The Comprehensive Aramaic Lexicon

00106_83	ܐܸܡܲܪ ܙܲܗܝܵܐ ܐܚܽܘܕܘ ܠܲܢ̈ܒܝܼܸܐ ܕܕܲܓܵܠܘܽܬܵܐ܃
00106_84	ܘܸܐܚܲܕ ܐܸܢܽܘܢ ܥܲܡܵܐ ܠܟܽܠܗܽܘܢ ܩܲܠܝܼܠܵܐܝܼܬ܀
00106_85	ܘܲܐܚܸܬ ܐܸܢܽܘܢ ܡܸܢ ܗܲܘ ܛܘܽܪܐ ܕܒܸܝܬ ܩܽܘܪܒܵܢܵܐ܃
00106_86	ܠܢܲܚܠܵܐ ܕܩܝܼܫܽܘܢ ܘܲܫܩܲܠ ܚܲܪܒܵܐ ܘܲܢܟܲܣ ܐܸܢܽܘܢ܀
00106_87	ܐܲܟܵܪܵܐ ܗܼܘܵܐ ܕܣܵܢܸܐ ܕܢܸܚܙܸܐ ܒܚܲܩܠܸܗ ܟܽܘ̈ܒܸܐ܃
00106_88	ܘܲܐܝܟ ܕܲܠܝܲܥܪܵܐ ܒܡܲܓܠܵܐ ܕܚܲܪܒܵܐ ܥܲܕ ܗܼܘܵܐ ܐܸܢܽܘܢ܀
00106_89	ܙܝܼܙ̈ܵܢܸܐ ܗܼܘܲܘ ܘܥܲܠ ܕܲܢܕܲܟܸܐ ܡܸܢܗܽܘܢ ܐܲܪܥܸܗ܃
00106_90	ܡܠܲܓ ܗܼܘܵܐ ܘܲܫܕܵܐ ܠܟܽܠܗܽܘܢ ܡܸܢܵܗ݀ ܕܠܵܐ ܢܲܐܟܽܘܢܵܗ݀܀
00106_91	ܕܠܵܐ ܢܲܪܦܸܐ ܗܼܘܵܐ ܟܽܘ̈ܒܸܐ ܒܙܲܪܥܵܐ ܕܒܸܝܬ ܐܲܒܪܵܗܵܡ܃
00106_92	ܒܲܥܲܪ ܐܸܢܽܘܢ ܡܸܢ ܗܵܝ ܚܲܩܠܸܗ ܒܪܝܼܟܬܵܐ ܕܼܐܝܣܚܲܩ܀
00106_93	ܥܽܘܩ̈ܣܸܐ ܒܝܼ̈ܫܸܐ ܚܙܵܐ ܒܸܐܫܟܵܪܵܗ݀ ܕܟܼܐܢܵܐ ܝܲܥܩܽܘܒ܃
00106_94	ܘܲܕܠܵܐ ܢܣܲܬܬܘܽܢ ܫܩܲܠ ܣܲܟܝܼܢܵܐ ܘܲܦܣܲܩ ܐܸܢܽܘܢ܀
00106_95	ܛܸܢܲܬ̤ ܪܽܘܚܵܐ ܕܲܢܒܝܼܽܘܬܵܐ ܗܵܝ ܕܸܐܼܠܝܵܐ܃
00106_96	ܒܪܽܘܚܵܐ ܕܫܽܘܩܪܵܐ ܗܵܝ ܕܲܢܒܝܼܸ̈ܐ ܕܕܲܓܵܠܘܽܬܵܐ܀
00106_97	ܘܲܕܬܸܛܪܽܘܕܝ ܗܼܘܵܬ ܗܵܝ ܩܲܕܝܼܫܬܵܐ ܠܲܡܣܲܝܲܒܬܵܐ܃
00106_98	ܠܲܡ̈ܫܲܡܫܵܢܸܝܗ݀ ܟܽܠܗܽܘܢ ܚܸܪܒܲܬ ܩܲܠܝܼܠܵܠܝܼܬ܀
00106_99	ܕܲܝܘܵܐ ܐܝܼܬ ܗܼܘܵܐ ܠܥܲܡܵܐ ܘܲܦܩܝܼܪ ܒܵܬܲܪ ܨ̈ܲܠܡܸܐ܃
00107_00	ܘܠܸܗ ܠܗܲܘ ܕܲܝܘܵܐ ܛܪܲܕ ܐܸܠܝܼܵܐ ܒܟܽܘܡܪܸ̈ܐ ܕܩܲܛܸܠ܀
00107_01	ܢܒܝܼܸ̈ܐ ܕܒܲܥܠܵܐ ܘܲܕܕܸܚ̈ܠܵܬܵܐ ܬܫܲܥܡܵܐܐ ܢܲܟܸܣ܃
00107_02	ܕܢܸܦܣܽܘܩ ܛܘܽܥܝܲܝ ܡܸܢ ܓܲܘ ܥܲܡܡܸ̈ܐ ܒܲܫܠ̈ܲܕܲܝܗܽܘܢ܀
00107_03	ܣܪܝܼ̈ܚܸܐ ܬܫܲܥ̈ܡܵܐܐ ܕܡܲܠܦܝܼܢ ܓܲܘܪܵܐ ܠܒܲܪܼܬ ܐܲܒܪܵܗܵܡ܃
00107_04	ܚܪܲܒ ܛܲܢܵܢܵܐ ܕܲܬܟܲܬܲܪܝ ܗܝܼ ܩܲܕܝܼܫܵܐܝܼܬ܀
00107_05	ܐܠ̈ܝܼܠܸܐ ܗܼܘܲܘ ܠܵܗ݀ ܠܟܲܠܬܵܐ ܘܓܵܪܲܬ̤ ܒܲܕܪܲܦܝܵܐ ܗܼܘܵܬ̤
00107_06	ܘܲܢܟܲܣ ܐܸܢܽܘܢ ܬܸܕܚܲܠܝ ܬܸܒܗܲܬܝ ܬܸܬܩܲܕܲܫܝ ܗܝܼ܀
00107_07	ܩܼܐܪܣܵܐ ܪܲܒܵܐ ܦܓܲܥ ܒܸܐܠܝܼܵܐ ܘܩܵܡ ܐܲܝܟ ܛܲܪܩܵܐ܃
00107_08	ܘܲܒܢܸܨܚ̈ܵܢܸܐ ܣܠܸܩ ܡܸܢ ܕܲܐܪܵܐ ܟܲܕ ܙܲܟܵܝܲܐ ܗܼܘ܀
00107_09	ܗܘܲܘ ܪܲܫ̈ܝܼܥܸܐ ܠܲܚܡܵܐ ܠܚܲܪܒܸܗ ܘܸܐܟܠܲܬ̤ ܐܸܢܽܘܢ܃
00107_10	ܥܲܠ ܕܸܐܟܲܠܘ ܗܼܘܲܘ ܠܲܚܡܵܗ݀ ܕܼܐܝܙܒܸܠ ܟܲܕ ܡܸܫܬܲܢܸܝܢ܀
00107_11	ܒܪܸܟܘ ܥܲܘ̈ܵܠܸܐ ܬܚܸܝܬ ܣܲܟܝܼܢܸܗ ܟܲܕ ܡܸܬܚܲܪܒܝܼܢ܃
00107_12	ܘܲܓܣܲܘ ܕܸܒܚܸ̈ܐ ܕܫܼ̈ܐܕܸܐ ܕܲܒܠܲܥܘ ܐܵܣܽܘܛܵܐܝܼܬ܀
00107_13	ܘܟܲܕ ܪܸܘܝܲܬ̤ ܗܼܘܵܬ̤ ܚܲܪܒܸܗ ܒܛܲܡܸ̈ܐܐ ܘܢܵܚ ܪܸܥܝܵܢܸܗ܃
00107_14	ܗܦܲܟ ܨܹܝܕ ܐܵܚܵܒ ܕܲܢܡܲܠܸܠ ܠܸܗ ܒܲܣܝܼܡܵܐܝܼܬ܀
00107_15	ܣܲܩ ܠܵܟ ܡܲܠܟܵܐ ܘܲܠܥܲܣ ܘܸܐܫܬܲܝ ܐܸܡܲܪ ܗܼܘܵܐ ܠܸܗ܃
00107_16	ܕܩܵܠܵܐ ܕܡܸܛܪܵܐ ܗܵܐ ܫܵܡܲܥ ܐܼܢܵܐ ܥܲܡܝܼܩܵܐܝܼܬ܀
00107_17	ܪܓܽܘܫܝܵܐ ܕܡܸܛܪܵܐ ܒܸܐܕܢܵܐ ܕܢܲܦܫܵܐ ܫܡܲܥ ܐܸܠܝܼܵܐ܃
00107_18	ܒܲܓܡܝܼܪܽܘܬܵܐ ܕܡܸܛܪܵܐ ܕܬܸܫܡܲܥܝ ܪܽܘܚܵܢܵܐܝܼܬ܀
00107_19	ܡܫܽܘܚܬܵܐ ܪܵܡܬܵܐ ܕܚܵܙܝܵܐ ܘܫܵܡܥܵܐ ܪܲܚ̈ܝܼܩܵܬܵܐ܃
00107_20	ܩܢܵܐ ܗܼܘܵܐ ܓܲܒܪܵܐ ܕܲܓܡܝܼܪܵܐ ܗܼܘܵܐ ܒܪܽܘܚܵܢܽܘܬܵܐ܀
00107_21	ܩܲܕܝܼܫܵܐ ܗܼܘܵܐ ܘܸܐܫܟܲܚ ܢܲܕܪܸܟ ܐܲܟܡܵܐ ܕܲܟܬܝܼܒ܃
00107_22	ܪܲܘܡܵܐ ܘܥܽܘܡܩܵܐ ܦܬܵܝܵܐ ܘܽܐܘܪܟܵܐ ܥܲܡ ܩܲܕܝܼ̈ܫܸܐ܀
00107_23	ܢܩܸܕ ܗܼܘܵܐ ܫܸܡܥܸܗ ܘܲܐܝܟ ܡܲܠܵܐܟܵܐ ܨܵܬ ܡܸܢ ܪܽܘܚܩܵܐ܃
00107_24	ܪܓܽܘܫܝܵܐ ܕܡܸܛܪܵܐ ܘܲܐܪܗܸܒ ܠܵܐܚܵܒ ܠܲܡܫܲܢܵܝܼܘ܀
00107_25	ܫܪܵܝܗܼܝ ܗܼܘܵܐ ܠܩܸܛܪܵܐ ܗܲܘ ܕܲܩܛܲܪ ܗܼܘܵܐ ܦܵܩܽܘܕܵܐܝܼܬ܃
00107_26	ܘܦܲܬܚܸܗ ܠܬܲܪܥܵܐ ܗܲܘ ܕܲܐܚܝܼܕ ܗܼܘܵܐ ܓܲܢܼܒܵܪܵܐܝܼܬ܀
00107_27	ܦܟܵܪܸ̈ܐ ܕܵܐܐܲܪ ܕܲܐܣܝܼܪܵܐ ܗܼܘܵܬ ܐܬܦܲܣܲܩܘ ܗܼܘܲܘ܃
00107_28	ܘܟܲܕ ܡܸܢ ܣܲܘ̈ܦܲܝ ܥܵܠܡܵܐ ܢܸܦܩܲܬ̤ ܬܸܐܬܸܐ ܐܲܪܓܸܫ܀
00107_29	ܥܢܵܢܵܐ ܕܵܠܲܬ ܠܗܲܠ ܡܸܢ ܥܸܒܪܸ̈ܝܗ݀ ܕܲܐܪܥܵܐ ܬܸܐܬܸܐ܃
00107_30	ܘܲܐܝܟ ܪܽܘܚܵܢܵܐ ܐܲܪܓܸܫ ܠܸܗ ܗܽܘ ܘܸܐܡܲܪ ܠܵܐܚܵܒ܀
00107_31	ܡܸܚܕܵܐ ܕܸܐܫܲܕ ܠܲܕܡܵܐ ܕܟܽܘܡܪܸ̈ܐ ܕܲܥ̈ܠܵܘܵܬܵܐ܃
00107_32	ܫܸܠܡܲܬ ܬܲܢܘܲܝ ܢܸܚܽܘܬ ܡܸܛܪܵܐ ܥܲܠ ܒܸܪ̈ܝܵܬܵܐ܂
00107_33	ܥܲܡ ܗܵܝ ܕܲܐܪܡܝܼ ܠܲܫܠ̈ܲܕܲܝܗܽܘܢ ܕܲܒ̈ܢܲܝ ܥܲܘܠܵܐ܃