The Comprehensive Aramaic Lexicon

1.000:000	ܬܘܒ ܡܐܡܪܐ ܐܚܪܢܐ ܕܥܠ ܣܪܐ ܘܐܒܪܗܡ ܒܡܪܝ ܐܦܪܝܡ
1.000:001	ܡܥܕ ܗܘ ܐܠܗܐ ܕܢܪܕܐ ܠܙܕܝ̈ܩܐ ܘܠܚ̈ܛܝܐ
1.000:002	ܕܢܐܠܦ ܥܠܡܐ ܫܘܦܪ̈ܝܗܘܢ ܘܗܘܦܟܐ ܕܕܘܒܪ̈ܝܗܘܢ
1.000:003	ܠܐ ܣܢ݁ܐ ܠܗ ܐܠܗܐ ܠܙܕܝܩܐ ܡܐ ܕܪ̈ܕܐ ܠܗ
1.000:004	ܕܢܓܠܝܘܗܝ ܨܒ݁ܐ ܒܒܪܝܬܐ ܟܡܐ ܢܥܢܐ ܠܗ ܒܐܘܠܨܢܐ
1.000:005	ܟܬܝܒ ܕܗܘܐ ܟܦܢܐ ܒܐܪܥܐ ܕܥܡ݁ܪ ܗܘܐ ܒܗ݀ ܐܒܪܗܡ
1.000:006	ܘܝܬܝܪ ܡܢ ܟܠ ܕܐܝܬ ܒܗ݀ ܕܝܢ ܐܠܨܗ ܟܦܢܐ ܠܙܕܝܩܐ
1.000:007	ܘܡܐ ܕܚܙܐ ܕܓܡܪ ܥܘܬܪܗ ܘܗܐ ܡܛܐ ܠܗ ܠܨܪܝܟܘܬܐ
1.000:008	ܩܪܐ ܠܐܢܬܬܗ ܘܫ̈ܦܥܝ ܕܡܥܘ̈ܗܝ ܥܠ ܚܘܣܪܢܐ ܕܡܛܝ ܗܘܐ
1.000:009	ܘܐܡܪ ܙܕܝܩܐ ܠܐܢܬܬܗ ܬܝ ܣܪܐ ܫܡܥܝ ܐܡܪ ܠܟܝ
1.000:010	ܕܐܢܐ ܘܐܢܬܝ ܚܢܢ ܠܐܠܗܐ ܒܗܢ ܐܬܪܐ ܕܟܢܥ̈ܢܝܐ
1.000:011	ܘܠܐ ܐܝܬ ܗܘܐ ܕܣܓ݁ܕ ܥܡܢ ܠܐܠܗܐ ܒܐܬܪܐ ܗܢܐ
1.000:012	ܘܡܘܕܐ ܐܢܐ ܠܗ ܠܐܠܗܐ ܕܐܝܟܢ ܙܐ݁ܢ ܠܟܦܘܪ̈ܐ
1.000:013	ܕܗܐ ܫܪܝܢ ܚܢ̈ܦܐ ܒܢܝܚܐ ܘܐܝܬ ܠܗܘܢ ܥܘܬܪܐ ܘܩܢܝ̈ܢܐ
1.000:014	ܠܒ̈ܘܫܐ ܗܕܝܪ̈ܐ ܥܡ ܨܒ̈ܬܐ ܡܬܒܣܡܝܢ ܒܟܠ ܓܐܘ̈ܬܐ
1.000:015	‍[‍ܬܒ‍]‍ܥܝܢ ܠܢ ܕܢܣܓܘܕ ܥܡܗܘܢ ܘܢܕܒܚ ܠܓܠܝܦܝ̈ܗܘܢ
1.000:016	ܘܥܠ ܕܠܐ ܫܠܡܢܢ ܠܛܥܝܘܬܗܘܢ ܟܠܝܢ ܠܢ ܐܦ ܡܢ ܠܚܡܐ
1.000:017	ܘܗܫܐ ܐܝܟ ܕܐܡܪܝܢ ܐܢܫ̈ܐ ܐܝܬ ܣܒܥܐ ܒܐܪܥܐ ܕܡܨܪܝܢ
1.000:018	ܩܘܡܝ ܢܘܕܐ ܠܗ ܠܐܠܗܐ ܘܢܒܥܐ ܡܢܗ ܕܗܘ ܢܕܒܪܢ
1.000:019	ܘܐܝܬ ܠܝ ܣܒܪܐ ܘܬܘܟܠܢܐ ܕܠܐ ܡܒܗܬ ܠܗ݀ ܠܒܥܘܬܢ
1.000:020	ܩܒܠܬܗ ܛܥܡܢܝܬܐ ܠܡܕܡ ܕܐܡܪ ܐܒܪܗܡ
1.000:021	ܘܐܡܪܬ ܕܨܒܝܢܟ ܢܗܘܐ ܕܐܢܬ ܪܝܫܐ ܘܐܢܐ ܥܩܒܐ
1.000:022	ܘܐܢܬ ܡܪܐ ܘܐܢܐ ܐܡܬܟ ܘܚܣ ܠܝ ܕܐܥܒܪ ܦܘܩܕܢܟ
1.000:023	ܘܐܫܪܐ ܦܬܓܡ̈ܝ ܦܘܡܟ ܐܘ ܐܘܒܕ ܬܘܒ ܦܘܩܕܢܟ
1.000:024	ܐܢ ܠܐܟܣܢܝܐ ܐܢܐ ܥܡܟ ܘܐܢ ܥܠ ܕܘܟܬܟ ܗܐ ܢܝܚܟ
1.000:025	ܠܝܡܐ ܘܝܒܫܐ ܐܢ ܬܐܙܠ ܥܡܟ ܐܢܐ ܒܠܘܝܬܐ
1.000:026	ܣܓܕܘ ܙܕܝ̈ܩܐ ܠܐܠܗܐ ܟܕ ܢܦܩܝܢ ܕܢܐܙܠܘܢ ܠܡܨܪܝܢ
1.000:027	ܢܦܩ ܐܒܪܗܡ ܙܕܝܩܐ ܕܢܐܙܠ ܢܫܟܚ ܠܗ ܣܒܥܐ
1.000:028	ܘܐܝܟ ܐܢܫ̈ܐ ܕܠܐ ܩܢܘ ܡܕܡ ܥܠܘ ܠܐܪܥܐ ܕܐܓܦ̈ܛܝܐ
1.000:029	ܡܛܪܦܝܢ ܘܠܐܝܢ ܘܡܥܩܝܢ ܢܟ̈ܦܐ ܕܪܚܡܘ ܠܐܠܗܐ
1.000:030	ܨܕܬ ܐܪܥܐ ܩܕܡ ܥܝ̈ܢܝܗܘܢ ܘܢܦܠܘ ܘܐܬܘܪܘ ܘܐܬܕܘܕܘ
1.000:031	ܐܢܫ̈ܐ ܕܝܩܪܘ ܠܐܠܝ̈ܨܐ ܘܐܢܫ̈ܐ ܕܩܒܠܘ ܡܣ̈ܟܢܐ
1.000:032	ܠܫ̈ܢܝܐ ܫܒ‍<‍ܩ‍>‍ܘܗ݀ ܠܟܢܥܢ ܘܫܒܩܘ ܒܗ݀ ܟܠ ܕܩܢܝܢ ܗܘܘ
1.000:033	ܘܠܐܠܗܐ ܫܩܠܘ ܗܘܘ ܒܠܒܗܘܢ ܐܝܟ ܕܫܩܠܘܗܝ ܒܝܬ ܐܢܫܝ̈ܗܘܢ
1.000:034	ܘܬܟܝܠܝܢ ܕܗܘ ܗܘ݁ܐ ܠܗܘܢ ܡܥܕܪܢܐ ܠܐܝܟܐ ܕܐܙܠܝܢ
1.000:035	ܣܪܐ ܠܡܨܪܝܢ ܪܕܝܐ ܗܘܬ ܕܬܐܠܦ ܡܨܪܝܢ ܥܠ ܡܪܗ݀
1.000:036	ܘܐܝܟ ܫܡܪܝܬܐ ‍[‍ܠ‍]‍ܫܡܪ̈ܝܐ ܚܘܝܬ ܐܢܘܢ ܠܫܪܪܐ
1.000:037	ܘܡܢ ‍[‍ܕ‍]‍ܡܛܘ ܬܚܘܡܐ ܕܡܨܪܝܢ ܐܒܪܗܡ ‍[‍ܝ݁‍]‍ܬܒ ܒ݁ܟܐ
1.000:038	ܘܣܡ ܪܫܗ ܒܝܢܬ ܒܘܪ̈ܟܘܗܝ ܘܐܫ̈ܦܥܝ ܕܡ̈ܥܐ ܥܠ ܦܟܘ̈ܗܝ
1.000:039	ܘܩܡܬ ܣܪܐ ܟܕ ܒ݁ܟܝܐ ܘܐܡܪܬ ܠܗ ܠܡܘܢ ܟܪܝܐ ܠܟ
1.000:040	ܕܟܠܗ݀ ܐܘܪܚܐ ܚ݁ܕܐ ܗܘܝܬ ܘܗܫܐ ܗܐ ܫ̈ܦܥܢ ܕܡ̈ܥܝܟ
1.000:041	ܒܠܒܝܒܘܬܐ ܬܢܐ ܠܝ ܥܠ ܡܢܐ ܡܥܩ ܪܥܝܢܟ
1.000:042	ܕܠܐ ܡܪܦܐ ܠܢ ܐܠܗܐ ܕܒܟܠ ܕܘܟ ܐܝܬܘܗܝ ܪܡܙܗ
1.000:043	ܒܐܠܗܐ ܕܠܗ ܣ݁ܓܕ ܐܢܬ ܐܘܕܥܝܢܝ ܫܪܒܐ ܕܒܟܝܟ
1.000:044	ܕܐܢܐ ܒܕܡ̈ܥܝܟ ܐܬܬܥܝܩܬ ܘܒܚܫ̈ܝܟ ܐܒܕ ܪܥܝܢܝ
1.000:045	ܛܠܝܬܐ ܠܐ ܡܟܣܝܢ ܡܢܟܝ ܥܠ ܟܪܝܘܬܐ ܕܡܛܬܢܝ
1.000:046	ܠܐ ܝܕܥܬ ܥܘܠܗ݀ ܕܡܨܪܝܢ ܥܕܡܐ ܕܥܠܬ ܠܬܚܘ̈ܡܝܗ݀
1.000:047	ܕܐܝܟ ܥܪ̈ܦܠܐ ܥܠ ܛܘܪ̈ܐ ܦܪܝܣ ܥܘܠܐ ܥܠ ܡܨܪ̈ܝܐ
1.000:048	ܘܐܢܬܝ ܛܠܝܬܐ ܣܓܝ ܪܓܝܓܬܝ ܡܢ ܟܠܗܝܢ ܢܫ̈ܐ ܕܐܪܥܐ
1.000:049	ܘܒܥܝܢ ܐܢܫ̈ܐ ܪܚܡܘܬܟܝ ܘܦܐܐ ܚܙܘܟܝ ܡܢ ܢܩ̈ܒܬܐ
1.000:050	ܘܫܡܥܬ ܠܝ ܕܐܓܝ̈ܦܛܝܐ ܗܢܘܢ ܥܡܐ ܙܠܝܠܐ
1.000:051	ܘܟܕ ܚ݁ܙܝܢ ܠܟܝ ܡܫܬܢܝܢ ܘܠܝ ܩܛܠܝܢ ܡܛܠܬܟܝ
1.000:052	ܘܝ ܕܒܥܠܬܟܝ ܡܐ݁ܬ ܐܢܐ ܒܗܕܐ ܐܪܥܐ ܕܐܟܣܢܝܐ
1.000:053	ܘܡ݁ܢ ܬܒ݁ܥ ܕܡܝ ܒܒܪܝܬܐ ܘܡܢܘ ܕܕܐ݁ܢ ܥܠ ܥܘܢܕܢܝ
1.000:054	ܘܟܕ ܗܠܝܢ ܫܡܥܬ ܣܪܐ ܐܡܪܬ ܠܗ ܬܐ ܠܟ ܢܒܟܐ
1.000:055	ܕܐܢܐ ܒܗܠܝܢ ܠܐ ܪܓܫܬ ܘܥܠ ܒܠܝ ܡܡܬܘܡ ܠܐ ܣܠܩ̈ܝ ܗܘ̈ܝ
1.000:056	ܕܐܢ ܡܘܬܟ ܐܬܝܬ ܐܚܙܐ ܛܒ ܠܝ ܡܘܬܐ ܡܢ ܚܝ̈ܐ
1.000:057	ܘܐܢ ܐܢܫ̈ܐ ܥܠܝܟ ܡܬܓܢܒܪܝܢ ܠܘܝ ܕܝܢ ܒܟܦܢܐ ܐܫܬܢܩܬ
1.000:058	ܐܢ ܚܛܝܬܐ ܡܠܝܐ ܡܨܪܝܢ ܢܦܢܐ ܠܢ ܠܗ݀ܝ ܝܪܬܘܬܢ
1.000:059	ܕܠܐ ܡܪܦܐ ܠܢ ܐܠܗܐ ܕܒܟܠ܆ܕܘܟ ܐܝܬܘܗܝ ܪܡܙܗ
1.000:060	ܘܐܢ ܪܘܫܥܐ ܡܠܝܐ ܡܨܪܝܢ ܠܝܛܐ ܡܨܪܝܢ ܥܡ ܚ̈ܛܝܗ݀
1.000:061	ܐܡܪ ܙܕܝܩܐ ܠܐܢܬܬܗ ܕܠܐ ܡܨܝܐ ܕܢܦܢܐ ܠܐܪܥܢ
1.000:062	ܥܒܕܝ ܒܝ ܗܕܐ ܛܝܒܘܬܐ ܘܟܠܝ ܢܦܫܟܝ ܡܢ ܥܩܬܐ
1.000:063	ܘܐܢ ܡܫܐܠܝܢ ܠܟܝ ܗܢ ܛܠܝܐ ܐܡܪܝ ܠܗܘܢ ܕܐܚܐ ܕܝܠܝ ܗܘ
1.000:064	ܘܐܢܐ ܐܡܪ ܐܢܐ ܕܐܢܬܝ ‍<‍ܛܠܝܬܐ‍>‍ ܚܬܐ ܕܝܠܝ ܐܝܬܝܟܝ
1.000:065	ܟܒܪ ܒܥܠܬܟܝ ܡܬܦܨܐ ܐܢܐ ܘܣ݁ܓܐ ܐܝܩܪܝ ܒܓܘ ܡܨܪܝܢ
1.000:066	ܩܡܬ ܣܪܐ ܟܕ ܒܟܝܐ ܘܫܪܝܬ ܕܬܐܡܐ ܗܟܢܐ
1.000:067	ܠܐ ܐܠܗܐ ܓܒܘܠܢ ܘܬܫܡܫܬܗ ܕܡܢ ܫܡ̈ܝܢܐ
1.000:068	ܠܐ ܡܪܝܐ ܕܨܒܐ ܘܝܗܒܢܝ ܠܬܫܘܝܬܟ ܘܠܙܘܘܓܟ
1.000:069	ܠܐ ܐܩܢܐ ܚܠܦܝܟ ܓܒܪܐ ܘܥܡܟ ܐܚܪܢܐ ܠܐ ܐܕܥ
1.000:070	ܘܠܡܐ̈ܢܝ ܟܝ ܫܠܚܐ ܐܢܐ ܘܒ̈ܠܝܐ ܡܬܥܛܦܢܐ
1.000:071	ܘܚܠܐ ܥܠ ܪܝܫܝ ܪܡܝܐ ܐܢܐ ܘܒܥܕܢ ܪܡܫܐ ܢܥܘܠ
1.000:072	ܥܒܕܬ ܣܪܐ ܐܝܟ ܕܐܡܪܬ ܘܡܢ ܫܘܦܪܗ݀ ܠܐ ܐܬܒܨܪܬ
1.000:073	ܘܙܗܝܐ ܗܘܬ ܒܗܝܡܢܘܬܐ ܕܝܗ݀ܒܐ ܫܘܦܪ̈ܐ ܠܩ̈ܕܝܫܐ
1.000:074	ܩܡܘ ܥܠ ܬܪܥܐ ܐܓܝ̈ܦܛܝܐ ܢܛܪܝܢ ܗܘܘ ܠܗ݀ ܠܗ݀ܝ ܫܥܬܐ
1.000:075	ܘܩܡܘ ܚܪܘ ܒܗ݀ ܒܣܪܐ ܘܫܢܘ ܥܠ ܫܘܦܪܗ݀ ܘܥܠ ܛܘܟܣܗ݀
1.000:076	ܐܘ ܐܢܫ̈ܐ ܡܢ ܐܝܟܐ ܐܢܬܘܢ ܡܢ ܐܪܥܐ ܕܡܠܝܐ ܫܘܦܪ̈ܐ
1.000:077	ܬܗܘܐ ܒܪܝܟܐ ܗܝ ܐܡܐ ܕܐܟܘܬܟܘܢ ܦܐ̈ܪܐ ܝܠܕܬ
1.000:078	ܐܝܢ ܛܠܝܬܐ ܡܘܢ ܗܘ݁ܐ ܠܟܝ ܗܢܐ ܛܠܝܐ ܕܐܝܬ ܥܡܟܝ
1.000:079	ܘܐܡܪܬ ܠܗܘܢ ܕܐܚܐ ܕܝܠܝ ܗܘ ܘܗܘ ܐܡܪ ܕܚܬܐ ܕܝܠܝ ܗܝ
1.000:080	ܘܪܗܛܘ ܡܚܕܐ ܐܝ̈ܙܓܕܐ ܘܚܘܝܘ ܠܗ ܠܦܪܥܘܢ ܡܠܟܐ
1.000:081	ܕܗܐ ܛܠܝܬܐ ܕܦܐܝܐ ܣܓܝ ܕܐܢܫ̈ܐ ܐܝܟ ܫܘܦܪܗ݀ ܠܐ ܚܙܘ
1.000:082	ܝܘܡܢ ܥܠܬ ܥܡ ܐܚܘܗ݀ ܕܓܗܪ̈ܢ ܥܝ̈ܢܐ ܡܢ ܚܙܘܗ݀
1.000:083	ܕܕܡܝܐ ܕܝܢ ܛܠܝܬܐ ܘܐܚܘܗ݀ ܐܝܟ ܕܒ̈ܢܝ ܡ̈ܠܟܐ ܐܢܘܢ
1.000:084	ܠܐ ܫܡܫܐ ܕܠܗ ܣܓ݁ܕ ܐܢܬ ܘܠܐ ܢܘܪܐ ܕܠܗ݀ ܡܫܒܚ ܐܢܬ
1.000:085	ܠܐ ܚܙܐ ܠܗ݀ ܠܐܪܥܟ ܡܡܬܘܡ ܐܝܟ ܫܘܦܪܗ݀ ܘܐܝܟ ܛܘܟܣܗ݀
1.000:086	ܕܟܕ ܐܝܟ ܒܪܬ ܡܣܟ̈ܢܐ ܠܒܝܫܐ ܕܡ݁ܝܐ ܠܫܡܫܐ ܡܐ ܕܕܢ݁ܚ
1.000:087	ܗܐ ܡܪܝ ܡܠܟܐ ܐܘܕܥܢܟ ܥܕܠܐ ܩܕܡܝܢ ܡܟܘܪ̈ܝܗ݀
1.000:088	ܫܡܥ ܦܪܥܘܢ ܘܪܘܙ ܠܒܗ ܘܫܕܪ ܘܩܪܐ ܠܐܒܪܗܡ
1.000:089	ܘܚܪ ܒܗ ܘܚܙܐ ܠܦܐܝܘܬܗ ܘܩܒܠܗ ܘܝܗܒ܆ܠܗ ܦܠܝܛܝܢ
1.000:090	ܠܐ ܫܐܠܗ ܒܩ‍[‍ܕܡܐ ܐܠܐ‍]‍ ܡܘܢ ܗܘܝܐ ܠ‍[‍ܟ ܗܕ ܛܠܝܬܐ
1.000:091	‍[‍܂܂܂܂܂܂܂܂܂݁
1.000:092	‍[‍܂܂܂܂܂܂܂܂܂݁
1.000:093	‍[‍܂܂܂܂܂܂‍]‍ ܒܦܪܥܘܢ ܡܠܟܐ
1.000:094	ܘܦܩܕ ܡܠܟܐ ‍[‍ܕܐܝܩܪܐ‍]‍ ܢܬܝܗܒ ܠܗ ܠܐܒܪܗܡ
1.000:095	ܝܗܒ ܗܘܐ ܠܗ ܥܒ̈ܕܐ ܕܩܝܡܝܢ ܥܠ ܬܫܡܫܬܐ ܕܦܬܘܪܗ
1.000:096	ܘܝܗܒ ܠܗ݀ ܠܣܐܪܐ ܐܡܗ̈ܬܐ ܠܐܝܩܪܗ݀ ܘܠܪܘܡܪܡܗ݀
1.000:097	ܘܦܩܕ ܠܪ̈ܫܢܐ ܕܢܝܬܘܢ ܠܥܙܩܬܐ ܕܡܟܝܪܘܬܗ݀
1.000:098	ܐ̈ܬܝ ܢܫ̈ܐ ܡܨܪ̈ܝܬܐ ܕܢܨܒܬܢܗ݀ ܒܠܒ̈ܘܫܐ
1.000:099	ܘܢ̈ܬܠܢ ܒܐ̈ܕܢܝܗ݀ ܚܫ̈ܠܬܐ ܡܢ ܓܙ̈ܐ ܕܡ̈ܠܟܐ ܩ̈ܕܡܐ
1.000:100	ܘܟܐ̈ܦܐ ܕܫܘܒܚܐ ܕܡܚܘܝܢ ܫܘܦܪܐ ܦܐܝܐ ܠܚ̈ܙܝܐ
1.000:101	ܡܘܢ ܟܪܝܐ ܠܟܝ ‍[‍ܐܡܪ̈ܢ‍]‍ ܗܘ̈ܝ ܡܨܪ̈ܝܬܐ ܠܛܠܝܬܐ
1.000:102	‍[‍܂܂܂܂܂܂܂܂܂݁
1.000:103	‍[‍܂܂܂܂܂܂܂܂܂݁
1.000:104	‍[‍܂܂܂܂܂܂܂܂܂݁
1.000:105	‍[‍ܠܒܫܝ‍]‍ ܢܚ̈ܬܐ ܕܝܗܒ ܠܟܝ ܡܠܟܐ ܘܐܥܒܪܝ ܡܢܟܝ ܥܩ̈ܬܐ
1.000:106	ܣܪܐ ܒܗܠܝܢ ܚܝܪܐ ܗܘܬ ܘܫܘܒܚܐ ܠܡܪܗ݀ ܝܗܒܐ ܗܘܬ
1.000:107	ܚܝܪܗ݀ ܡܪܟܢ ܗܘܐ ܒܐܪܥܐ ܘܠܒܗ݀ ܡܨܠܐ ܠܐܠܗܐ
1.000:108	ܡܪܝܐ ܐܠܗ݀ܝ ܕܩܪܝܬܟ ܥܕܪܝܢܝ ܘܐܚܙܐ ܫܘܒܚܟ
1.000:109	ܟܠܬܐ ܒܥ݁ܝܢ ܠܝ ܚܢ̈ܦܐ ܐܢܬ ܗܘ ܓܒܪܗ݀ ܕܥܠܝܡܘܬܝ
1.000:110	ܐܘ ܫܕܪ ܡܘܬܐ ܕܢܣܒܢܝ ܐܘ ܫܕܪ ܥܝܪܐ ܢܦܨܝܢܝ
1.000:111	ܨܠܘܬܗ݀ ܣܠܩܬ ܠܡܪܘܡܐ ܘܕܓܒܪܗ݀ ܗܘ ܙܕܝܩܐ
1.000:112	ܒܥܘܬܗ݀ ܛܣܬ ܣܠܩܬ ܘܡܛܬ ܠܟܘܪܣܝܗ ܕܐܠܗܐ
1.000:113	ܓܢܘ ܪ̈ܫܢܐ ܕܦܠܝܛܝܢ ܠܚܠܘܠܐ ܡܠܐ ܚܕܘ̈ܬܐ
1.000:114	ܩܪܬ ܠܗ ܣܪܐ ܠܐܒܪܗܡ ܘܒܪܟܬ ܣܓܕܬ ܩܕܡ ܪ̈ܓܠܘܗܝ
1.000:115	ܘܐܡܪܬ ܠܗ ܚܙܝ ܡܘܢ ܥܒ݁ܕܬ ܕܗ‍[‍ܐ‍]‍ ܡܚܕܐ ܗܐ ܕܒܪܝܢ ܠܝ
1.000:116	ܒܡܢܐ ܥܢܝܐ ܐܝܕܥܬܟ ܕܟܕ ܐܟܠܝܢܢ ܘܫܬܝܢܢ
1.000:117	ܐܢܐ ܝܕܥܢܝ ܕܗܐ ܕܒܪܝܢ ܠܝ ܥܕܪܝܢܝ ܘܐܚܙܐ ܡܕܥܟ
1.000:118	ܘܟܕ ܗܠܝܢ ܐܡܪܬ ܣܪܐ ܐܒܪܗܡ ܫܬܩܐ ܠܒܟܗ
1.000:119	ܘܡܢ ܫܠܝܐ ܡܢܥܘ ܘܡܛܘ ܚܝ̈ܠܘܬܐ ܕܡܨܪ̈ܝܐ
1.000:120	ܘܝܬܒܘ ܙܕܝܩ̈ܐ ܕܢܒܟܘܢ ܘܬܘܝܪܝܢ ܪ̈ܥܝܢܝܗܘܢ
1.000:121	ܣܡܬ ܪܫܗ݀ ܒܝܬ ܒܘܪ̈ܟܘܗܝ ܘܒܚܢܓܬܐ ܡܠܠܬ ܥܡܗ
1.000:122	ܠܒܐ ܕܪܚܡܢܝ ܡܢ ܛܠܝܘܬܝ ܫܡܥܝܢܝ ܘܐܠܦܟ ܡܢ ܬܥܒܕ
1.000:123	ܩܪܝ ܠܐܠܗܐ ܘܠܐ ܬܫܠܐ ܦܠ ܩܘܕܡܘܗܝ ܘܐܬܟܫܦ ܠܗ
1.000:124	ܕܐܢ ܗܘ ܕܠܐ ܦܪܩ ܚܝ̈ܝ ܐܢܐ ܗܐ ܫܩܠܢܝ ܡܢܟ
1.000:125	ܘܝ ܡܪܝ ܕܟܡܐ ܢܣܝܬܢܝ ܘܐܢܐ ܐܟܡܐ ܐܚܒܬܟ
1.000:126	ܟܕ ܐܝܕܥܬܗ ܠܐܠܗܐ ܥܡܟ ܢܦܩܬ ܡܢ ܐܢܫ̈ܝ
1.000:127	ܘܠܟܠ ܐܝܟܐ ܕܫܦܪ ܠܟ ܕܠܐ ܦܘܪܣܐ ܐܙܠܬ ܥܡܟ
1.000:128	ܘܨܠܝܬ ܠܝ ܦܚܐ ܘܝܕܥܬ ܕܗܘ ܗܘ݁ܐ ܠܝ ܠܬܘܩܠܬܐ
1.000:129	ܘܗܐ ܩܝܡܐ ܐܢܐ ܕܐܙܠ ܠܝ ܐܢܬܬܐ ܠܚܢܦܐ ܝܘܡܢܐ
1.000:130	ܟܒܪ ܒܕܠܐ ܗܘܘ ܠܝ ܒܢ̈ܝܐ ܦܪܫܬܢܝ ܝܘܡܢ ܡܢ ܨܐܕܝܟ
1.000:131	ܘܐܢܐ ܝܕܥܢܝ ܕܐܠܗܐ ܝܬܝܪ ܡܢܟ ܟܪܝܐ ܠܝ
1.000:132	ܘܝ ܕܢ݁ܦܩ ܛܐܒܟ ܒܐܪܥܐ ܕܒܠܚܡ ܦܘܡܟ ܙܒܢܬܢܝ
1.000:133	ܣܓܝ ܓܒܪ̈ܐ ܪܓܘ ܛܠܝܘܬܝ ܘܐܝܟ ܙܒܠܐ ܚܫܒܬ ܐܢܘܢ
1.000:134	ܡܪܝ‍[‍ܐ‍]‍ ܢܬܒܥ ܡܢܝ ܗܕܐ ܐܢ ܣܡܬ ܓܒܪܐ ܒܕܘܟܬܟ
1.000:135	ܟܠܝܠܝ ܫܦܝܪܐ ܦܘܫ ܒܫܠܡ ܕܗܐ ܡܓܚܟܝܢ ܒܝ ܟܦܘܪ̈ܐ
1.000:136	ܥܦܩܬܗ ܗܘܬ ܒܟܪܝܘܬܐ ܘܛܠܝ̈ܐ ܕܦܪܥܘܢ ܚܛܦܘܗ݀
1.000:137	ܘܥܠ ܡܪܟܒܬܐ ܐܬܥܠܝܬ ܐܝܟ ܟܘܟܒܬܐ ܡܐ ܕܢܓܗܐ
1.000:138	ܫ̈ܕܝ ܢܫ̈ܐ ܥܠܝܗ݀ ܒܣܡ̈ܢܐ ܡܢ ܬܪ̈ܥܐ ܕܩܝ̈ܛܘܢܝܗܘܢ
1.000:139	ܘܩܥܐ ܥܡܐ ܡܢ ܟܠ܆ܕܘܟ ܕܢܚܕܐ ܡܠܟܐ ܘܬܘܒ ܢܐܪܒ
1.000:140	ܕܗܐ ܡܪܬܐ ܕܐܪܥܢ ܥܡܢ ܚܕܝܘ ܒܗ݀ ܚܝ̈ܠܐ ܡܨܪ̈ܝܐ
1.000:141	ܕܣ݁ܠܩܐ ܒܫܘ̈ܩܝ ܡܠܟܘܬܐ ܘܦܪܥܘܢ ܡܠܟܐ ܢܦܩ ܠܐܘܪܥܗ݀
1.000:142	ܚܙܗ݀ ܦܪܥܘܢ ܘܪܘܙ ܠܒܗ ܐܝܟ ܦܩ̈ܚܐ ܕܘܪ̈ܕܐ ܕܢܝܣܢ
1.000:143	ܘܝܬܒ ܨܐܕܝܗ݀ ܒܡܪܟܒܬܐ ܕܟܠ ܫܘܦܪ̈ܝܢ ܣܕܝܪܝܢ ܗܘܘ ܒܗ݀
1.000:144	ܩܪ̈ܟܕܢܐ ܥܡ ܒܪ̈ܘܠܐ ܘܙܡܪ̈ܓܕܐ ܘܡܪ̈ܓܢܝܬܐ
1.000:145	ܓܚ݁ܟ ܠܗ݀ ܘܓܚܟܐ ܠܩܘܒܠܗ ܘܡܥܦܩ ܠܗ ܘܒܟܝܐ ܒܠܒܗ݀
1.000:146	ܡܨܒܬܐ ܣܩܝܠܐ ܘܦܨܝܚܐ ܘܣܝܡ ܠܒܗ݀ ܨܝܕ ܐܠܗܐ
1.000:147	ܡܪܝܐ ܐܠܗܝ ܕܩܪܝܬܟ ܥܕܪܝܢܝ ܘܐܚܙܐ ܚܝܠܟ
1.000:148	ܟܠܬܐ ܒܥܝܢ ܠܝ ܚܢ̈ܦܐ ܐܢܬ ܗܘ ܓܒܪܗ݀ ܕܥܠܝܡܘܬܝ
1.000:149	ܐܘ ܫܕܪ ܡܘܬܐ ܘܢܣܒܢܝ ܐܘ ܫܕܪ ܥܝܪܐ ܢܦܨܝܢܝ
1.000:150	ܨܠܘܬܗ݀ ܠܡܪ̈ܘܡܐ ܣܠܩܬ ܘܕܓܒܪܗ݀ ܗܘ ܙܕܝܩܐ
1.000:151	ܒܥܘܬܗܘܢ ܣܠܩܬ ܘܡܛܬ ܠܗܘ ܟܘܪܣܝܗ ܕܐܠܗܘܬܐ
1.000:152	ܪ̈ܫܢܐ ܓܢܝܢ ܒܚܠܘܠܐ ܘܦܠܝܛܝܢ ܡܠܝܐ ܚܕܘܬܐ
1.000:153	ܟܠܬܐ ܥܠܬ ܠܓܢܘܢܐ ܒܕܝܨܐ ܥܡ ܕܒܝܬ ܦܪܥܘܢ
1.000:154	ܘܫܡܠܝ ܡܠܟܐ ܢܡܘܣܐ ܘܬܪܨ ܐܘܪܚܗ ܠܓܢܘܢܐ
1.000:155	ܡܛܐ ܠܣܪܐ ܘܐܬܐ ܥܝܪܐ ܕܡܥܛܦ ܫܠܗܒܝܬܐ
1.000:156	ܡܚܝܗܝ ܠܡܠܟܐ ܘܝܒܫ ܓܒܗ ܘܥܠ ܐܪܥܐ ܣܚܦܗ ܘܢܦܠ
1.000:157	ܘܡܠܠ ܥܡܗ ܘܐܡܪ ܠܗ ܠܐ ܠܟ ܘܠܗܘ ܙܕܝܩܐ
1.000:158	ܫܪܝܗ݀ ܠܐܢܬܬܐ ܕܐܙ݁ܠܬ ܠܓܒܪܗ݀ ܘܠܐ ܬܬܩܪܒ ܠܟ ܨܐܕܝܗ݀
1.000:159	ܒܟܐ ܗܘܐ ܡܠܟܐ ܡܢ ܟܐܒܗ ܘܐܦܝܣܗ ܕܪܚܡ ܥܠܝ
1.000:160	ܠܐ ܝܕܥܬ ܕܐܝܬܘܗܝ ܓܒܪܗ݀ ܐܢܐ ܒܬܘܠܬܐ ܡܟܪܬ ܠܝ
1.000:161	ܐܡܪ ܢܘܪܢܐ ܠܦܪܥܘܢ ܐܠܗܐ ܐܝܬ ܠܗ݀ ܠܣܪܐ
1.000:162	ܘܗܘ ܡܪܗ݀ ܫܕܪܢܝ ܨܐܕܝܗ݀ ܘܐܡܚܐ ܠܟ ܡܚܘܬܐ ܗܕܐ
1.000:163	ܘܐܢܗܘ ܕܬܦܝܣ ܠܐܒܪܗܡ ܗܘ ܐ݁ܬܐ ܘܡܫܘܙܒ ܠܟ
1.000:164	ܒܫܪܪܐ ܐܡ݁ܪ ܐܢܐ ܠܟ ܕܒܢܘܪܐ ܕܣܕܘܡ ܬܐܩܕ
1.000:165	ܘܗܫܐ ܗܐ ܦܟ݁ܪ ܐܢܐ ܠܟ ܘܐܣܝܘܬܟ ܨܝܕ ܐܒܪܗܡ
1.000:166	ܫܢܝ ܥܝܪܐ ܡܢ ܨܐܕܘܗܝ ܘܦܫ ܦܪܥܘܢ ܒܕܡܘܬ ܡܝܬܐ

1.000:167	ܘܩܕܡܘ ܥܠܘ ܚܐܪ̈ܐ ܕܡܨܪܝܢ ܚܙܘܘܗܝ ܕܣܚܝܦ ܘܡܢܓܒ

1.000:168	ܐܡܪܝܢ ܠܗ ܐܝܟܘ ܚܝܠܟ ܓܢܒܪܐ ܕܟܠܗ݀ ܡܨܪܝܢ
1.000:169	ܡܢܘ ܦܟܪܟ ܕܠܐ ܣܘ̈ܛܡܐ ܘܡܢܘ ܫܦܠܟ ܕܠܐ ܙܝܢܐ
1.000:170	ܟܬܒ ܗܘܐ ܡܠܟܐ ܥܠ ܐܪܥܐ ܕܩܪܘܘܢܝܗܝ ܠܐܒܪܗܡ
1.000:171	ܒܣܘܪܗܒܐ ܩܪܘ ܠܙܕܝܩܐ ܕܢܗܘܐ ܠܗ ܐܣܝܐ ܠܦܪܥܘܢ
1.000:172	ܘܟܠ ܐܝܟܐ ܕܐܝܕܗ ܩܪܒܬ ܥܪܩ ܟܘܪܗܢܐ ܡܢ ܩܘܕܡܝܗ݀
1.000:173	ܩܪܐ ܗܘܐ ܦܪܥܘܢ ܠܐܒܪܗܡ ܘܒܚܢܓܬܐ ܡܠܠ ܥܡܗ
1.000:174	ܬܐ ܙܕܝܩܐ ܣܒ ܕܝܠܟ ܘܐܢܬܝ ܣܪܐ ܩܕܝ ܠܓܒܪܟܝ
1.000:175	ܘܟܠ ܡܐ ܕܝܗܒܬ ܠܟܘܢ ܢܗܘܐ ܘܠܐ ܐܢܫ ܢܣܒ ܡܢܟܘܢ ܡܕܡ
1.000:176	ܘܗܦܟܬ ܣܪܐ ܠܐܒܪܗܡ ܒܐܝܩܪܐ ܘܒܚܕܘܬܐ
1.000:177	ܘܫܒܚܘ ܘܐܘܕܝܘ ܠܐܠܗܐ ܕܥܠ ܣܒܪܗ ܢܦܩܘ ܠܐܟܣܢܝܐ
1.000:178	ܫܘܒܚܐ ܠܟ ܠܘܝܐ ܛܒܐ ܕܠܘܐ ܐܢܬ ܠܕܢܩ݁ܦ ܠܟ
1.000:179	ܕܒܗܢܐ ܥܠܡܐ ܘܒܗܘ ܠܕܪܚܡ ܐܢܬ ܡܝܩܪ ܐܢܬ
1.000:180	ܠܟ ܫܘܒܚܐ ܘܥܠܝܢ ܪ̈ܚܡܝܟ ܐܠܗܐ ܒܟܠ܆ܥܕ̈ܢܝܢ
1.000:181	ܫܠܡ ܡܐܡܪܐ ܕܥܠ ܐܒܪܗܡ ܘܥܠ ܣܪܐ