← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63403: JS_Elijah (Jacob of Saroug on Elijah)

Click on a word for lexical analysis
Click on a red-colored coordinate for comments and/or translations of the line

▲ earlier lines

00104_04 ܐܲܣܓܝܼܘ ܩ̈ܵܠܸܐ ܘܲܕܠܵܐ ܫܡܲܥ ܗܼܘܵܐ ܡܽܘܢ ܢܸܥܒܸܕ ܗܼܘܵܐ܀
00104_05 ܚܪܸܫܘ ܩܵܠܲܝܗܽܘܢ ܟܲܕ ܠܲܦܬܲܟܪܵܐ ܚܲܪܫܵܐ ܩܵܪܸܝܢ܃
00104_06 ܕܵܐܦܠܵܐ ܨܵܐܸܬ ܐܵܦܠܵܐ ܫܵܡܲܥ ܐܵܦܠܵܐ ܥܵܢܸܐ܀
00104_07 ܩܪܲܘ ܡܸܢ ܨܲܦܪܵܐ ܥܕܲܡܵܐ ܠܛܲܗܪܵ ܒܲܥܠܵܐ ܢܸܥܢܸܐ܃
00104_08 ܘܠܵܐ ܥܵܢܸܐ ܗܼܘܵܐ ܦܬܲܟܪܵܐ ܚܲܪܒܵܐ ܠܲܕܩܵܪܸܝܢ ܠܸܗ܀
00104_09 ܩܵܝܡܵܐ ܟܢܽܘܫܬܵܐ ܘܫܵܡܥܵܐ ܒܸܙܚܵܗ݀ ܡܸܢ ܦܽܘܡܲܝ̈ܗܽܘܢ܃
00104_10 ܘܠܵܐ ܡܫܲܬܩܵܐ ܠܗܽܘܢ ܠ̈ܲܒܢܲܝ ܥܲܘܠܵܐ ܕܡܸܫܬܲܢܸܝܢ
00104_11 ܠܲܘ ܗܽܘ ܒܲܥܠܵܐ ܐܸܬܦܲܪܣܝܼ ܗܼܘܵܐ ܒܗܲܘ݁ ܩܽܘܪܒܵܢܵܐ܃
00104_12 ܐܸܠܵܐ ܟܢܽܘܫܬܵܐ ܕܚܵܫܒܵܐ ܗܼܘܵܬ̤ ܠܸܗ ܠܒܲܥܠܵܐ ܡܸܕܸܡ܀
00104_13 ܐܸܠܽܘ ܐܝܼܬ ܠܸܗ ܠܒܲܥܠܵܐ ܫܸܡܥܵܐ ܘܠܵܐ ܫܵܡܲܥ ܗܼܘܵܐ܃
00104_14 ܟܽܘܵܐܪܸܗ ܗܼܘܵܐ ܕܲܠܣܵܓܽܘܕܲܘܗܼܝ ܠܵܐ ܥܵܢܸܐ ܗܼܘܵܐ܀
00104_15 ܘܲܕܠܵܐ ܐܝܼܬ ܠܸܗ ܡܚܲܪܲܪ ܗܽܘ ܗܽܘ ܡܸܢ ܟܽܘܐܵܪܵܐ܃
00104_16 ܘܲܫܪܸܟ ܟܽܠܸܗ ܨܹܝܕ ܒܲܪܼܬ ܥܲܡܵܐ ܕܲܟܡܵܐ ܙܸܠܲܬ̤܀
00104_17 ܐܸܢ ܛܲܥܵܝܸ̈ܐ ܐܓܝܼܪܸ̈ܝܗ݀ ܕܼܐܝܙܒܸܠ ܡܸܫܬܲܢܸܝܢ ܗܼܘܲܘ܃
00104_18 ܥܲܡܵܐ ܟܽܠܸܗ ܠܡܽܘܢ ܡܲܓܲܪ ܗܼܘܵܐ ܘܲܛܥܸܫ ܗܵܟܲܢ܀
00104_19 ܐܸܢ ܢܒܝܼܸ̈ܐ ܟܲܪܣ̈ܵܬܗܽܘܢ ܗ̄ܘ̈ܲܝ ܐܲܠܵܗܲܝ̈ܗܽܘܢ܃
00104_20 ܫܲܒ̈ܛܸܐ ܟܽܠܗܽܘܢ ܒܲܐܝܢܵܐ ܣܸܒܪܵܐ ܫܡܲܥܘ ܗܼܘܲܘ ܐܸܢܽܘܢ܀
00104_21 ܐܸܠܝܼܵܐ ܕܹܝܢ ܐܲܝܟܵܐ ܕܸܐܠܨܲܬ̤ ܐܲܓܲܪ ܪܽܘܚܸܗ܃
00104_22 ܕܚܲܟܝܼܡܵܐ ܗܼܘܵܐ ܠܲܘ ܚܸܡܬܵܢܵܐ ܕܢܸܣܬܲܪܗܲܒ ܗܼܘܵܐ܀
00104_23 ܟܲܕ ܪܸܥܝܵܢܸܗ ܛܢܵܢܵܐ ܡܠܸܐ ܗܼܘܵܐ ܐܲܠܵܗܵܝܵܐ܃
00104_24 ܠܵܐ ܟܠܵܐ ܐܸܢܽܘܢ ܡܸܢ ܛܵܥܝܽܘܬܵܐ ܡܸܛܽܠ ܦܽܘܪܣܵܐ܀
00104_25 ܕܠܵܐ ܢܸܫܒܽܘܩ ܗܼܘܵܐ ܬܲܡܵܢ ܥܸܠܬܵܐ ܠ̈ܲܒܢܲܝ ܥܲܘܠܵܐ܃
00104_26 ܒܡܲܓܪܲܬ ܪܽܘܚܸܗ ܫܩܲܠ ܥܸܠ̈ܵܬܗܽܘܢ ܣܲܓܝ̈ܵܐܬܵܐ܀
00104_27 ܐܲܪܦܝܼ ܘܲܩܪܲܘ ܩ̈ܵܠܸܐ ܩܫ̈ܲܝܵܐ ܐܵܦ ܪܲ̈ܟܝܼܟܸܐ܃
00104_28 ܕܲܠܗܽܘܢ ܬܸܡܲܐܢ ܠܲܡܫܲܢܵܝܽܘ ܘܗܽܘ ܠܵܐ ܢܸܡܲܐܢ܀
00104_29 ܚܲܡ ܗܼܘܵܐ ܝܲܘܡܵܐ ܘܫܲܢܸܩ ܐܸܢܽܘܢ ܠ̈ܲܒܢܲܝ ܥܲܘܠܵܐ܃
00104_30 ܘܕܲܓܵܠܘܽܬܵܐ ܫܚܝܼܩܵܐ ܘܩܲܪܝܵܐ ܘܠܵܐ ܡܸܬܥܲܢܝܵܐ܀
00104_31 ܘܫܲܪܝܼ ܢܒܝܼܵܐ ܠܲܡܓܲܚܵܟܽܘ ܒܗܽܘܢ ܟܲܕ ܐܵܡܲܪ܃
00104_32 ܩܪܲܘ ܠܸܗ ܠܒܲܥܠܵܐ ܒܩܵܠܵܐ ܪܵܡܵܐ ܛܵܟ ܢܸܥܢܸܝܟܽܘܢ܀
00104_33 ܥܲܠ ܕܲܐܠܵܗܲܐ ܗܼܘ ܪܲܟܝܼܟܵܐܝܼܬ ܠܵܐ ܬܸܩܪܽܘܢ ܠܸܗ܃
00104_34 ܕܲܠܡܵܐ ܪܸܢܝܵܐ ܡܸܕܸܡ ܐܝܼܬ ܠܸܗ ܒܚܲܕ ܡܸܢ ܓ̈ܲܒܝܼܢ܀
00104_35 ܐܲܘ݁ ܕܲܠܡܵܐ ܬܘܽܒ ܡܸܕܸܡ ܣܵܥܲܪ ܠܲܡܬܲܩܵܢܽܘ܃
00104_36 ܐܲܘ݁ ܕܲܨܒܽܘܬܵܐ ܪܲܒܬܵܐ ܝܲܨܝܼܦ ܥܲܕ ܡܸܬܓܲܡܪܵܐ܀
00104_37 ܣܽܘܥܪ̈ܵܢܸܐ ܐܝܼܬ ܘܲܥܒܝܼ̈ܕܵܬܵܐ ܐܵܦ ܨܸܒܘܵ̈ܬܵܐ܃
00104_38 ܘܸܐܠܵܐ ܝܵܨܸܦ ܡܸܣܬܲܪܚܵܐ ܠܵܗ݀ ܡܕܲܒܪܵܢܽܘܬܸܗ܀
00104_39 ܐܲܘ݁ ܡܸܢ ܥܲܡܠܵܐ ܕܣܵܥܽܘܪܽܘܬܸܗ ܡܸܕܡܲܟ ܕܲܡܝܼܟ܃
00104_40 ܒܩܵܠܵܐ ܪܵܡܵܐ ܩܪܲܘ ܠܸܗ ܡܸܬܬܥܝܼܪ ܥܲܠ ܣܽܘܥܪܵܢܵܐ܀
00104_41 ܐܲܘ݁ ܕܲܠܡܵܐ ܬܘܽܒ ܐܽܘܪܚܵܐ ܐܝܼܬ ܠܸܗ ܘܸܐܙܲܠ ܢܸܣܥܽܘܪ܃
00104_42 ܐܲܬܪ̈ܲܘܵܬܵܐ ܘܪܲܚܝܼܩ ܢܸܫܡܲܥ ܪܲܟܝܼܟܵܐܝܼܬ܀
00104_43 ܩܥܲܘ ܕܸܐܢ ܪܲܚܝܼܩ ܢܸܐܙܲܠ ܩܵܠܵܐ ܥܕܲܡܵܐ ܨܸܝܕܲܘܗܝ܃
00104_44 ܐܲܘ݁ ܐܸܢ ܕܲܡܝܼܟ ܬܥܝܼܪܸܗ ܩܥܵܬܵܐ ܪܲܒܬܵܐ ܘܲܢܩܽܘܡ܀
00104_45 ܢܒܝܼܵܐ ܡܓܲܚܸܟ ܘܗܸܢܽܘܢ ܙܵܩܦܝܼܢ ܩ̈ܵܠܸܐ ܪܸܒܲܬ܃
00104_46 ܗܽܘ ܡܲܗܸܠ ܗܼܘܵܐ ܘܗܸܢܽܘܢ ܩܵܪܸܝܢ ܥܲܬܝܼܪܵܐܝܼܬ܀
00104_47 ܥܒܲܪ ܗܼܘܵܐ ܛܸܗܪܵܐ ܘܬܽܘܒ ܒܲܩܥܵܬܵܐ ܡܸܫܬܲܢܸܝܢ ܗܼܘܲܐ܃
00104_48 ܘܸܐܬܵܐ ܦܵܢܝܵܐ ܘܗܸܢܽܘܢ ܩܵܪܸܝܢ ܐܲܝܟ ܕܼܐܝܬܲܝܗܽܘܢ܀
00104_49 ܠܟܽܠܸܗ ܝܲܘܡܵܐ ܒܲܣܪܝܼܩܽܘܬܵܐ ܕܥܲܘܠܵܐ ܒܲܙܘܽܗܼܝ܃
00104_50 ܨܲܦܪܵܐ ܘܛܲܗܪܵܐ ܘܦܵܢܝܵܐ ܟܽܠܸܗ ܒܚܲܕ ܪܸܥܝܵܢܵܐ܀
00104_51 ܐܸܫܲܕܘ ܗܼܘܲܘ ܕܸܡܗܽܘܢ ܐܲܝܟ ܢܵܡܽܘܣܗܽܘܢ ܥܲܠ ܕܸܒܚ̈ܲܝܗܽܘܢ܃
00104_52 ܕܢܸܫܬܲܓܲܫ ܗܼܘܵܐ ܫܼܐܕܵܐ ܒܲܕܡܵܐ ܘܢܲܝܬܸܐ ܢܽܘܪܵܐ܀
00104_53 ܫܩܲܠܘ ܗܼܘܲܘ ܪ̈ܽܘܡܚܸܐ ܟܬܝܼ̈ܫܸܐ ܕܲܒܗܽܘܢ ܚܲܕ ܠܽܘܩܒܲܠ ܚܲܕ܃
00104_54 ܘܲܠܦܲܓܪ̈ܲܝܗܽܘܢ ܣܲܕܸܩܘ ܢܸܬܬܢܝܼܚ ܫܼܐܕܵܐ ܛܲܐܡܵܐ܀

▼ later lines