The Comprehensive Aramaic Lexicon

00102_54	ܘܲܒܥܽܘܒܲܕܝܵܐ ܪܲܒܒܲܝܬܵܐ ܦܓܲܥ ܐܲܝܟ ܕܸܐܡܲܪܢܲܢ܀
00102_55	ܫܲܕܪܸܗ ܕܢܼܐܡܲܪ ܠܵܐܚܵܒ ܡܵܪܸܗ ܕܗܵܐ ܐܸܠܝܼܵܐ܃
00102_56	ܘܡܸܢ ܗܵܝ ܥܸܠܬܵܐ ܬܢ݂ܵܐ ܗܼܘܵܐ ܗܵܠܸܝܢ ܐܲܝܟ ܕܸܐܫܬܲܡ̈ܲܫܝ܀
00102_57	ܠܲܐ ܠܲܡ ܫܒܲܩ ܡܵܪܝ ܥܲܡܵܐ ܒܲܐܪܥܵܐ ܐܲܘ݁ ܡܲܠܟܽܘܬܵܐ܃
00102_58	ܕܠܵܐ ܒܥܵܟ ܬܲܡܵܢ ܘܟܸܦܪܲܬ̤ ܐܲܪܥܵܐ ܕܠܲܘ ܒܵܗ݀ ܐܝܼܬܲܝܟ܀
00102_59	ܘܸܐܢ ܐܵܡ݁ܲܪ ܐܼܢܵܐ ܕܗܵܐ ܐܸܠܝܼܵܐ ܘܡܸܬܓܲܢܙܲܬ ܠܵܟ܃
00102_60	ܦܵܣܸܩ ܠܸܗ ܪܝܼܫܝ ܐܵܚܵܒ ܡܲܠܟ̇ܵܐ ܕܒܵܥܸܐ ܢܸܚܙܸܝܟ܀
00102_61	ܐܵܡܲܪ ܓܲܒܝܵܐ ܕܚܲܝ ܗܼܽܘ ܡܵܪܝܵܐ ܕܝܲܘܡܵܢ ܐܸܚ݁ܙܸܝܘܗܼܝ܃
00102_62	ܘܸܐܬ݂ܵܐ ܥ݂ܲܒܕܵܐ ܘܚܲܘܝܼ ܠܡܲܠܟܵܐ ܕܗܵܐ ܐܸܠܝܼܵܐ܀
00102_63	ܘܸܐܬܬܙܝܼܥ ܚܲܢܦܵܐ ܘܸܐܬܸܐ ܠܽܐܘܪܥܸܗ ܕܗܲܘ ܛܲܢܵܢܵܐ܃
00102_64	ܘܲܚܙܵܝܗܼܝ ܘܲܓܥܲܪ ܗܵܘ݁ ܪܲܫܝܼܥܵܐ ܒܗܵܘ݁ ܙܲܕܝܼܩܵܐ܀
00102_65	ܐܲܢܼܬ݁ ܗܼܽܘ ܗܵܢܵܐ ܕܲܗܦܝܼܟܵܐ ܠܵܟ ܐܲܪܥܵܐ ܟܽܠܵܗ݀܃
00102_66	ܘܵܐܦ ܝܼܣܪܵܐܸܠ ܡܲܝܠܸܠ ܡܸܢܵܟ ܥܲܠ ܕܕܲܠܲܚܬ̇ܵܝܗܼܝ܃
00102_67	ܐܵܡܲܪ ܓܲܒܝܵܐ ܐܸܠܝܼܵܐ ܐܸܢܵܐ ܠܲܘ ܕܵܠܽܘܚܵܐ܃
00102_68	ܠܝܼܣܪܵܐܸܠ ܕܹܝܢ ܐܲܢܼܬ݁ ܕܲܠܲܚܬ̇ܵܝܗܼܝ ܐܵܦ ܒܸܝܬ ܐܲܒܽܘܟ܀
00102_69	ܠܡܵܪܝܵܐ ܫܒܲܩܬܘܽܢ ܘܲܒܦܽܘܩܕ̈ܵܢܲܘܗܼܝ ܠܵܐ ܗܲܠܸܟܬܘܽܢ܃
00102_70	ܒܲܥܠܵܐ ܪܚܸܡܬܘܽܢ ܘܲܒܚܲܢܦܽܘܬܵܐ ܐܸܬܟܲܫܲܪܬܽܘܢ܀
00102_71	ܐܝܼܙܒܸܠ ܕܲܠܚܲܬ̤ ܠܲܐܪܥܵܐ ܟܽܠܵܗ݀ ܒܲܥ̈ܠܲܘܵܬܵܐ܃
00102_72	ܗܝܼ ܗܘܵܬ̤ ܥܸܠܬܵܐ ܕܢܸܚܪܲܒ ܥܵܠܡܵܐ ܒܥܲܘܠܵܗ݀ ܪܲܒܵܐ܀
00102_73	ܒܵܟ ܗܼܽܘ ܗܵܫܵܐ ܕܠܝܼܚ ܝܼܣܪܵܐܸܠ ܘܲܒܒܝܼܫ̈ܵܬܵܟ܃
00102_74	ܘܲܒܚܲܢܦܽܘܬܵܟ ܕܵܐܦ ܠܲܫܡܲܝܵܐ ܡܛܵܐ ܬܸܢܵܢܵܗ݀܀
00102_75	ܒܨܲܠ̈ܡܸܐ ܕܲܐܩܝܼܡܬ݁ ܒܡܲܕܒ̈ܚܸܐ ܕܲܒܢܲܝܬ݁݁ ܒܕܸܒܚܸ̈ܐ ܕܲܐܣܸܩܬ݁܃
00102_76	ܒܪܽܘܫܥܵܐ ܕܲܦܠܲܚܬ݁ ܒܲܐܢܼܬܬܵܐ ܕܲܢܣܲܒܬ݁ ܒܟܽܠܗܸܝܢ ܕܲܣܥܲܪܬ݁܀
00102_77	ܒܲܥ̈ܠܲܘܵܬܵܐ ܕܕܲܝ̈ܘܸܐ ܕܬܲܪܣܝܼܬ݁ ܟܲܕ ܡܸܫ݂ܬܲܢܸܝܬ݁܃
00102_78	ܘܲܒܦܵܬܘܽܪܸ̈ܐ ܕܫܼ̈ܐܕܸܐ ܕܲܐܬܩܸܢܬ݁ ܥܲܡ ܒܲܪܼܬ ܙܽܘܓܵܟ܀
00102_79	ܕܵܠܘܽܚܵܐ ܐܲܢܼܬ݁ ܒܲܥܒܝܼ̈ܕܵܬܵܟ ܘܲܒܨܸܒܘ̈ܵܬܵܟ܃
00102_80	ܠܲܘ ܓܹܝܪ ܐܸܢܵܐ ܕܲܠܚܸܬ ܠܲܐܪܥܵܐ ܐܲܝܟ ܕܵܐܡܲܪ ܐܲܢܼܬ݁܀
00102_81	ܫܲܦ݁ܝܼܪ ܗܼܘܵܐ ܠܸܗ ܠܗܲܘ݁ ܫܲܪܝܼܪܵܐ ܕܲܡܡܲܠܸܠ ܗܼܘܵܐ܃
00102_82	ܒܓܲܠܝܽܘܬ ܐܲܦܸ̈ܐ ܩܕܵܡ ܗܲܘ݁ ܚܲܢܦܵܐ ܘܠܵܐ ܕܵܚܸܠ ܗܼܘܵܐ܀
00102_83	ܡܵܢܵܐ ܚܫܝܼܒ ܗܼܘܵܐ ܬܲܓܵܐ ܕܡܲܠܟܵܐ ܠܗܲܘ݁ ܥܲܙܝܼܙܵܐ܃
00102_84	ܕܬܲܓܸܗ ܕܝܼܠܸܗ ܐܲܠܵܗܵܐ ܗܼܘܵܐ ܘܠܵܐ ܢܵܦܸܠ ܗܼܘܵܐ܀
00102_85	ܓܲܒܪܵܐ ܕܣܝܼܡܝܼܢ ܚܲܝܸ̈ܐ ܕܥܵܠܡܵܐ ܒܪܝܼܫ ܠܸܫܵܢܸܗ܃
00102_86	ܠܡܽܘܢ ܢܸܕܚܲܠ ܗܼܘܵܐ ܡܸܢ ܫܽܘܠܛܵܢܵܐ ܕܲܐܝܟ ܛܸܠܵܠܲܐ ܗܼܘ܀
00102_87	ܠܵܐ ܕܵܚܸܠ ܗܼܘܵܐ ܕܲܡܡܲܠܸܠ ܗܼܘܵܐ ܒܙܲܕܝܼܩܽܘܬܵܐ܃
00102_88	ܩܕܵܡ ܗܲܘ ܡܲܠܟ̇ܵܐ ܕܲܠܚܲܢܦܽܘܬܵܐ ܫ݁ܒܸܐ ܗܼܘܵܐ ܠܸܒܸܗ܀
00102_89	ܐܲܢܼܬ ܘܒܸܝܬ ܐܲܒܽܘܟ ܕܠܲܚܬ݁ ܠܝܼܣܪܵܐܸܠ
00102_90	ܥܲܠ ܕܸܐܙܲܠܬ݁ܘܽܢ ܒܵܬܲܪ ܒܲܥ݂ܠܵܐ ܘܲܪܚܸܡܬ݁ܘܽܢܵܝܗܼܝ܀
00102_91	ܘܗܵܫܵܐ ܡܲܠܟܵܐ ܫܲܕ݁ܲܪ ܟܲܢܸܫ ܥܲܡܵܐ ܟܽܠܸܗ܃
00102_92	ܠܛܽܘܪܵܐ ܕܟܲܪܡܠܵܐ ܕܬܸܗܘܸܐ ܒܥܵܬܵܐ ܕܫܲܪܝܼܪ̈ܵܬܵܐ܀
00102_93	ܫܲܕ݁ܲܪ ܐܲܝܬܸ݁ܐ ܢܒܝܼܸ̈ܐ ܕܒܲܥܠܵܐ ܘܲܕܕܸܚ̈ܠܵܬܵܐ܃
00102_94	ܘܢܸܚܙܸܐ ܒܡܲܢܽܘ ܘܲܐܝܟ݁ܽܘ ܩܽܘܫܬܵܐ ܠܥܸܝܢ ܣܲܓ̈ܝܼ̈ܐܸܐ܀
00102_95	ܘܲܫܡܲܥ ܐܵܚܵܒ ܡܸܢ ܐܸܠܝܼܵܐ ܐܲܝܟ ܕܸܐܡܲܪ ܠܸܗ܃
00102_96	ܘܫܲܕܲܪ ܟܲܢܸܫ ܟܽܠܸܗ ܥܲܡܵܐ ܩܲܠܝܼܠܵܐܝܼܬ܀
00102_97	ܥܲܡ ܦܽܘܩܕܵܢܸܗ ܕܡܲܠܟܵܐ ܕܲܢܦܲܩ ܥܲܠ ܥܸܒܪ̈ܵܝܸܐ܃
00102_98	ܫܡܲܥܘ ܐܵܦ ܛܸܒ̇ܵܐ ܕܗܵܐ ܐܸܠܝܼܵܐ ܘܛܵܒ ܐܸܬܟܲܢܲܫܘ܀
00102_99	ܣܒܲܪܬܵܐ ܚܕܲܬܵܐ ܠܢܽܘܓܪܵܐ ܪܲܒܵܐ ܐܸܫܬܲܡܥ݂ܲܬ̤ ܗܼܘܵܬ܃
00103_00	ܘܗܝܼ ܟܲܢܸܫܬ݂ܸܗ ܠܟܽܠܸܗ ܥܲܡܵܐ ܕܠܵܐ ܬܽܘܗܵܝܵܐ܀
00103_01	ܫܡܲܥ ܗܼܘܵܐ ܐܲܬܪܵܐ ܕܗܵܐ ܐܸܠܝܼܵܐ ܘܲܢܩܲܫܘ ܟܲܦܵܐ܃
00103_02	ܕܢܼܐܬܸܐ ܢܸܚܙܸܝܗܼܝ ܐܲܝܟ ܕܲܠܡܸܛܪܵܐ ܠܢܽܘܓܪܵܐ ܪܲܒ̇ܵܐ܀
00103_03	ܓܢܝܼܙ ܗܼܘܵܐ ܢܒܝܼܵܐ ܘܡܸܛܪܵܐ ܥܲܡܸܗ ܘܟܲܕ ܐܸܫܬܲܡܥܲܬ܃
00103_04	ܕܵܐܬܸܐ ܢܒܝܼܵܐ ܠܸܗ ܘܲܠܡܸܛܪܵܐ ܣܘܲܚܘ ܫܵܡ̈ܽܘܥܸܐ܀