The Comprehensive Aramaic Lexicon

007:01	ܒܬܪ ܓܝܪ ܕܗܠܝܢ ܐܬܦܪܫܘ܃ ܢܐܬܐ ܠܘܬ ܗ݀ܝ
007:02	ܕܡܫܬܐܠܐ ܡ݂ܢ ܐܢܫ̈ܝܢ܂ ܕܐܢ ܡܬܘܡܝܐ ܗ݂ܘ ܐܠܗܐ

007:03	ܠܡܘܢ ܠܐ ܡ݂ܢ ܡܬܘܡ̈ܘܗܝ ܒܪܗ݀ ܠܒܪܝܬܐ܂ ܘܐܡܪܝܢܢ

007:04	ܕܚܕ ܗ݂ܘ ܕܠܐ ܫܘܪܝ ܘܕܠܐ ܣܘܝܟ ܐܠܗܐ܂ ܒܪܝܬܐ ܕܝܢ
007:05	ܒܫܘܪܝܐ ܘܒܣܘܝܟܐ܂ ܘܐܠܘ ܡ݂ܢ ܡܬܘܡ̈ܘܗܝ ܒܪܗ݀
007:06	ܒܪ ܐܝܬܘܬܗ ܗܘܝܐ ܗܘ݂ܬ܂ ܗܕܐ ܕܠܐ ܡܫܟܚܐ
007:07	ܕܒܪ̈ܝܐ ܥܡ ܒܪܘܝܗܘܢ ܢܗܘܘܢ܂ ܘܬܘܒ ܕܐܠܗܐ ܠܘ
007:08	ܡܛܠ ܝܬܗ ܒܪܗ݀ ܠܒܪܝܬܐ ܐܠܐ ܡܛܠ ܡܠܝ̈ܠܐ܃ ܘܟܠ
007:09	ܙܒܢܐ ܐܝܢܐ ܕܗ݀ܘ ܕܒܪܐ ܗܘ݂ܐ ܠܗ݀܃ ܗ݂ܘ ܟܕ ܗ݂ܘ
007:10	ܚܘܫܒܐ ܕܐ݁ܠ ܗܘ݂ܐ ܒܢ ܕܢܒܥܐ܃ ܕܠܡܘܢ ܒܗܢܐ
007:11	ܙܒܢܐ ܘܠܘ ܡ݂ܢ ܩܕܡ ܗܟܢ ܒܪܗ݀܃ ܟܕ ܣܘܝܟܐ ܠܒܥܬܐ
007:12	ܗܕܐ ܠܐ ܡܨܝܐ ܕܢܫܬܟܚ܂ ܘܕܠ݂ܘ ܡ݂ܢ ܩܛܝܪܘ ܘܠܘ ܡ݂ܢ
007:13	ܒܝܫܘ ܐܘ݁ ܡ݂ܢ ܚܣܡܐ ܗܕܐ ܥܒ݂ܕ ܐܠܐ ܟܕ ܨܒ݂ܐ
007:14	ܘܫ݂ܦܪ ܠܗ ܘܝ݂ܕܥ ܕܥܕܪܐ ܗܕܐ ܠܒܪܝܬܐ܂ ܓܠܝܐ ܗ݂ܝ
007:15	ܕܗܐ ܟܕ ܥܒ݂ܕܢ ܘܛܝܒ ܠܢ ܬܪ̈ܝܢ ܥܘܡܪ̈ܝܢ܃ ܠܐ ܒܪ
007:16	ܫܥܬܗ ܫܢܝܢ ܠܗ݀ܘ ܕܠܐ ܚܒܠܐ ܡ݂ܢ ܩܕܡ ܕܢܥܠܢ ܠܗܢܐ
007:17	ܡܨܛܠܝܢܐ܃ ܟܕ ܛܒ ܡܨܐ ܗܘ݂ܐ ܒܚܝܠ ܗܕܐ܂ ܘܐܢ
007:18	ܐܢܫ ܢܒܥܐ ܕܠܡܘܢ ܒܪܗ݀ ܟܕ ܠܐ ܚܢܝܩ ܗܘ݂ܐ ܥܠܝܗ݀܃
007:19	ܢܕܥ ܗܢܐ ܕܡܛܠ ܬܠܬ ܥܠ̈ܠܢ ܒܪܗ݀܂ ܚܕܐ ܕܢܚܘܐ
007:20	ܛܝܒܘܬܗ ܕܟܕ ܐܝܬܝܐ ܗ݀ܘ ܨܒ݂ܐ ܕܢܫܘܬܦ ܠܐܝܠܝܢ
007:21	ܕܠܝܬܝܗܘܢ ܒܐܝܬܘܬܐ܂ ܗ݀ܘ ܕܝܢ ܛܝܒܘܬܐ ܫܪܝܬ
007:22	ܒܗܘܝܐ ܕܫܡܝܐ ܘܕܐܪܥܐ ܘܫܠܡܬ ܒܐܕܡ ܐܢ̈ܫܐ܂
007:23	ܘܫܪܝܬ ܟܐܢܘܬܐ ܡ݂ܢ ܣܝܡ ܢܡܘܣܐ ܘܡܢ ܓܙܪ ܕܝܢܐ
007:24	ܕܥܠ ܐܕܡ ܘܫܠܡܬ ܒܡܫܝܚܐ ܕܚܪܪܢ ܡ݂ܢ ܢܡܘܣܐ
007:25	ܕܚܛܝܬܐ ܘܕܡܘܬܐ܂ ܘܫܪܝܬ ܛܝܒܘܬܐ ܡ݂ܢ ܣܘܒܪܗ
007:26	ܕܡܠܐܟܐ ܘܗܐ ܥܫܢܐ ܘܝܪܒܐ ܥܕܡܐ ܕܠܟܠ ܒܟܠ
007:27	ܐܠܗܐ ܥܒܕܐ܂ ܕܬܪ̈ܬܝܢ ܕܝܢ ܠܬܚܘܝܬܐ ܕܚܟܡܬܗ܂
007:28	ܘܕܬܠܬ ܠܫܘܘܕܥܐ ܕܚܝܠܗ܂ ܘܐܦܢ ܓܝܪ ܡܛܠ ܡܠܝ̈ܠܐ
007:29	ܒ݂ܪܐ ܠܠܐ ܡܠܝ̈ܠܐ܃ ܐܠܐ ܥܠ ܚ̈ܕܕܐ ܐܣܢܩ ܐܢܘܢ܂