← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63403: JS_Elijah (Jacob of Saroug on Elijah)

Click on a word for lexical analysis
Click on a red-colored coordinate for comments and/or translations of the line

▲ earlier lines

00105_05 ܣܵܡ ܥܽܘܗܕܵܢܵܐ ܕܡܸܢܝܵܢܲܝ̈ܗܽܘܢ ܘܲܕܫܲܒܛܲܝ̈ܗܽܘܢ܃
00105_06 ܒܗܲܘ ܒܸܢܝܵܢܵܐ ܕܩܽܘܫܬܵܐ ܕܫܲܪܝܼ ܦܲܪܽܘܫܵܐܝܼܬ܀
00105_07 ܥܲܡܵܐ ܥܩܝܼܪ ܗܼܘܵܐ ܒܗܵܝ ܚܲܢܦܽܘܬܵܐ ܕܲܐܚܪܸܒܬܸܗ ܗܼܘܵܬ̤܃
00105_08 ܘܲܒܥܵܐ ܢܒܝܼܵܐ ܕܠܸܗ ܢܸܒܢܸܐ ܗܼܘܵܐ ܒܟܼ̈ܐܦܸܐ ܕܲܣܕܲܪ܀
00105_09 ܬܲܪܣܝܼ ܗܵܟܝܼܠ ܡܲܕܒܚܸܗ ܕܡܵܪܝܵܐ ܕܲܡܣܲܚܲܦ ܗܼܘܵܐ܃
00105_10 ܘܲܒܢܵܝܗܼܝ ܒܟܼ̈ܐܦܸܐ ܠܵܐ ܓܠܝܼ̈ܦܵܬܵܐ ܐܲܝܟܲܢ ܕܲܦܩܝܼܕ܀
00105_11 ܘܲܠܒܲܪ ܡܸܢܸܗ ܥܒܲܕ ܚܸܐܪܝܼܬܵܐ ܕܡܸܬܟܲܪܟܵܐ ܠܸܗ܃
00105_12 ܘܲܣܕܲܪ ܩܝܼ̈ܣܸܐ ܘܦܲܫܲܚ ܬܲܘܪܵܐ ܘܣܵܡ ܒܲܥܠܵܬܵܐ܀
00105_13 ܘܲܢܣܲܟ ܡܲܝ̈ܵܐ ܠܥܸܠ ܡܸܢ ܕܸܒܚܵܐ ܘܛܵܦ ܩܽܘܪܒܵܢܵܐ܃
00105_14 ܘܠܵܗ݀ ܠܚܸܐܪܝܼܬܵܐ ܡܠܵܗ݀ ܗܼܘܵܐ ܡܲܝ̈ܵܐ ܐܲܟܡܵܐ ܕܲܟܬܝܼܒ܀
00105_15 ܠܡܽܘܢ ܟܲܝ ܡܲܝ̈ܵܐ ܠܥܸܠ ܡܸܢ ܕܸܒܚܵܐ ܢܣܲܟ ܐܠܝܵܐ܃
00105_16 ܟܲܕ ܢܵܡܽܘܣܵܐ ܠܵܐ ܡܲܠܸܦ ܗܼܘܵܐ ܕܗܵܕܸܐ ܢܸܥܒܸܕ܀
00105_17 ܘܲܕܠܵܐ ܟܬܝܼܒܵܐ ܠܡܽܘܢ ܐܸܣܬܲܥܪܲܬ̤ ܡܸܢ ܚܲܟܝܼܡܵܐ܃
00105_18 ܗܵܕܸܐ ܕܲܚܠܲܛ ܡܲܝ̈ܵܐ ܒܕܸܒܚܸܗ ܕܠܵܐ ܦܽܘܩܕܵܢܵܐ܀
00105_19 ܠܡܵܢܵܐ ܠܵܐ ܕܚܸܠ ܡܸܢ ܨܽܘܚܝܼܬܵܐ ܕܠܵܐ ܢܸܪܢܸܐ ܐܼܢܵܫ܃
00105_20 ܕܲܕܠܵܐ ܢܵܡܽܘܣ ܐܸܬܕܲܒܲܪ ܗܼܘܵܐ ܒܕܸܒܚܵܐ ܕܲܐܣܸܩ܀
00105_21 ܠܲܘ ܢܵܡܽܘܣܵܐ ܦܩܲܕ ܠܸܗ ܕܲܢܣܽܘܟ ܡܲܝ̈ܵܐ ܕܲܢܣܲܟ܃
00105_22 ܠܥܸܠ ܡܸܢ ܕܸܒܚܵܐ ܗܽܘ ܡܸܢ ܕܝܼܠܸܗ ܕܠܵܐ ܢܵܡܽܘܣܵܐ܀
00105_23 ܡܸܢ ܡܽܘܢ ܕܲܦܩܝܼܕ ܠܵܐ ܒܲܨܲܪ ܗܼܘܵܐ ܠܲܡܩܲܪܵܒܽܘ܃
00105_24 ܗܵܝܕܸܝܢ ܕܲܐܘܣܸܦ ܘܲܢܣܲܟ ܡܲܝ̈ܵܐ ܕܠܵܐ ܥܸܕܠܵܝܵܐ ܗܼܝܼ܀
00105_25 ܐܸܠܽܘ ܒܲܨܲܪ ܘܲܟܠܵܐ ܡܸܕܸܡ ܡܸܢ ܡܵܐ ܕܲܟܬܝܼܒ܃
00105_26 ܐܝܼܬ ܗܼܘܵܐ ܠܡܼܐܡܪ ܡܸܢ ܢܵܡܽܘܣܵܐ ܕܠܵܐ ܐܸܫܬܲܡܠܝܼ܀
00105_27 ܬܲܘܣܸܦܬܵܐ ܕܹܝܢ ܗܵܝ ܕܲܥܒܲܕ ܗܼܘܵܐ ܗܽܘ ܡܸܢ ܕܝܼܠܸܗ܃
00105_28 ܒܵܬܲܪ ܕܲܓܡܲܪ ܟܽܠܡܵܐ ܕܲܟܬܝܼܒ ܬܘܽܒ ܫܲܦܝܼܪܵܐ܀
00105_29 ܒܢܵܐ ܗܼܘܵܐ ܡܲܕܒܚܵܐ ܐܲܝܟܲܢ ܕܝܼܠܸܦ ܡܸܢ ܢܵܡܽܘܣܵܐ܃
00105_30 ܘܲܕܠܵܐ ܓܠܝܼ̈ܦܵܢ ܣܵܡ ܒܸܗ ܟܼܐܦܸ̈ܐ ܐܲܝܟ ܕܸܐܬܦܲܩܲܕ܀
00105_31 ܘܲܣܕܲܪ ܩܲܝ̈ܣܸܐ ܒܸܗ ܒܸܐܣܟܝܼܡܵܐ ܕܲܒܢܲܝ ܠܸܘܝܼ܃
00105_32 ܘܲܕܒܲܚ ܬܲܘܪܵܐ ܐܲܟܡܵܐ ܕܡܽܘܫܸܐ ܦܩܲܕ ܒܲܟܬܵܒܸܗ܀
00105_33 ܘܢܲܛܪܸܗ ܠܕܸܒܚܵܐ ܠܥܸܕܵܢ ܪܲܡܫܵܐ ܘܟܸܢ ܩܲܪܸܒ ܗܼܘܵܐ܃
00105_34 ܕܲܒܥܸܕܵܢܸܗ ܢܸܬܩܲܪܲܒ ܗܼܘܵܐ ܐܲܝܟ ܢܵܡܽܘܣܵܐ܀
00105_35 ܘܟܲܕ ܫܲܡܠܝܼ ܗܼܘܵܐ ܟܽܠܡܽܘܢ ܕܲܟܬܝܼܒ ܐܲܝܟ ܠܸܘܵܝܵܐ܃
00105_36 ܢܣܲܟ ܗܼܘܵܐ ܡܲܝ̈ܵܐ ܗܽܘ ܡܸܢ ܕܝܼܠܸܗ ܕܠܵܐ ܢܵܡܽܘܣܵܐ܀
00105_37 ܐܲܝܟ ܗܵܝ ܕܲܟܬܝܼܒ ܕܵܐܡܲܪ ܐܼܢܵܐ ܠܲܡ ܐܸܢܵܐ ܠܲܘ ܡܵܪܝ܃
00105_38 ܗܵܟܲܢ ܗܵܪܟܵܐ ܢܣܲܟ ܗܽܘ ܡܲܝ̈ܵܐ ܘܠܲܘ ܢܵܡܽܘܣܵܐ܀
00105_39 ܐܲܝܢܵܐ ܕܲܡܛܵܐ ܠܗܵܝ ܝܼܕܲܥܬܵܐ ܕܲܐܠܵܗܽܘܬܵܐ܃
00105_40 ܡܸܬܕܲܒܲܪ ܗܼܘܵܐ ܕܠܵܐ ܢܵܡܽܘܣܵܐ ܘܠܵܐ ܫܵܪܸܐ ܠܸܗ܀
00105_41 ܐܸܡܲܪ ܦܲܘܠܽܘܣ ܕܵܐܡܲܪ ܐܼܢܵܐ ܠܲܡ ܐܸܢܵܐ ܠܲܘ ܡܵܪܝ܃
00105_42 ܘܠܵܐ ܗܼܘܵܐ ܡܸܠܬܵܐ ܕܡܵܪܸܗ ܒܲܛܸܠ ܟܲܕ ܐܵܡܲܪ ܗܼܘܵܐ܀
00105_43 ܘܬܘܽܒ ܐܸܠܝܼܵܐ ܠܵܐ ܐܸܬܦܲܩܲܕ ܘܲܐܪܡܝܼ ܡܲܝ̈ܵܐ܃
00105_44 ܘܠܲܐ ܦܽܘܩܕܵܢܵܐ ܕܡܵܪܸܗ ܒܲܛܸܠ ܡܸܢ ܩܽܘܪܒܵܢܵܐ܀
00105_45 ܒܡܲܕܥܵܐ ܫܲܦܝܵܐ ܕܪܵܡ ܘܲܡܥܲܠܲܝ ܡܸܢ ܢܵܡܽܘܣܵܐ܃
00105_46 ܘܲܡܠܸܐ ܚܽܘܒܵܐ ܘܲܥܙܝܼܠ ܟܽܠܸܗ ܒܲܐܠܵܗܽܘܬܵܐ܀
00105_47 ܘܪܵܚܸܡ ܠܡܵܪܝܵܐ ܘܼܐܝܬ ܒܸܗ ܛܢܵܢܵܐ ܘܗܲܝܡܵܢܽܘܬܵܐ܃
00105_48 ܘܝܲܨܝܼܦ ܕܲܐܝܟܲܢ ܢܲܦܢܸܐ ܠܥܲܡܵܐ ܨܹܝܕ ܐܲܠܵܗܸܗ܀
00105_49 ܘܲܒܟܽܠ ܦܽܘܪ̈ܣܝܼܢ ܢܸܪܕܽܘܦ ܛܘܽܥܝܲܝ ܕܲܐܚܝܼܕܵܐ ܗܼܘܵܬ܃
00105_50 ܘܲܒܢܵܡܽܘܣܵܐ ܘܲܕܠܵܐ ܢܵܡܽܘܣ ܩܽܘܫܬܵܐ ܢܸܙܟܸܐ܀
00105_51 ܡܸܛܽܠܗܵܢܵܐ ܢܣܲܟ ܗܼܘܵܐ ܡܲܝ̈ܵܐ ܥܲܠ ܩܽܘܪܒܵܢܵܐ܃
00105_52 ܕܡܵܐ ܕܕܵܠܩܵܐ ܗܼܘܵܬ̤ ܢܽܘܪܵܐ ܒܡܲܝ̈ܵܐ ܡܵܪܝܵܐ ܢܼܐܪܲܒ܀
00105_53 ܐܵܬܵܐ ܪܲܒܬܵܐ ܒܥܵܐ ܕܲܢܚܲܘܸܐ ܠܚܲܢ̈ܦܸܐ ܬܲܡܵܢ܃
00105_54 ܘܢܲܬܗܲܪ ܐܸܢܽܘܢ ܡܵܐ ܕܣܲܦܝܼܦܵܐ ܒܡܲܝ̈ܵܐ ܢܽܘܪܵܐ܀
00105_55 ܠܵܗ݀ ܠܬܸܕܡܽܘܪܬܵܐ ܒܥܵܐ ܗܼܘܵܐ ܕܢܲܘܪܸܒ ܘܲܐܪܡܝܼ ܡܲܝ̈ܵܐ܃

▼ later lines