ݂ܬܗ ܕܐܠܗܢ ܠܥܠܡ ܥܠ ܥܡ݂̈ܡܐ ܒܕܝ݂ܢܐ
17:05	ܐܢܬ ܡܪܝܐ ܓܒ݂ܝܬ ܠܕܘܝܕ ܡܠܟܐ ܥܠ ܝ݂ܣܪܐܝܠ܂ ܘܐܢܬ ܝܡ݂ܝܬ ܠܗ ܥܠ ܙܪܥܗ܂ ܕܠܐ ܬܬܥ݂݁ܛܐ ܡ݂ܢ ܩܕܡ݁ܝܟ ܡ݂݁ܠܟܘܬܗܘܢ݁
17:06	ܘܒܚ̈ܛܗܝܢ ܕܝܢ ܩܡ݂ܘ ܥܠܝܢ ܚ̈ܛܝܐ܂ ܘܣ݂ܡܘ ܥܠܝܢ ܘܐܪܚܩܘ݂ܢܝ ܗ݀ܢܘܢ݁ ܕܠܐ ܦܩ݂ܕܬ ܠܗܘܢ݁܂ ܒܩܛܝ݂ܪܐ ܢܣ݂ܒܘ
17:07	ܘܠܐ ܫܒܚܘ ܠܫܡܟ ܡܝܩܪܐ ܒܬܫܒ݂̈ܚܬܐ܂ ܘܣ݂ܡܘ ܡܠܟܘܬܐ ܚܠ݂ܦ ܪܘܡܗܘܢ݁
17:08	ܐܚ݂ܪܒܘ ܟܘܪܣܝܗ ܕܕܘܝܕ ܒܫܘ݂ܒܗܪܐ ܕܫܘ݂ܚܠܦܗܘܢ݁܂ ܘܐܢܬ ܕܝܢ ܬܣܚܘܦ ܐܢܘܢ݁܂ ܘܬܪܝ݂ܡ ܙܪܥܗܘܢ ܡ݂ܢ ܐܪܥܐ
17:09	ܘܟܕ ܢܩܘ݂ܡ ܥܠܝܗܘܢ݁ ܓܒܪܐ ܢܘ݂ܟܪܝܐ ܡ݂ܢ ܫܪܒܬܐ ܕܝ݂ܠܢ
17:10	ܐܝܟ ܚܛܗ̈ܝܗܘܢ݁ ܬ݂ܦܪܘܥ ܐܢܘܢ݁ ܐܠܗܐ܂ ܘܬܫ݂ܬܟܚ ܠܗܘܢ ܐܝܟ ܥܒ݁ܕ̈ܝܗܘܢ݁
17:11	ܘܠܐ ܬܪܚܡ ܥܠܝܗܘ݁ܢ ܐܠܗܐ܂ ܦܩܘܕ ܙܪܥܗܘܢ ܘܠܐ ܬܫ݂ܒܘ݁ܩ ܡܢܗܘܢ ܘܠܐ ܚܕ
17:12	ܡܗܝܡ݂ܢ ܡܪܝܐ ܒܟܠܗܘܢ݁ ܕܝ݂̈ܢܘܗܝ ܕܥܒ݂ܕ ܥܠ ܐܪܥܐ

17:13	ܐܚ݂ܪܒ ܥܘ݁ܠܐ ܐܪܥܢ ܡ݂ܢ ܒܠܝ ܕܝܬ݁ܒ ܥܠܝܗ݀܂ ܚܒܠܘ ܛܠ̈ܝܐ ܘܣ̈ܒܐ ܘܒܢ̈ܝܗܘܢ݁ ܐܟܚܕܐ

17:14	ܒܫܘ݂ܦܪܐ ܕܪܘܓܙܗ ܫ݂݁ܕܪ ܐܢܘܢ݁ ܥܕܡܐ ܠܡܥܪܒܐ܂ ܘܠܪܝܫܗ݀ ܕܐܪܥܐ ܠܒܘ݂ܙܚܐ ܘܠܐ ܚ݂ܣ
17:15	ܒܢܘ݂ܟܪܝܬܐ ܡܫܬܒܗܪ ܒܥܠܕܒܒܐ܂ ܘܠܒ݂ܗ ܢܘ݂ܟܪܝ ܗ݂ܘ ܡ݂ܢ ܐܠܗܢ
17:16	ܘܟܠܡܕܡ ܥܒ݂ܕܬ ܐܘ݁ܪܫܠܡ܂ ܐܝܟ ܕܐܦ ܥܡ݂̈ܡܐ ܥܒ݂ܕܘ ܒܡܕ̈ܝܢܬܗܘܢ݁ ܠܐܠ̈ܗܝܗܘܢ݁
17:17	ܘܐܚܝ݂ܕܝܢ ܗ݂ܘܘ ܠܗܘܢ݁ ܒܢ̈ܝܗ݀ ܕܕܝܬܝܩܝ ܒܝܢܬ̤܂ ܥܡ݂̈ܡܐ ܚܠ̈ܝ݂ܛܐ܂ ܘܠܝܬ ܗ݂ܘܐ ܒܝܢܬܗܘܢ ܕܥ݂ܒܕ ܪ̈ܚ݂ܡܐ ܘܫܪܪܐ ܒܐܘ݁ܪܫܠܡ
17:18	ܥܪ݂ܩܘ ܡܢܗܘܢ݁ ܐܝܠܝܢ ܕܪܚ݁ܡܝܢ ܗ݂ܘܘ ܟܢܘ݂ܫܬܐ ܕܚ̈ܣܝܐ܂ ܘܦ݂ܪܚܘ ܐܝܟ ܨܦܪ̈ܐ ܕܦܪ̈ܚܢ ܡ݂ܢ ܩܢܝ̈ܗܝܢ
17:19	ܘܛܥ̈ܝܢ ܗ݂̈ܘܝ ܒܡܕܒܪܐ܂ ܠܡ݂ܦܪܩ ܢܦܫܗܘܢ݁ ܡ݂ܢ ܒܝ݂ܫܐ܂ ܘܝܩܝܪܐ ܗ݂ܘܬ ܒܥ̈ܝܢܝܗܘܢ݁ ܬܘܬܒܘܬܗ݀ ܕܢܦܫܐ ܕܡ݂ܬܦܪܩܐ ܗ݂ܘܬ̤܂ ܡܢܗܘܢ݁
17:20	ܒܟܠܗ݀ ܐܪܥܐ ܗ݂ܘܐ ܒܘܕܪܗܘܢ݁ ܡ݂ܢ ܥ݁ܘ̈ܠܐ܂ ܡܛܠܗܢܐ ܐܬܬܚ݂ܕܘ ܫܡ݁ܝܐ ܕܠܐ ܢ݁ܚ݂ܬܘܢ ܡ݂ܛܪܐ ܥܠ ܐܪܥܐ
17:21	ܘܡ݂݁ܒ̈ܘܥܐ ܕܡ݂ܢ ܥ݁ܠܡ܂ ܘܐܬܬܚ݂ܕܘ ܡܢ ܬܗܘ̈ܡܐ ܘܡ݂ܢ ܛܘܪ̈ܐ ܪ̈ܡܐ܂ ܡܛܠ ܕܠܝܬ ܗ݂ܘܐ ܒܗܘܢ݁ ܕܥ݁ܒܕ ܙܕܝܩܘܬܐ ܘܕܝ݂ܢܐ܂ ܡܢ ܪ̈ܝܫܢܝܗܘܢ݁ ܘܥܕܡܐ ܠܙܥܘܪ̈ܝܗܘܢ݁܂ ܐܝܬܝܗܘܢ݁ ܒܟܠ ܚܛ̈ܗܝܢ
17:22	ܡ݂݁ܠܟܐ ܒܥܘܠܐ ܐܝܬܘ‍[‍ܗܝ‍]‍܂ ܘܕܝ݁ܢܐ ܒܡ݂݁ܪܓܙܢܘܬܐ܂ ܘܥܡ݂ܐ ܒܚܛܝ݂ܬܐ
17:23	ܚܙܝ݂ ܡܪܝܐ ܘܐܩܝ݂ܡ ܠܗܘܢ݁ ܠܡܠܟܗܘܢ݁ ܠܒܪܗ ܕܕܘܝܕ܂ ܒܙܒܢܐ ܗ݀ܘ ܕܚ݁ܙܐ ܐܢܬ ܐܠܗܐ܂ ܕܢܡܠܟ ܥܠ ܝ݂ܣܪܐܝܠ ܥܒ݂ܕܟ
17:24	ܘܚ݂݁ܙܩܝܗܝ ܒܚܝܠܐ܂ ܕܢܡܟܟ ܪ̈ܝܫܢܐ ܕܥܘܠܐ
17:25	ܕܢܕܟܝܗ݀ ܠܐܘ݁ܪܫܠܡ ܡ݂ܢ ܥܡ݂̈ܡܐ ܕܡܕܝܫܝܢ ܠܗ݀ ܠܐܒܕܢܐ
17:26	ܠܡܘܒܕܘ ܥ݁ܘ̈ܠܐ ܡ݂ܢ ܝ݁ܪܬܘܬܟ܂ ܠܡܫ݂ܚܩ ܫܘ݂ܒܗܪܐ ܐܝܟ ܚ݂ܨܦܐ ܕܦܚܪܐ܂ ܠܡܫ݂ܚܩ ܒܫܒܛܐ ܕܦܪܙܠܐ ܟܠܗ ܫܘܪܪܗܘܢ݁
17:27	ܠܡ݂݁ܘܒܕܘ ܥܡ݂̈ܡܐ ܥ݁ܘ̈ܠܐ ܒܡ݂ܠܬ̤܂ ܦܘ݂ܡܗ܂ ܒܟܐܬܗ ܢܥ݂ܪܩܘܢ ܥܡ݂̈ܡܐ ܡ݂ܢ ܩܕܡ ܐܦ̈ܘܗܝ܂ ܘܠܡܟܘܢܘ ܠܚܛ̈ܝܐ ܒܡ݂ܠܬܐ ܕܠܒ݂ܗܘܢ݁
17:28	ܕܢܟܢܫ ܥܡ݂ܐ ܩܕܝܫܐ ܗ݀ܘ ܕܢ݂ܫܬܒܗܪ ܒܙܕܝܩܘܬܐ܂ ܘܢܕܘܢ ܫܪ̈ܒܬܐ ܕܥܡ݂ܐ ܕܡܩܕܫ ܡܪܝܐ ܐܠܗܗ
17:29	ܘܠܐ ܬܘ݂ܒ ܢܫܒܘܩ ܕܬܒܘܬܝ ܚܛܝܬܐ ܒܝܢܬܗܘܢ݁܂ ܘܠܐ ܬܘ݂ܒ ܢܥ݂ܡܪ ܒ݂݁ܝܢܬܗܘܢ݁ ܓܒܪܐ ܕܝ݁ܕܥ ܒܝ݂ܫܬܐ
17:30	ܝ݂ܕܥ ܐܢܘܢ݁ ܓܝܪ ܡܛܠ ܕܟܠܗܘܢ݁ ܒܢ̈ܝܐ ܐܢܘܢ݁ ܕܐܠܗܐ܂ ܘܢܦܠܓ ܐܢܘܢ݁ ܒܫܪ̈ܒܬܗܘܢ݁ ܒܐܪܥܐ
17:31	ܘܬܘܬܒܐ ܘܢܘ݂ܟܪܝܐ ܠܐ ܢܥ݂ܡܪ ܥܡܗܘܢ݁܂ ܡܛܠ ܕܕܐ݁ܢ ܥܡ݂̈ܡܐ ܘܐܡ݂̈ܘܬܐ ܒܚ݂ܟܡܬܐ ܕܙܕܝܩܘܬܗ
17:32	ܘܢܩ݂ܢܐ ܥܡ݂ܐ ܡ݂ܢ ܥܡ݂̈ܡܐ܂ ܕܢ݂ܦܠܚܝܘܗܝ ܬܚܝ݂ܬ ܢܝܪܗ܂ ܘܢܫܒܚܘܢܝܗܝ ܠܡܪܝܐ ܓܠܝܐܝ݂ܬ ܒܟܠܗ݀ ܐܪܥܐ
17:33	ܘܢܕܟܝܗ݀ ܠܐ݁ܘܪܫܠܡ ܒܩܕܝܫܘܬܐ ܐܝܟ ܕܡܢܩܕܝܡ
17:34	ܕܢܐ݂ܬܘܢ ܥܡ݂̈ܡܐ ܡ݂ܢ ܣܘ̈ܦܝܗ݀ ܕܐܪܥܐ܂ ܠܡ݂ܚܙܐ ܬܫܒܘ݁ܚܬܗ܂ ܟܕ ܡ݂݁ܝܬܝܢ ܐܝ݂ܩ݁ܪܐ ܠܒܢ̈ܝܗ݀܂ ܗ݀ܢܘܢ݁ ܕܐܬܒܕܪܘ ܡܢܗ݀
17:35	ܘܠܡ݂ܚܙܐ ܬܫܒܘ݁ܚܬܗ ܕܡܪܝܐ܂ ܗ݀ܝ ܕܫܒܚܗ݀ ܐܠܗܐ܂ ܘܗ݂ܘ ܡܠܟܐ ܙܕܝܩܐ ܡܠܦ ܡ݂ܢ ܐܠܗܐ ܥܠܝܗܘܢ݁
17:36	ܘܠܝܬ ܥܘܠܐ ܒܝܘܡ̈ܬܗ ܒܝܢܬܗܘܢ݁܂ ܡܛܠ ܕܟܠܗܘܢ݁ ܩܕܝܫܝܢ܂ ܘܡܠܟܗܘܢ݁ ܡܫܝ݂ܚܐ ܡܪܝܐ
17:37	ܡܛܠ ܕܠܐ ܓܝܪ ܡ݂݁ܣܒܪ ܥܠ ܣܘ݂ܣܝܐ ܘܠܐ ܥܠ ܪܟܒܗ܂ ܘܠܐ ܥܠ ܩ݂ܫܬܐ܂ ܐܦܠܐ ܡܣܓܐ ܠܗ ܕܗܒܐ ܘܣܐܡܐ ܠܩܪܒܐ܂ ܘܠܐ ܢܣܒܪ ܥܠ ܣ̈ܓܝܐܐ ܒܝܘܡܐ ܕܩܪܒܐ
17:38	ܡܪܝܐ ܓܝܪ ܡ݁ܠܟܗ݂ ܗ݂ܘܝܘ ܣܒܪܗ܂ ܘܚܝܠܗ ܥܠ ܣܒܪܗ ܕܐܠܗܗ܂ ܘܢ‍[‍܂܂‍]‍ܡ ܥܠ ܟܠܗܘܢ ‍[‍܂܂܂܂܂‍]‍ ‍[‍ܒܕܚ‍]‍ܠܬܐ
17:39	ܢܡܚܝܗ݀ ܓܝܪ ܠܐܪܥܐ ܒܡܠܬ ܦܘܡܗ݂ ܠܥܠܡ
17:40	ܘܢܒܪܟ ܥܡܗ ܕܡܪܝܐ ܒܚ‍[‍ܟܡܬܐ ܘܒ‍]‍ܒܘܣܡܐ
17:41	ܘܗ݂ܘ ܡܕܟܝ ‍[‍܂܂܂܂܂‍]‍ܡܐ̇ ܪܝܫܐ ܠܥܡܐ ܪܒܐ܂ ܠܡܟܘܢܘ ܠܪ̈ܝܫܢܐ ܘܠܡܘܒܕܘ ܠܚܛܝ̈ܐ ܒܡܠܬܗ
17:42	ܘܠܐ ܢܬܒ݁ܨܪ ܒܝܘ̈ܡܬܗ ܡܢ ܐܠܗܗ܂ ܡܛܠ ‍[‍܂܂܂܂܂܂ ܩ‍]‍ܕܝܫܐ܂ ܘܚܟܝܡܐ ܒܡ݂ܠܟܐ ܕܦܛܢܐ܂ ܒܥܘܫܢܐ ܘܒܙܕܝܩܘܬ݂ܐ
17:43	ܘܒܒܘܪܟܬܗ ܕܡܪܝܐ܂ ܥܡܗ܂ ܒܚܝ݁ܠܐ
17:44	ܘܠܐ ܢܬܟܪܗ܂ ‍[‍ܣܒܪܗ ܒ‍]‍ܡܪܝܐ݂ ܗ݂ܘ ܘܡܢ݂ܘ ܢܩܘܡ ܠܩܘܒܠܗ܂ ܡܚ݁ܝܠ ܓܝܪ ܒܥ݁ܒ̈ܕܘܗܝ܂ ܘܥܫܝܢ ܒܕܚܠܬܗ ܕܐܠܗܗ
17:45	ܪܥܐ ܡܪܥܝܬܗ ܕܡܪܝܐ ܒܙܕܝܩܘܬܐ ܘܒܗܝܡܢܘܬܐ܂ ܘܠܐ ܢܫܒܘܩ ܕܐܢܫ ܢܬܟ̇ܪܗ ܒܡܪܥܝܬܗ
17:46	ܠܟܠܗܘܢ ܢܟܢܫ ܒܫܦܝܘܬܐ݂܂ ܘܠܐ ܬܫܬܟܚ ܒܗܘܢ ܫܒܗܪܢܘܬܐ ܕܬܥܫܢ ܥܠܝܗܘܢ
17:47	ܗܕܐ ܗܝ ܝܐܝܘܬܗ ܕܡ݁ܠܟܗ ܕܐܝܣܪܐܝܠ܂ ‍[‍܂܂܂܂܂܂ ܠܡ‍]‍ܩܡܘ ܥܠ ܒܝܬܗ ܕܐܝܣܪܐܝܠ ܠ‍[‍ܡܪܕܝ‍]‍ܗ
17:48	ܦܬܓܡ̈ܘܗܝ ܒܩ݂ܝܢ ܝܬܝܪ ܡܢ ܕܗܒܐ܂ ܘܡܝܩܪ̈ܐ ܒܟܢܘܫ̈ܬܐ ܠܡܦ‍[‍ܪܫܘ‍]‍ ܫܪ̈ܒܬܐ ܡܢ ܥܡܐ ܩܕܝܫܐ
17:49	ܦܬܓܡ̈ܘܗܝ ܐܝܟ ܦܬܓܡ̈ܐ ܕܩܕ̈ܝܫܐ ܒܝܢܬ ܥܡܐ ܩܕܝܫܐ
17:50	ܛܘܒܝܗܘܢ ܠܐܝܠܝܢ ܕܗ݀ܘܝܢ ܒܝܘܡ̈ܬܐ ܗ݀ܢܘܢ܂ ܠܡܚܙܐ ܛܒ̈ܐ ܕܐܝܣܪܐܝܠ݂ ܒܟܢܘܫܬܐ ܕܥܡܐ܂ ܕܥ‍[‍ܒܕ‍]‍ ܐܠܗܐ
17:51	ܠܡܣܪܗܒܘ ܪ̈ܚܡ݂ܘܗܝ ܥܠ ܐܝܣܪܐܝܠ ܕܢܦܨܝܢ ܡܢ ܛܡܐܘܬܐ ܕܥܡ̈ܡܐ ܡܣܝ̈ܒܐ܂ ܡܪܝܐ ܗܘ ܓܝܪ ܡܠܟܢ܂ ܗܫ‍[‍ܐ ܘ‍]‍ܠܥܠܡ